2 ᑭᒋᐅᑭᒫᒃ 17 - Ojibwe Kihcimasina'ikan

Hoshiiya Ishkwaac Kaakiikihciokimaawitc Isriyal Ahkiink

¹ Mitaahshiniishopipoon (12) tahsh kaa⁠kihciokimaawinitc Ehaasan (Ahaz) weti Coota (Judah) ahkiink, mii hsa 'i ahpii Hoshiiya (Hoshea) wetetetc Iilawan (Elah) kaa⁠kihciokimaawitc i'imaa Sameriya ootenaank Isriyal ahkiink. Shaankahso pipoon hsa minihk kii⁠okimaawi.

² Noociko tahsh kii‑ishihcike enaahsamiinitc kaaTipencikenitc, kaawiin iko wiinke kii‑ishihcikehsii kaakii ishihcikenitc otaanaank kaakiih pi okimaawinitc.

³ Kihciokimaan itahsh Shalmaniisar (Shalmaneser) eshinihkaasonitc Ahsiiriya (Assyria) ahkiink wenciinitc kiih⁠piishaawan ekiih pi miikaanikotc. Miitahsh kaa⁠ishi pakiciihtawaatc ekiih taahtipa'amawaatc taakihs (tax) shooniyaan.

⁴ Mii hsa kaa⁠ishihciketc ekii ishinisha'waatc awiya' weti Iicipahkiink (Egypt) eshi'ayaanitc Kihciokimaan Soo (So) eshinihkaasonitc, ci⁠kanoonimintc ci⁠wiici'ikotc. Kiih⁠poonihcike kaye kaakii nihtaa tipa'amawaahpan entahsopipoon Ahsiiriyawi kihciokimaan. Okiih kaahcitinikoon itahsh i'i e⁠ishihciketc, miihsh kaa⁠ishi tahkonikotc.

Sameriya Kiihkaahcitinikaatek

⁵ Miitahsh a'a Ahsiiriyawi kihciokimaa kaakiih piishaatc i'imaa Isriyal ahkiink ekii waahkaashkank Sameriya ootena nihsopipoon minihk.

⁶ Mii hsa 'i shaankahso pipoon Hoshiiyawan kii⁠kihciokimaawinitc ahpii Ahsiiriyawi kihciokimaa okii kaahcicihtoon Sameriya ootena, kii‑ishiwinaatc kaye Isriyala' weti Ahsiiriya ahkiink. Weti hsa okii ishi kapehshi'aa' kihci ootenaank Hela (Halah) i'imaa kaa‑ayaak Kosan (Gozan) kaa'icikaatek ciiki siipink Hepar (Habor) ecikaatenik kaye eshi ayootenaahkaanik Miitiya (Media) ahkiink.

⁷ Miitahsh o'o Isriyalak kaa⁠onci ishihsewaatc onsaam aaniihsh kii⁠macitootamok enaahsamiinitc kaaTipencikenitc oKishemanitoomiwaan, Iicipahkiink (Egypt) kaakii onci saakiciwinikowaahpan eshi mashkawisiinitc Peroon (Pharaoh) Kihciokimaan. Pahkaan kaye manitoo' okiih piminisha'waawaa',

⁸ kaye tahsh kii‑ishihcikewak eshihcikenitc kotak pemaatisinitc eshi noocihcikenitc kaaTipencikenitc kaakiih saakitaama'waanihpan eni'ishaawaatc. Kii‑ishihcikewak kaye kaakii ishi anoohkiinihpan Isriyali kihciokimaa' ci‑ishihcikewintc.

⁹ Isriyalak hsa kaye kiih⁠kiimooci macitootamok enaahsamiinitc kaaTipencikenitc oKishemanitoomiwaan ekii noocihtoowaatc kweyahkonaakwahsininik. Mii hsa kaa⁠ishihcikewaatc ekii oshihtoowaatc eshi ayishpaanik ke⁠tashi anami'aawaatc eshi ayayaanikin ootenawenhsan, kihci ootenawan kaye.

¹⁰ Aanti hsa piko eshi ayishpatinaanik, shipaayaahtik kaye eshi ayakawaahtenik okii ishi onahsaawaa' anami'ehkaaniwahsinii', okiih patahkinaawaa' kaye ihkwewi manitoohkaana' Aasharah (Asherah) enimintc.

¹¹ Miitahsh i'imaa kaa⁠ishi nihtaa minaahsikewaatc eshi ayishpatinaanik, ekii ishihcikewaatc nehtaa ishihcikenitc kotak pemaatisinitc kaaTipencikenitc kaakiih saakitaama'waanitc eni'ishaawaatc. Noociko hsa kii‑ishihcikewak ekii onci nishki'aawaatc kaaTipencikenitc.

¹² Manitoohkaana' hsa okii anami'ehtawaawaa' aanawiin aana kii'ikowaahpan kaaTipencikenitc, “Keko i'iwe ishihcikehkek!”

¹³ KaaTipenciketc hsa otaanakii ishinishawaa' kaa⁠kanootamaakotc, i'i kaye oniikaani waapancike' kaa⁠niikaani kihkentaminitc ke⁠ishiwepaninik o'o ci‑ishi ayaankwaamimaanitc pemaatisinitc eyaanitc Coota (Judah) ahkiink, Isriyal ahkiink kaye. Miihsh kaa'inaatc, “Nakatamok kimaci'ishiwepisiwiniwaan. Kanawentamok nintinaahkonikewinan, nintihkitowinan kaye kaa⁠inahtekin kahkina Onahshowewinink kaakii inakwaapan kikehteya'aamiwaak. Nintanohkii'aakanak hsa kenootamawiwaatc kaye ninkii anoonaapaniik o'o ci‑ihkitowaahpan,” kii‑ihkito.

¹⁴ Kaawiin itahsh kiih⁠pisitansiiwak ekii ishi shaashiipihtamowaatc taapishkoo okehteya'aamiwaapanii' kaakiih tepweyenimaahsinik kaaTipencikenitc oKishemanitoomini.

¹⁵ Okii aanawentaanaawaa hsa otihkitowinini, i'i kaye otahshotamaakewin kaakii oshihtamawaanikopanen okehteya'aamiwaapanii'. Kaawiin kaye okiih papaapisihkihtansiinaawaa kaakii ishi ayaankwaamimikowaatc. Okiih piminisha'waawaa' manitoohkaana' kekoon enentaakosihsinik, miihsh kewiinawaa kaa‑ani inentaakosiwaatc. Okii nanaapinawaawaa' pemaatisinitc waahkaaya'ii eyaanitc aanawiin ekii onci'ikowaatc kaaTipencikenitc i'i ci‑ishihcikehsikwaa eshihcikenitc.

¹⁶ Okii nakataanaawaan hsa kahkina enaahkonikenitc kaaTipencikenitc oKishemanitoomiwaan. Miitahsh kaye kaa⁠ishihcikewaatc ekii ninkisamowaatc piiwaapihk ekii onci oshi'aawaatc niishin pishihkiiwi manitoohkaana'. Okii oshi'aawaan ihkwewi manitoohkaanan Asharah enimintc. Kii⁠animihkohtaawak kaye e⁠anami'ehtawaawaatc kaa⁠paahtiinonitc wanankohsha', ini kaye Pel (Baal) eshinihkaasonitc manitoohkaan.

¹⁷ Miitahsh kaye kaa⁠ishihcikewaatc ekii macihte'waawaatc okosihsiwaa', otaanihsiwaa' kaye ekiih pakitinaahsowaakewaatc. Okii noocihtoonaawaa kaye mamaantaawisiwin, mitewiwin kaye, noociko ekii ishi macihcikewaatc enaahsamiinitc kaaTipencikenitc, i'imaa ekii onci nishki'aawaatc.

¹⁸ Miitahsh kaaTipenciketc kaakii nihshki'ikotc Isriyala', ninkoci ekii ishiwepinaatc enaahsamiitc. Mii hsa ehta Cootawink wentahkaanesinitc i'imaa kaa⁠ishkwiinitc.

¹⁹ Kaawiin itahsh iko kaye Cootawink wentahkaanesiwaatc okiih kanawentansiinawaa enaahkonikenitc kaaTipencikenitc oKishemanitoomiwaan. Mayaa hsa ko kii‑ishihcikewak kaakii maacihtoonitc ishihcikewinan nehtaa ishihcikenihpan Isriyala'.

²⁰ Miitahsh kaaTipenciketc kaakii aanawenimaatc kahkina Isriyala', ekii nana'ahsaatc pisaan ci⁠shaakooci'ikonitc kaa⁠shiinkenimikonitc. Miihsh i'i piinihsh kaakiih onci caaki wepinaatc keyaapi ci⁠waapamaahsik.

²¹ KaaTipencikenitc okii onci pahkewinikowaan Isriyalak Cootahkaank wenciinitc, miitahsh i'i Isriyalak kaakiih kihciokimaawi'aawaatc Ceroopooaman (Jeroboam) wetetenitc Niipatan (Nebat). Miiwan itahsh ini kaakii wepi'aanitc Isriyala' ci⁠piminisha'waahsinik kaaTipencikenitc, ekii wepi'aanitc kaye ci⁠kihci macitootaminitc.

²² Isriyalak hsa kii‑ishihcikewak kahkina kaakii ishi macitootaminihpan Cerapooaman; kaawiin kiih⁠poonihcikehsiiwak.

²³ Miitahsh piinihsh kaaTipencikenitc ninkoci kaakii ishi wepinikowaatc enaahsamiinitc, mii' iitok i'i kaa⁠ishi ayaankwaamimiwekopan kiih⁠kiikitoohtamaakotc otanohkii'aakana', kaa⁠kanootamaakotc kaye. Miitahsh Isriyalak otahkiimiwaank kaakii onci maaciinintwaa, ekii ishiwinintwaa weti Ahsiiriya ahkiink. Miihsh weti keyaapi eyaawaatc.

Ahsiiriyawininiwak Kiihkapehshi'intwaa Isriyal Ahkiink

²⁴ Miitahsh kaa⁠ishihciketc a'a Ahsiiriyawi kihciokimaa pemaatisinitc ekii onci piinaatc Paapilan (Babylon) ahkiink ootenaahkaank Koohta (Cuthah), Aaipah (Ivvah), Hemaht (Hamath), Sehparpeyim (Sepharvaim) ecikaatenikin ekii ishi kapehshi'aatc ootenaahkaank Sameriya ahkiink ekii naapahsaatc eshi'ayaanihpan Isriyala'. Miihsh kaa⁠ishi tipentaminitc i'i Sameriya ahkiink ekii ayishitaanitc ootenaahkaank.

²⁵ Ahpii hsa maawac iko nihtam eh⁠kapehshinitc i'imaa, kaawiin hsa okii⁠anami'ehtawaahsiini kaaTipencikenitc. Miitahsh kaaTipenciketc kaakii ishinisha'waatc mihshipishiwa' i'imaa mekweya'ii ci⁠nihsaanitc aaninta pemaatisinitc.

²⁶ Miitahsh kaa⁠ishi wiintamawintc Ahsiiriyawi kihciokimaa ekii'inintc, “Iki hsa naa pemaatisiwaatc kaakii ishiwinatwaapan ci⁠kapehshiwaatc weti ootenaahkaank Sameriya ahkiink, kaawiin ohsha naa okihkentansiinaawaa aaniin eshi antawentaminitc ini manitoon weti ahkiink wenci tipentaakosinitc. Okii ishinisha'waani mihshipishiwa' eshi'ayaawaatc, ke⁠nihsikowaatc, kaawiin aaniihsh okihkentansiinaawaa aaniin eshi antawentaminitc,” kii'inaa.

²⁷ Miitahsh o'o Ahsiiriyawi kihciokimaa kaa⁠inaahkoniketc, “Kiiwenisha'ohk hsa peshik anami'ewikimaa kaakii onci piinintipan weti Sameriya ahkiink ci⁠awi ishitaatc, ke⁠kihkino'amawaatc i'i pemaatisinitc aaniin eshi antawentaminitc manitoon weti wenci tipentaakosinitc,” kii‑ihkito.

²⁸ Peshik itahsh Isriyali anami'ewikimaa Sameriya ahkiink kaakii onci piinintipan kiih⁠kiiwe ekii ishi kapehshitc Pehtal (Bethel) ootenaank. Miitahsh a'a kaakiih kihkino'amawaatc pemaatisinitc aaniin keshi anami'ehtawimintc kaaTipencikenitc.

²⁹ Shaakooc itahsh eshi pepahkaanwewaanakisiwaatc pemaatisiwaatc kaakiih pi kapehshiwaatc Sameriya ahkiink okii oshi'aawaa' omanitoohkaanimiwaa', ekii ishi ahsaawaatc manitoohkaani anami'ewikamikonk eshi ayishpatinaanik Isriyala' kaakii oshihtoonitc.

³⁰ Iki hsa Paapilan wenciiwaatc okii oshi'aawaan ke⁠omanitoomiwaatc Sahkat Piinoht (Succoth Benoth) eshinihkaasonitc. Iki kaye Koohta (Cuthah) wenciiwaatc okii oshi'aawaan ke⁠omanitoomiwaatc Nerkal (Nergal) eshinihkaasonitc, iki kaye Hemaht (Hemath) wenciiwaatc okii oshi'aawaan ke⁠omanitoomiwaatc Ahshiima (Ashima) eshinihkaasonitc.

³¹ Iki kaye Aaipah (Ivvah) wenciiwaatc okii oshi'aawaan ke⁠omanitoomiwaatc Nipaas (Nibhaz), Taartak (Tartak) kaye eshinihkaasonitc. Mii kahkina kaakii oshihtamaasowaatc ke⁠omanitoomiwaatc. Ikiweniwak tahsh wiin kaakii onciiwaatc Sehparpeyim (Sepharvaim) kiih⁠pakitinaahsowaakewak oniicaanihsiwaa' kaa‑ankwaahkisikaatek tino pakitinaahsowin eh⁠pakitinaahsoohtamawaawaatc omanitoomiwaa' Atraamalehk (Adrammelech), Anaamalehk (Anammelech) kaye eshinihkaasonitc.

³² Okii kohtaanenimaani hsa kaye kaaTipencikenitc, shaakooc itahsh awenena' iko owiicipimaatisiini okii onci onakimaani ke⁠ani anami'ewanohkiihcikenitc kaakii ayishi anami'aawaatc eshi ayishpatinaanik.

³³ Okii kohtaanenimaani kaye kaaTipencikenitc, shaakooc itahsh okii anami'ehtawaani omanitoomini ekii ishihcikenitc kaakii nihtaa ishihcikenitc weti otahkiiminiink kaah⁠pi'onci piicikaniwinitc.

³⁴ Miitahsh keyaapi noonkom kaa⁠kiishikaninik eshihcikenitc, e⁠noocihtoonitc okehte ishihcikewinini. Kaawiin otanami'ehtawaahsiwaawaan kaaTipencikenitc, kaawiin okii na'ihtansiinaawaa otihkitowinini, anami'ehcikewinan kaye kaakii icikaniwiwaahpan ci⁠tootamowaatc. Kaawiin kaye opapaapisiskentansiinaawaa otoonahshowewinini, otinaahkonikewinini kaye kaakii ishi miinaanikopanen Cekapoon (Jacob) opiiwesiimini. Cekap iitok Isriyal kii‑ishinihkaanaawintipan.

³⁵ Ahpii kaaTipenciketc kii⁠oshihtamawaakopanen ahshotamaakewin Isriyala', o'o hsa kii'inaakopan, “Keko wiin pahkaan manitook anami'ehtawaahkekwaanik; keko kaye animihkohtawaahkekwaanik ci⁠anohkiihtawekwaa; keko kaye pakitinaahsoohtamawaahkekwaanik.

³⁶ Niin ihsa ehta kaaTipencikeyaan kika kohtaanenimim, kika animihkohtaam enaahsamiiyaan, kika pakitinaahsoohtamawim kaye. Niin iitok Iicipahkiink kaakii onci saakiciwininakook ninkihci mashkawisiiwin kii⁠aapacihtooyaan ahpii kiishi niminihkeniyaampaan.

³⁷ Mooshak hsa kaye kika kanawentaam nintihkitowinan, anami'ehcikewinan kaye, nintoonahshowewinan kaye, nintinaahkonikewinan kaye kaakii oshipii'amaan. Keko wiin pahkaan manitook kohtaanenimaahkekwaanik.

³⁸ Keko kaye waniihkehkek i'i ahshotamaakewin kaakii oshihtamawinakook, keko kaye pahkaan manitook pisintawaahkekwaanik.

³⁹ Niin ihsa ehta Tepencikeyaan kiKishemanitoomiwaa kika kohtaanenimim, niin iitok ke⁠naatamawinakook eshi mashkawentaakosiwaatc kaa⁠shiinkeniminekwaa,” okii'inaawaan.

⁴⁰ Kaawiin itahsh okiih pisintaakohsii'. Shaakooc kaawiin okiih poonihtoohsiini okehte ishihcikewinini.

⁴¹ Aana hsa wiin oko pemaatisiwaatc ekii kohtaanenimaawaatc kaaTipencikenitc, shaakooc hsa okii anami'ehtawaawaa' omanitoomiwaa'. Miitahsh keyaapi noonkom kaa⁠kiishikaninik kaa⁠onci ishihcikenitc oniicaanihsiwaa', oshihsiwaa' kaye enaapihcikenitc kaakii ishihcikewaatc.