ᐃᔑᒋᑫᐎᓇᓐ 16 - Ojibwe Kihcimasina'ikan

Timahti kiimaaciiwiiciiwaatc Pwaalan, Saailahsan kaye

¹ Pwaal (Paul) hsa kiihpitakohshin i'imaa eshi ootenaawaninik Tarpi (Derbe), Listara (Lystra) kaye kaaicikaatenikin. Kii'ayaawan itahsh i'imaa peshik otepwehtamoon Timahti (Timothy) eshinihkaasonitc. Omaamaani hsa Coo kiihtinowihkwewiwan, oteteni tahsh wiin Kariihk (Greek) kiihtinowiwan.

² Kahkina hsa otepwehtamook eyaawaatc i'imaa Listara ootenaank, Aaihkooniyam (Iconium) ootenaank kaye okii'-mino tashimaawaan Timahtiin.

³ Miiwan tahsh ini Pwaal kaakii'-antawenimaatc ciwiiciiwikotc, miihsh kaakiih kihkinawaatashakeshwaatc. Miitahsh kaakii'onci tootawaatc aaniihsh kahkina Coowa' i'imaa kaakii'-ayaanitc okii kihkentamini Timahtiin oteteni Kariihk ekiih tinowinitc.

⁴ Kii'ani ayishaawak itahsh eshi waootenaawaninik, ekii'-wiintamaakewaatc aaniin kaakii'ishi onentaminitc ishinisha'waakana' ke'ishihcikenaawiwaninik, kaaniikaanisinitc kaye Ceroosalamink (Jerusalem) kaa'ayaanitc. Miitahsh kaakii'-inaawaatc cikanawentaminitc ini inaahkonikewinan.

⁵ Otepwehtamook tahsh entashi maamaawaci'itiwaatc awahshime kii'ani mashkawi tepwehtamook, kii'ani paahtiinowak kaye entahsokiishik.

Pwaal kii'ishinank ci'ishaatc Caroowahsink

⁶ Misiwe tahsh kii'ishaawak i'imaa Pariciya (Phrygia) ahkiink, i'imaa kaye Kalehshiya (Galatia) ahkiink. Kaawiin tahsh okiih pakitinikohsiiwaan Kishemanitoon otAhcaahkoni citashintamowaatc kaaTipencikenitc otihkitowinini Eshiya (Asia) kihci ahkiink.

⁷ Ahpii tahsh kaamayaashkamowaatc Mihshiya (Mysia) ahkiink kiihkakwe ishaawak Pihtiniya (Bithynia) ahkiink. Kaawiin tahsh okiih pakitinikohsiiwaan Ciisahsoon otAhcaahkoni i'imaa ci'ishaawaatc.

⁸ Okiih shaaposhkaanaawaa tahsh Mihshiya ahki, weti tahsh kii'ishi takohshinook Caroowahs (Troas) ootenaank.

⁹ Ahpii tahsh ehtipihkaninik Pwaal okii'-waapantaan ishinamowin. Okii'-waapamaan ininiwan ematwe niipawinitc Maahsitooniya (Macedonia) ahkiink ehpakohsenimikotc o'o ekii'-matweikotc iinsan: “Piishaan cipi yaashawishkaayan ciwiici'iyaank,” okii'ikoon.

¹⁰ Ahpii tahsh kaawaapantank i'i ishinamowin shemaak iko ninkii'-oshiihtaamin ewii'-ishaayaank Maahsitooniyaa ahkiink. Ninkiih kecinaa'omin tahsh Kishemanitoo weti ekii'ishi antomiyamintc ciwiintamawimankitc minwaacimowin weti eyaanitc.

Aaniin Litiya kaa'ishikwehkaatisitc

¹¹ Caroowahs (Troas) ootenaank tahsh ninkii'-onci maaciiyaahshimin tiwehk iko Saamohtaarehs (Samothrace) minihsink ekii'ishi pakamaahshiyaank. E'ani waapank itahsh Niyaahpolihs (Neapolis) ootenaank ninkii'-inaahshimin.

¹² Miitahsh weti kaa'onci kohpiiyaank ekii'-ishaayaank ootenaank Pilipaai (Philippi) eshinihkaatek. I'i hsa ootena kiiniikaanentaakwan kii'onci tipentaakwan Maahsitooniyaa ahkiink, Oroomink (Rome) kaa'onciiwaatc okii'-oshihtoonaawaakopan. Paahtiino kiishik tahsh i'imaa ninkii'-ayaamin.

¹³ Ahpii tahsh e'Anwepiiwi kiishikahk ninkii'-ishaamin akwaciink kaashi ishkwaantemiwank ootena, eshi siipiiwank inahke ekii'-ishaayaank, ekii'-inentamaank kehcinaac maawiin cimihkamaank Coowak entashi anami'aawaatc. Ninkii'-onapimin tahsh ekiih kakanoonankitwaa ihkwewak i'imaa kaakii maawaci'itiwaatc.

¹⁴ Peshik tahsh ihkwe kaakiih pisintawiyamintc Litiya (Lydia) kii'ishinihkaaso, Tayahtaira (Thyatira) ootenaank ekii'-onciitc. Mii hsa kaa'inanohkiitc e'ataawaaketc mahkatemiskwekinoni, kaa'anami'ehtawaatc Kishemanitoon hsa kiihtinowi. Miitahsh kaakii'-miinikoowisitc cinihsitohtank, citepwehtank kaye kahkina Pwaalan kaakii'-ihkitonitc.

¹⁵ Ahpii tahsh kaahsiika'antaasotc, i'i kaye otaawinink eyaanitc, ninkiih kakaansomikonaan ekii'-ishiyanmintc: “Kiishpin enakimiwekwen kwayahk ehtepweyenimak kaaTipenciketc, piintikek nintaawinink, ciwiici'-ayaamiyek,” ninkii'ikonaan. Ninkii kashkimikonaan itahsh ci'ishaawankitc.

Pwaal, Saailahs kaye kiikipa'ontwaa i'imaa Pilipaai ootenaank

¹⁶ Aapitink tahsh ehkiishikahk e'ishaayaank entashanami'aaniwank, ninkii'-mekwaashkawaanaan oshkiniikihkwe kaapamiihtaaketc ekikishkaakotc maciahcaahkwan, ekii'-inishkaakotc cikashkihtootc ciwiintank niiyaak keni'-ishihsenik. Niipiwa' kii'onci shooniyaahkewa' otookimaama' a'a oshkiniikihkwe ekiih kashkihtootc ciniikaaniwiintank aaniin kekoon keni'-ishihsenik.

¹⁷ Mii 'awe kaakiih piminisha'waatc Pwaalan (Paul) e'wiiciiwimankitc o'o ekii'ishi shaahshaakowetc: “Miiwak hsa oko ininiwak kaa'anohkiihtawaawaatc Maawac Eshpentaakosinitc Kishemanitoon, kewiintamawinekwaa aaniin inahke keshi pimaaci'ikoowisiyek!” ekii'-ihkitotc.

¹⁸ Paahtiino kiishik tahsh o'o kii'ishihcikewan. Kekahpii tahsh Pwaal okii'-mikoshkaatentamo'ikoon, miihsh kaakiih kwehkikaapawihtawaatc ekii'inaatc ini maciahcaahkwan kaakikishkawaanitc oshkiniikihkwewan: “Ciisahs Christ owiinsowinink kitishi kanoonin cinakanatc a'a ihkwe,” okii'inaan. Shemaak itahsh okii'-nakanaani.

¹⁹ Ahpii tahsh oshkiniikihkwe otookimaama' ekihkentaminitc e'wanihtoonitc kaashi'-ahpenimonotaakotc kaanihtaa onci shooniyaahkenihpan, okii'-otihtinaani Pwaalan, Saailahsan kaye. Okii'ishi waawiihkopinaani tahsh i'imaa kaaishi nihtaa tanataawenk mekwe ootenaank eshi ayaanitc otoonahshowe'.

²⁰ Okiih piinaani tahsh eshi ayaanitc onahshowewikimaan Oroomink (Rome) kaaonci tipentaakosinitc o'o ekii'inaanitc: “Oko hsa ininiwak kaaCoowiwiwaatc wawaanentamihcikewak kitootenaaminaanink,

²¹ ekihkino'amaakewaatc ishihtwaawinan ci'otaahpinamowank citako ishihcikewank itahsh. Kaawiin kiinawint iitok kitaa otaahpinamowaahsiimin ehkitowaatc aaniihsh Oroomink kitoonci tipentaakosimin,” kii'ihkitowa'.

²² Ikiweniwak tahsh kaakii'-maamawi ayaawaatc i'imaa kiihtakwiiwak emiikaanimintc Pwaalan, Saailahsan kaye. Onahshowewikimaak kii'anoohkiiwak cikiihcikonayepicikaniwinitc cipahpahshanshe'omintc, cipapahkihte'omintc kaye.

²³ Kaa'⁠ishkwaa kihci pahpahshanshe'waawaatc itahsh okiihpiinci wepinaawaa' kipa'otiiwikamikonk. Kanawencikewi shimaakanihsh tahsh kii'anoonaa ciyaayiici kipa'waatc cikashki'ohsinik.

²⁴ Ahpii tahsh a'a kanawencikewi shimaakanihsh i'i kaa'ishi anoonintc okiih piintike wepinaa' maawac anaamink kipa'otiiwikamikonk, ositiniink kaye ekii'ishi kihciwaahkwa'waatc.

²⁵ Ninkoci ko e'ani aapihtaatipihkaninik Pwaal, Saailahs kaye kii'anami'aawak, ekii'-anami'e nikamoohtawaawaatc kaye Kishemanitoon. Kotak tahkonikana' okiih pisintaakowaa'.

²⁶ Miitahsh i'i kwetahto kaakii'kihci koshkohsek ahki. Kiiwahkawihse kaye kaakii'ishi patahkitek kipa'otiiwikamik. Ishishemaak tahsh kahkina kipa'otiiwi'-ishkwaanteman kiihpaahkihsewan, kahkina kaye omamaancikwahpisowiniwaan kiipahkihseniwan.

²⁷ Kanawencikewi shimaakanihsh tahsh ekoshkohsetc ekii'-waapantank ishkwaanteman epaahkihsininikin, kii'inentam tahkonikana' ekii'-maaciipa'iwenitc. Miitahsh kaakiih kicipitootc opashipa'ikewihkomaan ewii'-nihsitisotc.

²⁸ Pwaal tahsh okiih shaakowaanaan: “Keko kekoon tootaasohken! Kahkina ohsha 'omaa nintayaamin,” okii'inaan.

²⁹ Kii'anoohkiiwan tahsh cipiicikaatenikin waahsahkonencikanan, miihsh kaakiih piintikepahtoonitc ekii'-animihkohtaanitc eshi ayaawaatc Pwaal, Saailahs kaye, ekii'-nininkishkaanitc ehpiihcisekisinitc.

³⁰ Okiih saakisi'ikowaan tahsh ekii'ikowaatc: “Aaniin keishihcikeyaan cipimaaci'ikoyaan?” okii'ikowaan.

³¹ O'o tahsh okii'ishi nahkwehtawaawaan: “Tepweyenim kaaTipenciketc Ciisahs, miitahsh i'i cipimaaci'ikooyan, iki kaye kitaawinink eyaawaatc,” okii'inaan.

³² Okiih kakanoonaawaan tahsh ekii'-wiintamawaawaatc otihkitowinini kaaTipencikenitc, i'i kaye kahkina i'imaa eyaanitc otaawininiink.

³³ Shemaak tahsh iko i'i ahpii etipihkaninik kanakwencikewi shimaakanihshan okii'-ishiwinikowaan ekiih kisiihsipatoonitc kaakii'ishi ayenakanaasowaatc. Shemaak tahsh kaye kiihsiika'antaasowan, ini kaye kahkina otaawininiink eyaanitc.

³⁴ Okii'-ishiwinikowaan tahsh eshitaanitc ekiih piintikanikowaatc ekii'-ahtamaakowaatc kemiiciwaatc. Wiinke kiikihci minwentamoon kahkina ko entahshinitc aaniihsh okiih tepweyenimaani Kishemanitoon.

³⁵ E'ani waapaninik tahsh onahshowewikimaak okii'-ishinisha'waa' aanihkewikimaa' ci'awi kanoonaanitc kanawencikewi shimaakanihshan: “Mii 'i ishipakitin iki ininiwak,” ci'inaanitc.

³⁶ Kanawencikewi shimaakanihsh tahsh okii'-wiintamawaan Pwaalan ekii'inaatc: “Onahshowewikimaak kiihpi'-ihkitowak pisaan cipakitinikooyan, a'a kaye Saailahs. Saaka'amok tahsh weweni cini maacaayek,” kii'ihkitowan.

³⁷ Pwaal o'o okii'inaa' aanihkewikimaa': “Wiinke hsa mohsheya'ii ninkiih pahpahshanshe'okonaanik, kaawiin kanake ninkiih tipaahkonikohsiinaanik, Oroomink (Rome) tahsh e'onci tipentaakosiwankitc. Kaawiin i'i nintinentansii ci'ishihsekipan. Wiinawaa hsa piko ninka pinaasihkaakonaanik cisaakici wiiciiwiyamintwaa,” okii'inaa'.

³⁸ Anihkewikimaak tahsh okii'awi wiintamawaawaa' onahshowewikimaa' aaniin Pwaalan kaa'ihkitonitc. Wiinke tahsh kiihsekisiwa' ahpii enoontaminitc Oroomink ekii'onci tipentaakosinitc Pwaalan ini kaye Saailahsan.

³⁹ Kiihpiishaawa' itahsh ekiihpi kakwe waankawi'ikowaatc pehkihsh ekiihpi saakisi'ikowaatc kaye. Miihsh kaakiih kanoonikowaatc ninkoci 'imaa ootenaank ci'onci'-ishaawaatc.

⁴⁰ Kipa'otiiwikamikonk tahsh kaa'ishkwaa onci saaka'amowaatc, kii'ishaawak Litiyawan (Lydia) owaahkaa'ikaniniink. Miihsh weti kaa'ishi waapamaawaatc otepwehtamoo' ekiih kanoonaawaatc cimashkawentaminitc. Miihsh kaa'ani'ishimaacaawaatc.