2 ᑲᕒᐃᑎᔭᓇᒃ 12 - Ojibwe Kihcimasina'ikan

Pwaal kaakii'ishimaamahkaataapanciketc

¹ Oncita tahsh iko cimamiihkwaanitisoyaan ishinaakwan. Aanawiin kaawiin kekoon tainaapatahsinoon. Niwiihtashintaanan tahsh ini inaapantamowinan ini kaye waapanta'ikoowinan kaaTipenciketc kaakii'miishitc.

² Ninkihkenimaa hsa peshik inini Christan kaawiiciiwikotc mitaahshiniiwipipoonakaani maawiin ekii'ishiwicikaniwitc weti maawac kaaishi‑ishpaanik kiishikonk. –Kaawiin tahsh mayaa ninkihkentansiin kiishpin o'o kaa'ishihsekopanen, komaa kaye kaa'inaapantamokopanen, Kishemanitoo hsa ehta okihkentaan.–

³ Ehkihkenimak tahsh wa'a inini, Kishemanitoo hsa okihkentaan komaa kaye kaa'ishihsenikwen komaa kaye kaa'inaapantaminikwen.

⁴ Ninkihkenimaa hsa ekii'ishiwicikaniwitc weti kaaishiwinintwaa kaashawentaakosiwaatc, ekii'noontank hsa kekoonan kaakashkihcikaatehsininikin mayaa citashintenikin, kaawiin kaye awiya pakitinaahsii citipaatotank ini kekoonan.

⁵ Niwii'mamiihkwaanaa tahsh a'a tino inini. Kaawiin tahsh niin niwii'mamiihkwaanitisohsii, ini hsa ehta cinaakwahkin kaaishiniinamisiyaan.

⁶ Mihsawaa ko kiishpin wii'mamiihkwaanitisoyaan, kaawiin nintaakakiipaasinaakosihsii. Aaniihsh nintepwe i'i kaawii'ihkitoyaan. Kaawiin tahsh niwii'mamiihkwaanitisohsii aaniihsh kaawiin awiya ninantawenimaahsii awahshime ci‑inenimitc o'o kaaishiwaapamitc i'i kaye kaaishinoontawitc e'ihkitoyaan.

⁷ Ekii'waapantamaan tahsh kekoonan maawac iko e'minonaakwahkin, cioncikihci‑inenimohsiwaan tahsh, mii hsa ninkii'miinikoo keonciwiihsakentamaan i'imaa niwiiyawink. Mii 'i maciaya'aa (Satan) kaakiihpiicinisha'amawitc mooshak ehpahpahkihte'okowak niwiiyawink, mii hsa tahsh i'i kaaoncikihci‑inenimohsiwaan.

⁸ Nihswaa (3) tahsh nintaanakiihkanoonaa kaaTipenciketc ekiihkakwecimak ciotaahpinank i'i niwiihsakentamowinini.

⁹ O'o tahsh ninkii'ishinahkwehtaak: “Ninkishewaatisiwin ohsha ehta kitepihse'ikon, mii hsa i'imaa kiniinamisiwinink maawac eshinaakwahk nimashkawisiiwin.” Mii hsa tahsh i'i keshiciihkentamaan cikihci‑inentamaan i'i kaaishiniinamisiyaan, aaniihsh Christ omashkawisiiwin ninantawentamowaan cikikishkaakowak.

¹⁰ Miitahsh i'i keshina'entamaan i'imaa kaaishiniinamisiyaan, noociko kaye kaaishi ikooyaan, kaaishikakwaatakihseyaan kaye, kaaishikakwaataki'ikooyaan kaye, mooshak kaye kaaishisanakihseyaan Christ onci. Ahpii tahsh kiiniinamisiyaan, miitahsh maawac eshimashkawisiiyaan.

Pwaal kaakii'ishisaaki'aatc otepwehtamoo' Kwaarintink kaa‑ayaanitc

¹¹ Aahpici tahsh ninkakiipaasinaakos, kiinawaa aaniihsh kaakii'ishi'iyek ci‑ishihcikeyaan! Kiinawaa ohsha ishinaakwan kwayahk citashimiyekipan. Kekoon tahsh wiin e'ahpiihtentaakosihsiwaan, shaakooc tahsh kaawiin awahshime nintapahsentaakosihsii i'i kaa‑ahpiihtentaakosiwaatc kaakihci‑inentaakosiwaatc ishinisha'waakanink kaainwaanitisowaatc.

¹² Ini hsa kihkinawaacihcikewinan ini kaye maamahkaacihcikewinan kaye mashkawi‑ishihcikewinan kaakii'ishihcikeyaan i'imaa kaashiayaayek wiihkaa ekiihpakiciihsiwaan, mii hsa i'imaa eshinaakwahk keniin hsa kwayahk ishinisha'waakan ehtinowiyaan!

¹³ Wekonen tahsh wenci‑inentamek kiinawaa pahkaan ekiihtootaakooyek ahpiihc wiin iki kotak otepwehtamook kaaishipiintikewaatc? Onsaam ina ekiihkakwecimihsinowinakook ciwiitoohkawiyek kaaonci‑inentamek? Taka tahsh poonentamawihshik kaakii‑ishimamaashiihkantawinakook!

¹⁴ Miitahsh aasha nihsink (3) ekiihkiishiihtaayaan ewii'antawaapaminakookipan. Kaawiin tahsh wiin kekoon kika‑antotamawihsinooninim. Kiinawaa ohsha kaa‑antaweniminakook, kaawiin wiin kitayi'iimiwaan. Aaniihsh apinoonciishak kaawiin otahshamaahsiwaawaa' i'i oniiki'ikoowaa', iki hsa oniiki'ikoomaak otahshamaawaa' oniicaanihsiwaa'.

¹⁵ Aahpici hsa ninkaminwentaan kahkina kekoon cipakitinamaan, cipakitinitisoyaan kaye ciwiici'inakook. Aana tahsh wiinke kitaanasaaki'ininim kiinawaa tahsh pankii kisaaki'ihshim.

¹⁶ Siiyaaken maawiin aasha kitepwehtaam ekii'mikoshkaaci'ihsinowinakook. Awiya tahsh taihkito ekii'nakacikayenisiyaan, kaye ehkashkiminakook e'wayeshihtaakosiyaan.

¹⁷ Mii na 'i kaa'ishihcikeyaan ekii'wayeshiminakook, ekii'aapaci'akwaa iki kaakii'ishinisha'wakwaa weti kaaishiayaayek?

¹⁸ Taitahs (Titus) ohsha ninkiihkanoonaa ci‑ishaatc peshik kotak otanami'aan cipiwiiciiwaatc. Mii na tahsh ehkitoyek Taitahs ekii'wayeshiminek? Pepahkaan ina nintinentaamin, pepahkaan ina nintishihcikemin?

¹⁹ Mii maawiin mooshak enenimiyaank ehkakwenaatamaasoyaank. Kaawiin hsa i'i nintishihcikehsiimin! Christ ohshehta kaaishiantaweniminankitc ci‑ihkitowankitc nintihkitomin, Kishemanitoo enaahsamiitc. Kiinawaa tahsh ciompikiyek!

²⁰ Aahpici tahsh ninaniisaanentam ahpii weti otihsinakook kihcipahkaan ci‑ishiayaayek, ekaa ci‑ishiayaahsiwek kaa'ishiantaweniminakook, keniin tahsh kihcipahkaan ci‑ishiayaayaan ahpii waapamiyek. Miitahsh kaye eshinaniisaanentamaan cimihkamaan kiihkaantiwin, ayaahshenintiwin, wahkewikitaasowin, kakweniikaanenintisowin, anoociko itiwin, tashintiwin, kihci‑inenintisowin, kekoon kaye sesik e'ishihsehsinok.

²¹ Miitahsh eshisekisiyaan miinawaa ahpii otihsinakook, Kishemanitoo ci‑ishi'itc ciakaahsinaakosiwak i'imaa enaahsamiiyek, mii 'i keoncimawiyaan iki niipiwa' kaakii'macitootamowaatc otaanaank, mahshi tahsh kaye e'wepinansikwaa ini kaawiinentaakwaninikin otishihcikewiniwaan, kaye ekiihpihshikwaatisiwaatc, kaawiin kaye kiimanaaishihcikehsiiwak kekii'ishihcikehsikipan.