1 ᑭᒋᐅᑭᒫᒃ 3 - Ojibwe Kihcimasina'ikan

Swaalaman Kiikakwetwetc Cimiinikoowisitc Kakiihtaawentamowin

¹ Swaalaman (Solomon) hsa kii‑inentamook kihciokimaan Iicipahkiink (Egypt) wenciinitc ci⁠mino wiiciintiwaatc, ekii wiiwitc otaanihsini. Okiih piinaan hsa ini ihkwewan i'imaa ootenaank ecikaatenik Tepit (David) Otootenaam piinihsh ekiih kiishihtootc otookimaawikamik, kihci anami'ewikamikoni kaye, kaakii waahkaayaapihkinikaatenik kaye Ceroosalam (Jerusalem).

² Kaawiin iitok mahshi kii⁠oshihcikaatehsinini kihci anami'ewikamik ke⁠tanentaakosinitc kaaTipencikenitc. Miitahsh pemaatisinitc keyaapi kaakii onci ishi pakitinaahsonitc misiwe kaakii ishi nihtaa anami'aawintc.

³ Swaalaman hsa okiih saaki'aan kaaTipencikenitc, ekii ishi pimohsetc kaakii ihkitonitc otetepaniin Tepitoon. Shaakooc itahsh kii‑ishi pakitinaahso, kii‑ishi minaahsike kaye misiwe piko aanti kaa⁠tashi nihtaa anami'aawintc.

⁴ Kihciokimaa tahsh kii‑ishaa ootenaank Kipiyan (Gibeon) eshinihkaatenik. Mii hsa weti kaakii ishi'ayaanik maawac kehci inentaakwaninik ishpatinaa. Swaalaman hsa mitaahswaahk 1,000 pakitinaahsowinan kaakii ankwaahkitenikin tino okiih pakitinaanan i'imaa kaakii ishi nihtaa pakitinaahsonaaniwaninik.

⁵ Miitahsh weti Kipiyanonk e⁠ayaatc kaaTipencikenitc kaakii naakosiihtaakotc ekii inaapantank eh⁠tipihkaninik. Miitahsh kaa'ikotc Kishemanitoon, “Wekonen iko ke⁠kakwecimiyan, kika miinin,” ekii'ikotc.

⁶ Miihsh o'o Swaalaman kaa⁠ishi nahkwehtawaatc, “Kiin hsa weweni kikiih kihci minotootawaa kaakii anohkii'atc Tepit kaakii oteteyaan, aahpici hsa tepwe, kwayahk kaye, kiih⁠kwayahkonaakwanini ote' enaahsamiiwatc. Kaawiin tahsh mahshi kipooni minotootawaahsii. Kimiinimaan iitok okosihsan ci⁠namatapinitc kihciokimaawapiwinink noonkom kaa⁠kiishikaninik.

⁷ Oo Tepencikeyan, kaa⁠Kishemanitoowiyan, kiin iitok kikii'ish ci⁠namatapiyaan okimaawapiwinink ci⁠naapishkawak Tepit kaakii oteteyaan; aanawiin e⁠apinoonciishiwentaakosiyaan. Kaawiin ohsha ninkihkentansiin aaniin inahke ke⁠ishikimaawiyaampaan.

⁸ Inashke tahsh o'omaa nintayaa, niin kaa⁠pamiihtawinaan mekweya'ii kaashi ayaawaatc pemaatisiwaatc kiin kaakii onaapamatwaa. Aahpici kaye paahtiinowak, kaawiin ta⁠kashkihcikaniwihsiiwak ci⁠akimintwaapan.

⁹ Miihsh eshi kakweciminaan ci⁠miishiyan kakiihtaawentamowin i'imaa ninte'ink ci⁠onaahkonakwaa kipimaatisiimak ci⁠nihsitawentamaan kaa⁠minonaakwahk, i'i kaye kaa⁠macinaakwahk. Awenen hsa ke⁠kashkihtoohpan ci⁠onaahkonaahpan o'o kaa⁠kihci paahtiinonitc pemaatisinitc kaa⁠tipenimimatc?” okii'inaan.

¹⁰ KaaTipencikenitc hsa wiinke okii minwaapantamini Swaalaman inahke kaakii ishi kakwecimaatc.

¹¹ Kishemanitoon tahsh o'o okii'ikoon, “O'owe tahsh inahke e⁠ishi kakwetweyan, eh⁠kakwetwehsiwan kinwesh ci⁠pimaatisiyan, kiin iko kaye ci⁠wenootisiyan; e⁠ishi kakwetwehsiwan kaye ci⁠nihsintwaa kaa⁠shiinkenimihkwaa. Tekwac ihsa kitishi kakwetwe ci⁠nihsitawentaman ke⁠onci nihsitohtaman weweni ci‑inaahkonikeyan.

¹² Ninka ishihcike hsa 'i aaniin eshi kakwecimiyan. Kika miinin hsa aanciihke kakiihtaawentamowin, nihsitohtamowin kaye, kaawiin hsa awiya i'i wiihkaa otaanaank cipwaa ayaayan kiih⁠pimi ishi'ayaahsii, kaawiin kaye awiya wiihkaa i'i ta⁠ishi'ayaahsii kii‑ishkwaa ayaayan.

¹³ Kika tako miinin tahsh kaye kekoon kekwetwehsiwan. Aahpici hsa kika kakiihtaawentam, kika wenootis kaye, kika kihtentaakos kaye. Kaawiin hsa kaa⁠tahshiwaatc kihciokimaak awiya ta⁠inentaakosihsii kaa⁠inentaakosiyan minihk iko ke⁠pimaatisiyan.

¹⁴ Kiishpin kota ishi pimohseyan nintishihtwaawinink, kanawentaman kaye nintihkitowin, nintinaahkonikewinan kaye taapishkoo Tepit kaakii oteteyan kaakii ishi pimohsetc, kika inenimin kaye kinwesh ci⁠pimaatisiyan,” okii'ikoon.

¹⁵ Miitahsh Swaalaman kaakii koshkositc, miihsh kaakiih kihkentank inankwana ekii inaapantank. Kii⁠ani ishi kiiwe tahsh weti Ceroosalamink ekii inaahsamikaapawitc eshi'ayaanik kaaTipencikenitc otahshotamaakemahkahkoni. Mii hsa weti kaah⁠tashi pakitinaahsotc ekiih pakitinank tino wiinke kaa‑ankwaahkisikaatenik pakitinaahsowinan kaye wenci mino wiiciintink. Miitahsh kaye kaa⁠ishi wiihkwamaatc kahkina otanohkii'aakana'.

Swaalaman Kiinana'ahtootc Senakentaakwaninik

¹⁶ Niishin itahsh pihshikwaacihkwewa' okiih pi'anta waapamikoo' ekii oncishkawikaapawinitc eshi'ayaatc kihciokimaa.

¹⁷ Miitahsh o'o peshik kaa⁠ihkitonitc, “Nintookimaam, wa'a hsa ihkwe peshikwan waahkaa'ikanink nintishitaamin. Miitahsh kaakii oniicaanihsiyaan mekwaa ewiicitaamitc.

¹⁸ Nihsokiishik (3) itahsh kaa⁠ishkwaa nihtaawikitc niniicaanis, mii 'i kewiin kaakii oniicaanihsitc. Niinehtawint hsa ehta i'imaa ninkii ayaamin. Kaawiin pahkaan awiya i'imaa cikii ayaatc waahkaa'ikanink.

¹⁹ Eh⁠tipihkaninik itahsh kii⁠nipowan okosihsan wa'a ihkwe, aaniihsh okiih patakoshkawaan.

²⁰ Miitahsh iinsan eh⁠tipihkaninik e⁠nipaawak kaa⁠ishi wanishkaatc ekii otaahpinaatc ninkosihsan e⁠wiihpemimak eshi pimihshinowak. Miihsh iinsan kaa⁠ishi pimihshimaatc eshi coocoohshimehshink, ini tahsh kaakii niponitc okosihsan okii ishi pakitinaan eshi coocoohshimehshinowak.

²¹ Eh⁠kishepaawakahk e⁠wanishkaayaan ewii nooni'ak ninkosihs, kaawiin kiih⁠pimaatisihsii. Weweni tahsh ekii naanaakatawaapamak, mii 'i kaakii kihkentamaan e⁠aawihsik ninkosihs kaakii nihtaawiki'ak,” okii'ikoon.

²² Ini tahsh kotak ihkwewan kii‑ihkitowan, “Anihshaa'i ihkito. Niin hsa wiin a'a kaa⁠pimaatisitc ninkosihs; a'a tahsh kiin kaa⁠nipotc kikosihs!” kii‑ihkitowan. Ini tahsh nihtam kaakiih kanoonikotc okii'inaani ini kotak, “Kaawiin ohsha! A'a ohsha kaa⁠nipotc kiin kikosihs; a'a tahsh kaa⁠pimaatisitc, mii niin a'a ninkosihs!” okii'inaani. Miihsh kaakii kiihkaantinitc enaahsamiitc kihciokimaa.

²³ Miitahsh kihciokimaa kaakii ihkitotc, “Wa'a hsa peshik o'o ihkito, ‘Niin hsa wiin a'a kaa⁠pimaatisitc ninkosihs; a'a tahsh kiin kaa⁠nipotc kikosihs,’ a'a tahsh kotak o'o e⁠ihkitotc, ‘Kaawiin ohsha! A'a ohsha kaa⁠nipotc kiin kikosihs; a'a tahsh kaa⁠pimaatisitc, mii niin a'a ninkosihs.’ ”

²⁴ Miihsh kaa‑ani ihkitotc, “Taka piitamawihshik pashipa'ikewihkomaan!” Miihsh kaa⁠ishi piitamawintc.

²⁵ Miitahsh o'o kaa⁠inaahkoniketc, “Taashkishohk a'a kaa⁠pimaatisitc apinoonciish, aapihta ci⁠miinitc wa'a ihkwe, aapihta kaye a'a kotak ihkwe,” kii‑ihkito.

²⁶ A'a tahsh ihkwe weniicaanihsitc kaakiih pimaatisinitc kwiiwisenhsan, okiih koohpaatenimaan okosihsan o'o ekii'inaatc kihciokimaan, “Nintookimaam, taka miish a'a kotak ihkwe ini kaa⁠pimaatisinitc apinoonciishan! Keko nihsaahken a'a apinoonciish!” kii‑ihkito. A'a tahsh kotak ihkwe kii‑ihkito, “Kaawiin iinsan awiya oka ayaawaahsiin o'o kaashi niinshiyank, pisaan taashkisho!” kii‑ihkito.

²⁷ Miihsh o'o kihciokimaa kaa⁠ihkitotc, “Miinihk a'a ihkwe ini apinoonciishan kaa⁠pimaatisinitc kaa⁠ihkitotc ci⁠nihsimaahsiwintc. Mii hsa awe tepwe omaamaamaa. Keko nihsaahkek a'a apinoonciish,” kii‑ihkito.

²⁸ Ahpii tahsh kahkina Isriyalak (Israel) e⁠noontamowaatc aaniin kihciokimaan kaa⁠ishi nana'ahcikenitc, mii hsa kaa⁠ishi kihtenimaawaatc, aaniihsh mii 'i kaakii kihkentamowaatc Kishemanitoon ekii miinikonitc kakiihtaawentamowin aaniin keshi nana'ahtoonitc o'o kaakii ishihsenik.