2 ᑭᒋᐅᑭᒫᒃ 18 - Ojibwe Kihcimasina'ikan

Ahpii Kiishaakoocihcikaatek Sameriya

¹ Nihsipipoon hsa kaa⁠kihciokimaawinitc weti Isriyal ahkiink Hoshiiyawan (Hoshea) wetetenitc Iilawan (Elah), mii hsa 'i Hesihkaaya (Hezekiah) wetetetc Ehaasan (Ahaz) kaakii maacii kihciokimaawitc i'imaa Coota ahkiink.

² Niishtanashinaanan (25) hsa kiih⁠tahsopipoonwe kii⁠kihciokimaawitc. Niishtanashishaankahso (29) tahsopipoon hsa Ceroosalamink (Jerusalem) kiih⁠tashi kihciokimaawi. Omaamaan hsa Apaaicah (Abijah) kii‑ishinihkaasowan kaakii otetenitc Sehkaraayawan (Zechariah).

³ Kwayahk ihsa kii‑ishihcike Hesihkaaya enaahsamiinitc kaaTipencikenitc taapishkoo kaakii ishihcikenitc okehteya'aamipaniin Tepitoon.

⁴ Okii nihshiwanaacihtoonan hsa e⁠ishpatinaanikin, kaakii nihtaa tashi anami'aank, okiih piikonaa' kaye ahsinii' petahkisonitc enami'ewenimimintc, okiih kiishka'waa' kaye petahkisonitc ihkwewi manitoohkaana' Aasharah (Asherah) enimintc. Okii pikishka'waan kaye osaawaapihkowi kinepikohkaanan Moosihsoon (Moses) kaakii oshi'aanikopanen, aaniihsh piinihsh i'i ishi'ahpii Isriyala' (Israel) okii minaahsamawaani ini kinepikohkaanan. Niioshtan (Nehushtan) hsa kii‑ishinihkaanimaawan.

⁵ Hesihkaaya okiih tepweyenimaan hsa kaaTipencikenitc, weKishemanitoominitc Isriyala'. Kaawiin hsa wiihkaa awiyan i'i nahke otaanaank kiihpi inentaakosihsiiwan kaakii ishi kihciokimaawitc kaawiin kaye kiini ishkwaa ayaatc.

⁶ Okii kihciwenimaan hsa kaaTipencikenitc, kaawiin okii poonihtoohsiin eh⁠piminisha'waatc. Okiih na'ihtamowaanan kahkina otinaahkonikewinini kaaTipenciketc kaakii miinaakopanen Moosihsoon.

⁷ Miihsh i'i kaakii onci wiiciiwikotc kaaTipencikenitc, kii⁠minohse kaye aaniin iko kaa⁠ishihciketc. Okii nakaashkawaan Ahsiiriyawi kihciokimaan (Assyria), kaawiin kaye okii anohkiihtawaahsiin.

⁸ Oyootenaasihkaank hsa kaye kihci ootenaahkaank kaa⁠waahkaa'aataapihkinikaatek okiih tashi shaakooci'aa' Pilistii (Philistines) kaatinowinitc weti kaye Kesa (Gaza) ootenaank, waahkaaya'ii kaye ahkiink.

⁹ Niiwipipoon tahsh Hesihkaaya (Hezekiah) kii⁠kihciokimaawitc; a'a hsa kehciokimaawitc Hoshiiya (Hoshea) eshinihkaasotc, mii 'i kewiin niishwaahso (7) pipoon kii⁠okimaahkantank i'i Isriyal ahkiini. Miitahsh i'i ahpii maamawi kihciokimaan Shalmaniisar (Shalmaneser) eshinihkaasonitc, Siiriya (Syria) ahkiink e⁠onciinitc kaakii waahkaashkaminitc i'i Sameriya (Samaria) ootena.

¹⁰ Nihsopipoon (3) tahsh e⁠ani ishihsenik, mii hsa kaa⁠ishi shaakoocihtoonitc weweni Sameriya ootena. Miitahsh Hesihkaaya ninkotwaahso (6) pipoon ekii kihciokimaawitc, shaankahso (9) pipoon tahsh wiin a'a Hoshiiyawan (Hoshea) kii⁠kihciokimaawiwan i'imaa Isriyal ahkiink. Mii hsa 'i ahpii kii⁠shaakoocihcikaatek i'i Sameriya ootena.

¹¹ A'a tahsh Siiriya kihciokimaa otahkiiminiink okii maaciinaa' Isriyala' ekii onci maaciinaatc, ekii ishiwinaatc Siiriya ahkiink. Aaninta hsa Hela (Halah) ootenaank okii ishi kapehshi'aa'. Aaninta tahsh ciiki siipink Arpar (Habor) eshinihkaatenik kihci ootenaank Kosan (Gozan) eshinihkaatenik, aaninta kaye okii ishi kapehshi'aa' ootenaank Miitiya (Media) ahkiink.

¹² Miitahsh o'o kaakii onci ishihsewaatc aaniihsh onsaam kaawiin okii na'ihtawaahsiwaawaan kaaTipencikenitc oKishemanitoomiwaan. Okiih piikonaanaawaa hsa kaakii ishi ahshotamawaakopanen, okiih piikonaanaawaa kaye kaakii inaahkonikenitc Moosihsoon (Moses) kaakii anohkii'ikonitc kaaTipencikenitc. Kaawiin hsa ko kiih⁠pisintansiiwak, kaawiin kii‑ishihcikehsiiwak kaakii'inintwaa.

Kiihkakwesekimaawak Awiyak Ceroosalamink Kaa'ayaawaatc

¹³ Mitaahshiniiwipipoon itahsh Hesihkaaya kaa⁠kihciokimaawitc, Ahsiiriyawi kihciokimaan Senaakarip (Sennacherib) eshinihkaasonitc okiih pi miikaataamini i'imaa Coota ahkiink kahkina ootenawan kaakii soonkihcikaatenikin. Miihsh kaa⁠ishi kaahcicihtoonitc.

¹⁴ Miitahsh Hesihkaaya kaa⁠kihciokimaawitc Coota ahkiink, o'o kaakii anoohkiitc ci⁠awi'inimintc Senaakaripoon kaakii ayaanitc Lekish (Lachish) ootenaank, “Ninkii mamaashii iinsan. Taka mii 'i ishi pooni'ihshin, kika tipa'amawin hsa aaniin iko minihk entawentaman,” okii'inaan. Miihsh kaa'ikotc ci⁠tipa'amawaatc niishtanawa mitaahswaahk (20,000) tahso tipaapiishkoocikan waapaapihko shooniyaa waapihkoon shikwa niishin mitaahswaahk (2,000) tahso tipaapiishkoocikan osaawi shooniyaa waapihkoon.

¹⁵ Miitahsh Hesihkaaya kaakii miinaatc kahkina waapaapihko shooniyaa waapihkoon eyaanitc i'imaa kaaTipencikenitc okihci anami'ewikamikoniink, ekii miinaatc kaye kahkina eshi wenootaninik kihciokimaawikamik.

¹⁶ Okii pahkwatinaan kaye shooniyaa waapihkoon kaakii ahsaakopanen ishkwaantenk, ishkwaantemaahtikohkaank kaye eyaanikin i'imaa kaaTipencikenitc okihci anami'ewikamikoniink. Miihsh kaa⁠ishi miinaatc Ahsiiriyawi kihciokimaan.

¹⁷ Miitahsh a'a Ahsiiriyawi kihciokimaa kaakiih piicinisha'waatc nihsin (3) otaanihkewikimaama' o'o eshinihkaasonitc, Tartan (Tartan), Orapsaris (Rabsaris), ini kaye Orapshake (Rabshakeh). Lekish (Lachish) ootenaank kiih⁠pi onciiwa' ekiih pi tako wiiciiwaanitc niipiwa' shimaakanihsha' Ceroosalamink ekiih pishi takohshininitc eshi'ayaatc Hesihkaaya. Ahpii hsa tekohshinowaatc i'imaa kii‑ishi kapehshiwak eh⁠tipentamowaatc miihkana kaa⁠pimamoninik kaa⁠ishiikinohkenitc kaashi anohkiinitc. Mii 'owe ciikaya'ii siipiinsihkaan kaapi onciciwank kaa⁠ishi waashipiiyaak eshi'ayaanik.

¹⁸ Kii⁠matwe ihkitowak tahsh e⁠antawenimaawaatc kihciokimaan ci⁠piishaanitc. Okiih pi naasihkaakowaan Ilaayahkiman (Eliakim) kaa⁠naakacihtoonitc okimaawikamik wetetenitc Hilkaaya (Hilkiah), Shepawan (Shebna) oshipii'ikewininiwan, ini kaye Cooah (Joah) kenawentaminitc kekoon eshi oshipii'ikaatenik wetetenitc Esahp (Asaph).

¹⁹ Miitahsh o'o kaa⁠matwe ihkitotc Orapshake, “O'o hsa inihk Hesihkaaya, ‘Mii hsa oweni maawac kihciokimaa, Ahsiiriyawi kihciokimaa ehkitotc, “Wekonen itahsh ehpenimonotamek o'o kaa⁠kehcinaa'oyek?”

²⁰ Kitihkit iitok e⁠ayaayan aaniin eshi miikaasoyan, e⁠ayaayan kaye shimaakanihshiiwi mashkawisiiwin. Anihshaa iitok i'i kaa⁠ihkitoyan. Awenen itahsh ehpenimoyan o'o kaa⁠pisiskenimihsiwan?

²¹ Kipakohsenimaak hsa Iicipahkiink (Egypt) wenciiwaatc ci⁠wiici'inekwaa, mii 'i iitok ke⁠inentaakwahkipan taapishkoo mashkohsi kaa‑aapatahk kii⁠sahka'onk, ci⁠piikohsekipan awiya ci⁠patahkininciihshinkipan. Mii' iitok entootawaawaatc awiyan kahkina ehpenimonotaakowaatc,’ ” okii'inaan.

²² Miihsh kaani ihkitotc, “Kiishpin itahsh o'o ishiyan, ‘KaaTipenciketc ninKishemanitoominaan hsa nintahpenimonotawaanaan,’ miiwan iitok ini Hesihkaaya kaakiih piikonank eshi ayishpatinaanik entashi anami'ehtawimintc kaaTipencikenitc, eshi pakitinaahsoohtamawimintc kaye, o'o tahsh e⁠ihkitotc, ‘O'omaa eshi pakitinaahsonk e'ayaak Ceroosalamink, mii hsa imaa ke⁠tashi anami'ehtawek kaaTipenciketc.’

²³ Taka hsa kiinawaa inentamok ci⁠wiici inentamoomek nintookimaam Ahsiiriyawi kihciokimaa kika miinininim hsa niishink mitaahswaahk (2,000) mihtatimook, kiishpin kota ayaawekwaa ininiwak ke⁠pimiwanepa'ikowaatc.

²⁴ Kaawiin iitok mihsawaa kitaa shaakooci'aahsii maawac mecentaakositc Ahsiiriyawi aanihkewikimaa, shaakooc itahsh e⁠ahpenimoyek Iicipiiwininiwak ci‑ishinisha'amawinekwaa miikaasowi otaapaanaahkwa', ke⁠otaapa'iwenitc kaye!

²⁵ Mii na 'i enentamek o'o kaa⁠pi miikaatamaan, kaa⁠pi nihshiwanaacihtooyaan kaye o'omaa kitahkiimiwaa ewiici'ihsik kaaTipenciketc? Wiin iitok iko kaakiih kanooshitc ci⁠piishaawak o'omaa ahkiink ci⁠pi nihshiwanaacihtoowak, inihk!” kii‑ihkito Orapshake.

²⁶ Miitahsh o'o Ilaayahkim, Shepna, a'a kaye Cooah kaakii'inaawaatc ini Orapshakewan (Rabshakeh), “Erameik (Aramaic) ishikiishwewin hsa aapacihtoon o'o kaa⁠kanooshiyaank, niinawint kitanohkii'aakanak enenintisoyaank, mii hsa iwe nesitohtamaank. Keko wiin Hiiparoowi ishikiishwewin aapacihtoohken pisintamook ohsha iki waahkaayaapihkinikanink eyaawaatc,” okii'inaawaan.

²⁷ Miitahsh o'o kaa'ikowaatc Orapshakewan, “Kitinentaam ina kiinehtawaa, a'a kaye kihciokimaa e⁠onci piicinisha'onankitc nintookimaaminaan ono ci⁠wiintamaakooyek? Iki ohsha kaye kaa⁠kanoonankitwaa eyaawaatc waahkaayaapihkinikanink, ke⁠ani miiciiwaatc omoowiwaan, ke⁠minihkwewaatc kaye oshikiwiniwaan!”

²⁸ Miitahsh o'o kaa⁠matwe ihkitonitc ini aanihkewikimaan Hiiparoowi ishikiishwewin ekii aapacihtoonitc, “Noontamowaahk ehkitotc maawac kehciokimaawitc Ahsiiriyawi kihciokimaa!

²⁹ Mii hsa oweni eninek, ‘Keko pakitinaahkek Hesihkaaya ci⁠waniminek, kaawiin iitok oka kashkihtoohsiin ci⁠naatamawinek eshi mashkawisiiwak.

³⁰ Keko kaye kika kashkimikohsiiwaa e'ininek ci⁠tepweyenimimek ci⁠naatamawinimek kaaTipencikenitc ahpii o'o ihkitotc, “KaaTipenciketc hsa tepwe kika naatamaakonaan; kaawiin hsa ta⁠pakitinaahsii a'a kihciokimaa ci⁠shaakoocihtootc o'o ootena.”

³¹ Keko pisintawaahkek Hesihkaaya!’ Mii hsa 'oweni kihciokimaa Ahsiiriya ahkiink ehkitotc, ‘Taka inentamok ci⁠mino wiiciiwiyek, pisaan pi⁠saaka'amok. Miitahsh kahkina entahshiyek ci⁠ontancikeyek eshi kihtikaanekwaa shoominak, kaye kimiinaahtikoomiwaak, ci⁠onci minihkweyek kaye kitoonta'ipaaniwaank.

³² Niin itahsh ahpii ninka piishaa ci‑ishiwininakook ahkiink inentaakwahk taapishkoo kitahkiiwaank. Mii hsa weti eshi nihtaawikihkin pahkweshikaniminan ke⁠onci oshi'intc pahkweshikan, eshi'ayaakin eshi kihtikaasowaatc shoominak ke⁠onci oshihcikaatenik oshki shoominaapo, eshi'ayaawaatc kaye aalip tinowaahtikook, aamoowi siinsipaahkwat kaye eshi'ayaak. Miitahsh i'imaa ke⁠tashi pimaatisiyek. Keko tahsh pisintawaahkek Hesihkaaya, kika waniwinikowaa iitok o'o kii'ininek, “KaaTipenciketc hsa kika naatamaakonaan.”

³³ Kotak awiyak pemaatisiwaatc ina otaa kashkihtooni omanitoomiwaa' ci⁠shaapwiihtoonitc otahkiimiwaa ahpii kii⁠miikaanikowaatc Ahsiiriyawi kihciokimaan?

³⁴ Aaniinti tahsh iki manitook wenci tipentaakosiwaatc ootenaahkaank ecikaatenikin, Hemaht (Hamath), Erpat (Arpad), Sehparpeyim (Sepharvaim), Ihna (Hena), Aaipah (Ivvah)? Awiya na okii kashkihtoon ci⁠naatamawaatank Sameriya ahki?

³⁵ Aanahpii hsa manitoo ahkiihkaank wenci tipentaakosiwaatc keshkihtoowaatc ci⁠naatamawaatamowaatc otahkiimiwaan niin onci? Aaniin itahsh inaa kaaTipencikenitc keshi kashkihtoohpan ci⁠naatamawaatank Ceroosalam niin onci?’ ihkito Ahsiiriyawi kihciokimaa,” okii'ikowaa'.

³⁶ Pemaatisiwaatc hsa kaawiin kii⁠noontaatihsiiwak, kekoon ekii ishi nahkwehtansikwaa aaniihsh kihciokimaan okii'ikowaan i'i ci‑ishihcikewaatc.

³⁷ Miitahsh a'a Ilaayahkim, wetetetc Hilkaayawan, kaa⁠naakacihtootc okimaawikamik, Shepna kaye oshipii'ikewinini, Cooah kaye, wetetetc Esahpan kaa⁠naakacihtootc masina'ikanan, kii‑ishaawak ekii anta waapamaawaatc Hesihkaayawan, ekiih taashkiikipitoowaatc okikishkikaniwaan. Miihsh kaa⁠ishi wiintamawaawaatc kaakii ihkitonitc ini Orapshakewan (Rabshakeh) miikaasowikimaan.