2 ᑭᒋᐅᑭᒫᒃ 25 - Ojibwe Kihcimasina'ikan

Nepakanaasar Kiishaakoocihtootc Ceroosalam Kihci'ootenaani

¹ Shaankahso (9) pipoon tahsh minihk aasha kii⁠kihciokimaawitc Setihkaaya (Zedekiah), mitaahsokiisihsoon eh⁠pimakinsonitc, e⁠mitaahsokonakaanik; mii hsa 'i ahpii Nepakanaasar (Nebuchadnezzar) kaakii kihciokimaawitc Paapilan (Babylon) ahkiink kaakiih piinaatc kahkina oshimaakanihshiima' ekii waahkaashkank Ceroosalam (Jerusalem) kihci ootenaani. Waahkaaya'ii kaye ekii oshihtoowaatc wa⁠onci kakwe shaakoocihtwaawaatc.

² Piinihsh tahsh mitaahshipeshikopipoon (11) Setihkaaya kii⁠kihciokimaawitc, kiih⁠kaape waahkaashkikaatenik Ceroosalam.

³ Niiwikiisihsoon tahsh eh⁠pimakinsonitc, shaankahso kiishik e⁠ishihsenik i'i peshikwan eh⁠pipooninik, wawiinke kii⁠kihci kakwaatakentaakwan i'imaa Ceroosalamink aaniihsh kaawiin miicim aapiinciko kii⁠ayaahsinoon i'imaa ahkiink kekii miiciwaahpan pemaatisiwaatc.

⁴ Miitahsh i'i ahpii kaakiih piikwa'ikaatek kihci ootena Ceroosalam waahkaayaapihkinikan, kahkina hsa Isriyaliwi shimaakanihshak kii⁠maaciipa'iwewak eh⁠tipihkaninik. Kii⁠onci saakicipa'iwewak kaakii ishi piihtawaapihkinikaatenik inahke kihciokimaan kaakii ishi nihtaa kihtikenitc. Aana hsa wiin Paapilaniwi shimaakanihsha' ekii waahkaashkaminitc i'i kihci ootenaani, weti hsa pihkwatahkamik Erapa (Arabah) ecikaatenik kii⁠ahpa'iwewak.

⁵ Paapilaniwi shimaakanihshak tahsh okiih piminisha'waawaan kihciokimaan, weti tahsh kaakii ishi pashkwaanik ciikaya'ii Cerahko (Jericho) mii hsa 'i weti kaa⁠ishi atimaawaatc. Kahkina hsa oshimaakanihshiimini pepahkaan kii⁠ahpa'iwewa' ekii nakacipa'ikotc.

⁶ Okiih kaahcitinaawaan tahsh ini kihciokimaan Setihkaayawan. Weti tahsh Oripla (Riblah) ootenaank kaakii ishi'ayaanik, okii ishiwinaawaan kihciokimaan Nepakanaasaran kaakii ishi'ayaanitc. A'a tahsh kihciokimaa okii onaahkonaan ini kihciokimaan kaakiih piitamawintc.

⁷ Miitahsh weti Setihkaaya kaa⁠ishi nihcikaniwinitc okosihsa' enaahsamiitc, miitahsh kaa⁠ishi kicaapa'ontc, sakaapaaneyaapiin e⁠aapataninikin e⁠mamaancikwahpisotc ekii ishiwicikaniwitc Paapilan ahkiink.

Kiinihshiwanaacihcikaatek Kihci'anami'ewikamik

⁸ Mitaahshishaankahso (19) pipoon itahsh Nepakanaasar (Nebuchadnezzar) kii⁠kihciokimaawitc Paapilan (Babylon) ahkiink, naanokiisihsoon eh⁠pimakinsonitc, e⁠niishwaahsokiishikwakaanik (7), tipinawe kaakii anohkiihtaakotc Nepoosaretan (Nebuzaradan) kaakii ishinihkaasonitc kaakii naakaci'aanitc okanawencike' kiih⁠piishaawan i'imaa kihci ootenaank Ceroosalamink (Jerusalem).

⁹ Miitahsh a'a inini kaakii sahka'ank kihci anami'ewikamikoni, kihciokimaan kaye owaahkaa'ikanini, kahkina kaye hsa ko waahkaa'ikanan i'imaa Ceroosalamink, ini kaye waahkaa'ikanan kaakiih kihci inentaakwaninikin.

¹⁰ Ini hsa shimaakanihsha' Nepoosaretan kaakii wiiciiwikotc okiih piikopitooni i'i kaakii ishi waahkaayaapihkinikaatenik i'i Ceroosalam.

¹¹ Pemaatisinitc tahsh kaakii ishkopa'iwenitc, niipiwa' kaye kaakii naacipa'iwaanaanitc ini Paapilaniwi kihciokimaan, miiwa' hsa 'i Nepoosaretan kahkina kaakii ishiwinaatc weti Paapilan ahkiink.

¹² Okii⁠nakanaa' itahsh wiin maawac iko kaa⁠kitimaakisinitc i'imaa kaakii onciinitc ahkiink ci⁠naakacihtoonitc kaakii ishi kihtikaanimintc shoomina', ini kaye kihtikewahkamikoon.

¹³ Paapilaniwi shimaakanihshak tahsh okiih pikishka'waawaa' i'i kaakii osaawaapihkowinitc kihci ahsinii' kaakiih patahkisonitc, i'i kaye tesaahkwa'ikanini, i'i kaye kaakii osaawaapihkowaninik nipiini kaakii ishi ahtenik kaakii ayaanik piintik kihci anami'ewikamikonk. Paapilan ahkiink tahsh okii ishiwitoonaawaa i'i osaawaapihkoni.

¹⁴ Ahkihkwa', ihspetenhsa' kaye, waahsahkonencikani aapacihcikanan kaye, emihkwaanenhsa' kaye, kahkina hsa ko kaakii osaawaapihkaninikin onaakanan kaakii aapataninikin i'imaa kihci anami'ewikamikonk kiih⁠pamiihtoowaatc.

¹⁵ Nepoosaretan tahsh okii maaciitoonan kaakii ishi minaahsikenk, onaakanenhsan kaye kaakii onci oshihcikaatenikin osaawi shooniyaa waapihkonk, waapaapihko shooniyaa waapihkonk kaye.

¹⁶ I'i tahsh niishin (2) ahsinii' kaakiih patahkisonitc, i'iweni nipiini kaakii ishi ahtenik i'i kaye tesaahkwa'ikanini Swaalaman (Solomon) kaakii oshihtookopanen ci⁠ahtenik i'imaa kihci anami'ewikamikonk, i'i hsa osaawaapihkoni i'imaa kaakii onciinik kaawiin kiih⁠kashkihcikaatehsinoon ci⁠tipaapiishkootenik kaa‑ahpiihtinikwaninik.

¹⁷ A'a tahsh peshik ahsin kaakiih patahkisotc niishtanashiniishwaahsomisit (27) kii⁠ahpiihtahkiso. Weti ishpimink osaawaapihk kaakii ishi mamasinihcikaatek niiwimisit aapihta kii⁠ahpiihtaani. I'iwe tahsh ishpimink kaakii osaawaapihkahk kishipaaya'ii kii⁠masinihsinoon kekoonan kaa⁠nihtaawikinkin. A'a hsa kotak kaakiih patahkisotc ahsin, mii peshikwan kaa⁠ishinaakositc.

Pemaatisiwaatc Coota Ahkiink Kaa'onciiwaatc Kiimaaciinintwaa

¹⁸ Nepoosaretan (Nebuzaradan) hsa kaye okiih tako maaciinaa' ekii wiih kipa'waatc kihci anami'ewikimaan Siireya (Seraiah) eshinihkaasonitc, Sehpanaayawan (Zephaniah) kaye kaakii anihke anami'ewikimaawinitc; i'i kaye nihsin (3) kaakii naanaakacihtoonitc ishkwaantem i'imaa kihci anami'ewikamikonk.

¹⁹ Okii ontinaan ininiwan kaakiih tipenimaanitc shimaakanihsha', naanan (5) kaye ininiwa' kaakii ani wiintamawaanitc kihciokimaan aaniin keni ishihcikenitc. Okiih tako maaciinaan kaye oshipii'ikewininiwan kaakii naanaakaci'aanitc ininiwa' ke⁠shimaakanihshiiwinitc, ninkotwaahsimitana (60) kaye awiya' kaakii ayaanitc i'imaa kihci ootenaank.

²⁰ Nepoosaretan tahsh kaakiih tipenimaatc okanawencike' okii ishiwinaa' o'o kahkina weti Oripla (Riblah) ootenaank, Hemaht ahkiink (Hamath) kaakii icikaatenik, eshi'ayaanitc kihciokimaan Nepakanaasaran (Nebuchadnezzar).

²¹ Miitahsh kaa⁠inaahkonikenitc ci⁠nihsimintc i'i ininiwa'. I'i tahsh Coota kaa⁠onci tipentaakosinitc kii⁠maaciicikaniwiwa' i'imaa otahkiimiwaa' taapishkoo tahkonikana'.

Ketalaaya Kii'onakimintc Ci'okimaahkantank Coota Ahkiini

²² Nepakanaasar (Nebuchadnezzar) tahsh kaakii kihciokimaawitc Paapilan (Babylon) ahkiink okii onakimaan Ketalaayawan (Gedaliah) ci⁠okimaahkantawaanitc pemaatisinitc kaakii nakanimintc Coota (Judah) ahkiink. Ketalaaya hsa Ahaaikam (Ahikam) kii‑ishinihkaasowan oteten, omihshoomihsan tahsh Shehpan (Shaphan) kii‑ishinihkaasowan.

²³ Ahpii tahsh iki Cootawi shimaakanihshiiwikimaak, shimaakanihshak kaye e⁠noontamowaatc Nepakanaasaran ekii onaapamaanitc Ketalaayawan ci⁠okimaahkantaminitc Coota ahkiini, mii hsa kaakii ishi anta waapamaawaatc weti Mispa (Mizpah) ootenaank. Ishmeyal (Ishmael) wetetetc Nehtanaayawan (Nethaniah), Cohaanan (Johanan) wetetetc Kariiyan (Kareah), Siireya wetetetc Tanoomehtan (Tanumeth) Netopah (Netophah) kaakii onciinitc, a'a kaye Ce'aasanaaya (Jaazaniah) wetetetc Me'aka wenciinitc (Maacathite), miiwa oko ininiwak, otininiimiwaa' kaye kaakii anta waapamaawaatc Ketalaayawan.

²⁴ Ketalaaya tahsh kii⁠ahpimo ekii wiintamawaatc o'o ininiwa', “Keko kohsaahkekwaanik Paapilaniwikimaak; pisaan hsa o'omaa ahkiink ishi kapehshik, ci⁠anohkiihtawek Paapilaniwi kihciokimaa, miihsh i'i ci⁠minohseyek.”

²⁵ Niishwaahso kiisihs tahsh e⁠ani ishihsenik a'a hsa Ishmeyal kaakii ontahkaanesitc kaakiih pi'onci ayaanihkewikimaawinitc, oteten Nehtanaaya (Nethaniah) kaakii ishinihkaasonitc, omihshoomihsan tahsh Ilishama (Elishama) kii‑ishinihkaasowan. Ishmeyal okiih pi wiiciiwaa' mitaahso ininiwa' Coota ahkiink wenciinitc ekii nihsaawaatc Ketalaayawan. Aaninta kaye Cootawininiwa', i'i kaye Paapilaniiwininiwa' okiih tako nihsaawaa' kaakii wiiciiwaanitc Ketalaayawan weti ootenaank Mispa (Mizpah).

²⁶ Kahkina tahsh pemaatisiwaatc, kaakiih kitimaakisiwaatc, kaakiih wenootisiwaatc kaye, iki kaye shimaakanihshiiwikimaak Iicipahkiink (Egypt) kii⁠ahpa'iwewak, aaniihsh okiih kohsaawaa' Paapilaniiwininiwa'.

Cehooyakin Kiipakitinintc Cisaaka'ank Kaakii'ishikipa'ontc

²⁷ Nihsimitanashiniishwaahso (37) pipoon ekii ocihcihsenik aasha minihk Cehooyakin (Jehoiachin) Cootawi kihciokimaa kaakii ishiwicikaniwikopanen Paapilan ahkiink. Mii hsa 'i ahpii Iipal Miirootaahk (Evil Merodach) kaakii ani kihciokimaawitc. Kihciokimaa tahsh okiih pakitinaan Cehooyakinan ci⁠saaka'aminitc eshi kipa'omintc mitaahsokiisihsoon eh⁠pimakinsonitc, niishtanashiniishwaaso (27) kiishik e⁠ishihsenik.

²⁸ Weweni hsa okiih kakanoonaan Cehooyakinan, nawac okii inahsaan ci⁠kihci inentaakosinitc ahpiihc wiin i'i kotak kihciokimaa' kaakiih piicikaniwinikopanen i'imaa Paapilan ahkiink.

²⁹ Cehooyakin tahsh kiih⁠pakitinaa ci⁠kiihcikoshkank kipa'otiiwi kikishkikanan, minihk tahsh kaakiih pimaatisitc kihciokimaan hsa okii wiitoohpamaan otatoohpowinaahkoniink ekii ontanciketc.

³⁰ Entahsokiishik hsa kihciokimaan okii miinikoon shooniyaan minihk iko kaakiih pimaatisitc.