2 ᑭᒋᐅᑭᒫᒃ 22 - Ojibwe Kihcimasina'ikan

Cosaaya Kiikihciokimaawi'intc

¹ Cosaaya (Josiah) hsa kii⁠nihshwaahsopipoonwe (8) kii⁠maacii kihciokimaawitc i'imaa Coota ahkiink. Nihsimitanashipeshikopipoon (31) hsa Ceroosalamink (Jerusalem) kiih⁠tashi kihciokimaawi. Omaamaan tahsh Cetaaita (Jedidah) kii‑ishinihkaasowan, kaakii otaanihsimikonitc Ateya (Adaiah) kaakii ishinihkaasonitc, Pooskaaht (Bozkath) ootenaank kaakii onciinitc.

² Kwayahk hsa kii‑ishihcike Cosaaya enaahsamiinitc kaaTipencikenitc, kii‑ishi pimaatisi kaye misiwe nahke kaakii ishi pimaatisinitc Tepitoon (David) okehteya'aaman. Wiinke okiih piminisha'amawaan otinaahkonikewinini kaaTipencikenitc ekii ishi pahkehsik.

Kiimihkikaatek Masina'ikan Onahshowewin Eshi'oshipii'ikaatek

³ E⁠ani ayishihsenik tahsh mitaahshinihshwaahso (18) pipoon Cosaaya (Josiah) kiihpi pimikimaawitc, okii ishinisha'waan otooshipii'ikewininiiman Shehpan (Shaphan) eshinihkaasonitc ci‑ishaanitc kihci anami'ewikamikonk. Oteteni tahsh Aasalaaya (Azaliah), omihshoomihsini tahsh Miihshalam (Meshullam) kii‑ishinihkaasowan.

⁴ Miihsh o'o kaa'inaatc, “Maacaan anta waapam Hilkaaya (Hilkiah) kihci anami'ewikimaa weti kaashi ayaatc kaaTipencikenitc owaahkaa'ikaniniink. Owiih sakahkakimaan ohsha shooniyaan kaakii maawantoonaanitc i'i ishkwaantenk kaa⁠kanawentaminitc, kaakiih pakitinike'aanitc pemaatisinitc eh⁠pi piintikenitc.

⁵ Wiintamaw hsa ci⁠miinaatc shooniyaan i'i ininiwa' kaa⁠kanawaapantaminitc anohkiiwin kihci anami'ewikamikonk, miihsh i'imaa ke⁠onci tipa'amawaanitc i'i ininiwa' kaa⁠waweshihtoonitc kihci anami'ewikamikoni kii⁠piikoshkaanik.

⁶ Ci⁠tipa'amawaatc kaye mihtikonaape', kaa⁠waahkaa'ikenitc, kaa⁠onaapihkinikenitc kaye. Ci⁠ataawewaatc kaye napakihsakoo', ahsinii' kaye ke⁠aapatisinitc waweshihcikaatenik kihci anami'ewikamikoni.

⁷ Iki hsa ininiwak kaa⁠naanaakacihtoowaatc o'o anohkiiwin kaawiin memwehc wiinawaa ta⁠naanaakaci'aahsiiwak aaniin entootawaawaatc shooniyaan, aaniihsh wawiinke kwayahk tepweyentaakosiwak,” kii‑ihkito.

⁸ Hilkaaya kihci anami'ewikimaa tahsh okii'inaan Shehpanan (Shaphan) oshipii'ikewininiwan, “Ninkii mihkaan hsa 'i masina'ikan kaashi oshipii'ikaatek onahshowewin i'imaa piintik kaaTipenciketc owaahkaa'ikanink.” Miihsh Hilkaaya kaa⁠ishi miinaatc Shehpanan i'i masina'ikan. Miihsh kaa⁠ishi anamihtoonitc.

⁹ Miitahsh oshipii'ikewinini Shehpan kaakii anta waapamaatc kihciokimaan ekii wiintamawaatc aaniin kaa⁠ishi waapantank ekii ihkitotc, “Kitanohkii'aakanak hsa okiih tipa'ikaakenaawaan ini shooniyaan kihci anami'ewikamikonk kaakii ayaanitc ekii miinaawaatc anohkiiwininiwa', i'i kaye kaa⁠naanaakacihtoonitc anohkiiwin kihci anami'ewikamikonk.”

¹⁰ Miitahsh kaye Shehpan kaa'inaatc kihciokimaan, “Hilkaaya kihci anami'ewikimaa ninkii miinik o'o masina'ikan.” Miihsh Shehpan kaa⁠ishi anamihtootc i'imaa eshi'ayaanitc kihciokimaan.

¹¹ Ahpii tahsh kihciokimaa kaa⁠noontank aaniin eshipii'ikaatenik onahshowewin i'imaa masina'ikanink, mii hsa kaa⁠ishi taashkiikipitootc okikishkikanan ehpiihci mikoshkaatentank.

¹² Miitahsh kihciokimaa kaa⁠ishi anoonaatc Hilkaayawan kihci anami'ewikimaan, ini Ahaaikaman (Ahikam) wekosihsimikonitc Shehpanan, ini kaye Ahkparan (Achbor) wekosihsimikonitc Maaihkeyawan (Micaiah), ini kaye Shehpanan oshipii'ikewininiwan, ini kaye Aseyawan (Asaiah) kihciokimaa kaakiih pami'ikotc ekii'inaatc,

¹³ “Maacaak anta kakwecimihk kaaTipenciketc, eh⁠kakwetwehtamawiyaank, oko kaye kahkina pemaatisiwaatc o'omaa kaa‑ayaawaatc Coota (Judah) ahkiink, ewiih kihkentamowankitc aaniin eshipii'ikaatenik i'i masina'ikan kaakii mihkikaatenik. Wiinke ohsha kikihci nishki'aanaatok kaaTipenciketc, onsaam aaniihsh kikehteya'aaminaanik kaawiin okiih pisintansiinaawaa aaniin eshipii'ikaatenik o'o masina'ikan, kaawiin kaye kikiih tootamaakohsiinaanik kahkina kaa⁠ishipii'ikaatenik o'o masina'ikan.”

¹⁴ Ikiweniwak tahsh ininiwak, Hilkaaya, Ahaaikam (Ahikam), Ahkpar (Achbor), a'a kaye Aseyah (Asaiah) okii anta kanoonaawaan ini ihkwewan kaakii kanootamawaanitc Kishemanitoon Aalta (Huldah) eshinihkaasonitc. Onaapeman tahsh a'a ihkwe Shaalam (Shallum) kii‑ishinihkaasowan, okiih kanawentamini anami'e kikishkikanan kaakii otetenitc Tikpa (Tikvah), kaakii ani otetenitc Oraash (Harhas) kaakii ishinihkaasonitc. Ceroosalamink (Jerusalem) tahsh inahke kaakii ishi oshki kapehshiwintc kii‑ishitaawan ini ihkwewan. Okii wiintamawaawaan aaniin kaakii inahkamikaninik.

¹⁵ Aaltawan tahsh okii'ikowaan, “Mii ohsha 'o ehkitotc kaaTipenciketc weKishemanitoomiwaatc Isriyalak (Israel), wiintamaw iki ininiwak kaapi ishinisha'ontwaa kaashi ayaayan.

¹⁶ O'o e⁠ihkitotc kaaTipenciketc, ‘Niwii nana'ahtoon hsa 'i Ceroosalam kihci ootena, iki kaye kahkina i'imaa ootenaank kaa⁠ishitaawaatc, ci‑ishiwepisiwaatc mayaa piko kahkina kaa⁠ishipii'ikaatenik i'i masina'ikan kaakii anamihtootc a'a Cootawi kihciokimaa.

¹⁷ Onsaam aaniihsh ninkii wepinikook Isriyalak, pahkaani manitoo' kaye ominaahsamawaawaa', miihsh i'i kaakii onci nishki'iwaatc aanciko oninciiwaank ekii onci oshi'aawaatc manitoohkaana'. Wiinke tahsh ninishki'ikon i'i ootena Ceroosalam, kaawiin kaye noonta' niwii ahpiihci kitaasohsii.

¹⁸ A'awe tahsh wiin Cootawi kihciokimaa, mii hsa 'o e'inak niin kaaTipencikewak, kaaKishemanitoohkantawimak Isriyala', “Ekiih pisintaman hsa 'i kaa⁠ishipii'ikaatek masina'ikan,

¹⁹ eh⁠kwehkaatisiyan, eh⁠tapahsenintisoyan kaye enaahsamiiyaan, eh⁠taashkiikipitooyan kaye kikikishkikanan, e⁠mawiyan kaye ahpii kaa⁠noontaman ewii nana'ahtooyaan i'i ootena Ceroosalam, iki kaye kahkina i'imaa kaa⁠pimaatisiwaatc. Wawiinke ohsha ewiih nihshiwanaacihcikaatekipan, pemaatisiwaatc ke⁠ahpintamowaatc ahpii macikiishwewaatc. Ninkii noontaan hsa kiin i'i kaakii ishi anami'ehtawiyan.

²⁰ I'we tahsh kaawii ishi nana'ahtooyaan i'i kihci ootena Ceroosalam kaawiin ta⁠ishiwepahsinoon paanimaa kii‑ishkwaa pimaatisiyan. Pisaan hsa kiin weweni kika nip.” Mii hsa 'i enak Cosaaya kihciokimaa,’ ihkito kaaTipenciketc,” okii'ikowaan. Miitahsh iki ininiwak kaa⁠ishi kiiwewaatc ekii awi wiintamawaawaatc Cosaayawan aaniin kaakii'inintwaa.