1 ᑭᒋᐅᑭᒫᒃ 2 - Ojibwe Kihcimasina'ikan

Tepit Ishkwaac Weweni Kiikakanoonaatc Swaalamanan

¹ Aasha tahsh kekaa kii⁠ocihcihsenik Tepit (David) ci‑ishkwaa pimaatisitc, miihsh kaakii antomaatc okosihsan Swaalamanan (Solomon). Miihsh o'oweni ishkwaac kaa⁠ishi kakanoonaatc,

² “Mii ohsha 'i aasha e⁠ocihcihsek ci‑ishkwaa pimaatisiyaan, mashkawenintison ihsa, ininiink kaye inenintison.

³ Ishihciken hsa ci⁠kanawentamowatc kaaTipenciketc kiKishemanitoom otishihtwaawin; otihkitowin, otinaahkonikewinan, aaniin kaye eshi antawentank, kahkina kaye eshihsininik otoonahshowewin. Ci⁠kanawentamowatc kahkina kaa⁠ishipii'ikaatenik Moosihs (Moses) otoonahshowewin, kiin hsa ci⁠minohseyan aaniin iko ke⁠ishihcikeyan, kaye aanti piko ke⁠ishaayan.

⁴ Mii maawiin itahsh i'i ci⁠tootank kaaTipenciketc kaakii ishi ahshotamawihpan ahpii kii‑ishihpan, ‘Kiishpin hsa kitapinoonciishimak ayaankwaamisiwaatc, ke⁠ishi pimaatisiwaatc, tepwewinink kaye ishi pimohsewaatc ote'iwaank, i'imaa kaye otahcaahkowaank enaahsamiiwak; kaawiin hsa wiihkaa ta⁠kwenawi onciihsii inini ke⁠namatapitc i'imaa kihciokimaawapiwinink Isriyalihkaank kaa‑ayaanik.’ ”

⁵ “Kikihkentamowaan iitok kaye aaniin Cooap (Joab) wemaamaatc Seroaayahwan (Zeruiah) kaah⁠tootawitc, ekii nihsaatc niishin shimaakanihshiiwikimaa' kaa⁠naanaakaci'aanitc Isriyali shimaakanihsha'. Miihsh o'o kaakii nihsaatc Aapinar (Abner) eshinihkaasonitc wetetenitc Ner (Ner) kaakii'inimintc, Amesa (Amasa) kaye kaakii otetenitc Ciihtaran (Jether) ekiih tootawaatc mekwaa ahpii kaa⁠miikaatinaaniwansinok taapishkoo kaa⁠tootaatink kaa⁠tashi miikaatink. Miihsh kaakii onci miskwiiwaninik kecihpiswaaketc, omahkisinan kaye kaakii onci miskwiiwaninikin.

⁶ Eshi kakiihtaawentaman itahsh tootaw, keko wiin pakitinaahken ci⁠kawikiihkaatc.”

⁷ “Kika minotootawimaa' itahsh wiin a'a Paarsilaai (Barzillai) okosihsa' Kiliyat (Gilead) ahkiink wenciitc. Taka miiwa' i'i ke⁠tinowinitc ke⁠onci wiihsininitc kitatoohpowinaahkonk. Wiinawaa iitok kaakii minotootawiwaatc ahpii kii⁠maaciipa'iwaanimakipan kiicihkiweyan Aapasalamoon (Absalom).”

⁸ “Inashke tahsh kaye ayaa Shimiaai (Shimei) wetetetc Kiirawan (Gera) wenciitc Payoorim (Bahurim) Pencimanink (Benjamin) wentahkaanesitc. Wiin iitok kaakii maci'inaahpinemihpan eh⁠kiishikaninik kii‑ishaawakipan weti ootenaank Mehaneim (Mahanaim). Ahpii tahsh kiihpi anta nakishkawihpan weti Cwaartan (Jordan) siipink, miihsh kaa⁠ishi ahpimowakipan kaaTipencikenitc ci⁠nihsaahsiwak.

⁹ Keko tahsh pakitinaahken kekoon ci‑ishi nana'ahsaahsiwintc. Kiin hsa kikakiihtaawentam, kika kihkentaan hsa ke⁠tootawatc, mihsawaa ko aana waapihkwetc kika nihsaa,” okii'inaan.

Tepit Ahpii Kii'ishkwaapimaatisitc

¹⁰ Tepit (David) hsa tahsh kii‑ishkwaa pimaatisi. Weti hsa kii‑ishi na'inikaniwi otootenaamink ecikaatenik, Tepit Otootenaam.

¹¹ Niimitana (40) tahsopipoon hsa Tepit kii⁠kihciokimaawi i'imaa Isriyalahkiink. Niishwaahso pipoon hsa ootena Hiiparan (Hebron) ecikaatenik kiih⁠tashi kihciokimaawi. Nihsimitanashinihsopipoon (33) itahsh kiih⁠tashi kihciokimaawi weti Ceroosalamink (Jerusalem).

¹² Swaalaman (Solomon) tahsh kii⁠namatapi otookimaawapiwininiink Tepitoon kaakii otetetc ekii naapishkawaatc. Otookimaawiwin hsa tahsh wiinke kii⁠ayiici ayaani.

Atonaaicah Kiinipotc

¹³ Atonaaicah (Adonijah) hsa wemaamaatc Hahkit (Haggith) eshinihkaasonitc okiih pi naasihkawaan Paahshiipawan (Bathsheba) wekosihsinitc Swaalamanan. Miihsh o'o kaa'ikotc, “Pisaan ina kipiishaa?” Miitahsh kaa'inaatc, “Eya', pisaan nimpiishaa,” okii'inaan.

¹⁴ Miihsh kaa‑ani ihkitotc, “Nintayaan kekoon ci'ininaan,” okii'inaan. O'o tahsh okii'ikoon, “Aaniin itahsh waa'ishiyan,” okii'ikoon.

¹⁵ Atonaaicah tahsh kii‑ihkito, “Kikihkentaan iitok niin cikii kihciokimaawiyaampaan. Mii hsa 'i kahkina Isriyalak (Israel) kaa⁠inentamowaatc. Kaawiin itahsh i'i kii‑ishihsehsinoon, Swaalaman hsa kii⁠kihciokimaawi'aa, aaniihsh mii'inahke kaa⁠inentaminitc kaaTipencikenitc.

¹⁶ Peshik itahsh kekoon kiwiih kakwecimin, keko tahsh aanwehtawihshihken,” okii'inaan. Miihsh o'o kaa'ikotc, “Wekonen itahsh entawentaman?” okii'ikoon.

¹⁷ Miihsh kaa'inaatc, “Taka awi kakwecim Swaalaman kihciokimaa ci⁠miishitc ci⁠wiiwiwak Aapishakoon (Abishag) Shoonem (Shunem) wenciinitc, kaawiin iitok kiin kika aanwehtaakohsii,” kii‑ihkito.

¹⁸ Miitahsh kaa'ikotc Paahshiipawan, “Weweni hsa ninka ishihcike; kika kanoocikehtamawin hsa ci⁠kanoonak kihciokimaa,” okii'ikoon.

¹⁹ Paahshiipa hsa kii‑ishaa ekii anta waapamaatc Swaalamanan kihciokimaan ewiih kanoocikehtamawaatc Atonaaicahwan. Kihciokimaan hsa kiih⁠pasikwiiwan eh⁠pooshoo'ikotc ekii animihkohtaanitc, miihsh kaa⁠ishi onapinitc okihciokimaawapiwininiink. Miihsh kaa⁠ishi kakwetwenitc ci⁠piicikaatenik kotak okimaawapiwin i'imaa ekii ishi namatapitc okihcinihkiniink inahke Swaalamanan.

²⁰ Miitahsh kaa⁠ishi kakwecimaatc, “Kekoonenhs hsa kipi kakwecimin ci⁠tootawiyan. Keko tahsh aanwehtawihshihken!” okii'inaan. “Nimaamaa, pisaan kakwecimihshin; kaawiin kika aanwehtawihsinoon,” okii'ikoon.

²¹ Miitahsh kaa'inaatc, “Taka Atonaaicah kiicihkiwensi ta⁠miinaa ci⁠wiiwitc Aapishakoon Shoonem wenciinitc,” okii'inaan.

²² Swaalaman tahsh o'o okii ishi nahkwehtawaan omaamaan, “Wekonen tahsh wenci kakwetweyan Aapishak wenciitc Shoonem ci⁠miinintipan Atonaaicah? Mii hsa peshikwan ke⁠inentaakwahkipan kakwecimiyampan ci⁠miinintipan kaye nintookimaawiwin. Wiin iitok tipinawe nihsayenhs. Owiiciiwikoon iitok kaye Apaaitaran (Abiathar) anami'ewikimaan, Cooapoon (Joab) kaye wemaamaanitc Seroaayahwan!” kii‑ihkito.

²³ Miitahsh Swaalaman kaakii ahpimotc kaaTipencikenitc ekii ihkitotc, “Taka Kishemanitoo waah⁠tootawitc iko ninka tootaak, kiishpin Atonaaicah opimaatisiwin tipa'ikaakehsik i'i kaashi kakwecimitc!

²⁴ KaaTipenciketc iitok ninkii ayiitahsik ci⁠namatapiwak nintetepaniin Tepitoon otookimaawapiwininiink. Kii‑ishihcike kaakii ishi ahshotamaakekopanen, niin ekii miishitc i'i okimaawiwin, nimpiiwesiima' kaye. Eshi pimaatisitc hsa kaaTipenciketc nintishi ahpim Atonaaicah ci⁠nipotc noonkom kaa⁠kiishikaninik!” kii‑ihkito.

²⁵ Miitahsh Swaalaman kihciokimaa kaakii anoonaatc Piinaaiawan (Benaiah) wetetenitc Ceohiataawan (Jehoiada) ci⁠awi nihsaanitc Atonaaicahwan.

Apaaitar Kiipakitinintc E'anami'ewanohkiihpan, Cooap Itahsh Kaye Kiinihsintc

²⁶ Kihciokimaa Swaalaman tahsh okii'inaan Apaaitaran (Abiathar) anami'ewikimaan, “Weti hsa kiin ishaan Anataht (Anathoth) kitahkiimink. Ishinaakwan kekiin ci⁠nihsikooyampan, kaawiin itahsh i'i noonkom kiwiih tootawihsinoon, aaniihsh kikiih pimiwitaawaan kaa⁠Maawaci Tipenciketc otahshotamaakemahkahk mekwaa kii⁠wiiciiwatipan nintetepan Tepit, kaakii ishi kakwaatakihsetc kaye kiin kikiih tako kakwaatakihtoo,” okii'inaan.

²⁷ Miitahsh kaa⁠ishi pakitinaatc i'i kaakii ishi anami'ewikimaawinihpan eh⁠pamiihtawaanihpan kaaTipencikenitc. Miihsh mayaa ekii ishihsenik kaaTipenciketc kaakii ihkitokopanen weti Shaailoo (Shiloh) ootenaank kii⁠tashintamokopanen Iilaaiwan (Eli) otaawinini.

²⁸ Ahpii tahsh Cooap (Joab) e⁠noontank aaniin kaa⁠inahkamikaninik, kewiin iitok kaakii wiici'aatc Atonaaicahwan, kaawiin wiin Aapasalamoon, mii hsa kaakii ahpa'iwetc okihci anami'e pakwaanekamikoniink kaaTipencikenitc ekii kihciwinank kiihkeyaank eshi kakaashihcikaatenik eshi pakitinaahsowintc.

²⁹ Swaalaman tahsh kii⁠wiintamawaa Cooapoon ekii ahpa'iwenitc okihci anami'e pakwaanekamikoniink kaaTipencikenitc, ekii ayaanitc iinsan kaashi pakitinaahsowintc. Miitahsh kaakii anoonaatc Piinaaiawan wekosihsimikonitc Ceohiataawan o'o ekii'inaatc, “Maacaan awi nihshi!” okii'inaan.

³⁰ Miitahsh kaa⁠ishi ishaanitc okihci anami'e pakwaanekamikoniink kaaTipencikenitc o'o ekii'inaanitc Coapoon, “O'o hsa kihciokimaa kitik, ‘Pisaaka'an,’ ” okii'inaani. O'o tahsh kii⁠matwe ihkitowan, “Taka mii 'i, mii hsa o'omaa pisaan ke⁠tashi nipoyaan!” Miihsh Piinaaiawan kaa⁠ishi anta waapamikotc kihciokimaa o'o ekii'ikotc, “Mii hsa 'oweni Cooap eshi nahkwehtawitc.”

³¹ Miitahsh kihciokimaa kaa'inaatc Piinaaiawan, “Ishihcikew hsa i'i kaa⁠ihkitotc. Nihshi, miihsh ishi ninkwa'waahkan. Kaawiin itahsh kekoon ninka ishi anaamentaakosihsii, nintetenk kaye wentahkaanesiwaatc i'i Cooap kaa⁠ishi nihsaakopanen awiya' kekoon kaakii ishi mamaashiihsinikopanen.

³² Wiin hsa piko Cooap oka tipa'amaakoon kaaTipencikenitc kaakii ishi nihshiwetc. Kaawiin iitok okii kihkentansiini nintetepaniin o'o ekii ishihcikekopanen. Niishin kii⁠nihsaakopan ininiwa' nawac kehci inentaakosinitc ahpiihc wiin. Miiwak hsa 'o; Apinaran (Abner) wetetenitc Naran (Ner) shimaakanihshiiwikimaan kaakii naanaakaci'aanitc Isriyali shimaakanihsha', ini kaye Amesawan (Amasa) wetetenitc Ciihtaran (Jether) shimaakanihshiiwikimaan kaakii naanaakaci'aanitc Cootawahki shimaakanihsha' (Judah).

³³ I'i kaakii ishi mamaashiitc taka wiin Coap oka pakamishkaakoon nehpic iko, i'i kaye kahkina opiiwesiima'. A'a tahsh wiin Tepit, opiiwesiima' kaye, otaawinink kaye wenciinitc, i'i kaye eshi kihciokimaawitc oka ishi shawenimikoon kaaTipencikenitc ci⁠nehpici ayaanik pisaanisiwin,” okii'inaan.

³⁴ Miitahsh Piinaaiawan kaa⁠ishi ishaanitc okihci anami'e pakwaanekamikoniink kaaTipencikenitc ekii nihsaanitc Cooapoon. Weti tahsh wenciinitc otahkiiminiink kii‑ishi na'inaawan pikwatahkamik.

³⁵ Miitahsh Swaalaman kaakii inakimaatc Piinaaiawan ci⁠shimaakanihshiiwikimaawinitc ci⁠naapishkawaanitc Cooapoon. Setahkoon (Zadok) anami'ewikimaan tahsh wiin okii inakimaan ci⁠naapishkawaanitc Apaaitaran.

Shimiaai Kiinihsintc

³⁶ Kihciokimaa tahsh okii antomaan Shimiaaiwan (Shimei), miihsh o'o kaa'inaatc, “Oshihtamaason waahkaa'ikan ke⁠ishitaayan i'imaa Ceroosalamink (Jerusalem). Keko tahsh inkoci i'imaa onci ishaahken.

³⁷ Ahpii hsa kiishikahk maacaayan, aashawishkaayan itahsh i'i Kiitaran (Kidron) siipiinhs, mii hsa 'i kehcinaac ci⁠nipoyan; kiin itahsh iko i'i ke⁠tootaasoyan,” okii'inaan.

³⁸ Miitahsh o'o Shimiaaiwan kaa'ikotc, “Onishihshin hsa 'i kaa⁠ihkitoyan. Kitanohkii'aakan hsa ko ta⁠ishihcike otookimaaman kihciokimaan e'ikotc,” kii‑ihkitowan. Miihsh Shimiaaiwan kinwesh kaa⁠ishi'ayaanitc i'imaa Ceroosalamink.

³⁹ Nihsopipoon itahsh e⁠ani ishihsenik, niishin Shimiaai pemiihtaakotc kii⁠maaciipa'iwewa' ekii ahpa'iwenitc eshi'ayaanitc kihciokimaan Ekish (Achish) eshinihkaasonitc wetetenitc Maa'ahka (Maacah) wenciinitc Kaht (Gath) ootenaank. Miihsh kaakii'inintc, “Kaa⁠pamiihtawihkwaa hsa weti ayaawak Kaht ootenaank,” kii'inaa.

⁴⁰ Miitahsh kaakii onahpinaatc omaanshimihtatimooman ekii ishaatc eshi'ayaanitc Ekishan kihciokimaan Kaht ootenaank ekii antone'waatc pemiihtaakotc. Miihsh kaakii mihkawaatc, Kaht ootenaank ekiih pi'onci kiiwewinaatc.

⁴¹ Swaalaman tahsh kii⁠noontam Shimiaaiwan Ceroosalamink ekii onci maacaanitc ekii ishaanitc Kaht ootenaank, miinawaa hsa ekiih pikiiwenitc.

⁴² Miitahsh kaakii antomaatc Shimiaaiwan ekii'inaatc, “Kikii ishi ahpimonaapan iitok kaaTipenciketc owiinsowinink wiihkaa ci⁠nakatansiwan Ceroosalam. Miitahsh kaye o'owe kaa⁠ishi ayaankwaamiminaampaan, ‘Ahpii kiishikahk maacaayan inkoci ishaayan, mii hsa 'i kehcinaac ci⁠nipoyan!’ O'o tahsh kikii ishinaapan, ‘Onishihshin i'i kaa⁠ihkitoyan. Ninka na'ihtam,’ ekii'ishiyampan.

⁴³ Wekonen itahsh kaa⁠onci kanawentansiwan kaakii ishi ahpimonotawatipan kaaTipenciketc, ekii ishihcikehsiwan kaakii'ininaampaan?” okii'inaan.

⁴⁴ Miitahsh o'o kihciokimaa kaa'inaatc, “Kikihkentaan iitok kite'ink kahkina kaakii ishi maanshi tootawatc nintetepan Tepit (David). Noonkom itahsh kaaTipenciketc kika tipa'amaak kaakii ishi maanshi tootawimatc.

⁴⁵ Niin itahsh wiin ninka minohse'ik, oka ishihtoon kaye Tepit kaakii ishi okimaawinitc wiihkaa ci⁠poonihsesininik,” okii'inaan.

⁴⁶ Miitahsh kihciokimaa kaakii anoonaatc Piinaaiawan ci⁠awi nihsaanitc Shimiaaiwan. Miihsh kaa⁠ishi nihsaanitc. Miitahsh Swaalaman otookimaawiwin kaakii ayiitahtenik.