ᐃᔑᒋᑫᐎᓇᓐ 10 - Ojibwe Kihcimasina'ikan

Piitar kiiantawaapamaatc Kwaarniiliyahsan

¹ Kii'ayaa tahsh peshik inini Sehsariiya (Caesarea) ootenaank Kwaarniiliyahs (Cornelius) e'ishinihkaasotc. Kiishimaakanihshiiwikimaawi ninkotwaahk (100) shimaakanihsha' ekiih tipenimaatc. I'i hsa shimaakanihsha' Itali (Italy) kaakii'-onciinitc okii'-naanaakaci'aa'.

² A'a hsa inini kii'anami'ewaatisi, ekiih kohtaanenimaatc Kishemanitoon, kahkina kaye eyaanitc otaawinink. Niipiwa' hsa kii'ishihcike ekiiwiici'aatc ketimaakisinitc Coowa', mooshak kaye ekii'-anami'ehtawaatc Kishemanitoon.

³ Aapitink tahsh ehkiishikaninik ninkociko enihso tipa'ikaneyaanik e'ishkwaa naawahkwenik, okii'-waapantaan ishinamowin. Okii'-waapamaan encalan epipiintikaakotc Kishemanitoon ekiih piicinisha'okonitc o'o e'ikotc: “Kwaarniiliyahs!”

⁴ Wiinke tahsh kiisekisi ekiih kanawaapamaatc ekii'-ihkitotc: “Wekonen entawentaman nintookimaam?” kii'ishi sekihtaakosi. O'o tahsh okii'ikoon encalan: “Kishemanitoo ohsha kiminwaapamik i'i kaashi anami'aayaan, i'i kaye kaashi wiici'atwaa ketimaakisiwaatc, kaye tahsh emaamihkwenimihk.

⁵ Taka hsa ishinisha'o ininiwak Caahpa (Joppa) ootenaank cinaasihkawaawaatc ininiwan Saaimanan Piitar (Simon Peter) kaa inimintc.

⁶ Ini hsa kaapashkwekinohkenitc Saaiman (Simon) eshinihkaasonitc owiiciayaamaan, cikikihcikamiink kaaishitaanitc,” okii'ikoon.

⁷ Ahpii tahsh kaanakanikotc ini encalan kaakiih kanoonikotc, Kwaarniiliyahs okii'-antomaa' niishin (2) otanohkii'aakana' owaahkaa'ikanink eyaanitc, ini kaye enami'ewaatisinitc shimaakanihshan mooshak kaakiih pami'ikotc.

⁸ Kaa'ishkwaa waawiintamawaatc tahsh kahkina kekoon, mii 'i kaa'ishi'-ishinisha'waatc Caahpa ci'ishaanitc.

⁹ E'ani waapaninik tahsh e'ani naawahkwenik kekaa e'ani otihtaminitc i'i ootena Caahpa, mii 'i na'itaak ahpii Piitar kaakii'-ishaatc wakici napaki waahkaa'ikanink ekii'anta anami'aatc e'ani naawahkwenik.

¹⁰ Piitar tahsh kii'nooteshkate ekii'-antawentank kekoon ewii'-miicitc. Mekwaa tahsh ehkwayaancihcikaatenik miicim, kekoon kii'ishinam e'nipaawi ishiayaatc.

¹¹ Miitahsh kaakii'-waapantank kiishik epaahkishkaanik, kekoon kaye ekii'-waapantank taapishkoo waapishkiikinonk, e'shiniiwi kiihkeyiikaninik itahsh kii'onci pakitaapiikinikaateni.

¹² Miitahsh i'imaa kii'ayaawa' kahkina kaaniiwikaatenitc aya'aawihsha', i'i kaye kiinepikoo' ahkiink eyaanitc, pinehshiinsha' kaye ishipimink pepaamihsenitc.

¹³ Miihsh kaakii'-noontawaatc awiyan e'ihkitonitc: “Wanishkaan Piitar, nihshi ciamwatwaa.”

¹⁴ Piitar tahsh kii'ishi nahkwehtam: “Kaawiin Tepencikeyan! Kaawiin iitok wiihkaa nimpimiicihsiin kekoon nintanami'aawininaanink wenci manaamiicinaakaatek kaawiinentaakwahk.”

¹⁵ Miinawaa tahsh okii'-noontawaan awiyan ehkanoonikotc: “Keko inentanken cimanaa miicinaakaatek Kishemanitoo kaaitank ehpehkaninik,” kii'inaa.

¹⁶ Nihswaa (3) tahsh o'o kiihtoocikaateni, miitahsh miinawaa kiishikonk kaaishi kiiweishpishkaanik i'i kaakii waapantank.

¹⁷ Mekwaa tahsh Piitar ewawaanentank aaniin enwaatenikwen i'i kaakii'-ishinank, iniweniwa' ininiwa' kaakiih piicinisha'okonitc Kwaarniiliyahsan, okii mihkamini Saaimanan (Simon) owaahkaa'ikanini. Akwaciink itahsh kiiniipawiwa'.

¹⁸ Miitahsh kaakiih kishiiwenitc ehkakwetwenitc kiishpin eyaanikwen i'imaa Saaimanan Piitar kaaishinihkaasonitc.

¹⁹ Mekwaa tahsh Piitar (Peter) enaanaakatawentank i'i kaakii'-ishinank, Kishemanitoo otAhcaahkoni okiih kanoonikoon ekii'ikotc: “Nihsin ohsha ininiwak kipinanaantawaapamikook.

²⁰ Wanishkaan, ciniisaantaweyan. Keko pwaahtawentanken ciwiiciiwatwaa, aaniihsh niin ninkiih piicinisha'waak,” okii'ikoon.

²¹ Piitar tahsh kiiniihsaantawe. Miitahsh kaa'inaatc iniweniwa': “Niin ohsha kaananaantawaapamek. Wekonen tahsh wenci piishaayek?” ekii'inaatc.

²² Miihsh o'o kaa'ikotc: “A'awe hsa Kwaarniiliyahs (Cornelius) shimaakanihshiiwikimaa ninkiih piicinisha'okonaan. Kwayahkwaatisi, okohtaanenimaan kaye Kishemanitoon. Kahkina hsa Coowa' okihtenimikoo'. Kishemanitoon tahsh otencalimini okii wiintamaakoon cipiishaawatc owaahkaa'ikanink cinoontawihk aaniin ke'ihkitowatc,” okii'ikoo'.

²³ Piitar tahsh okiih piintikeantomaa' ekii'-nipe'aatc. E'ani waapaninik tahsh okiimaacii wiiciiwaa'; aaninta kaye owiici otepwehtamoo' Caahpa ootenaank wenciinitc ekii'ani wiiciiwikotc.

²⁴ Miinawaa tahsh e'ani waapaninik kiihtakohshinook Sehsariiya ootenaank. Kwaarniiliyahsan i'imaa kiihtashi pii'owan, ekii'-antomaanitc otinawemaakanini, kaakiih saaki wiiciiwaanitc kaye.

²⁵ Ahpii tahsh Piitar kaahpiintiketc owaahkaa'ikaniniink, Kwaarniiliyahsan okii'-nakishkaakoon, eshi sitekaapawitc ekii'ishi animihkohtaanitc.

²⁶ Piitar okiih pasikwii'aan ekii'inaatc: “Pasikwiin! Keniin ohsha nintininiw,” okii'inaan.

²⁷ Ehkakanoonaatc itahsh, kii'ani piintike. Miitahsh kaakii waapamaatc niipiwa' awiya' emaawaci'itinitc.

²⁸ Miitahsh kaa'inaatc: “Kikihkentaanaawaa iitok nintoonahshowewininaan einahtek awiya kaaCoowiwitc ciwiiciiwaahsik, cipiintikawaahsik kaye pahkaan awiyan wenciinitc. Kishemanitoo tahsh ninkii'-waapanta'ik pahkaan awiya noociko ci'inakimaasiwak, ci'ihkitohsiwaan tahsh kaye pahkaan awiya cimanaawiiciiwakipan.

²⁹ Miitahsh kaakii'onci pwaahtawiihsiwaan ahpii kiiantomikooyaan kekoon ekii'-ontamentansiwaan. Kikakwecimininim tahsh wekonen kaaonci antomiyek?” okii'inaa'.

³⁰ Kwaarniiliyahsan tahsh o'o okii'ikoon: “Niiwikiishik aasha ishihse kaakii'-anami'aayaampaan niwaahkaa'ikanink o'o ahpii enihso tipa'ikaneyaak eishkwaa naawahkwek. Miitahsh i'i ahpii kaakii'-waapamak inini e'oncishkawikaapawitc ewaahsitenikin okikishkikanan.

³¹ Miitahsh o'o kaa'ishitc: ‘Kwaarniiliyahs Kishemanitoo ohsha onoontaanan kitanami'aawinan, omaamihkawinotaan tahsh kaye kaashi miinimatc ketimaakisinitc.

³² Ishinisha'owen tahsh Caahpa ootenaank ci'antomatc cipi'anta'-waapamihk Saaiman Piitar kaa'icikaniwitc. Iniweniwan tahsh owiiciayaamaan Saaimanan kaapashkwekinohkenitc ciikipiik kihcikamiink kaaishitaanitc,’ ninkii'ik.

³³ Shemaak tahsh kikii naacinisha'on. Kiminohcike tahsh kiipiishaayan. Kahkina tahsh o'omaa nintayaamin enaahsamiitc Kishemanitoo ewiih pisintamaank kahkina kekoon kaaTipenciketc kaakii'ishi anoonihk cishi wiintamawiyaank,” okii'ikoon Kwaarniiliyahsan.

Piitar kiitipaacimaatc Ciisahsoon

³⁴ Piitar (Peter) tahsh kiimaacii kakito o'o ekii'-ihkitotc: “Tepwe ninihsitawinamowaan Kishemanitoo kahkina awiyan peshikwan e'inenimaatc.

³⁵ Kahkina tahsh iko kaatahswewaanakisinitc awiyan kwehtaanenimikotc, ketootaminitc itahsh kaye kaakwayahko naakwanink otootaahpinaan.

³⁶ Kikihkentaam iitok i'i tipaacimowin kaakii'-ishinisha'amawaatc pemaatisinitc Isriyala', ekii'-wiintamawimintc eshi minwaatotenik pisaanisiwin onci Ciisahs Christink kaamaamawi tipencikenitc.

³⁷ Kikihkentaam kaye aaniin kaaishiwepahk misiwe Cootiiyahkiink (Judea), ekii'onci maacihsenik i'imaa Kaalaliiwahkiink (Galilee) ahpii Cwaanan (John) Osiika'antaaken kii'ishkwaa tashintaminitc siika'antaasowin.

³⁸ Kikihkentaam kaye aaniin enaacimintc Ciisahs Naasaritink (Nazareth) kaaonciitc, Kishemanitoon ekii'-onaapamikotc ekii miinikotc otAhcaahkoni, mashkawisiiwin kaye. Misiwe ekiihpapaa ishaatc eminotootaaketc, ekii minoayaa'aatc kaye kahkina kaakitima'ikonitc maciaya'aan, aaniihsh Kishemanitoon okii'-wiiciiwikoon.

³⁹ Niinawint tahsh nintipaatotaamin kahkina kekoon kaakii'ishi waapamankitc eishihciketc i'imaa Coowak otahkiimiwaank, i'imaa kaye Ceroosalamink (Jerusalem). Miitahsh i'i kaakii nihsikotc Coowa', aashiteyaahtikonk ekii'-akosaka'okotc.

⁴⁰ Kishemanitoon tahsh okiihkiiwe pimaatisii'ikoon nihsokiishik e'ishihsenik, ekiih tootaakotc kaye cinaakositc.

⁴¹ Kaawiin kahkina awiyan okii'-waapamikohsiin. Niinehtawint ehta niikaan kaakii'-onaapamiyamintc citipaatotamawaank kaakii waapantamaank, kaakii'-wiici wiihsiniimankitc, kaakii wiici minihkwemankitc kaye kii'ishkwaa kiiwe pimaatisii'intc.

⁴² Niinawint kaye ninkii'-anoonikonaan cikakiihkimimankitc pemaatisinitc, citipaacimowankitc kaye wiin eyaawitc Kishemanitoon kaakii'-onakimikotc cionaahkonaatc pemaatisinitc, iki kaye kaaniponitc.

⁴³ Miiwan hsa ini kaakiih tashimaawaatc Kishemanitoon kenootamawaawaatc o'o kii'ihkitowaakopanen, kahkina awiya entahso peshikotc ketepweyenimaatc oka tepinaan cipoonentamawintc omacitootamowinan, owiinsowininiink onci.”

KaaCoowiwihsikwaa kiimiinikoowisiwaatc Kishemanitoon otAhcaahkoni

⁴⁴ Mekwaa tahsh keyaapi Piitar (Peter) ehtashintank kaakii'-ishiwepaninik, Kishemanitoon otAhcaahkoni okii'-otihsikoni kahkina kaakii noontaminitc i'i tipaacimowin.

⁴⁵ Iniweniwa' tahsh kaaCoowiwinitc otepwehtamoo' Piitar kaakiihpi wiiciiwikotc kiimaamahkaatentamoo', aaniihsh i'i kaaCoowiwihsinik kiimiinikoowisiwa' ekiih siikinamawimintc Kishemanitoon otAhcaahkoni. Kaakiih kihkinawaatashakeshomintc otepwehtamoo'

⁴⁶ Okiinoontawaani aaniihsh pepahkaan e'ayishikiishwenitc, emiikwehciwenimaanitc tahsh kaye Kishemanitoon.

⁴⁷ Piitar tahsh kii'ihkito: “Awiya na taaonci'iwe nipiink cishi siika'antaasohsinikipan onoweniwa' kaamiinikoowisinitc Kishemanitoon otAhcaahkoni taapishkoo kiinawint.”

⁴⁸ Piitar tahsh kii'anoohkii cisiika'antaasonitc owiinsowininiink Ciisahs Christan onci. Okiihkakwecimikoo' itahsh acina ciwiiciayaamaatc.