2 ᑭᒋᐅᑭᒫᒃ 19 - Ojibwe Kihcimasina'ikan

Hesihkaaya Kiikakwecimaatc Okanootamaaken Aaiseyawan

¹ Ahpii hsa kihciokimaa Hesihkaaya o'o kaa⁠noontank, mii hsa kaa⁠ishi taashkiikipitootc okikishkikanan ekiih pihsihkank ahsapiiwekinowayaan ehpiihci mikoshkaatentank. Miitahsh kaa⁠ishi ishaatc kaaTipencikenitc okihci anami'ewikamikoniink.

² Miitahsh kaakii ishinisha'waatc Ilaaikaman (Eliakim) neyaanaakacihtoonitc okimaawikamik, ini kaye Shepnawan (Shebna) oshipii'ikewininiwan, i'i kaye kaa⁠niikaanisinitc anami'ewikimaa'. Okoweniwak kahkina okiih kikishkaanaawaa ahsapiiwekinowayaanan. Okii anta waapamaawaan tahsh Aaiseyawan kenootamawaanitc Kishemanitoon wetetenitc Emaas (Amoz) enimintc.

³ Miihsh o'o kaa'inaanitc, “Mii hsa 'oweni Hesihkaaya ehkitotc, ‘Noonkom kaa⁠kiishikahk hsa etatawe wahsitaawentaakwan, e⁠kihci nooci'ikooyaank, e⁠koohpaasinaakosiyaank kaye. Kitishinaakosimin hsa ko taapishkoo ihkwe ewii nihtaawikinaawaahsotc kaa⁠te'ahpiihciihsik ci⁠nihtaawiki'iwetc.

⁴ Ahsiiriyawi kihciokimaa iitok okii anoonaan Orapshakewan (Rabshakeh) shimaakanihshiiwikimaan ci⁠kiikitoohtamaakotc ekiih pi maanenimaatc pemaatisinitc Kishemanitoon. Kehcinaac maawiin kaaTipenciketc kiKishemanitoom okii noontawaatokwena' kahkina kaakii ihkitonitc, wiin itahsh ci⁠nana'ahsaanitc i'i kaakii ihkitonitc. Anami'ehtamaw itahsh iki eshkohsewaatc mahshi nesaahsiwintwaa,’ ” okii'inaawaan.

⁵ Ahpii tahsh Aaiseya (Isaiah) kaa⁠noontank kaah⁠pi'ikotc Hesihkaayawan,

⁶ miihsh o'o kaa⁠ishi wiintamawaatc ci⁠awi'inaanitc, otookimaamini, “Mii hsa 'owe kaaTipenciketc ehkitotc, ‘Keko onci sekisihkek i'i kaa⁠ishi noontamek ehkitonitc e⁠maci'inaahpinemimitc otanohkii'aakana' a'a Ahsiiriyawi kihciokimaa.

⁷ Niin hsa ninka ishi'aa otahcaahkonk ci‑inihtank ke⁠onci kiiwetc otahkiimink, miitahsh weti keshi tootawak pashipa'ikewihkomaanink ci⁠onci nihsintc,’ ” okii inaa' ci⁠awi ihkitonitc.

Ahsiiriyawininiwak Miinawaa Kiihkakwesekihtaakosiwaatc

⁸ Ahpii tahsh Orapshake e⁠noontank Ahsiiriyawi kihciokimaan ekii matwe onci maacaanitc Lekish (Lachish) ootenaank, mii hsa kaa⁠ishi maacaatc e⁠anta waapamaatc, miihsh tepwe kaakii miikaanaanitc Lipna (Libnah) ootenaank wenciinitc.

⁹ Ahpii hsa Senaakarip (Sennacherib) e⁠noontank Iicipiiwi kihciokimaan Terhaka (Tirhakah) eshinihkaasonitc, eh⁠piishaanitc ewiih pi miikaanikotc, mii hsa kaakii ishi ishinisha'waatc awiya' o'o ci⁠awi'inaanitc Hesihkaayawan,

¹⁰ “O'o hsa inaahkek Hesihkaaya kehciokimaawitc Coota ahkiink, ‘Keko hsa pakitinintisohken ci⁠wanimihk Kishemanitoo ehpenimoyan o'o e⁠inihk, “Kaawiin hsa ta⁠pakitinaahsii Ahsiiriyawi kihciokimaa ci⁠shaakoocihtootc Ceroosalamini.”

¹¹ Kinoontaan iitok aaniin Ahsiiriyawi kihciokimaa entootank kahkina ahkiin, wiinke piko e⁠nihshiwanaacihtootc. Kitinentam ina tahsh kiin ci⁠naatamaakooyan?

¹² Ninkehteya'aamipaniik iitok okii nihshiwanaacihtoonaawaan ono ootenawan Kosan (Gozan), Heran (Haran), Oresahp (Rezeph), i'i kaye pemaatisinitc Iitinink (Eden) eshitaanitc Telasar (Telassar), kaawiin itahsh kanake omanitoomiwaa' cikii naatamaakowaatc.

¹³ Aaniinti tahsh iki kihciokimaak wenciiwaatc Hemaht (Hamath), Erpat (Arpad), Sehparpeyim (Sepharvaim), Ihna (Hena), Aaipah (Ivvah) kaye?’ inihk,” okii'inaani.

¹⁴ Miitahsh kihciokimaa Hesihkaaya (Hezekiah) kaa⁠ishi otaahpinank i'i oshipii'ikan kaakiih piitoonitc opiitaacimoo' ekii anamihtootc. Miihsh kaa⁠ishi ishiwitootc okihci anami'ewikamikoniink kaaTipencikenitc ekiih tashwekihsitootc enaahsamiinitc.

¹⁵ Miitahsh kaa⁠ishi anami'ehtawaatc kaaTipencikenitc ekii ihkitotc, “Kiin kaaTipencikeyan, Isriyalak weKishemanitoomiwaatc, kehciokimaawapiyan nahsaw eshi'ayaawaatc cerapiik (cherubim), kiin iitok ehta kiKishemanitoow eh⁠tipentaman kahkina okimaawiwinan o'omaa ahkiink. Kiin kaakii oshihtooyan kihcikiishik, ahki kaye.

¹⁶ Oo Tepencikeyan taka waapamihshinaam o'o kaa⁠ishihseyaank, noontamow kaye aaniin Senaakarip ehkitotc e⁠maci'inaahpinemihk kiin kaaTipencikewatc.

¹⁷ Tepencikeyan, tepwe hsa Ahsiiriyawi kihciokimaak onihshiwanaaci'aawaa' kotak pemaatisinitc, otahkiimini kaye.

¹⁸ Okii macihte wepinaawaa' hsa omanitoomini ekii nihshiwanaacihtamawaawaatc, kaawiin iitok kii⁠manitoowihsiiwa'. Kii⁠mihtikowiwa' iitok, kii⁠ahsiniiwiwa' kaye, ininiink ekii onci oshi'aatc.

¹⁹ Taka hsa tahsh Tepencikeyan ninKishemanitoominaan, naatamawihshinaam onci Ahsiiriyawi kihciokimaa. Miitahsh kahkina entahswewaanakisiwaatc o'omaa ahkiink wekimaawiwaatc ci⁠kihkentamowaatc, kiin ehta e⁠mihci peshikoyan, eh⁠Kishemanitoowiyan, Tepencikeyan,” kii‑ihkito.

Aaiseya Kaakii'inaatc Hesihkaayawan

²⁰ Miitahsh Aaiseya wetetetc Emaasoon (Amoz) kaakii anoohkiitc o'o ci⁠awi inimintc Hesihkaayawan, “Mii hsa 'o ehkitotc kaaTipenciketc Isriyalak weKishemanitoomiwaatc, ‘Ekii anami'ehtawiyan hsa onci Senaakarip Ahsiiriyawi kihciokimaa, kikii noontawin hsa.’

²¹ Miitahsh o'o kaaTipenciketc enaatc, ‘I'i kihci ootena Ceroosalam kipaahpi'ikon, kimaanenimikon kaye, miihsh kaye eshi wewepihkwepani'omakahk e⁠maaciipa'iweyan!

²² Awenen hsa kaa⁠maanenimatc, awenen kaye kaa⁠maci'inaahpinematc? Awenen hsa kaa⁠kishiiwe kanoonatc, awenen kaye kehci inenintisoohkantawatc? A'a hsa Kehtentaakositc Isriyaliink wenci tipentaakositc!

²³ Kitaapaci'aak hsa omaaciiyaacimook e⁠maanenimiyan, niin Tepencikeyaan. O'o hsa kitihkit, “Kaa⁠paahtiinowaatc hsa nimiikaasowi otaapaanaahkwak ninka aapaci'aak ci‑ishaayaan maawac eshpatinaakin waciin Lepanan (Lebanon) eyaakin. Ninka kawa'waak maawac eshpahkisowaatc kiishkaahtikook, ohkihkak kaye. Nintootihtaan kaye maawac eshi noohpimiiwank, maawac eshi onishihshink kaa⁠ishi minwaahkweyaak.”

²⁴ Miihsh kaye ehkitoyan, “Ninkii waanihkaataanan hsa onta'ipaanan i'imaa mayaki ahkiink, kaye ekii onci minihkweyaan nipi. Ninkii paanko wepishkaanan kahkina siipiinhsan eyaakin Iicipahkiink,” kitihkit,’ okii'inaan.”

²⁵ “ ‘Kaawiin ina kikiih noontansiin aasha iwe ekii inaahkonikeyaan mewisha? Miitahsh i'i aasha e⁠ishihcikeyaan. Kikii miinin mashkawisiiwin ci⁠shaakoocihtooyan ini ootenawan kaa⁠waahkaayaapihkinikaatekin ci⁠mihci ayohkwaapihkisinkin.

²⁶ Ikiweniwak i'imaa kaa⁠ishitaawaatc kaawiin kekoon cikii ishi nanahkwiiwaatc ekii sekisiwaatc ekii wanaanimisiwaatc taapishkoo ko kaa⁠nihtaawikihcikaatekin kaa⁠ishi pashkwaak, taapishkoo ko mashkohsiwan wakici waahkaa'ikan kaa⁠nihtaawikinkin kaa⁠noonte paahtekin cipwaa kiishikinkin onsaam kii⁠kishitek.’ ”

²⁷ “ ‘Kahkina ohsha ninkihkentaanan eshi'ayaayan eshihcikeyan, eshaayan, kaye eshi nishkenimiyan.

²⁸ Ninkii noontam eshi nishkenimiyan kaye eshi kihci inenintisoyan. Kwaashkwepicikan ninka cihtisitoon kishankwanink, piiwaapihk kika tahkwantamo'in taapishkoo mihtatim kaa⁠onci maamiinopicikaniwitc ci⁠kiiwe wihkopininaan ci⁠anishi kiiweyan kaakii pi'onciiyan,’ kii‑ihkito kaaTipenciketc.”

²⁹ Aaiseya tahsh okii'inaan kihciokimaan Hesihkaayawan, “Mii 'owe ke⁠onci kihkentaakwahk aaniin ke⁠ishihseyan, o'owe ahpii kaa⁠ishihsek miinawaa o'owe ahpii ani ishihsek kika miicin i'i kaa⁠nihtaawikink mihtahkamik, miinawaahsh ahpii ani ishihsek kika kihtike ci⁠manishaman kaakii kihtikaataman kaye ci⁠kihtikaanatwaa shoominak ke⁠amwatwaa.

³⁰ Ikiweniwak pemaatisiwaac Coota kaatinowiwaatc kaakiih pi shaapwiiwaatc ta⁠ishinaakosiwak taapishkoo kihtikaan ociipihk kaa⁠kontaawakink ci⁠onci minokinkin miinan.

³¹ Awiyak kaye i'imaa Ceroosalamink i'imaa kaye Saayan ishpatinaank ta‑ayaawak kaakiih pi shaapwiiwaatc aaniihsh kaaTipenciketc kaaMaawaci mashkawisiitc ekii onentank ewiih tootank i'iwe ci‑ishihsenik.”

³² “Mii 'owe kaaTipenciketc ehkitotc iniweniwan onci kihciokimaan Ahsiiriya ahkiink, ‘Kaawiin oka piintikeshkasiin o'o ootena, kaawiin awaac peshik pihkwahk ta⁠ishi pimoocikehsii o'omaa. Kaawiin awiya shimaakanihsh kaa⁠tahkonank nakaa'ikanini ta⁠piishaahsii ciikaya'ii o'o ootenaank. Kaawiin awiya oka kashkihtoosiin ci⁠oshihtootc ke⁠onci paashicishkank i'iwe waahkaayaapihkinikan.

³³ Ta‑anishi kiiwe i'iweni peshikwan miihkana kaakiih pi'onci takohshink awaac ci⁠piintikeshkasik i'i ootena, niin kaaTipenciketc kaa⁠kiikitoyaan.

³⁴ Ninka naatamawaataan o'o ootena ci⁠naakacihtooyaan, niin iko onci, i'iwe kaye onci a'a nintanohkii'aakan Tepit,’ ” mii 'owe Aaiseya kaakii'inaatc Hesihkaayawan.

³⁵ Miitahsh i'i eh⁠tipihkaninik kaaTipenciketc otencaliman kii‑ishaawan eshi kapehshinitc Ahsiiriyawi shimaakanihsha', ekii nihsaanitc ninkotwaahk nihshwaahsomitanashinaanan tahsink mitaahswaahk (185,000). Weyaapaninik hsa misiwe kii⁠mihci piiwihshinoo' shimaakanihsha'.

³⁶ Miitahsh Senaakarip Ahsiiriyawi kihciokimaa kaa⁠ishi kawinoketc ekiih kiiwetc, Ninipe (Nineveh) ootenaank ekii ishitaatc.

³⁷ Aapitink itahsh eh⁠kiishikaninik e⁠anami'ehtawaatc omanitooman Nisrak (Nisroch) enimintc anami'ewikamikonk, niishin hsa okosihsa' okii nihsikoo' pashipa'ikewihkomaan ekii aapacihtoonitc. Miihsh o'o kaa⁠ishinihkaasonitc Ataramilehk (Adrammelech), Shariisar (Sharezer) itahsh. Weti hsa kii‑ishi tapasiiwak ahkiink Erarat (Ararat). Ini itahsh okosihsan Esaraatan (Esarhaddon) eshinihkaasonitc okii naapishkaakoon ekii kihciokimaawinitc.