2 ᑭᒋᐅᑭᒫᒃ 6 - Ojibwe Kihcimasina'ikan

Waakaahkwatwaapihk Kii'aaposhkancipiihsek

¹ Ilaaihsha (Elisha) hsa okii'ikoo' wehkwiinonitc okanootamaake', “Onsaam hsa akaahsin i'imaa kaashi wiicitaamikooyan.

² Taka pakitinihshinaam ci‑ishaayaank Cwaartan (Jordan) siipink entashiyaank ci⁠manaahtikweyaank kihci mihtikook, ci⁠oshihtamaasoyaank ke⁠ishitaayaank,” ekii'ikotc. “Haw, pisaan ishaak,” okii inaa'.

³ Miitahsh peshik kaa'ikotc, “Taka wiiciiwihshinaam kitanohkii'aakanak eh⁠tinowiyaank.” Miihsh kaa'inaatc ewii wiiciiwaatc.

⁴ Miitahsh i'i kaa‑ani ishi wiiciiwaatc. Ahpii hsa wetihtamowaatc Cwaartan siipink, mii hsa kaa⁠ishi maacii kawa'waanitc mihtikoo'.

⁵ Peshik itahsh eh⁠kawa'waanitc mihtikoon, kiih⁠kiihcikwaakohseni waakaahkwatwaapihkoni, ekiih pahkopiihsenik. Miihsh kaa⁠ishi shaakowenitc, “Aah, nintookimaam! Nintawi'aason hsa i'i!” kii‑ihkitowan.

⁶ Ilaaihsha hsa Kishemanitoon wetininiimikotc okii ishi kakwecimaan, “Aanti kaa⁠ishi pahkopiihsek?” Miihsh kaa⁠ishi kihkino'amaakotc aanti kaa⁠ishi pahkopiihsenik. Ilaaihsha hsa okiih kiishka'aan mihtik ekii ishi pahkopii wepinank i'imaa. Miitahsh kaakii aaposhkancipiihsenik i'i waakaahkwatwaapihk.

⁷ Miihsh o'o kaa'inaatc, “Haw tahsh otaahpinan.” Miihsh kaa⁠ishi niiminihkeninitc ekii otaahpinaminitc.

Siiriya Shimaakanihshak Kiihshaakooci'intwaa

⁸ A'a tahsh Siiriyawi kihciokimaa (Syria) okii miikaanaa' Isriyala' (Israel). Miihsh kaa⁠ishi kakwecimaatc otaanihkewikimaama', “Weti hsa piko aanti kika ishi kapehshimin,” okii inaa'.

⁹ Ilaaihsha tahsh wetininiimikotc Kishemanitoon kii⁠anoohkii' o'o ci⁠awi'inimintc Isriyali kihciokimaan, “Keko weti inahke pimi'ishaahkek, Siiriyawininiwak ohsha weti ishaawak,” kii‑icikaniwiwan.

¹⁰ Miitahsh Isriyali kihciokimaa awiyan okii ishinisha'waan ci⁠anta kihkentaminitc weti ayaawinink kaakii ishi wiintank wetininiimikotc Kishemanitoon. Ayaahpii hsa Ilaaihsha o'o okii ishi ayaankwaamimaan kihciokimaan, miihsh kaa⁠ishi kanawenintisonitc eshaanitc.

¹¹ Wiinke tahsh kii⁠nishkaatisi Siiriyawi kihciokimaa, ekii antomaatc otaanihkewikimaama', “Taka wiintamawihshik awenen kiinawaa kaa⁠wiiciiwek Isriyali kihciokimaa!” ekii'inaatc.

¹² Miitahsh peshik kaakii'ikotc otanohkii'aakanan, “Nintookimaaminaan, kaawiin i'i kaa⁠tahshiyaank nintaa ishihcikehsiimin! A'a iitok Ilaaihsha kaa⁠kanootamawaatc Kishemanitoon eyaatc Isriyal ahkiink, kaa⁠wiintamawaatc Isriyali kihciokimaan aaniin ehkitowatc kaashi nipaayan,” okii'ikoon.

¹³ Miitahsh o'o kaa⁠ihkitotc, “Maacaak anta kihkentamowaahk aanti eyaakwen, ewiih kaahcitinak!” kii‑ihkito. Kiihpi wiintamawaa tahsh weti Toohtan (Dothan) ayaawinink e⁠ayaanitc.

¹⁴ Miitahsh kaa⁠ishi ishinisha'waatc weti niipiwa' shimaakanihsha', miikaasowi otaapaanaahkwa', mihtatimoo' kaye eh⁠tipihkaninik. Miihsh kaa⁠ishi waahkaashkaminitc i'i ootenaani.

¹⁵ Wiipa tahsh kikishep kii⁠wanishkaawan Ilaaihsha otanohkii'aakanan ekii saaka'aminitc, miihsh kaakii waapamaanitc eh⁠paahtiinonitc shimaakanihsha', miikaasowi otaapaanaahkwa', mihtatimoo' kaye e⁠waahkaashkaminitc ootena. Miihsh kaa'ikotc, “Nintookimaam, aaniin itahsh inaa ke⁠ishihcikeyank?”

¹⁶ Miitahsh o'o Ilaaihsha kaa'inaatc, “Keko sekisihken! Nawac ohsha kiinawint paahtiinowak kaa⁠wiiciiwinankwaa, ahpiihc wiin ikiweniwa' kaa⁠wiiciiwikowaatc,” okii'inaan.

¹⁷ Miihsh kaa⁠ishi anami'aatc, “KaaTipencikeyan tootaw ci⁠waapitc.” Miitahsh kaakii waapi'ikotc kaaTipencikenitc o'o ekii ishinank, okii waapamaa' eshi pihkwatinaanik e⁠mooshkine ayaanitc mihtatimoo', miikaasowi otaapaanaahkwa' kaye e⁠ishkotewinitc e⁠waahkaashkaakotc Ilaaihsha.

¹⁸ Ahpii ehpi naasihkaakotc Siiriyawi shimaakanihsha', mii hsa Ilaaihsha kaa⁠ishi anami'ehtawaatc kaaTipencikenitc, “Taka tootaw oko ininiwak ci⁠waapihsikwaa!” Miitahsh kaah⁠tootawaanitc i'i ininiwa' ci⁠waapihsinik, Ilaaihsha kaakii ishi kakwetwetc.

¹⁹ Miitahsh o'o Ilaaihsha kaa'inaatc, “Kaawiin iitok wiin o'o miihkana entone'amek, kaawiin kaye o'o aawansinoon ootena! Piminisha'ohshik, kika ishiwinininim itahsh a'a inini kaa‑antone'wek,” okii inaa'. Miihsh kaa⁠ishi ishiwinaatc Sameriya (Samaria) ootenaank.

²⁰ Kaa⁠ishkwaa piintikewinaatc itahsh i'imaa ootenaank, miihsh Ilaaihsha kaa⁠ihkitotc, “KaaTipencikeyan, taka tootaw oko ininiwak ci⁠waapiwaatc,” kii‑ihkito. Miitahsh kaaTipencikenitc kaa⁠ishi waapi'aanitc i'i ininiwa'. E⁠inaapinitc itahsh, okii waapantamini e⁠ayaanitc piintik i'imaa ootenaank Sameriya.

²¹ Ahpii hsa Isriyali kihciokimaan e⁠waapamaanitc, mii hsa kaa'ikotc Ilaaihsha, “Ninka nihsaak ina nintookimaam Ninka nihsaak ina?” okii'ikoon.

²² Miitahsh o'o kaa'inaatc, “Keko nihsaahken. Kaawiin iitok kitaa nihsaahsiik ininiwak ke⁠kaahcitinatwaapan kii⁠miikaatink. Ahsham miicim ci⁠wiihsiniwaatc, mina' kaye, pakitinaahkan itahsh cini kiiwewaatc, ci‑ishaawaatc eshi'ayaanitc otookimaamiwaan,” okii'inaan.

²³ Miitahsh a'a Isriyali kihciokimaa kaa⁠ishi kihci wiihkwanketc ekii ahshamaatc. E⁠ishkwaa wiihsininitc itahsh, e⁠ishkwaa minihkwenitc kaye mii 'i kaa⁠ishi kiiwenisha'waatc ci‑ishaanitc eshi'ayaanitc otookimaamini. Kaawiin itahsh miinawaa Siiriyawi shimaakanihsha' kii⁠onci piishaahsiiwa' cipi mikoshkaaci'ikowaatc.