2 ᑲᕒᐃᑎᔭᓇᒃ 3 - Ojibwe Kihcimasina'ikan

Kaa‑anohkiihtamowaatc i'i oshkiahshotamaatiwin

¹ Mii na'i enihtaakosiyaank miinawaa e'mihcikihci inenintisoyaank? Mii na'i keniinawint eshinaakosiyaank taapishkoo kotak kaaishinaakosiwaatc memwehc oshipii'ikanan cipimiwitooyaank ciwaapantamek, komaa kaye oshipii'ikan cimiishiyaank keoncikihkenimikooyaank?

² Kiinawaa hsa eshipimaatisiyek mii 'iwe oshipii'ikan wencikihkenimikooyaank, ninte'inaanink e'oshipii'ikaasoyek. Miitahsh kahkina awiyak okihkentaanaawaa, owaapantaanaawaa, taapishkoo e'anamihtoowaatc.

³ Aahpici payahtenaakwan Christ e'kii'oshipii'ank o'o oshipii'ikan. Kaawiin wiin oshipii'ikanaapooni okii'aapacihtoohsiin, ini hsa okii'aapaci'aan otAhcaahkoni kaapimaatisinitc Kishemanitoon. Kaawiin wiin napakaapihkahsiniink kii'ishioshipii'ikehsii, pemaatisinitc ote'iniink ohsha kii'ishioshipii'ike.

⁴ Miitahsh o'o kaa'onci‑ihkitoyaank, aaniihsh ninkehcinaa'aanaan Kishemanitoo e'wiiciiwankitc Christ.

⁵ Kaawiin tahsh kekoon nintayaahsiimin keonci‑ihkitoyaankipan ehkashkihtooyaank citootamaank o'o anohkiiwin, Kishemanitoo hsa wiin nimiinikonaan cikashkihtooyaank.

⁶ A'a hsa kaakii'oshi'iyamintc kaaoncikashkihtooyaank cianohkaatamaank i'i oshkiahshotamaatiwin, kaawiin wiin i'i kaamihcioshipii'ikaatek Onahshowewin, i'i hsa Kishemanitoo otAhcaahkwan kaamiikiwenitc. I'i hsa kaamihcioshipii'ikaatek Onahshowewin nipowin i'imaa onciimakan. A'a tahsh wiin Ahcaahk miikiwe pimaatisiwin.

Eshikihci inentaakwahk oshkiahshotamaatiwin

⁷ I'i hsa Onahshowewin ekii'mihcioshipii'ikaatek i'imaa napakahsiniink, Kishemanitoo hsa kaye okihci inentaakosiwin kii'naakwanini ahpii i'i Onahshowewin kii'miikiwetc. A'a hsa kaye Moosihs (Moses) kaakii'ishiwaahsiinkwesotc aahpici wiipa kii'aniankonaakwanini. Miitahsh kaa'ahpiihci mashkawinaakwaninik Isriyalak (Israel) kaawiin okiihkashkihtoohsiinaawaa cikanawaapamaawaatc Moosihsoon. Kiishpin tahsh i'i Onashowewin kaapiitamaakowaatc nipowin ekii'ahpiihci kihci inentaakwahk mekwaa e'anohkiimakahk,

⁸ nawac hsa i'imaa kaaishianohkiitc a'a Ahcaahk awahshime takihci inentaakwan.

⁹ Kiishpin hsa i'i kaapiitamaakoyank nipowin ekiihkihci inentaakwahk, nawac iitok i'i kaapimaaci'iwemakahk takihci inentaakwan.

¹⁰ Noonkom tahsh e'ayaayank i'i nawac kaakihci inentaakwahk, i'i hsa kaakiihkihci inentaakwahkipan kaakii'waahseyaakipan aasha kii'ishkwaahse.

¹¹ Kiishpin hsa i'i kaakiihkihci inentaakwahk acina ehta ekii'ayaak, nawac i'i noonkom mooshak kaa‑ayaak takihci inentaakwan.

¹² O'o tahsh e'ishiahpenimoyaank, mii hsa kaaoncisoonkite'eyaank kiikiikitoyaank.

¹³ Kaawiin wiin nintishinaakosihsiimin taapishkoo Moosihs kaakiihkipiinkwehpinitisotc kipiikinikanini ekii'aapacihtootc, mii hsa i'i kaakii'onci‑ishihciketc ciwaapantansinik i'i Isriyala' (Israel) pemaatisinitc i'i kaakii'ishiwaahsiinkwesotc ekii'aniankonaakwaninik.

¹⁴ Mii hsa kaa'ishinaakwaninikin ini otinentamowiniwaan taapishkoo ekiihkipiikinikaatenikin. Miitahsh kaye noonkom kaakiishikaninik keyaapi i'i kipiikinikanini eshikipiikinikaatenik i'imaa otinentamowiniwaank kiianamihtoowaatc i'i masina'ikanini, kehte⁠ahshotamaakewinini kaashitashintenik. Paanimaa hsa awiya kiiwiiciiwaatc Christan, mii hsa paanimaa i'i kipiikinikanini e'otaahpinikaatenik.

¹⁵ Mihsawaa ko noonkom kaakiishikaninik kiinoontamowaatc e'anamihcikaatenik i'i Moosihs otOonahshowewinini, kaawiin nihsitohtansiiwak, taapishkoo keyaapi ehkipakootenik i'i kipiikinikanini i'imaa otinentamowiniwaank.

¹⁶ Ahpii tahsh awiya kiikwehkiihtawaatc kaaTipencikenitc, kipiikinikan otaahpinikaateni.

¹⁷ A'a tahsh kaaTipenciketc kaatashinsotc mii hsa a'awe Kishemanitoo otAhcaahkwan. Aanti tahsh iko a'a Ahcaahk eyaatc, mii hsa 'imaa eyaamakahk pakitinikoowin.

¹⁸ Kiinawint tahsh kahkina kimohsheyiinkwe⁠waahseshkamowaamin kaaTipenciketc okihci inentaakosiwin. Kitishi'ikonaan ci‑ishinaakosiyank ciayaawank okihci inentaakosiwin, mooshak kaanikihci inentaakwaninik. KaaTipenciketc otAhcaahkwan ohsha kaaishi'inank.