2 ᑲᕒᐃᑎᔭᓇᒃ 11 - Ojibwe Kihcimasina'ikan

Pwaal iki tahsh kaye ishinisha'waakanak kaainwaanitisowaatc

¹ Miitahsh eshimihsaweniminakook, cishashiipenimiyek i'i ehkakiipaatenimoyaan pankii. Ninkehcinaa' itahsh ehshashiipenimiyek.

² Kitoontenimininim hsa keniin taapishkoo Kishemanitoo kaaishionteniminek! Mii 'i aaniihsh eshinaakosiyek taapishkoo kaapehkisitc ihkwe ekii'ahshotamawakipan Christ wiin ehta ciwiitikeminek.

³ Kiinawaa tahsh e'mihcipeshiko'ek weweni kaye e'wiiciiwek Christ, kinaniisaanenimininim kekiinawaa ciwanimikooyek kitinentamowiniwaank taapishkoo Iip (Eve) kaakii‑ishiwanimikotc kaakakiihtaawiinitc macikinepikoon.

⁴ Awiya hsa kii'otihsinek pahkaan Ciisahsoon kiitashimaatc, mii hsa 'awe eshitepwehtawek, kaawiin niinawint kaakiihtashimankitc mayaa Ciisahs, kitootaahpinaawaa kaye pahkaan ahcaahk, kaatinowihsinik Kishemanitoo otAhcaahkwan kaakii'otaahpinimekipan, kitootaahpinaam kaye pahkaan minwaacimowin, niinawint tahsh wiin kwayahk ekiihkakiihkimikooyek.

⁵ Kaawiin tahsh kaye nintinenintisohsii nawac niin ehtapahsentaakosiyaan ahpiihc wiin iki kaamihci‑inwaanitisowaatc eniikaanentaakosiwaatc ishinisha'waakanak.

⁶ Komaa kaye kaawiin ninihtaakaakiikitohsii, kaawiin tahsh wiin kihkentamaawin ninoontehsehsii. Misiwe iitok kikii'ishiwaapanta'ikoom kaakii'ishihcikeyaank ehtepweyaank o'o kaakii'ihkitoyaank.

⁷ Kaawiin tahsh kekoon kikii'inakintamawihsinooninim ahpii ekiihkakiihkwaatamaan o'o minwaacimowin, ekiihkakiihkwaanak Kishemanitoo. Aahpici kaye ninkiihtapahsenintis kiinawaa cikihci‑inentaakosiyek. Mii na tahsh ekii'mamaashiiyaan?

⁸ Ahpii hsa weti kaakiihtananohkiiyaan kaashiayaayek, kotak hsa pepahkaan otepwehtamook kaaiishimaawaci'itiwaatc ninkiihtipa'amaakook. Miitahsh ekii'ishinaakosiyaan taapishkoo ekiihkimootimakwaa shooniyaan. Miitahsh i'i ewii'wiici'inakook kaakii'onci‑ishihsek.

⁹ Weti tahsh ahpii kaakii'wiiciiwinakook, kaawiin hsa awiya kaatahshiyek ninkii'mikoshkaasomaahsii ciwiici'itc ahpii shooniyaa ekii'noontehseyaan. Kiitanami'aanaanik hsa Maahsitooniyaawahkiink (Macedonia) kaa'ayaawaatc ninkiihpiitamaakook kahkina kekoonini kaakii'ishinoontehseyaan. Kaawiin hsa wiihkaa kekoon kika‑antotamawihsinooninim. Mii hsa 'i mooshak keishihcikeyaan.

¹⁰ I'i tahsh Christ otepwewin ehkikishkaakoyaan, kaawiin hsa wiihkaa ninkapakiciihsii citashintamaan o'o kaakii'ishiminohcikeyaan i'imaa misiwe Ahkeyaawahkiink (Achaia) ishaayaan.

¹¹ Aaniin itahsh? Onsaam ina ehsaaki'ihsinawinakook? Kishemanitoo hsa okihkentaan ehsaaki'inakook.

¹² Miitahsh iko keishihcikeyaan i'i mooshak kaa'ishihcikeyaan. Aaniihsh kaawiin ninantawenimaahsiik iki kaainwaanitisowaatc ishinisha'waakanak ci ishimamiihkwaanitisowaatc, ci‑ihkitowaatc kaye kewiinawaa hsa e'inanohkiiwaatc peshikwan kaainanohkiiyaank.

¹³ Kaawiin hsa kwayahk ishinisha'waakanak tinowihsiiwak. Mii hsa iki kaainwaanitisowaatc ishinisha'waakanak, kaakiiwanimowaatc ehtashintamowaatc otanohkiiwiniwaan. Taapishkoo tahsh kaye tepwe Christ otishinisha'waakana' e'ishinaakosi'itisowaatc.

¹⁴ Keko tahsh maamahkaatentankek, aaniihsh maciaya'aa kewiin ishi'itiso taapishkoo encal kaawaahsenaakositc.

¹⁵ Keko kaye kihci‑inentankek kiishpin otanohkii'aakana' ishi'itisonitc taapishkoo e'ishiwiicihtwaanitc i'imaa kwayahkwaatisiwinink. Weti hsa ishkwaac tatipa'amawaawak kahkina kekoonini kaakii'ishihcikewaatc.

Pwaal okakwaatakihsewinan ehtashintank

¹⁶ Miinawaa tahsh nintihkit, keko awiya tainentansii ehkakiipaatisiyaan. Kiishpin tahsh i'i inenimihshiyek, mii hsa 'i pisaan iko ishiotaahpinihshik, keniin hsa pankii cimamiihkwaanitisoyaan.

¹⁷ O'o tahsh kaawii'ihkitoyaan noonkom, kaawiin iitok wiin a'a kaaTipenciketc kaaishiantawenimitc ci‑ihkitoyaan. O'o tahsh kaaishimamiihkwaanitisoyaan, mii hsa eshinaakosiyaan taapishkoo ehkakiipaatisiyaan.

¹⁸ Aahpici tahsh ehpaahtiinowaatc awiyak kaamamiihkwaanitisowaatc i'imaa wiiyaahsipimaatisiwinink onci, mii hsa keniin keishihcikeyaan.

¹⁹ Kitinentaamowaatok maawiin aahpici ehkakiihtaawentamek ehshashiipenimekwaa kekiipaatisiwaatc!

²⁰ Kishashiipenimaawaa hsa kaye awiya kaa‑ayaanooninek e'mikoshkaasominek kekoonini ci‑ishihcikeyek, awiya kaye kaawayeshiminek, awiya kaye kaamamaancikoninek, awiya kaye kaamacinawinek komaa kaye kaapahsiinkwe'onek.

²¹ Aahpici hsa nintakac e'ihkitoyaan ekiihshaakwenimoyaank niinawint o'o citootaakooyek. Kiishpin awiya wii'mamiihkwaatank kekoonini, keniin hsa mii peshikwan keishihcikeyaan. Aahpici maawiin ninkakiipaasinaakos.

²² Hiiparoowiwak (Hebrews) ina? keniin hsa Hiiparoo nintinow. Isriyaliiwiwak (Israelites) ina? Keniin hsa Isriyal nintinow. Eparahaamink (Abraham) ina kii'onciiwak? Keniin hsa mii 'imaa wentahkaanesiyaan.

²³ Christ ina i'i otanohkii'aakana'? Ninkakakiipaasihtaakos maawiin o'o kaawii'ihkitoyaan! Nawac itahsh niin kwayahk anohkii'aakan ahpiihc wiinawaa! Nawac niin ninkiihkihcianohkii! Nawac niin paahtiinwaa ninkiihkipa'okoo, nawac niin kaye paahtiinwaa ninkiihpahpahshanshe'okoo, nawac niin kaye paahtiinwaa kekaa ninkii'nip.

²⁴ Coowak nihsimitanahshishaankahcink (39) hsa awiyan opahpahshanshe'waawaan aapitink ehpahshanshe'waawaatc. Naanink itahsh i'iwe ninkiihtootaakook Coowak.

²⁵ Nihsink (3) kaye ninkiihpahpahkihte'okoo mihtikoon ekii'aapacihcikaatekin. Aapitink kaye ninkiihpapimwahsina'ikoo, nihswaa (3) kaye ekiihpiikwa'ank ninkihciciimaaninaan, aapitink tahsh kapetipihk, kapekiishik kaye ninkiihpapaamaa'ok kihcikamiink.

²⁶ Mooshak kaye ehpapaamiayaayaan, ekii'naniisaanisiyaan cinihkipiiyaan siipiihkaank, ekii'naniisaani'iwaatc kaye kiimoocishkak, ekii'naniisaani'iwaatc kaye Coowak kaye ekaa kaaCoowiwihsikwaa, ekii'naniisaanisiyaan kaye kihciootenaahkaank, ekii'naniisaanisiyaan kaye pikwatahkamikonk, ekii'naniisaanisiyaan kaye kihcikamiink, ekii'naniisaani'iwaatc kaye iki kaakii'anami'ehkaasowaatc.

²⁷ Aahpici tahsh kaye ekiihkihcianohkiiyaan, ekiihkakwaatakihseyaan kaye, mooshak kaye weweni ekii'nipaahsiwaan, mooshak kaye ekiiwii'wiihsiniyaan, ekiiwii'minihkweyaan kaye, mooshak kaye miicim teminihk ekii'ayaahsiwaan, akwaciink kaye mooshak ekii'ayaayaan, ekiihkiihkaciyaan kaye mooshak.

²⁸ Kaawiin tahsh wiin kahkina kekoonan niwii'wiintansiinan. Entahsokiishik kaye e'oncikosikwentamaan e'naanaakatawenimakwaa otepwehtamook kahkina ayaawinink kaaishimaawaci'itiwaatc.

²⁹ Awiya hsa kiimacenimotc aahpici hsa ninkohpaatenimaa. Awiya kaye kii'ishiwinintc macitootamowinink, aahpici hsa ninkihcimaanentam.

³⁰ Kiishpin tahsh wii'mamiihkwaanitisoyaan, mii hsa ini ketashintamaan ciwiintamaan aaniin eshiniinamisiyaan.

³¹ Kishemanitoon kaaTipenciketc Ciisahs Kaaoyoohsitc mooshak kaamiikwehciwenimimintc, ninkihkenimik ekaa ehkiiwanimohsiwaan.

³² Weti tahsh mekwaa Timaaskahsink (Damascus) kii'ayaayaan, a'a hsa aanihkeokimaa kaakiihtipenimikotc ini kihciokimaan Ariitahsan (Aretas) okii'ahsaa' shimaakanihsha' misiwe kihci‑ishkwaantemihkaank ewiihkakwetahkonitc.

³³ I'imaa tahsh kaakii'ishipakoneyaak kaashiwaahkaayaapihkinikaatek ootena mii 'imaa ninkii'onci niihsaapiikinikoo, kihciwiikopiimahkahkonk ekii'ishikaanikooyaan. Miitahsh i'imaa kaakii'oncishaapwiihkantawak a'a kihciokimaa.