2 ᑭᒋᐅᑭᒫᒃ 23 - Ojibwe Kihcimasina'ikan

Cosaaya Kii'anoohkiitc Cinihshiwanaacihcikaatenik Manitoohkewinan

¹ Kihciokimaa tahsh okii antomaa' eshi'ayaatc i'i kahkina kaa⁠niikaanisinitc i'imaa Coota (Judah) ahkiink, i'imaa kaye kihci ootenaank Ceroosalamink (Jerusalem).

² Kihciokimaa hsa tahsh kii‑ishaa kihci anami'ewikamikonk ekii wiiciiwikotc kahkina ininiwa' Coota ahkiink wenciinitc, i'i kaye kahkina Ceroosalamink wenciinitc. I'i kaye anami'ewikimaa', okiikitoohtamaake' kaye, kahkina kaye pemaatisinitc kaakiih kitimaakisinitc, kaakii wenootisinitc kaye. Miitahsh kaa⁠ishi anamihtamawaatc i'i masina'ikan otahshotamaakewin kaakii ishi oshipii'ikaatenik kaakii mihkikaatenik i'imaa kihci anami'ewikamikonk.

³ I'imaa hsa kaakii onci aaswahkitenik waahkaa'ikan kii‑ishi niipawi, miihsh i'imaa kaa⁠ishi ahshotank enaahsamiinitc kaaTipencikenitc ewiih piminisha'waatc. Ewiih kanawentank kaye otinaahkonikewinini, otoonahshowewinini, otihkitowinini kaye. Misiwe piko ote'ink, otahcaahkonk kaye ewii onci ishihciketc kaakii inahtenik i'imaa otahshotamaakewin kaakii ishipii'ikaatenik i'imaa masina'ikanink. Kahkina hsa kaye pemaatisiwaatc kii⁠ahshotamook kewiinawaa ewiih kanawentamowaatc i'i ahshotamaakewin.

⁴ Kihciokimaa tahsh okii inaahkonaan kihci anami'ewikimaan, ini kaye kaa⁠wiiciiwikonitc, i'i kaye kaakii naakacihtoonitc ishkwaantem ci⁠onci saakisihtoonitc i'imaa kihci anami'ewikamikonk kahkina kekoonan kaakii oshihtamawimintc i'i manitoohkaana' Pel (Baal), Aasharah (Asherah) kaye kaakii ishinihkaanimintc, ini kaye kekoonan kaakii onci anami'ehtawimintc wanankohsha'. I'imaa tahsh akwaciink ootenaank Ceroosalamink pehsho Kiitaran (Kidron) kaakii ishi pahsatinaanik, mii hsa imaa kaa⁠tashi ankwaahkisank iniweniwan. Ishkwaahkishen tahsh okii ishiwitoonan weti ootenaank Pehtal (Bethel) kaakii icikaatenik.

⁵ Miitahsh kaye kaa⁠ishi poonanohkii'aatc manitoohkewi anami'ewikimaa' kaakii onakimikowaakopanen Cootawi kihciokimaa' ci⁠minaahsikenitc i'imaa kaakii ishi nihtaa pakitinaahsowintc ootenaank Coota ahkiink, i'imaa kaye Ceroosalamink. Miiwa' itahsh i'i kaa⁠nihtaa minaahsamawaanitc manitoohkaanan Pel kaakii ishinihkaanimintc, kiisihsoon kaye, tipihkikiisihsoon kaye, kaa‑ayoohkwakoocinowaatc kaye wanankohshak, wanankohshak kaye kiishikonk kaa‑ayaanitc.

⁶ Okii onci saakisi'aan kaye ihkwewi manitoohkaanan Aasharah kaakii ishinihkaanimintc i'imaa kihci anami'ewikamikonk ekii ishiwinaatc weti Kiitaran eshi pahsatinaanik akwaciink Ceroosalamink. Miitahsh weti kaah⁠tashi ankwaahkiswaatc, wawiinke kaye ekiih piihsipoonaatc, miihsh kaa⁠ishi piiwiwepinank i'i kaakiih piihsipootootc i'imaa kaakii ishi na'inimintc kaa⁠tapasentaakosinitc.

⁷ Okiih piikopitoonan tahsh kaye kaakii ishitaanitc i'i ininiwa' kaakiih pihshikwaacihcikenitc i'imaa piinci anami'ewikamikonk, miihsh kaye i'imaa ihkwewa' kaah⁠tashi ishiikinohkenitc kaakii aapataninikin kii⁠anami'ehtawimintc ihkwewi manitoohkaanan Aasharahwan enimintc.

⁸ Okiih piinaa' tahsh kaye kahkina anami'ewikimaa' kaakii onciinitc ootenaank Coota ahkiink; miihsh kaa⁠ishi nihshiwanaacihtootc kaakii nihtaa tanahkamikisinitc kii⁠minaahsikenitc. I'imaa tahsh ootenaank Kiipa (Geba) ecikaatenik kii⁠onci maaciihtaa piinihsh weti Piiarshiipa (Beersheba) ecikaatenik. Okii nihshiwanaacihtoonan kaye kaakii ishi pakitinaahsowintc ciikaya'ii ishkwaantem kaakii oshihtootc Caahshowaa onahshowewikimaa, namantinihkink inahke kaa⁠ishi'ayaak kihci ishkwaantem.

⁹ Iki tahsh wiin tino anami'ewikimaak kaawiin kiih⁠pakitinaahsiiwak ci⁠tananohkiiwaatc i'imaa kaakii ishi pakitinaahsowintc kihci anami'ewikamikonk, shaakooc itahsh okii wiici wiihsiniimaawaa' kotak anami'ewikimaa' kii⁠amwaanitc pahkweshikanan wempisikaniwihsinik.

¹⁰ Kihciokimaa Cosaaya hsa kaye okii nihshiwanaacihtoon Toopaht (Topheth) ecikaatenik kaakii nihtaa tashi anami'ewihcikenitc eshi'ayaanik Hinam Pahsatinaank (Hinnom Valley). Miitahsh kaa⁠onci tootank awiyan ci⁠pakitinaahsowaakehsinik otaanihsini, komaa kaye okosihsini ci⁠pakitinamawaahsinik Moolehk enimintc manitoohkaanan.

¹¹ Okii aanciwinaa' kaye mihtatimoo' kaakii ahsimintipan eshi ishkwaantemiwaninik otanami'ewikamikoniink kaaTipencikenitc. Miiwa' iitok o'o mihtatimoo' Cootawi kihciokimaak kaakii ihkitowaakopanen kiisihsonk e⁠onci tipentaakosinitc. Okiih sahka'waa' kaye otaapaanaahkwa' i'imaa kaakii aapatisinitc. Miiwa' hsa o'o kaakii ayaanitc i'imaa eshi wiimpihcikaatenik kihci anami'ewikamikonk ciiki'ishkwaant, pehsho kaakii ishitaanitc ini Nehtan Milehk (Nathan Melech) enimintc okimaan.

¹² Okiih piikopitoonan hsa kaye eshi pakitinaahsowintc kaakii oshihtoonikopanen Cootawi kihciokimaa' wakitapahk pahkehcikanink kaakii ishi'ayaanitc Ehaas (Ahaz) kaakii'inimintc. Okii maaciitoonan kaye eshi pakitinaahsowintc Manaahsawan (Manasseh) kaakii oshihtoonikopanen i'imaa eshi niisho wiimpaahkonikaatenik otanami'ewikamikoniink kaaTipencikenitc, weti tahsh okii ishi pikishka'aanan ekii ishi wepinank Kiitaran pahsatinaank (Kidron Valley).

¹³ Okii nihshiwanaatentaakohtoonan kaye ishpaapihkinikanan eyaanikin waapanonk inahke Ceroosalamink, shaawanonk inahke pihkwatinaank Aalip kihtikaanaahtikohkank kaa⁠ishinihkaatek, Swaalamanan (Solomon) kaakii oshihtoonikopanen Isriyali kihciokimaan. Mii' iitok i'imaa kaakiih tashi anami'ehtawimintc kaa⁠kakwaanihsakentaakosinitc ihkwewi manitoohkaanan Aastahti (Ashtoreth) enimintc Saaitan (Sidon) kaa⁠onciinitc omanitoomini. Inihsh kaye Kiimosh (Chemosh) enimintc omanitoomini Moowap (Moab) ahkiink wenciinitc, ini kaye omanitoohkaanini Eman (Ammon) wenciinitc Moolehk (Molech) enimintc.

¹⁴ Cosaaya tahsh kaye okiih piikwa'waa' anami'ewentaakosinitc ahsinii' kaa⁠patahkisonitc, okiih kawa'waa' kaye mihtikowi manitoohkaana' Aasherah enimintc. Ciipekanan hsa tahsh okii aapacihtoonan misiwe ekii aakwana'ank mihtahkamik kaakii ishi'ayaanikipanen manitoohkewinan.

¹⁵ Okiih piikopitoon hsa kaye eshi pakitinaahsowintc, i'i kaye ishpaapihkinikan eyaanik Pehtal (Bethel) ootenaank. Mii' iitok i'i kaakii oshihtoonihpan Ceroopooaman (Jeroboam) wetetenitc Niipat (Nebat), kaakiih kashki'aanitc Isriyala' (Israel) ci⁠macitootaminitc. Wiinke hsa okii nihshiwanaaci'aa' ahsinii' kaa‑aapatisinitc, ekiih pikishkipoonaatc ci⁠paashkinehsenitc. Okiih caakiswaan kaye manitoohkaanan petahkisonitc Aasharah enimintc.

¹⁶ E⁠ayinaapitc hsa tahsh okii waapantaanan na'initiiwikamikoon eyaanikin aasamatinaak. Miitahsh kaakiih saakisihtootc ohkanimaan ekiih caakisank eshi pakitinaahsowintc. Mii hsa o'owenahke kaa⁠ishi wanaatentaakohtootc i'i eshi pakitinaahsowintc, ekii ishihsenik mayaa kaakii ihkitonikopanen kaaTipencikenitc kii⁠aapaci'aanikopanen kenootamaakonitc mewisha.

¹⁷ Miitahsh kihciokimaa kaa⁠ihkitotc e⁠waapantank na'initiiwikamik, “Awenen itahsh wiin i'i ona'inikoowikamik?” Miihsh kaa⁠ihkitonitc pemaatisinitc i'imaa eyaanitc, “Mii hsa 'iweni ona'inikoowikamik okanootamaake Coota ahkiink kaakii onciitc. Mii' iitok a'a kaakii ihkitokopanen ci‑ishihsenik o'o kaa⁠tootamowatc eshi pakitinaahsowintc,” kii‑inaa.

¹⁸ Miitahsh kaa⁠ihkitotc, “Keko wiin i'i papaamentankek, keko mikoshkaacihtoowaahkek ohkanan,” kii‑ihkito. Kaawiin kiih⁠papaamencikaatehsininiwan ini ohkanan, ini kaye okiikitoohtamaaken kaakii onciinitc Sameriya (Samaria) ahkiink.

¹⁹ I'i hsa kaakii ishihciketc i'imaa Pehtal ootenaank, mii hsa Cosaaya (Josiah) kaa⁠ishi piikopitootc waahkaa'ikanan eyaanikin ishpaapihkinikanink kaakii oshihtoonikopanen Isriyali kihciokimaa' misiwe Sameriya (Samaria) ahkiink. Mii 'i aaniihsh i'imaa kaa⁠onci nishki'aawaatc kaaTipencikenitc.

²⁰ Kaye okii nihsaa' i'imaa eshi pakitinaahsowintc kahkina manitoohkewi anami'ewikimaa' kaa⁠ishi'ayaak ishpaapihkinikan, ekiih caakisank awiya ohkanini i'imaa eshi pakitinaahsowintc. Miitahsh Ceroosalamink kaa‑ani ishi kiiwetc.

Cosaaya Kiikanawentank Pimaaci'ikoowi Wiihkwantiwin

²¹ Miitahsh kihciokimaa Cosaaya kaakii inaahkonaatc kahkina pemaatisinitc, “Tootawihk kaaTipenciketc kiKishemanitoomiwaa ci⁠Pimaaci'ikoowi Wiihkwantiiwahkamikisiyek ci‑ishihcikeyek eshihsink masina'ikanink ahshotamaakewin eshi oshipii'ikaatek,” okii inaa'.

²² Kaawiin hsa wiihkaa o'o tino Pimaaci'ikoowi Wiihkwantiiwahkamikisiwin kiihpi ishihcikaaniwansinoon ahkonaak onaahkonikek kiihpi onaahkonaawaatc Isriyala', kiih⁠pi ayaawaatc kaye Isriyali kihciokimaak, Coota kihciokimaak kaye.

²³ Mitaahshinihshwaahso (18) pipoon hsa kaa⁠kihciokimaawitc Cosaaya, mii hsa 'i kaa⁠ishihcikewaatc ekiih Pimaaci'ikoowi Wiihkwantiiwahkamikisiwaatc i'imaa Ceroosalamink kaaTipencikenitc onci.

Kekoonan Cosaaya Kaakii'aancihtootc

²⁴ Miitahsh kaye kaa‑ani ishihciketc kenoonaanitc neponitc, ahcaahkwa' kaye ekiih kipihtinaatc, manitoohkaana' kaye eyaanitc waahkaa'ikanihkaank keyaapi ci⁠aapatisihsininik, manitoohkaana' iko kaye, kahkina hsa kekoon kaa⁠naakwaninikin kekwaanihsakentaakwaninikin i'imaa Coota ahkiink, i'imaa kaye Ceroosalamink. Miihsh kaakii onci ishihciketc ci⁠tipihsenik mayaa eshipii'ikaatenik masina'ikan eshi oshipii'ikaatenik onahshowewin kaakii mihkaminitc anami'ewikimaan weti okihci anami'ewikamikoniink kaaTipencikenitc.

²⁵ Kaawiin hsa wiihkaa ootaanank kihciokimaan i'i kiihpi ishi'ayaahsiiwan kaakii ishi'ayaatc, kaawiin kaye awiyan kii⁠ani ishi'ayaahsiiwan. Enikohkote'etc iko, otahcaahkonk kaye, ehko kashkihtootc iko kaye ekiih tootank kahkina eshihsininik Moosihsoon (Moses) otoonahshowewinini.

²⁶ Shaakooc itahsh kaawiin kaaTipenciketc kii⁠aantentansii ci⁠poonentank kaakii ishi nishki'ikotc Coota ahkiink eyaanitc pemaatisinitc, onsaam aaniihsh Manaahsawan (Manasseh) misiwe okii ishi kakaanci'ikoon ci⁠nishkaatisitc.

²⁷ Miitahsh kaakii ihkitotc kaaTipenciketc, “Ninkoci hsa ninka ishi wepinaak enaahsamiiwak Coota ahkiink wenciiwaatc, taapishkoo kaakiih tootawakwaa Isriyal ahkiink eyaawaahpan. Miihsh kaye ci⁠aanawentamaan i'i kihci ootena Ceroosalam kaakii onentamaampaan, o'o kaye kihci anami'ewikamik kaakii ihkitoyaampaan, ‘Mii hsa 'iwe niwiinsowin entanentaakwahk,’ ” kii‑ihkito.

Cosaaya Kiipoonikihciokimaawitc

²⁸ Kahkina hsa kaakii ishihciketc mekwaa e⁠kihciokimaawitc i'imaa ishi oshipii'ikaateniwan masina'ikanink eshi oshipii'ikaasowaatc kaakiih pi ayintiwaatc Coota kihciokimaak.

²⁹ Mekwaa hsa kii⁠kihciokimaawitc, Iicipahkiink wenciinitc kihciokimaan Niiko (Neco) eshinihkaasonitc kiih⁠piishaawan i'imaa Iyoohparetiis (Euphrates) siipink ekiih piinaanitc oshimaakanihshiimini ewii wiici'aanitc Ahsiiriya kihciokimaan. Miitahsh Cosaaya kaakiih kakwe kipihtinaatc ekii miikaanaatc. Miihsh kaakii nihsikotc weti Mekitoo (Megiddo) ecikaatenik.

³⁰ Otanohkii'aakana' itahsh okiih poosihtooni otaapaanaahkonk owiiyaw ekii ishi kiiwewitoonitc Ceroosalamink, ekii ishi na'inikotc eshi na'inimintc Isriyali kihciokimaa'. Pemaatisiwaatc hsa Coota ahkiink wenciiwaatc okii onaapamaawaan Cosaayawan okosihsini Coo'ahaas (Joahaz) eshinihkaasonitc ekii kihciokimaawi'aawaatc ci⁠naapishkawaanitc oteteni.