2 ᑲᕒᐃᑎᔭᓇᒃ 5 - Ojibwe Kihcimasina'ikan

¹ Kikihkentaamin hsa o'o pakwaanekamik kaataanotamank o'omaa ahkiink, mii hsa i'i kiwiiyawinaan, piikopicikaatek, kitayaamin waahkaa'ikan Kishemanitoo wiin iko kaakii'oshihtamawinank weti kihcikiishikonk ci‑ishitaawank. Kaawiin tahsh wiin oninciimaank kii'oncioshihcikaatehsinoon, mooshak iko ahpane ta‑ayaamakan.

² Kaawiin tahsh kitanihsaa'ohsiimin e'moohkoneyank e'mihsawentamank ini kitaawininaanin kihcikiishikonk kaaonciikin, cipihsihkamoonikooyank.

³ Ahpii hsa pihsihkamank, kaawiin kikaishinaakosihsiimin kekoon ehkikishkansiwank.

⁴ O'omaa hsa e'ayaayank ahkiiwipakwaanekamikonk, kitinamanci'omin ewii'moohkoneyank onsaam ehkakwaatakihtooyank. Kaawiin tahsh wiin kitinentansiimin cikiihcikoshkamoonikooyank ono kitahkiiwi⁠wiiyawinaanin, i'i hsa e'antawentamank ewii'ayaayank i'i kihcikiishikonk kaa‑ayaak cipihsihkamoonikooyank, i'i hsa kaaninipoomakahk cini‑ishiankonaakwahk i'imaa pimaatisiwinink.

⁵ Kishemanitoo hsa kaakiihkwayaanci'inank pahkaan ci‑ishinaakosiyank, kikii'miinikonaan otAhcaahkwan ewiihkihkinawaacihtootc i'i kaakii'ishiahshotamawinank.

⁶ Miitahsh mooshak kaaoncimashkawentamank, kikihkentaamin kaye minihk iko ketaayank kiwiiyawinaanink, kaawiin kitayaahsiimin weti kaaTipenciketc otaawinink.

⁷ Tepwehtamowinink hsa kitishipimohsemin, kaawiin wiin kaaishiwaapantamank.

⁸ Aahpici hsa kimashkawentaamin e'ishimihsawentamank kaye ewii'nakatamank ono kiwiiyawinaanin, ewii'wiiciayaamank kaaTipenciketc weti kaashiayaatc.

⁹ Maawac tahsh eshimihsawentamank citootamank, mii hsa i'i ciminwaapaminank o'omaa kaashitaayank, komaa kaye weti.

¹⁰ Aaniihsh kahkina kaatahshiyank oncitako ishinaakwan cinakishkawank Christ enaahsamiitc, citipaahkoninank. Awiya hsa tashitipa'amawaa kahkina kekoonini kaakii'ishihciketc i'imaa ahkiink mekwaa owiiyawink kiipimaatisitc, komaa kaye kaaminohcikekopanen, komaa kaye kaamaashihcikekopanen.

Nintinanohkiimin pemaatisiwaatc ciminowiiciiwaawaatc Kishemanitoon

¹¹ Ninkihkentaamin hsa wekonen kaaicikaatek cikohsintc a'a kaaTipenciketc, miitahsh kaye kaaoncikakwekashkimankitwaa kotak awiyak. Mii hsa eshipakohsenimikooyek i'imaa kite'iwaank cikihkenimiyaank taapishkoo Kishemanitoo kaashikihkenimiyamintc.

¹² Kaawiin niinawint miinawaa niwii'mihci minotashintisohsiimin, kiwii'miinikoom kekoon keoncikihtakimihshiyaank, cikashkihtooyek hsa kwayahk cinahkwehtawekwaa iki kaakihci‑inentamowaatc aaniin eshinaakosinitc ininiwan akwaciink inahke, i'imaa tahsh opimaatisiwininiink cikii'ishikanawaapamaawaahpan.

¹³ Kiishpin tahsh ishinaakosiyaank ehkiiwashkweyaatisiyaank, Kishemanitoo ohsha kaaonci‑ishiayaayaank kaa‑anohkiihtawankitc. Kiishpin kaye pakahkentamaank, kiinawaa ohsha ci⁠wiici'ikooyek kaaonci‑ishiayaayaank.

¹⁴ Christ ihsa osaaki'iwewin nintipenimikomin, ehkihkentamaank kaye peshik hsa inini ekii'nipoohtamawaatc kahkina ininiwa'. Miitahsh kahkina hsa awiyak kaakii'onci⁠wiiciiwaawaatc i'imaa onipowininiink.

¹⁵ Kahkina hsa awiya' okii'nipohtamawaa', iki hsa kaapimaatisiwaatc ci‑ishipimaatisiwaatc ciminwaapamikowaatc ini kaakii'nipohtamaakowaatc, kaakiihkiiwepimaatisi'imintc wiinawaa onci. Kaawiin wiin wiinawaa ehta kaaoncipimaatisiwaatc.

¹⁶ Kaawiin tahsh noonkom nintishi⁠kanawaapamaahsiwaanaan awiya taapishkoo inini kaaishikanawaapanciketc. Kiishpin hsa i'i aapitink kii'ishikanawaapamankitipan a'a Christ, kaawiin noonkom i'i nintishihcikehsiimin.

¹⁷ Kiishpin hsa awiya ayaatc i'imaa Christink, mii hsa 'i kii'oshkioshihcikaniwitc. Kahkina hsa kehteya'iin kii'ishkwaahsewan, oshkaya'iin tahsh kiihtakohshinoomakanoon.

¹⁸ Kishemanitoo hsa o'o kahkina otishihcikewin, i'imaa Christink kaakii'naaciwiihkopininank ciminowiiciiwankitc, kaakii'miininankitc kaye o'o anohkiiwinini cinaaciwiihkopinankitwaa pemaatisiwaatc cinaasihkawaawaatc Kishemanitoon.

¹⁹ Kishemanitoo hsa i'imaa Christink kii'ayaa ekii'naaciwiihkopitamaasotc pemaatisinitc cikiiwewiiciiwikotc o'omaa ahkiink kaa‑ayaanitc. Kaawiin okii'akintamawaahsii' i'i kaakii'ishimacitootaminitc. Ninkiihpakitinamaakonaan hsa i'iweni ihkitowinini kaaishitashintenik ewii'minowiiciiwaatc pemaatisinitc.

²⁰ Niinawint hsa kaakiikitohtamawankitc a'a Christ, Kishemanitoo hsa nintaapaci'ikonaan ehkanooninek, miitahsh eshipakohsenimikooyek aaniihsh ninkiikitoohtamawaanaan Christ: “Kiiwenaasihkawihk Kishemanitoo.”

²¹ Christ tahsh wiihkaa kaakiihkihkentansik macitootamowinini, shaakooc itahsh macitootamowinink okiihtinowi'ikoon Kishemanitoon kiinawint onci, kiinawint meshkwac Kishemanitoo okwayahkwaatisiwinink citinoowiyank e'wiiciiwank Christ.