2 ᑲᕒᐃᑎᔭᓇᒃ 4 - Ojibwe Kihcimasina'ikan

Pwaal otanohkiiwin, otaanimisiwin kaye

¹ Kishemanitoo hsa kaashawenciketc ninkii'miinikonaan o'o anami'ewianohkiiwin cianohkaatamaank. Miitahsh kaaoncipakitentansiwaank.

² Kahkina hsa ninkii'wepinaamin kiimoocihcikewinan, kaa‑akasinaakwahkin kaye ishihcikewinan, kaawiin wiin kaye niwayeshimiwehsiimin. Kaawiin wiin kaye pahkaan nintinwehtaawaahsiimin Kishemanitoo otihkitowin. I'imaa hsa kaaishipayahtehtaakwaninik Kishemanitoo otepwewin mii hsa 'imaa eshipimaatisiyaank, Kishemanitoo enaahsamiitc, kwayahk hsa ci‑ishinaakosiyaank kahkina awiya kaaishiminwaapantank.

³ Kiishpin hsa minwaacimowin kaakakiihkwaatamaank kaacikaatek, mii hsa ehkaatamawintwaa iki kaawanihshinowaatc.

⁴ Aaniihsh a'a maciaya'aa kaamanitoowitc o'omaa ahkiink okii'ishi'aa' ciwaapihsinik i'imaa otinentamowininiink, mii hsa tahsh kaaoncitepwehtansinik. Kaawiin tahsh kaye onantawenimaahsii' ciwaapantaminitc i'i kaaishiwaahseyaanik i'i minwaacimowinini, i'imaa kaaishitashintenik Christ okihci‑inentaakosiwin. Aaniihsh mayaa piko Kishemanitoonk ishinaakosi a'a Christ.

⁵ Kaawiin tahsh wiin niinawint ninkakiihkwaanitisohsiimin, Ciisahs Christ hsa nintihkitomin ehTipenciketc, niinawint itahsh nintihkitomin ehpamiihtaakooyek Ciisahs onci.

⁶ Kishemanitoo hsa kaakii'ihkitotc: “I'imaa hsa kaaishikashkiitipihkahk, kaawaahseyaak tasaakaahte,” mii hsa a'awe peshikwan Kishemanitoo kaakii'waahseyaahtootc ninte'inaanin cikihkentamowankitc Kishemanitoo okihci‑inentaakosiwin, Christ e'waahsiinkweshkaakotc.

⁷ Niinawint hsa kaa‑ayaayaank o'o kaakihci‑inentamaank wenootisiwin, mii hsa eshinaakosiyaank taapishkoo waapikaniwahkihkonk eshipiina'amaank, cinaakwaninik Kishemanitoo maawac e'mashkawisiitc, kaawiin niinawint.

⁸ Misiwe nintoonci mikoshkaaciihkaakoomin, kaawiin tahsh ninshaakoocishkaakoohsiimin; e'waanentamaank kaye ninkotink, kaawiin tahsh mahshi nimpakiciihsiimin.

⁹ Mooshak kaye ninkakwaataki'ikoomin, shaakooc tahsh kaawiin wiihkaa ninakanikoohsiimin; ehkawiwepinikooyaank kaye kaawiin tahsh mahshi ninihshiwanaaci'ikoohsiimin.

¹⁰ Miitahsh eshinaakwahk mooshak ehpimiwitaawankitc Ciisahs onipowin i'imaa niwiiyawinaanink, i'i hsa kaaonci‑ishinaakwahk opimaatisiwin ciwaapancikaatenik i'imaa niwiiyawinaanink.

¹¹ I'imaa hsa nimpimaatisiwininaanink, mii hsa eshinaakosiyaank taapishkoo mooshak e'naniisaanisiyaank e'ahshonipoyaank Ciisahs onci. I'i hsa opimaatisiwin ciwaapancikaatenik i'imaa niwiiyawinaanink kaawahkenipoomakahkin.

¹² Mii hsa 'o kaa⁠icikaatek, nipowin niinawint ninooci'ikoomin i'imaa nimpimaatisiwininaanink, kiinawaa tahsh pimaatisiwin anohkiimakan kipimaatisiwiniwaank.

¹³ Keniinawint tahsh peshikwan eshitepweyentamaank Kihcimasina'ikan eshipii'ikaatek: “Ninkiihkiikit aaniihsh ehtepwehtamaan.” Miitahsh peshikwan keniinawint e'ishitepwehtamaank kaaoncikiikitoyaank.

¹⁴ A'a hsa Kishemanitoo kaakiihkiiwepimaatisi'aatc ini kaaTipencikenitc Ciisahsoon, ninkihkenimaanaan hsa cikiiwepimaatisi'iyamintc aaniihsh niwiiciiwaanaan Ciisahs. Kikaishiwinikonaan tahsh maamaw ci‑ishiayaawank weti kaashiayaatc.

¹⁵ Kiinawaa o'o kahkina kaaonci‑ishihsek; iki hsa kaapaahtiinowaatc pemaatisiwaatc e'anitepinikowaatc Kishemanitoon okishewaatisiwinini aahpici tahsh tapaahtiinatinoon ini anami'aawinan cinanaahkomintc Kishemanitoo kaakihci‑inentaakositc.

E'ishipimaatisink i'imaa tepwehtamowinink

¹⁶ Miitahsh o'o wiihkaa kaaoncipakitentansiwaank. Aanawiin niwiiyawinaanin e'aninipoomakahkin, shaakooc tahsh nintahcaahkonaanik nimpimaatisiwininaanink anioshkioshihcikaniwiwak entahsokiishik.

¹⁷ O'o hsa kaaishiaanimisiyaank ninaankentaamin, aaniihsh acina ehta ninooci'ikomin. Miitahsh keonci⁠otihsikoyaank maawac kaakihci‑inentaakwahk kihci‑inentaakosiwin wiihkaa kepoonihsehsinok.

¹⁸ Kaawiin tahsh wiin ini kaanaakwahkin ninkanawaapantansiimin, ini hsa kaanaakwahsinokin; ini hsa kaanaakwahkin acina ehta ayaawan, ini tahsh wiin kaanaakwahsinokin pishihshik ayaawan.