2 ᑭᒋᐅᑭᒫᒃ 13 - Ojibwe Kihcimasina'ikan

Ciihoahaas Kiikihciokimaawitc Isriyal Ahkiink

¹ Niishtanashinihsopipoon (23) itahsh kii⁠kihciokimaawinitc Cooashan (Joash) weti Coota (Judah) ahkiink wetetenitc Ehasaayawan (Ahaziah), mii hsa 'i ahpii Ciihoahaas (Jehoahaz) wetetetc Ciihoowan (Jehu) kaakii maacii kihciokimaawitc i'imaa Sameriya (Samaria) Isriyal (Israel) ahkiink. Mitaahshiniishwaahso ahki ekii kihciokimaawitc.

² Noociko kii‑ishi maci'ishihcike enaahsamiinitc kaaTipencikenitc, ekii ishihciketc kaakii ishihcikenitc Ceroopooaman (Jeroboam) wetetenitc Niipatan (Nebat). Okii wepi'aa' Isriyala' ci⁠macitootaminitc; kaawiin i'i nahke kii‑ishi poonihcikehsii.

³ Miitahsh Isriyalak kaakii nishki'aawaatc kaaTipencikenitc, ekiih pakitinaanitc ci⁠kihci shahshaakooci'ikowaatc Siiryawi kihciokimaan Haaseal (Hazael) eshinihkaasonitc, ini kaye okosihsini Pen hetaat (Ben hadad) eshinihkaasonitc.

⁴ Miitahsh Ciihoahaas kaakii anami'ehtawaatc kaaTipencikenitc. Miihsh kaa⁠ishi pisintaakotc kaaTipencikenitc aaniihsh okii waapantamini aaniin kaa⁠ishi onsosaami'ikowaatc ini Siiriyawi kihciokimaan.

⁵ KaaTipencikenitc itahsh okii ishinisha'amaakowaan oniikaanisiin ke⁠naatamaakowaatc i'i onci eshi mashkawisiinitc Siiriyawininiwa'. Miitahsh pisaan Isriyalak kaa⁠ishi ayintaawaatc otaawiniwaank, taapishkoo kaakii pi ayintiwaahpan.

⁶ Shaakooc itahsh kaawiin okii nakatansiinaawaan omaci'ishiwepisiwiniwaan Ceroopooaman kaakii ishi wepi'aanikopanen Isriyala' cishi macitootaminitc. Mii keyaapi kaa⁠ishi piminisha'waanitc ini ihkwewi manitoohkaanan Aasharah (Asherah) enimintc keyaapi kiih⁠patahkisowan i'imaa Sameriya (Samaria) ootenaank.

⁷ Ciihoahaas hsa aahpici kiih⁠pankiiwiwa' oshimaakanihshiima', mii ehta kaa⁠tahshinitc naanimitana (50) pemiwanepa'ikonitc, mitaahso (10) miikaasowi otaapaanaahkwa', mitaahciink mitaahswaahk (10,000) itahsh kiih⁠tahshiwa' oshimaakanihshiima'. Ini hsa Siiriyawi kihciokimaan kotak okiih caaki'aani, taapishkoo kekoon kaa⁠pawihsek kaa⁠tahtahkohkaacikaatek ekiih tootawaanitc.

⁸ Kahkina tahsh Ciihoahaas kaakii ishihciketc kii⁠kihciokimaawitc, aaniin kaye kaakiih pi ishi soonkaatisitc ishi oshipii'ikaateniwan i'imaa masina'ikanink eshi oshipii'ikaasonitc kotak Isriyali kihciokimaa' kaakiih pi ayishihcikenitc.

⁹ Ekii ishkwaa pimaatisitc itahsh, kii‑ishi na'inaa eshi na'inimintc okehteya'aamipanii' i'imaa Sameriya ootenaank. Okosihsan hsa tahsh Cihooaash (Jehoash) eshinihkaasonitc kii⁠kihciokimaawiwan ekii naapishkaakotc.

Kihciokimaa Cihooaash Ehtashinsotc

¹⁰ Nihsimitanashiniishwaahso (37) pipoon itahsh kaa⁠kihciokimaawinitc Cooashan (Joash) weti Coota (Judah) ahkiink, mii hsa 'i ahpii Cihooaash (Jehoash) wetetenitc Ciihoahaasan (Jehoahaz) kaakiih kihciokimaawitc Sameriya ootenaank Isriyal ahkiink. Mitaahshininkotwaahso pipoon hsa minihk kii⁠kihciokimaawi.

¹¹ Noociko hsa kii‑ishi macitootam enaahsamiinitc kaaTipencikenitc ekii nakatansik kaakii ishi macitootaminitc Ceroopooaman wetetenitc Niipatan (Nebat), kaakii ishi wepi'aanitc Isriyala' ci‑ishihcikenitc. Mii hsa 'i aanciko kaa‑ani ishihciketc.

¹² Kahkina tahsh kekoon kaakii ishihciketc, kahkina kaye kaa⁠ishi soonkite'etc kii⁠miikaanaatc kihciokimaan Emasaayah (Amaziah) eshinihkaasonitc kehciokimaawinitc Coota ahkiink, ishi oshipii'ikaateniwan i'imaa masina'ikanink eshi oshipii'ikaasonitc kotak Isriyali kihciokimaa' kaakiih pi ayishihcikenitc.

¹³ Kaa⁠ishkwaa pimaatisitc Ciihoahaas kii‑ishi na'inaa imaa Sameriya ootenaank eshi na'inimintc Isriyali kihciokimaa'. Ceroopooaman itahsh okii naapishkaakoon ekii kihciokimaawinitc.

Ilaaihsha Kii'ishkwaapimaatisitc

¹⁴ Ilaaihsha hsa kii⁠aahkosi, mii hsa 'iweni kaakii ani nihsikotc. Cihooaashan (Jehoash) kehciokimaawinitc Isriyal ahkiink hsa kiih⁠piishaawan ekiih pi waapamikotc, miihsh kaa⁠ishi mawimikotc. Miitahsh kaa⁠ihkitonitc, “Nitetenk eneniminaan, kiin iitok kihci onaatamaake i'imaa Isriyalihkaank,” kii‑ihkitowan.

¹⁵ Miitahsh Ilaaihsha kaa'inaatc, “Naasihkaw mihtikwaap, aaninta kaye pihkwahkoon.” Miihsh kaa⁠ishihcikenitc.

¹⁶ “Otaahpin a'a mihtikwaap,” okii'inaan ini Isriyali kihciokimaan. Ahpii wetaahpinaanitc, mii hsa Ilaaihsha kaa⁠ishi saaminaatc oninciinink.

¹⁷ Miitahsh kaa'inaatc, “Paahkinan i'i waahsehcikan eyaak waapanonk inahke.” Kii‑ishihcikewan itahsh. Miihsh kaa'inaatc, “Haw, pimociken!” Miitahsh kihciokimaan kaa⁠ishi pimocikenitc. Ilaaihsha tahsh kii‑ihkito, “Mii hsa 'i enwaatek i'i pihkwahk kaaTipencikenitc opihkwahk ke⁠onci shaakooci'atwaa Siiriya (Syria) ahkiink eyaawaatc! Wiinke hsa ko kika caaki'aak weti Ehpek (Ahpek) ecikaatenik,” okii'inaan.

¹⁸ Miitahsh kaa‑ani'inaatc kihciokimaan ci⁠otaahpinaminitc ini pihkwahkoon. Kaa⁠otaahpinaminitc itahsh mii 'i kaa'inaatc, “Pahkihte'an ihsa mihtahkamik!” Nihsink itahsh okiih pahkihte'amini, miihsh i'i minihk.

¹⁹ Miitahsh kaakii nishkaatisitc a'a Ilaaihsha wetininiimikotc Kishemanitoon ekii'inaatc, “Naanink ohsha, komaa kaye ninkotwaahcink kitaakiih pahkite'an i'i mihtahkamik. Miitahsh i'i cikiih shaakooci'atwaapan Siiriyawininiwak, wiinke cikiih caaki'atwaapan. Nihsink itahsh ehta kika shaakooci'aak,” okii'inaan.

²⁰ Miitahsh Ilaaihsha kaa⁠ishi ishkwaa pimaatisitc ekii na'inintc kaye. Entahso ahki hsa kii⁠nihtaa takohshinoo' i'imaa Isriyal ahkiink ininiwa' ehpi piikwahkamikisinitc Moowap (Moab) ahkiink wenciinitc.

²¹ Miitahsh aapitink Isriyalak ewii na'inaawaatc ininiwan, ketahtawin okii waapamaawaa' i'i pemi mamaashiinitc, miihsh kaa⁠ishi piinci wepinaawaatc ini kaawii na'inaawaahpan i'imaa Ilaaihshawan eshi na'inimintc. Ahpii e⁠saamishkaminitc Ilaaihshawan ohkanini, mii 'i kaa⁠ishi kiiwe pimaatisinitc, miina ekii anishi niipawinitc.

Isriyalak Kiimiikaanikowaatc Siiriyawininiwa'

²² Minihk itahsh Cihooaash kaa⁠kihciokimaawitc wiinke hsa okii onsosaami'ikoon ini kihciokimaan Hasealwan Siiriya ahkiink wenciinitc.

²³ Isriyalak hsa tahsh okii minotootaakowaan kaaTipencikenitc ekiih koohpaatenimikowaatc ekii naakatawenimikowaatc onci i'i kaakii ishi ahshotamawaanikopanen Eparahaaman, Aaisikoon, kaye Cekapoon. Piinihsh itahsh o'o ishi ahpii kaawiin inentansiiwan ci⁠nihshiwanaaci'intwaa, ci⁠waniihkenotaakowaatc kaye.

²⁴ Haseal hsa tahsh kii‑ishkwaa pimaatisitc, okosihsan Pen hetaat (Ben hadad) eshinihkaasonitc kii⁠kihciokimaawiwan.

²⁵ Cihooaash itahsh okiih kiiwe mahkamaan Pen hetaatan ootenawan Isriyal ahkiink wenci tipentaakwaninikin. Pen hetaat iitok kii⁠mahkamaakopan Ciihoahaasan ono ootenawan mekwaa kii⁠kihciokimaawitc.