ᐃᔑᒋᑫᐎᓇᓐ 15 - Ojibwe Kihcimasina'ikan

Kiikihcimaawaci'itink Ceroosalamink

¹ Aaninta tahsh ininwak kiihtakohshinook i'imaa Entiyaahk (Antioch) ekiihpi onciiwaatc Cootiiyahkaank (Judea). Miiwak itahsh iki kaakiih kihkino'amawaawaatc otepwehtamoo' ekii'-ihkitowaatc: “Kihkinawaatashakeshokooyek ehta kika pimaaci'ikoowisim ishihcikeyek kaainahtenik Moosihs (Moses) otoonahshowewin.”

² Mii hsa 'i Pwaal (Paul) a'a tahsh kaye Paarnapahs (Barnabas) kaakiikihci kakanoonaawaatc kaye tahsh ekiikihci tashintamowaatc o'oweni. Miitahsh kaakii'-inentamonaaniwaninik Pwaal a'a kaye Paarnapahs, i'i kaye kotak otepwehtamoo' ci'ishaawaatc Ceroosalamink (Jerusalem). Ekii'inintwaa ci'anta waapamaawaatc Ishinisha'waakana', i'i kaye kaaniikaanisinitc o'oweni onci kaakiih tashintamowaatc.

³ Miitahsh kaakii'-maacinisha'okowaatc otepwehtamoo', ekii'ani shaaposhkaawaatc Piniihshiya (Phoenicia) ahki, i'i kaye Sameriya (Samaria). Ekiih tipaacimowaatc aaniin kaaCoowiwihsinik kaa'ishi kwehkiinotawaanitc Kishemanitoon. Wiinke tahsh kiikihci ciihkentamoo' otepwehtamoo' enoontaminitc o'o.

⁴ Ahpii tahsh tekohshinowaatc Ceroosalamink (Jerusalem), okiih piintikanikowaa' otepwehtamoo', Ishinisha'waakana' kaye, iniweniwa' kaye kaaniikaanisinitc, ekii'-wiintamawaawaatc aaniin kahkina kaa'ishihcikenitc Kishemanitoon wiinawaa onci.

⁵ Kii'ayaawak itahsh i'imaa aaninta otepwehtamook Perasiink (Pharisee) kaakii'ishi wiicihtwaawaatc. Miiwak itahsh oko kaakiih pasikwiiwaatc ekii'-ihkitowaatc: “Oncitako ishinaakwanini cikihkinawaatashakeshontwaa, ciayaankwaamimintwaa kaye cipiminisha'amowaatc kaye Moosihsoon kaakii'-inahshowenitc.”

⁶ Miitahsh Ishinisha'waakanak, iki kaye kaaniikaanisiwaatc kaakii'-maawaci'itiwaatc ewii'-naanaakatawentamowaatc o'oweni.

⁷ Kaa'ishkwaa kihci tashintenik itahsh o'o, Piitar (Peter) kiihpasikwii o'o ekii'-ihkitotc: “Niici otepwehtamook, kiinawaa iitok kikihkentaam mewisha Kishemanitoo ekii'onci onaapamitc eshi ayaawek. Niin ewiiaapaci'itc cionci noontaminitc minwaacimowin i'i kaaCoowiwihsinik, kaye tahsh citepwehtaminitc.

⁸ Kishemanitoo kehkentank ote'imaa okii'-ishinaakohtoon ekii'-otaahpinaatc ekii'-miinaatc ciotihsikonitc Kishemanitoon otAhcaahkoni taapishkoo kaakiih tootawinankitc.

⁹ Kaawiin pahkaan kitinenimikohsiinaan i'i kaye kaaCoowiwihsinik, awiya otepwehtamowinink e'onci pehkihcikaniwitc omacitootamowinink onci.

¹⁰ Wekonen itahsh wenci'-ishihcikeyek ehkakweci'ek Kishemanitoo ehtootawekwaa otepwehtamook ci'ishihcikewaatc senakaninikin. Kaawiin iitok kikehteya'aaminaapaniik, kekiinawint itahsh kikashkihtoohsiimin i'i ci'ishihcikeyank.

¹¹ Kiinawint itahsh kitepwehtaamin e'onci pimaaci'ikooyank okishewaatisiwinink onci kaaTipenciketc Ciisahs taapishkoo kewiinawaa kaashi pimaaci'ikoowisiwaatc.”

¹² Kahkina tahsh kaakii'-maamawi ayaawaatc i'imaa kaawiin kii'noontaatihsiwak ekiih pisintawaawaatc Paarnapahsan, Pwaalan kaye ehtashintaminitc aaniin kaa'ishi maamahkaacihcikenitc, aaniin kaye kaa'ishi kihkinawaacihcikenitc Kishemanitoon mekweya'ii eshi ayaanitc kaaCoowiwihsinik.

¹³ Ahpii kaa'ishkwaa kakitonitc, Ciimis (James) kewiin o'o kii'ihkito: “Niici otepwehtamook, taka pisintawihshik.

¹⁴ Saaiman (Simon) iitok weweni okiih tashintaan aaniin maawac iko nihtam Kishemanitoo kaa'ishi shawenimaatc kaaCoowiwihsinik ekii'-otaahpinaanitc wiin iko ewiih tipinawewisitc owiinsowinink onci.

¹⁵ Miiwan itahsh ono mayaa ihkitowinan peshikwan inahke kaainentamowaatc Kishemanitoon kenootamawaawaatc o'o e'ishipii'ikaatek:

¹⁶ ‘Ani'ishkwaahsekin ihsa ini, mii 'i cipikiiweyaan. Ninka kiiweoshihtaawaan kaye Tepit (David) okihcianami'ewikamik kaakiih kawihsenikipan. Ninka kiiwe patahkihtoonan kaye kaapiikoshkaakin, ewii naapahtooyaan.

¹⁷ Miitahsh kotak kahkina pemaatisiwaatc cinanaantone'waawaatc kaaTipencikenitc, iki kaye kaaCoowiwihsikwaa kaakii'-antomakwaa niwiinsowinink ewiih tipinawewisiyaan.

¹⁸ Mii 'i ehkitotc kaaTipenciketc, kaakihkenimintc mewisha ekiih pionci oshihtootc ono kahkina kekoon.’ ”

¹⁹ Ciimis (James) kii'ani'-ihkito: “Aasha ninkiih kiishentam awahshime cimikoshkaaciaahsiwankwaapan iki kaaCoowiwihsikwaa kaakwehkiinotawaawaatc Kishemanitoon.

²⁰ Meskwac itahsh cioshipii'amawintwaa ciwiintamawintwaa cipapaamentansikwaa kekoonan kaaonci wiinentaakwaninikin manitoohkaanink, pishikwaatisiwinink itahsh. Cipapaamentansikwaa kaye miicim kepinewe nihcikaatenik, cipimentansikwaa kaye miskwiini.

²¹ Inashke Moosihs (Moses) otoonahshowewin mewisha pi'onci anamihcikaateni entahso Anwepiiwi kiishik Coowi anami'ewikamikohkaank. Otihkitowinan kaye tashincikaateniwan entahso ootenaahkaank.”

Kaakii'ishipii'amawintwaa Otepwehtamook kaaCoowiwihsikwaa

²² Miitahsh Ishinisha'waakanak, kaaniikaanisiwaatc kaye, iki kaye otepwehtamook kaakii'-maawaci'itiwaatc kii'maamawi'-inentamook cionci'-ishinisha'waawaatc ininiwa' eshi ayaawaatc. Miiwa' itahsh o'o niishin kaaniikaanisinitc kaakii'-onenimaawaatc, Cootahs (Judas) Paarsapas (Barsabas) kaakii'-inimintc, ini kaye Saailahsan (Silas) ciani wiiciiwaanitc Pwaalan (Paul), Paarnapahsan (Barnabas) kaye ishaanitc weti Entiyaahk (Antioch) ootenaank

²³ Ekii'-miinaawaatc cimaaciitonitc oshipii'ikan o'o eshipii'ikaatenik: “Niinawint otepwehtamook, Ishinisha'waakanak, kaaniikaanisiwaatc kaye, kitooshipii'amaakoom kiinawaa otepwehtamook kaaCoowiwihsiwek wenciiyek Entiyaahk, Siiriya (Syria) ahkiink, Silihshiya (Cilicia) kaye. Pooshoo kitikoom.

²⁴ Ninoontaamin aaninta awiyak emikoskaasominekwaa wenci mikoshkaatentamek o'omaa tahsh iinsan e'onciiwaatc kaashi ayaayaank. Kaawiin niinawint ninkii'-ishinisha'waahsiwaanaanik.

²⁵ Ninkii'-maamawi inentaamin tahsh ci'onaapamankitwaa ininiwak kepianta waapaminekwaa cipi wiiciiwaawaatc Pwaalan, Paarnapahsan kaye kaasaaki'imankitc.

²⁶ Miiwak ihsa oko kaapi naniisaanihtoowaatc opimaatisiwiniwaan otishinihkaasowininiink onci kaaTipencikenitc Ciisahsoon Christan.

²⁷ Miitahsh kaaonci'-ishinisha'wankitc Cootahs a'a kaye Saailahsan, wiinawaa piko otooniwaank cionci wiintamawinekwaa peshikwan e'ihkitoyaank.

²⁸ Miitahsh o'oweni Kishemanitoo otAhcaahkwan kaaminwaapantank, miihsh peshikwan keniinawint enentamaank onsaam paashitc ci'ishihcikehsiwek, ini hsa ehta entawentaakwahkin.

²⁹ Cipapaamentansiwek miicim kaapakitinamawintwaa manitoohkaanak, i'i kaye miicim kaakipinewe nihcikaatek, cinoocihtohsiwek kaye pihshikwaatisiwin. Kiishpin itahsh ishihcikeyek kaaikooyek, aahpici kikakihci minohcikem. Pooshoo kitikoom,” mii 'i kaa'⁠ishipii'ikaatek i'i oshipii'ikan.

³⁰ Miitahsh kaakii'-maacinisha'ontwaa iki pemiwitoowaatc oshipii'ikan ci‑ishaawaatc weti Entiyaahk (Antioch). Ahpi tahsh tekohshinowaatc weti okii'-antomaawaa' otepwehtamoo' cimaawaci'itinitc. Miihsh kaakii'-miinaawaatc i'i oshipii'ikan.

³¹ Ahpii hsa tahsh kaa'‑anamihtoonitc i'i oshipii'ikan, wiinke kii'onci minwentamoo' ekii'-noontaminitc i'i minwaacimowin.

³² A'a hsa Cootahs (Judas) a'a tahsh kaye Saailahsan (Silas), kewiinawaa kiihtinowiwak kenootamawaawaatc Kishemanitoon. Niipiwa' kii'ayihkitowak keonci mashkawentaminitc, cimashkawi tepwehtaminitc kaye otepwehtamoo'.

³³ Kinweshiihsh itahsh iko 'imaa kii'ayaawak, miihsh kaakii'-nakanaawaatc otepwehtamoo' ekii'-ishaawaatc cianta waapamaawaatc kaakiih piicinisha'okowaahpan. Otepwehtamoo' itahsh okii'ikowaa' cianimino pimiayaawaatc.

³⁴ [Saailahs iitok kii'antawentamokopan i'imaa cikii'-ayaahpan.]

³⁵ Pwaal hsa wiin a'a kaye Paarnapahs kii'⁠ayaawak i'imaa Entiyaank i'i kaye kotak kaapaahtiinonitc otepwehtamoo'. Kiikihkino'amaakewak, ekiih tashintamowaatc kaye kaaTipencikenitc otihkitowinini.

Pwaal, Paarnapahs kiipahkewinitiwaatc

³⁶ Naanaake tahsh e'ani'-ishihsek Pwaal (Paul) okii'inaan Paarnapahsan (Barnabas): “Taka kiiwe ishaataa kahkina ootenawan kaakiih pitashi kakiihkwaanotamowank kaaTipenciketc otihkitowin cimawatihsankwaa kahkina otepwehtamook cikihkenimankwaa aaniin eshihsewaakwen,” okii'inaan.

³⁷ Paarnapahs tahsh kii'ishi antawentam ciwiiciiwikowaatc Cwaan Maarhk (John Mark) kaainimintc.

³⁸ Pwaal tahsh wiin kaawiin i'i kii'inentansii cikii'-wiiciiwikowaahpan aaniihsh okii'-noontenakanikowaakopan weti Paampiliya (Pamphylia) ahkiink kaawiin okii'-wiici'ikohsiiwaan enanohkiiwaatc.

³⁹ Kaa'ahpiihci kihci kakanoonitiwaatc tahsh mii 'i kaakii pahkewinitiwaatc. Paarnapahs okii'-otaahpinaan Maarhkan ciwiiciiwikotc, miihsh kaakii'-ishaawaatc minihsink Saaiparahs (Cyprus) ciimaanink ekii'onci'-inaahshiwaatc.

⁴⁰ Pwaal tahsh wiin Saailahsan okii'-otaahpinaan ciwiiciiwikotc. Miihsh kaa'ishi maacaawaatc otepwehtamoo' ekii'-ikowaatc e'ishi pakitinikowaatc eshi kishewaatisinitc kaaTipencikenitc.

⁴¹ Okii'ani shaaposhkaan itahsh Siiriya (Syria) ahkiini, i'i kaye Silihshiya (Cilicia) ahkiini, ekii'-mashkawentamo'aatc otepwehtamoo' entashi maawaci'itinitc.