2 ᑭᒋᐅᑭᒫᒃ 24 - Ojibwe Kihcimasina'ikan

Cehooyakin Coota Kihciokimaa

⁸ Cehooyakin (Jehoiachin) hsa mitaahshinihshwaahso (18) kiih⁠tahsopipoonwe kii⁠maacii kihciokimaawitc. Nihsokiisihs hsa kii⁠kihciokimaawi i'imaa Ceroosalamink (Jerusalem). Omaamaan hsa Niioshta (Nehushta) kii‑ishinihkaasowan kaakii otaanihsimikonitc Elnehtan (Elnathan) Ceroosalamink wenciinitc.

⁹ Kaawiin hsa kwayahk kii‑ishihcikehsii enaahsamiinitc kaaTipencikenitc, taapishkoo kaakii ishihcikenitc oteten.

¹⁰ Mii hsa 'i ahpii kii⁠kihciokimaawitc kaakiih piishaanitc ini Nepakanaasaran (Nebuchadnezzar) oshimaakanihshiiwikimaamini i'imaa Ceroosalamink ekii waahkaashkaminitc.

¹¹ Nepakanaasaran hsa kewiin kiih⁠piishaawan i'imaa mekwaa oshimaakanihshiiwikimaamini e⁠waahkaashkaminitc Ceroosalam ootenaank.

¹² Miitahsh Cehooyakin Coota (Judah) kihciokimaa, omaamaan kaye, i'i kaye otanohkii'aakana', oshimaakanihshiiwikimaama' kaye, otaanihkewikimaama' kaye kaakiih pakiciiwaatc eshi'ayaanitc Paapilaniwi shimaakanihsha'. Mii hsa 'i nihshwaahso (8) pipoon Nepakanaasaran kii⁠kihciokimaawinitc ahpii kii⁠maaciinikotc Cehooyakin kii⁠tahkonikotc.

¹³ Miitahsh Nepakanaasar kaakii maaciitootc kahkina eshi wenootaninik kihci anami'ewikamik, eshi wenootaninik kaye kihciokimaawikamik. Okii maaciitoonan kaye kahkina Swaalamanan (Solomon) kaakii oshihtoonihpan kaa⁠osaawi shooniyaa waapihkowankin aapacihcikanan i'imaa okihci anami'ewikamikoniink kaaTipencikenitc, ekii ishihsenik mayaa kaakii ihkitonikopanen kaaTipencikenitc.

¹⁴ Miitahsh kaye kaakii maaciinaatc pemaatisinitc Ceroosalamink wenciinitc otahkiimink ekii ishiwinaatc mitaahciink mitaahswaahk 10,000 ekiih tahshinitc. Kahkina aanihkewikimaa', kahkina kaye miikaasowininiwa', i'i kaye nekacihtoonitc kekoon, piiwaapihkohkewininiwa' kaye. Maawac hsa ketimaakisinitc ehta okii nakanaa' i'imaa ahkiink ci⁠ayaanitc.

¹⁵ Nepakanaasar hsa okii maaciinaan Cehooyakinan ekiih tahkonaatc Paapilan (Babylon) ahkiink ekii ishiwinaatc. Omaamaani kaye, owiiwini kaye, otaanihkewikimaamini kaye, kaa⁠niikaanisinitc kaye, Ceroosalamink ekii onci maaciinaatc Paapilan ahkiink itahsh ekii ishiwinaatc.

¹⁶ Niishwaahcink mitaahswaahk 7,000 hsa kaye kii⁠tahshiwa' miikaasowininiwa', tako kaye mitaahswaahk 1,000 kaakii nakacihtoonitc kekoon, piiwaapihkohkewininiwa' kaye, kahkina hsa ko ininiwa' menoayaanitc ke⁠shimaakanihshiiwinitc. Miiwa' hsa 'o Paapilan ahkiink kaakii ishiwinaatc.

¹⁷ Nepakanaasar hsa okii inakimaan Matanaayawan (Mattaniah) ci⁠kihciokimaawinitc ci⁠naapishkawaanitc Cehooyakinan, Setihkaaya (Zedekiah) hsa okii ishi aancinihkaanaan. Cehooyakin iitok kii⁠omihshoomenshi Matanaayawan.

Setihkaaya Coota Kihciokimaa

¹⁸ Setihkaaya hsa niishtanashipeshik (21) kii⁠tahsopipoonwe kii⁠maacii kihciokimaawitc, mitaahshipeshikopipoon (11) hsa kiih⁠kihciokimaawi i'imaa Ceroosalamink. Omaamaan hsa Hamoohtal (Hamutal) kii‑ishinihkaasowan kaakii otetenitc Ceramaayawan (Jeremiah) wenciinitc Lipna (Libnah) kihci ootenaank.

¹⁹ Wiinke hsa noociko kii‑ishihcike enaahsamiinitc kaaTipencikenitc, ekii naapihciketc kaakii ishihcikenitc Cehooyakiman (Jehoiakim).

²⁰ Miitahsh kaaTipenciketc kaakii onci tootawaatc pemaatisinitc Ceroosalamink eyaanihpan, Coota ahkiink kaye, ninkoci ekii ishi wepinaatc aaniihsh onsaam okii nishki'ikoo'. Miitahsh Setihkaaya kaakiih shashiipihtawaatc Paapilan kihciokimaan.