ᐃᔑᒋᑫᐎᓇᓐ 12 - Ojibwe Kihcimasina'ikan

Keyaapi kiikakwaataki'intwaa Otepwehtamook

¹ Miitahsh o'o ahpii Herat (Herod) kihciokimaa kaakii maacii kakwaataki'aatc aaninta otepwehtamoo'.

² Kii'anoohkii tahsh pashipa'ikewihkomaanink ci'onci nihsimintc Ciimisan (James) kaakii'-wiicihkiwemikonitc Cwaanan (John).

³ Ahpii tahsh ewaapantank Coowa' eminwentaminitc, kii'anoohkii Piitaroon (Peter) ci'otaahpinimintc. Mii 'i ahpii kiimayaahsek ewiihkwantiiwahkamikisinitc Coowa' e'amwaanitc pahkweshikanan kaaompisikaniwihsinik.

⁴ Ahpii tahsh kaakaahcitinaatc okiih kipa'waan. Okii'ishi pakitinaan tahsh cishi kanawencikaniwinitc niiwayek eshi neniiwinitc shimaakanihsha'. Herat kii'inentam mohshe citipaahkonimintc kahkina awiya' ciwaapamikonitc ishkwaa Pimaaci'ikoowi Wiihkwantiwintc.

⁵ Piitar tahsh kiihkanawenimaa kipa'otiiwikamikonk. Otepwehtamoo' tahsh weweni kiikihci anami'aawa' ekiih kakwecimaanitc Kishemanitoon cipakitinikaasotc.

Piitar kiipakitinintc kipa'otiiwikamikonk onci

⁶ Ehtipihkaninik tahsh, mii 'i waapaninik Heratan (Herod) citipaahkonikotc, Piitar (Peter) kiinipaa nahsawaya'ii niishin shimaakanihsha'. Niishin tahsh piiwaapihkweyaapiin kiiaapataniniwan emamaancikwahpisotc. Kanawencikewishimaakanihsha' kaye kii'ayaawa' eshi'-ishkwaantemiwaninik kipa'otiiwikamik.

⁷ Kwetahto tahsh okii'-naakosiihtaakoon otencalimini kaaTipencikenitc, kipa'otiiwikamik tahsh kii'waahseyaani. Okiih toohkiwepinikoon tahsh ohpimenaw ekii'-amaciwepinikotc e'ikotc: “Weyiip wanishkaan.” Piiwaapihkweyaapiin itahsh onihkink kii'onci pankihsininiwan.

⁸ Miihsh encalan kaa'ani'ikotc: “Kihkinciciihpinintison, pihtahkisinen itahsh kaye. Pihsihkan kikashkiikiiwin, piminisha'ohshin itahsh,” okii'ikoon. Miitahsh iko Piitar kaa'ishihciketc.

⁹ Piitar tahsh okiih saakiciwiiciiwaan ekiih piminisha'waatc. Kaawiin tepwe okii kihkentansiin i'i ekii'-ishihsenik. Nimihci'-ishinam kii'inentam.

¹⁰ Okii'ani mayaashkaanaawaa tahsh i'i nihtam eshi ayaanitc okanawencike', i'i tahsh kaye kotak eshi ayaanitc okanawencike', piinihsh weti eshi ayaanik piiwaapihko ishkwaantem wenci saakiciayaanik inahke kii'ishaank ootenaank. Eshkwaat tahsh iko kiihpaahkihseni, miihsh kaa'ishi shaaposhkaawaatc. E'ani pimohsewaatc itahsh miihkanaani, kwetahto okii'-nakanikoon ini encalan.

¹¹ Miihsh Piitar kaakii'-waapaahkamentank o'o ekii'-ihkitotc: “Miitahsh tepwe ekihkentamaan kaaTipenciketc ekiih piicinisha'waatc otencaliman cinaatamawimitc okashki'ewisiwininiink Heratan (Herod) onci, i'i kaye kahkina Coowa' eshi pakohsentaminitc.”

¹² Ahpii tahsh kaanihsitawentank kii'ishaa owaahkaa'ikaniniink Meriin (Mary), Cwaan (John) omaamaan, Maarhk (Mark) kaakii'-inimintc. Miihsa 'imaa niipiwa' awiya' kaahtashi maawaci'itinitc e'anami'aanitc.

¹³ Ahpii tahsh eotihtank akwaciink kaashi'-ishkwaantemiwaninik menikan okiih paahpaawa'aan. Oshkiniikihkwewan tahsh Oroota (Rhoda) eshinihkaasonitc kiihpiianta kihkencikewan awenenan kaapaahpaawa'ikenitc.

¹⁴ Ahpii tahsh Oroota enihsitohtawaatc Piitaran eyaawinitc, kaa'ahpiihci minwentank tahsh, kaawiin okiih paahkinamawaahsiin. Kiihkiiwe piintikepahtoo ekiih tipaacimotc Piitar eniipawinitc akwaciink.

¹⁵ O'o tahsh okii'ikoo': “Anihsha iitok i'i kaaihkitoyan, kikiiwashkwe maawiin!” okii'ikoo'. Aanciko tahsh okiihkakwe tepimaa' ehtepwetc i'i kaa ihkitotc. Miitahsh aanciko kaa'ikotc: “Otencaliman maawiin ini,” okii'ikoo'.

¹⁶ Piitar aanciko kiihpaahpaawa'ike. Ahpii tahsh kaahpaahkintenamawintc ewaapamintc itahsh wiinke kiimaamahkaatentamoo'.

¹⁷ Kii'ishinihkehtaa tahsh cimanaa noontaatinitc. Miitahsh kaakii'-wiintamawaatc aaniin kaa'ishi saakisi'ikotc kaaTipencikenitc i'imaa kipa'otiiwikamikonk. Miihsh kaa'inaatc: “Wiintamawihk o'o Ciimis iki kaye kotak otepwehtamook.” Miitahsh kaa'ani'-ishi maacaatc pahkaan inkoci ekii'-ishaatc.

¹⁸ E'ani kishepaawakaninik tahsh etatawe kii'ocaanimahkamikisiwak shimaakanihshak. Kaanaka tipi ayaakwen Piitar ekii'-inentamowaatc.

¹⁹ Herat tahsh okii'-nanaantone'waan, kaawiin tahsh okii mihkawaahsiin. Weweni hsa okii'anta kihkenimaa' kaakiih kanawenimaanitc. Miitahsh kaakii'-anoohkiitc cinihsimintc. Herat tahsh Cootiiyahkiink kii'onci maacaa weti Sehsariiya (Caesarea) ekii'awi ayayaatc acina.

Ehtipaacimintc Herat aaniin kaakii'ishinipotc

²⁰ Herat (Herod) tahsh kaawiin okii'-minwaapamaahsii' pemaatisinitc eyaanitc Tayar (Tyre) ootenaank, Saaitan (Sidon) ootenaank kaye. Miihsh kaakiih pianta waapamikotc. Pinamaa hsa okiih shaakoosomaani Palaastahs (Blastus) eshinihkaasonitc kaakii'-naakacihtoonitc kihciokimaawikamik cikanoocikehtamaakonitc. Miihsh Herat kaakiih pi'anta waapamikotc ekiih kakwecimikotc pisaan ciwiiciiwaatc aaniihsh mii weti kaa'ontinamowaatc miicim otahkiiminiink.

²¹ Ahpii tahsh ehkiishikaninik kaakii'-onaapantenik, Herat okii pihsihkaanan okihciokimaa kikishkikanan ekii'-onapitc okihciokimaa wapiwinink. Miitahsh mohshe kaakiih kanoonaatc kaakiihpi naasihkaakotc.

²² Pemaatisinitc itahsh kiihshaakowewa' ekii'-ihkitonitc: “Manitoo hsa 'a kaainwetc, kaawiin ininiiwihsii,” kii'ihkitowa'.

²³ Shemak itahsh iko kaaTipencikenitc otencalimini okiih tootaakoon ciaahkositc, aaniihsh kaawiin okii'-miikwehciwenimaahsiin Kishemanitoon. Manicoosha' tahsh okii'-amokoo', miihsh piinihsh kaa'ishi nihsikotc.

²⁴ Kishemanitoo tahsh otihkitowin kii'ani misihteshkaani, niipiwa' ekii'ani tepwehtaminitc.

²⁵ Paarnapahs (Barnabas) tahsh, a'a kaye Swaal (Saul) Ceroosalamink kiihpi'onci kiiwewak ahpii kaahkiishihtoowaatc otanohkiiwiniwaa. Cwaan Maarhk (John Mark) tahsh kaainimintc okii'-maacii wiiciiwaawaan.