ᐃᔑᒋᑫᐎᓇᓐ 24 - Ojibwe Kihcimasina'ikan

Kaakii'ishianaamimintc Pwaal

¹ Naanokiishik tahsh e'ani'-ishihsenik kihcianami'ewikimaa Aananaayahs (Ananias) eshinihkaasotc kiihpiishaa e'wiiciiwikotc aaninta kaaniikaanentaakosinitc Coowa', ini kaye peshik onaataamaaken Tartalahs (Tertullus) eishinihkaasonitc. Miitahsh kaakiih tashintamawaawaatc Piilikihsan kaatipentaminitc ahki, aaniin eshi anaamimaawaatc Pwaalan.

² Miitahsh Pwaal kaashi antomintc. Tartalahsan kiimaacii kakitowan e'mamishimikotc e'ihkitonitc: “Kiin kehci'-inentaakosiyan Piilikihs (Felix)! Kiin hsa ekakiihtaawi okimaahkantaakeyan aasha kinwesh kaaonci pisaanahkamikahk nintahkiinaanink, miihsh kaye kaanionci minohsehcikaatekin kekoonan kaamaanshihse'ikoyaank awahshime ciminohseyaank o'omaa nintahkiinaanink.

³ Misiwe tahsh niminwentaamin ono mooshak; kihci miikwetc tahsh kitikoo.

⁴ Kaawiin tahsh awahshime nintinentansii ciontaminamawinaan kitipa'ikan, miihsh eshi pakohseniminaan kaashi nihtaa minohcikeyan acina cipisintawiyaank kaawii'ikooyan.

⁵ Nikii'-mihkawaanaan hsa wa'a inini enihshiwanaatahkamikisitc, mii iitok wa'a kaapapaa ompwehkamikisitc misiwe ahkiink eshi ayaanitc Coowa'. Oniikaanishkawaa' kaye wehkwiinonitc Naasariiwininiwa' (Nazarene).

⁶ Wa'a tahsh kaye inini okiihkakwe wiinentaakohtoon kihcianami'ewikamik, intawaa tahsh ninkii'-otihtinaanaan. [Niinawint hsa ko niwiih tipaahkonaanaapan eshihsininik nintoonahshowewininaan.

⁷ Kihci shimaakanihshiiwikimaa tahsh Lihsiyahs (Lysias) ninkii'-moohkiihtaakonaan ekii manaacihcikehsik emahkamiyamintc Pwaalan,

⁸ Ekii'-inaahkoniketc i'i kaamamishimiwenitc o'omaa cipiishaanitc eshi ayaawatc.] Anta kihkenimatc tahsh kiin iko kika kihkentaan ehtepimankitc kahkina ono kaashi anaamimankitc,” kii'ihkito a'a onaatamaake.

⁹ Coowak tahsh kewiinawaa okii wiicihtoonaawaa i'iweni kaakii'ishi anaamimimintc, ekii'-ihkitowaatc kahkina ini ehtepwewaninikin.

Pwaal kiikaakiikitowinaatamaasotc eshiayaanitc Piilikihsan

¹⁰ Ahpii tahsh kaatipentaminitc i'i ahki kaawaahta'amaakotc cikiikitotc, Pwaal (Paul) kii'ishi nahkwehtam: “Ninkihkentaan aasha kinwesh tahsopipoon epi onaahkonatwaa o'omaa ahkiink wenci tipentaakosiwaatc. Wiinke tahsh niminwentam cikiikitoohtamaasoyaan.

¹¹ Kiin hsako kikawencimihkaan kaawiin awahshime mitaahshiniisho kiishik (12) kii'ishihsehsinoon kaakii'-ishaayaan Ceroosalamink (Jerusalem) ekii'awi anami'aayaan.

¹² Kaawiin ninkii'-mihkaakohsiik Coowak cikakwe shaakoosomimak awiya' piinci kihcianami'ewikamikonk, ci'ompwehkamikisiwak kaye eshi maamaawiayaaniwaninik. Kaawiin kaye anami'ewikamikohkaank, kaawiin kaye piko aanti ootenaank.

¹³ Kaawiin kaye oka kashkihtoohsiinaawaa ciwaapanta'ihkwaa ehtepimiwaatc i'i noonkom kaashi mamishimiwaatc.

¹⁴ O'owe tahsh wiin kiwiintamawin, niin e'anami'ehtawimak kaaoKishemanitoomiwaatc ninkehteya'aaminaapaniik ehpiminisha'amaan i'i ishaawin, Coowak kaaitamowaatc ehtepwewansininik. Nintepwehtaan tahsh kaye kahkina kekoon enahtenik Moosihs otoonahshowewin, i'i kaye masina'ikan kaashi oshipii'ikaatenikin otihkitowiniwaan kaakiih kanootamawaawaatc Kishemanitoon.

¹⁵ Miitahsh keniin peshkwan eshi tepweyenimak Kishemanitoo taapishkoo okoweniwak kaashi tepweyentamowaatc: cikiiwe pimaatisiwaatc okwayahkwaatisiik, iki kaye omaci'-ishiwepisiik kaanipowaatc.

¹⁶ Miitahsh mooshak kaaonci'-ishihcikeyaan, ekakwe kanawenintisoyaan kwayahk ci'ishinaakwahk kaashi naanaakatawentamaan enaahsamiitc Kishemanitoo, iki kaye pemaatisiwaatc.

¹⁷ Kinwesh tahsh tahsopipoon ekii'-ontentiyaan, Ceroosalamink (Jerusalem) ninkiihpishi kiiwe ekiih piitamawakwaa kaakitimaakisiwaatc miikiwaanan, kaye tahsh cipakitinaahsoyaan.

¹⁸ Mekwaa tahsh o'o e'ishihcikewak, mii 'i kaakii mihkawiwaatc kihcianami'ewikamikonk aasha ekiihkiishi'-ishihcikewak i'i ishihcikewin kaanihtaa ishihcikenk ke'onci pehkentaakosinaaniwank enaahsamiitc Kishemanitoo. Kaawiin ninkii'-wiiciiwikohsiik awiyak cipaahtiinowaatc, kaawiin kaye ninkii'-ompwehkamikisihsii.

¹⁹ Ayaawak tahsh aaninta Coowak Eshiya (Asia) ahkiink wenciwaatc o'omaa kewiinawaa kekii'-ayaawaahpan eshi ayaawatc cikii'-wiintamawihkwaapan kiishpin kekoon ayaanikwen eshi mamishimiwaatc.

²⁰ Komaash kaye okoweniwak ininiwak o'omaa kaa'ayaawaatc otaa wiintaanaawaa wekonen tino mamaanshiiwin kaa'ishihcikewak ahpii kii'inaahsamikaapawihtawimak otoonahshowe'.

²¹ Komaa tahsh kaye o'o ninkii'ishi mamaanshiinaatok peshik ihkitowin kaakii'ishi shaakoweyaan mekwaa weti e'niipawiyaan: ‘Ehtepwehtamaan nipowinink ci'onci kiiwe pimaatisinaaniwank, mii 'i kaaonci tipaahkoniyek noonkom kaakiishikahk o'o e'inaahsamikaapawihtawinakook,’ ” Pwaal kii'ihkito.

²² A'a tahsh Piilikihs (Felix) eshinihkaasotc, kaanakacikihkentank ishaawin kii'ihkito cipoonihcikaatenik i'i maawaci'itiwin. Miitahsh kaa'ihkitotc: “Ahpii Lihsiyahs (Lysias) kihci shimaakanihshiiwikimaa takohshink ninka onentaan aaniin ke'inaahkonikooyan,” kii'ihkito.

²³ Okii'-anoonaan tahsh shimaakanihshiiwikimaan kwayahk cikanawenimaanitc Pwaalan, pisaan kaye wa'ishihcikenitc ci'ishihcikenitc, pisaan kaye cipakitinaanitc i'i kaasaaki wiiciiwikonitc cipami'ikonitc.

²⁴ Naanaake tahsh e'ani'-ishihsenik, Piilikihs kiihpiishaa e'wiiciiwaatc wiiwan Carohsila (Drusilla) kaaishinihkaasonitc, ehCoowihkwewinitc. Miitahsh kaakii'-antomaatc Pwaalan cinaasihkawimintc. Okiih pisintawaan tahsh ehtashintaminitc eshi tepweyenimimintc Christ Ciisahsoon.

²⁵ Okiih tashintamini kwayahkwaatisiwin, kwayahko tipenimitisowin, i'i kaye piciinak kaawiih tipaahkonikewi kiishikaninik. Piilikihs tahsh kiihsekisi ekii'-ihkitotc: “Mii 'i teminihk! Animaacaan. Ahpii na'ihseyaan miinawaa kika'-antomin,” okii'inaan.

²⁶ Kiihtako pakohsenimo shooniyaan cikiimooci miinikotc. Pwaalan Miitahsh i'i wawiipa kaakii'onci nihtaa naacinisha'waatc, ekiinihtaa kakanoonaatc kaye.

²⁷ Ahpii tahsh niisho pipoon e'ishihsenik Piilikihs okii'-naapishkaakoon ini Pwaarhshiyahs Pestahs (Porcius Festus) eshinihkaasonitc. Ciminwaapamikotc tahsh Coowa' Piilikihs kaawiin okiih papaamenimaahsiin Pwaalan etahkonimintc.