2 ᑭᒋᐅᑭᒫᒃ 14 - Ojibwe Kihcimasina'ikan

Amahsaaya Kiikihciokimaawitc Coota Ahkiink

¹ Niishopipoon hsa e⁠kihciokimaawinitc Cihooaashan (Jehoash) wetetenitc Ciihoahaasan (Jehoahaz) Isriyal ahkiink, mii hsa 'i ahpii Amahsaaya (Amaziah) wetetetc Cooashan (Joash) kaakii kihciokimaawitc Coota (Judah) ahkiink.

² Niishtanashinaanan (25) hsa kii⁠tahsopipoonwe kii⁠maacii kihciokimaawitc. Niishtanashishaankahso (29) pipoon hsa kii⁠kihciokimaawi i'imaa Ceroosalamink (Jerusalem). Omaamaan hsa Ciihoatan (Jehoaddin) kii‑ishinihkaasowan Ceroosalamink ekii onciinitc.

³ Kwayahk hsa kii‑ishihcike enaahsamiinitc kaaTipencikenitc, kaawiin mayaa cikii ishihciketc Tepitoon okehteya'aaman kaakii ishihcikenitc. Kii‑ishihcike hsa wiin kahkina kaakii ishihcikenitc oteten Cooashan.

⁴ Shikwa tahsh kaawiin okiih piikopitoohsiinan eshi nihtaa tashi pakitinaahsowintc eshi ayishpatinaanik. Pemaatisinitc hsa keyaapi i'imaa kii‑ishi pakitinaahsowa', kii⁠minaahsikewa' kaye.

⁵ Ahpii tahsh kaa‑ayiicikimaawitc i'imaa otookimaawapiwinink, mii hsa kaa⁠ishi nihsaatc i'i aanihkewikimaa' kaakii anoohkiinitc ci⁠nihsimintc oteten kaakii kihciokimaawinihpan.

⁶ Kaawiin itahsh wiin okii nihsaahsii' i'i okosihsini aanihkewikimaa', ekii ishihciketc eshipii'ikaatenik i'i masina'ikan eshi oshipii'ikaatenik Moosihs (Moses) otoonahshowewin, kaaTipenciketc kaakii ishi ihkitokopanen, “Otetemaak hsa kaawiin ta⁠onci nihsaahsiiwak eshi mamaashiinitc oniicaanihsiwaa', apinoonciishak kaye kaawiin ta⁠onci nihsaahsiiwak eshi mamaashiinitc otetewaa'; entahso peshikotc hsa ko awiya eshi mamaashiitc ta⁠onci nihsaa.”

⁷ Okii nihsaa' itahsh kaye mitaahciink mitaahswaahk (10,000) shimaakanihsha' Iitam (Edom) ahkiink wenciinitc weti Shiiwihtaakani Pahsatinaank ecikaatenik. Okiih kaahcicihtoon hsa kaye kihci ootena Siila (Sela) ecikaatenik e⁠miikaasotc. Caahktiiel (Joktheel) hsa okii ishinihkaataan, miihsh keyaapi noonkom kaa⁠kiishikaninik eshinihkaatenik.

⁸ Amahsaaya tahsh okii ishinisha'waa' owiintamaake' o'o ci⁠awi'inaanitc Cihooaashan wetetenitc Ciihoahaasan wetetenitc Ciihoowan kehciokimaawinitc Isriyal ahkiink, “Taka ampe pi⁠miikaashihshin!”

⁹ O'o tahsh Cihooaashan okiih pishi nahkwehtaakoon, “Kaawiminakashii eyaatc Lepanan (Lebanon) ahkiink iinsan okii'inaan kiishkaahtikoon eyaanitc Lepanan ahkiink, ‘Taka miinsh ninkosihs kitaanihsan ci⁠wiitikentiwaatc.’ Miitahsh iinsan aya'aawihsh kiih⁠pimi ayaa i'imaa Lepanan ahkiink ekiih shikoshkawaatc kaawiminakashii'.

¹⁰ Tepwe hsa kikiih shaakooci'aak Iitam ahkiink wenciiwaatc, noonkom itahsh kikakiipaatentam! Inashke kihci inentan i'i kaakiih shaakoocihtwaayan, kitaawinink hsa ayapin keko inkoci onci ishaahken! Wekonen itahsh wa⁠onci maanshi wiiciiwiyan, mii' iitok i'i ke⁠nihshiwanaaci'ikoyan, iki kaye Coota ahkiink eyaawaatc,” okii'ikoon.

¹¹ Amahsaaya tahsh kaawiin kiih⁠pisintansii, miihsh Cihooaashan kehciokimaawinitc Isriyal ahkiink kaakii miikaanikotc. Weti tahsh ootenaank Peht Shiimesh (Beth Shemesh) Coota ahkiink kiih⁠tashiihkotaatiwak.

¹² Coota ahkiink hsa wenciiwaatc okiih shaakooci'ikowaa' i'i Isriyal ahkiink wenciinitc.

¹³ Miitahsh Ciihoahaas Isriyali kihciokimaa kaakiih kaahcitinaatc Amahsaayawan Cootawi kihciokimaan weti Peht Shiimesh ecikaatenik. Kii‑ishaa kaye weti Ceroosalamink ekiih piikopitootc eshi waahkaayaapihkinikaatenik i'imaa ekii onci maacihtaatc ishkwaantenk Iihpariyam ecikaatenik piinihsh weti Kiihkeyishkwaantenk ecikaatenik. Ninkotwaahswaahk tahsomisit (600) ekiih piikopitootc.

¹⁴ Kahkina hsa osaawi shooniyaa waapihkoon, waapaapihko shooniyaa waapihkoon kaye okii maaciinaan, tako kaye kahkina kekoon ehtenikin kaaTipencikenitc otanami'ewikamikoniink. Okii maaciitoonan kaye eshi wenootaninik i'i kihci okimaawikamik. Okii maaciinaa' awiya' kaa⁠tahkonaatc kii⁠ani kiiwetc weti Sameriya ootenaank.

¹⁵ Kahkina tahsh kaakii ayintitc Cihooaash kii⁠kihciokimaawitc, aaniin kaye kaa⁠ishihciketc, aaniin kaye kaa‑ayishiitc kii⁠miikaanaatc Amahsaayawan i'imaa ishi oshipii'ikaateniwan i'imaa masina'ikanink eshi oshipii'ikaasonitc Isriyali kihciokimaa' kaakiih pi ayishihcikenitc.

¹⁶ Ekii ishkwaa pimaatisitc itahsh i'imaa kii‑ishi na'inaa eshi na'inimintc Isriyali kihciokimaa' Sameriya ootenaank. Okosihsan hsa Ceroopooam (Jeroboam) eshinihkaasonitc kii⁠kihciokimaawiwan ekii naapishkaakotc.

Amahsaaya Kehciokimaawitc Coota Ahkiink Kii'ishkwaapimaatisitc

¹⁷ Amahsaaya itahsh wetetetc Cooashan, Coota ahkiink kaakiih tashi kihciokimaawitc mitaahshinaanopipoon kiih⁠pimaatisi kii‑ishkwaa pimaatisinitc Cihooaashan Isriyali kihciokimaan.

¹⁸ Kahkina hsa Amahsaaya kaakii ishihciketc i'imaa ishi oshipii'ikaateniwan eshi oshipii'ikaasonitc i'imaa masina'ikanink Cootawi kihciokimaa' kaakiih pi ayishihcikenitc.

¹⁹ Kiih⁠kiimooci inentamonaaniwanini tahsh ewii nihsintc Amahsaaya i'imaa Ceroosalamink. Weti tahsh ootenaank Lekish (Lachish) ecikaatenik kii⁠ahpa'iwe, kii‑ishinisha'omaawa' hsa tahsh ininiwa' ci⁠piminisha'okotc. Miiwa' hsa 'i kaa⁠nihsikotc.

²⁰ Owiiyaw itahsh mihtatimoonk kii‑ishi ahcikaateni ekiih piicikaatenik i'imaa Ceroosalamink. Miitahsh i'imaa kaa⁠ishi na'inintc eshi na'inimintc kotak kihciokimaa', Tepit Otootenaam ecikaatenik.

²¹ Kahkina hsa tahsh pemaatisiwaatc eyaawaatc Coota ahkiink okii onakimaawaan Aasaraaya (Azariah) eshinihkaasonitc ci⁠kihciokimaawinitc, ci⁠naapishkawaanitc oteteni Amahsaaya kaakii'inimintc.