1 ᑭᒋᐅᑭᒫᒃ 22 - Ojibwe Kihcimasina'ikan

Maaihkeya Niiyaak Kiiwiintamawaatc Ehaapoon Aaniin Keishihsenitc

¹ Nihsopipoon hsa kii‑ishihse ekii onci miikaatihsikwaa Isriyalak (Israel), iki kaye Siiriya (Syria) eyaawaatc.

² Nihsipipoon itahsh eshihsenik Ceoohshahpaat (Jehoshaphat) kaakii kihciokimaawitc Coota (Judah) ahkiink kii‑ishaa Isriyalahkiink ekii anta waapamaatc Ehaapoon (Ahab) kihciokimaan.

³ Ehaap itahsh okii ishi kakwecimaa' otaanihkewikimaama', “Kaawiin kikihkentansiim ootena Oremaht, Kiliyat ahkiink (Ramoth Gilead) eh⁠tipentamank, kaawiin itahsh kekoon kitishihcikehsiimin ci⁠kiiwe mahkamankipan kehciokimaawitc weti Siiriya ahkiink?” kii‑ihkito.

⁴ Miitahsh kaakiih kakwecimaatc Ceoohshahpaatan, “Kitaa wiiciiwihsh ina ci⁠awi miikaatamank i'i ootena Oremaht, Kiliyat ahkiink eyaak?” okii'inaan. Miitahsh o'o kaa⁠ishi nahkwehtaakotc, “Kaatinowiyan iitok nintinow, nimpimaatisiimak kaye taapishkoo e⁠opimaatisiimiyan, nimihtatimoomak kaye taapishkoo kiin e⁠omihtatimoomiyan,” okii'ikoon.

⁵ Ceoohshahpaatan hsa okii ani'ikoon, “Taka hsa pinamaa anta kihkentamowaataa kaaTipenciketc ke⁠ihkitokwen,” okii'ikoon.

⁶ Miitahsh Ehaap kehciokimaawitc i'imaa Isriyalahkiink kaa⁠ishi antomaatc niiwaahk (400) okanootamaake' ekii'inaatc, “Ninka ishaa na weti ootenaank Oremaht, Kiliyat ahkiink kaa'icikaatek ci⁠anta miikaasoyaan, komaa kaye kaawiin nintaa ishaahsii?” Miitahsh kaa'ikotc, “Pisaan ishaan, kaaTipenciketc ohsha kimiinik ci⁠shaakooci'imatc ini kihciokimaan,” okii'ikoo'.

⁷ O'o tahsh ini kihci okimaan Ceoohshahpaatan (Jehoshaphat) okii'ikoon, “Kaawiin ina peshik ayaahsii o'omaa kaa⁠kanootamawaatc kaaTipencikenitc ke⁠kakwecimankipan?” okii'ikoon.

⁸ Miitahsh o'o Ehaap kaa⁠ihkitotc, “Keyaapi hsa peshik aana ayaa inini ke⁠kakwecimankipan ci⁠kakwecimaatc kaaTipencikenitc. Wiinke tahsh nishiinkenimaa a'a inini aaniihsh kaawiin wiihkaa niminwaacimohtaakohsii niin onci niiyaak kekoonini aanakii wiintamawitc, mii ehta ko noociko e⁠nihtaa'ishitc. Maaihkeya (Micaiah) hsa ishinihkaaso, kaa⁠okosihsimikotc Imalawan (Imlah),” kii‑ihkito. O'o tahsh Ceoohshahpaat kii‑ihkitowan, “Taka hsanaa keko i'inahke tashi kaakiikitohsii kihciokimaa.”

⁹ Ehaap tahsh okii'inaan peshik kaakii naanaakacihcikenitc, “Maacaan shemaak iko naasihkaw Maaihkeya (Micaiah) kaa⁠okosihsimikotc Imalawan,” okii'inaan.

¹⁰ Iki hsa minciniish kihciokimaak, Ehaap kehciokimaawitc Isriyalahkiink, a'a kaye Ceoohshahpaat kehciokimaawitc Coota ahkiink, okiih kikishkaanaawaan otookimaa kikishkikaniwaan. Kii⁠namatapiwak kaye otookimaawapiwiniwaank i'imaa eshi nihtaa pawikanaatenik manoomin wenci piintikenk i'i ishkwaantem kihci ootena Sameriya (Samaria). Kahkina tahsh okanootamaake' ininiwa' okii wiintamaakowaa' aaniin niiyaak keni ishiwepaninik.

¹¹ Peshik tahsh ini Setihkaayawan (Zedekiah) wetetenitc Kiineana (Chenaanah) eshinihkaasonitc, kii⁠oshi'aanikopan piiwaapihkwehshkana' miitahsh kaa⁠ihkitonitc, “Mii ohsha 'o ehkitotc kaaTipenciketc, miiwak hsa oko ke⁠aapaci'atwaa miikaanatwaa ininiwak Siiriya wenciiwaatc piinihsh wawiinke ci⁠caaki'atwaa,” kii‑ihkitowan.

¹² I'i tahsh kotak okanootamaake' mii 'i peshikwan kaa⁠ihkitonitc. “Awi miikaatamok i'i ootena Oremaht weti Kiliyat ahkiink eyaak. Kika shaakoocihtwaam ohsha, aaniihsh kaaTipenciketc kimiinikowaa ci⁠shaakoocihtwaawek,” kii‑ihkitowa'.

¹³ Iki tahsh wiin ininiwak kaakii ishinisha'ontwaa ci'awi kanoonaawaatc Maaihkeyawan, o'o okii'inaawaan, “Inashke hsa iki kaa⁠kanootamaakewaatc kahkina peshikwan ihkitowak, e'inaawaatc kihciokimaan ci⁠minohsenitc. Taka hsa kekiin peshikwan ihkitoohkan kaa⁠ihkitowaatc, ci⁠mino'inatc kihciokimaa,” okii'inaawaan.

¹⁴ Miitahsh o'o Maaihkeya kaa⁠ihkitotc, “Kehcinaac iko kaaTipenciketc wiin misiwe eh⁠tipenciketc, mii 'i ehpiihci kehcinaa'entamaan kaa'ishitc ihsa ehta kaaTipenciketc, mii hsa ehta ko minihk ke'inak kihciokimaa,” kii‑ihkito.

¹⁵ Ahpii tahsh weti tekohshink eshi'ayaanitc kihciokimaan, mii hsa kaa⁠ishi kakwecimikotc, “Maaihkeya, ninka anta miikaasomin ina weti ootenaank Oremaht, Kiliyat ahkiink eshi'ayaak, komaa kaye kaawiin?” Miihsh o'o Maaihkeya kaa⁠ishi nahkwehtank, “Maacaak anta miikaasok ci⁠shaakoocihtwaayek, kaaTipenciketc iitok kimiinik cishaakoocihtwaawatc!” oncita okii inan.

¹⁶ Miihsh Ehaapoon kaa'ikotc, “Ahpii hsa kii⁠kanooshiyan otishinihkaasowinink kaaTipenciketc, tepwen hsa kekoon kii⁠wiintamawiyan. Aasha ohsha paahtiinwaa i'i kitaana'inin,” okii'ikoon.

¹⁷ Maaihkeya hsa tahsh kii⁠ani ihkito, “Ninkii waapamaak hsa kahkina Isriyalak ehpaapiiwe ayaawaatc kihci waciihkaank taapishkoo maanahcaanihshak kaa‑ayaawaahsikwaa kenawenimikowaatc, kaaTipenciketc tahsh ninkii'ik, okoweniwak hsa kaawiin otookimaamihsiiwak. Taka hsa pakitin entahso peshikowaatc otaawiniwaank pisaan weweni cishi kiiwewaatc,” kii‑ihkito.

¹⁸ Miihsh Ehaapoon kaakii'inaanitc Ceoohshahpaatan, “Kitaanakii wiintamawin iitok, wiihkaa kwayahk e⁠ishihsik niiyaak kekoonini aanakii wiintamawitc, mii ehta ko noociko e'ishitc.”

¹⁹ Miitahsh Maaihkeya kaa‑ani ihkitotc, “Inashke hsa noontamowaahk kaaTipenciketc ehkitotc, ‘Ninkii waapamaa hsa kaaTipenciketc enamatapitc otookimaawapiwinink kahkina kihcikiishikonk eyaanitc e⁠waahkaashkaakotc okihcinihkink inahke, onamantinihkink kaye.’

²⁰ Miihsh o'o kaaTipenciketc ehkitotc, ‘Awenen tahsh ke⁠ishaatc ci⁠awikakwe kashkimaatc Ehaapoon ci⁠anta miikaasonitc weti ootenaank Oremaht, Kiliyat ahkiini eyaanik, miitahsh weti keshi nihsintc?’ Aaninta tahsh encalak peshikwan kii‑ihkitowak, aaninta tahsh pahkaan kii‑ihkitowak.

²¹ Kekahpii tahsh peshik ahcaahkwan kii⁠matekaapawiwan ekii inaahsamikaapawihtaakotc kaaTipenciketc ekii ihkitonitc, ‘Niin hsa ninka kakwe shaakoosomaa,’ kii‑ihkitowan.

²² Miitahsh o'o kaaTipenciketc kaa'inaatc, ‘Aaniin tahsh waah⁠tootawatc?’ Miihsh ini ahcaahkwan kaa⁠ihkitonitc, ‘Niin hsa ninka ishaa, ninka ishi'itis hsa tino ahcaahk kaa⁠nihtaa wanimiwetc, ninka ishi'imaa' hsa Ehaap kaa⁠kanootamaakotc ci⁠kiiwanimonitc.’ KaaTipenciketc hsa tahsh kii‑ihkito, ‘Haw maacaan mii hsa 'i ci⁠kashkimatc, kika kashkihtoon hsa 'i kaawi ishihcikeyan, haw maacaan,’ ” kii‑ihkito

²³ “Inashke tahsh kaaTipenciketc hsa okii ishi pakitinaa' kaa⁠wanimiwenitc ahcaahkwa' otooniniink i'i kahkina kaa⁠kanootamawimihk. KaaTipenciketc hsa kehcinaac kitik ci⁠otihsaapantamowatc ci⁠nihsikoowatc!” kii‑ihkito Maaihkeya.

²⁴ Setihkaayawan tahsh wetetenitc Kiineanawan okii naasihkaakoon Maaihkeya miihsh kaa⁠ishi pahsiinkwekanaamikotc, pehkihsh ekii'ikotc, “Aanti tahsh inahke kaa‑ani ishaanitc kaaTipenciketc otAhcaahkwan kii⁠nakashimitc kiin itahsh ekii awi kanoonimihk? Aanti kaa⁠onci aashawishkaanitc,” okii'ikoon.

²⁵ Miihsh o'o Maaihkeya kaa'inaatc Setihkaayawan, “Paanimaa hsa o'o kika kihkentaan ahpii kiishikahk pahkehcikanink ishi kaasoyan,” okii'inaan.

²⁶ Miitahsh o'o Ehaapoon kehciokimaawinitc Isriyalahkiink kaakii anoohkiinitc e⁠ihkitonitc, “Taka ishiwinihk Maaihkeya weti eshi'ayaanitc ootenaawikimaan Emanan (Amon), kaye eshi'ayaatc Coaash (Joash) ninkosihs.

²⁷ Miitahsh ke⁠ihkitoyek, kihciokimaa hsa o'o ihkito, ‘Kipa'ohk wa'a inini, pankii kaye ehta kika ahshamaawaa pahkweshikanan, nipiini kaye. Paanimaa hsa weweni kiih⁠pitakohshinaan, mii hsa 'i payesh ci⁠pakitinek,’ ” kii‑ihkitowan.

²⁸ Miitahsh o'o Maaihkeya kaa⁠ihkitotc, “Kiishpin hsa weweni pitakohshinan, kaawiin iinsan kaaTipenciketc ninkii aapaci'ikohsii o'o kaakii ihkitowak.” Miihsh kaye kaa‑ani ihkitotc, “Kiinawaa kahkina pemaatisiyek o'omaa kaa‑ayaayek pisintawihshik aaniin ehkitoyaan.”

Ehaap Ehtashintenik Aaniin Kaa'ishinipotc

²⁹ Miitahsh Ehaap (Ahab) kehciokimaawitc Isriyalahkiink (Israel), a'a kaye Ceoohshahpaat (Jehoshaphat) kehciokimaawitc Coota (Judah) ahkiink kaakii ishaawaatc ekii anta miikaasowaatc weti ootenaank Oremaht (Ramoth), Kiliyat (Gilead) ahkiink.

³⁰ Miihsh Ehaap kaa'inaatc Ceoohshahpaatan, “Shimaakanihshak hsa kaa⁠ishi'owaatc niin ninka ishi' ci⁠kihkenimikoohsiwaan; kiin tahsh wiin kikishkan okimaawi'onan.” Miitahsh Ehaap kaa⁠ishihciketc ekii ishi'otc shimaakanihsha' eshi'onitc ci⁠kihkenimaahsiwintc, miihsh kaa⁠ishi anta miikaasotc.

³¹ A'a tahsh kihciokimaa Siiriya ahkiink wenciitc kii'inaakopan nihsimitanashiniishin (32) oshimaakanihshiiwikimaa' kaakii naakaci'aanitc miikaasowi otaapaanaahkwa', “Keko wiin miikaanaahkekwaanik iki kaa‑akaahsentaakosiwaatc, iki kaye kaa⁠kihci inentaakosiwaatc, a'a hsa ehta kaa⁠kihciokimaawitc Isriyalahkiink kika miikaanaawaa.”

³² Miitahsh iki shimaakanihshiiwikimaak kaakii naanaakaci'aawaatc miikaasowi otaapaanaahkwa' e⁠waapamaawaatc Ceoohshahpaatan, mii hsa kaa⁠ihkitowaatc, “Mii maawiin a'a kehcinaac Isriyali kihciokimaa.” Miitahsh kaa⁠ishi pahkewaatc ewii miikaanaawaatc. Miitahsh Ceoohshahpaatan kaakiih shaakowenitc.

³³ Miihsh iki shimaakanihshiiwikimaak e⁠waapamaawaatc e⁠aawihsinik Isriyali kihciokimaan, mii hsa kaa⁠ishi pooni'aawaatc.

³⁴ Peshik tahsh iko shimaakanihsh noociko kii‑ishi pimocike. Miitahsh mayaa kaakii miihkwa'ontc Isriyali kihciokimaa eshi tawaanik eshi aanihkawihsininik omiikaasowi kikishkikan. Ehaap tahsh okii'inaan kaakii otaapa'iwehtamaakotc, “Taka mii 'i intawaa ishikwehkiin, ninkoci omaa onci'ishiwishihshin kaatashi miikaatink, wawiinke ohsha nimaahki'ikoo,” kii‑ihkito.

³⁵ Kapekiishik tahsh kii⁠kihci miikaatinaaniwan. Ehaap tahsh omiikaasowi otaapaanaahkonk kii‑ishi aasohshin, ekii inaahsamihshink eshi'ayaanitc inahke shimaakanihsha' wenciinitc Siiriya ahkiink. I'imaa tahsh kaakii ishi maahkihcikaniwitc kii⁠onciciwanini omiskwiim ekii ishiciwaninik i'imaa kaakii ishi mihcihsakaanik otaapaanaahkonk. E⁠ani onaakohshininik tahsh mii 'i kaa⁠ishi nipotc.

³⁶ Kiisihsoon itahsh e⁠ani pankihshimonitc, awiyan hsa kii‑ishi shaakowewan shimaakanihsha' eshi'ayaanitc, “Taka entahso peshikotc inini otootenaamink tashi kiiwe, otahkiimiwaank cishi kiiwewaatc.”

³⁷ Mii hsa 'i kaakii onci ishkwaa pimaatisitc kihciokimaa Ehaap. Owiiyaw tahsh Sameriya (Samaria) ahkiink kii‑ishiwicikaateni, miitahsh weti kaa⁠ishi na'inikaatenik.

³⁸ Miitahsh weti kaakii ishi pehkihcikaniwinitc otootaapaanaahkwan eshi'ayaanik saaka'ikaniinhsihkaan Sameriya ootenaank. Miitahsh i'imaa animoo' kaakii ishi nooskwaata'aminitc omiskwiim, ekii ishihsenik kaakii ihkitonihpan kaaTipencikenitc. Mii hsa kaye i'imaa saaka'ikaniinhsihkaanink kaakii ishi nihtaa kisiihsipasonitc pihshikwaacihkwewa'.

³⁹ Kahkina hsa Ehaap kihciokimaa kaakii ishihciketc, eshi tashintenik kaye otookimaawikamik ekii mamasinahcikaatenik kakinooshkishiiwaapitan ekii aapataninikin, kahkina ootenawan kaakii oshihtootc i'imaa ishi tashinteniwan masina'ikanink eshinihkaatenik, “Eshi tashinsowaatc Isriyali kihciokimaak.”

⁴⁰ Kii‑ishi na'inaa hsa eshi na'inimintc okehte'aya'aama'. Okosihsan hsa Ehasaaya (Ahaziah) eshinihkaasonitc okii naapishkaakoon ekii kihciokimaawinitc.