1 ᑲᕒᐃᑎᔭᓇᒃ 15 - Ojibwe Kihcimasina'ikan

Christ okiiwepimaatisi'ikoowin kaawiintamaakeyaank

¹ Niiciotepwehtamook, kiwii'waapanta'ininim aaniin eshinaakwahk i'i minwaacimowin, mii 'iwe nihtam kaakiih kakiihkiminakookipan kaye kaakii'otaahpinamek, amii 'imaa entashimashkawikaapawiyek.

² Mii hsa 'o minwaacimowin kaapimionciimakahk cipimaaci'ikooyek kiishpin nehpic iko kihciwinamek. Kiishpin itahsh kekoon inaapatahsinok kaakiihpitepwehtamek kaawiin kikapimaaci'ikoohsiim.

³ I'iwe hsa tahsh kaamaawaci niikaanentaakwahk kaakii'miinikooyaan, kekiinawaa kikii'aniwiintamawininim. Mii 'owe e'ihkitoomakahk: a'a Christ ekii'ishinipotc onci kimacitootamowininaanin, mii 'iwe niiyaak kaakii'ishipii'ikaatek Kehtemasina'ikan.

⁴ Shikwa i'i ekii'na'inintc, ekiinihsokiishikwakaanik itahsh ekiihkiiwepimaatisi'intc mayaa ekii'ani‑ishihsek i'i niiyaak kaakii'ishipii'ikaatek kehtemasina'ikan.

⁵ Shikwa ekii'waapamikotc ini Piitaroon (Peter), miitahsh kaye kotak i'iweniwa' mitaahshiniishin kaakii'inimintc okii'waapamikoo'.

⁶ Miihsh i'i paanimaa naake naanwaahk awahshime okii'waapamikoo' otepwehtamoo', peshikwan iko 'iyahpii okii'waapamikoo'. Kekaa kahkina noonkom keyaapi pimaatisiwak. Aaninta tahsh aasha kii'ishkwaapimaatisiwak.

⁷ Miinawaa tahsh okii'waapamikoon ini Ciimisan (James), naake mincikahkina otishinisha'waakana'.

⁸ Kaye niin itahsh ayotaanaank ninkii'waapamaa, niin aana inentaakosiyaan awiya ehkwayahko nihtaawikihsik.

⁹ Niin maawac otaanaank nintinentaakos kahkina iki enakimintwaa ishinisha'waakanak. Kaawiin ninteahpiihtentaakosihsii ishinisha'waakan ci‑ikooyaampaan. Aaniihsh ninkiihkakwaataki'imaa' Kishemanitoo kaamaawacitepwehtaakotc.

¹⁰ Ninkiihshawenimik itahsh Kishemanitoo, e'onci‑ishiayaayaan noonkom enaatisiyaan. I'iwe tahsh oshawencikewin kaamiinikooyaan kaawiin kanake kii'aanawewansinoon. Awahshime ninkiihkihcianohkii ahpiihc wiin kahkina pehkaanisiwaatc ishinisha'waakanak. Aanawiin kaawiin niin tipinawe tepwe ninkii'anohkiihsii, i'iwe hsa wiin Kishemanitoo oshawencikewin kii'anohkiimakanini e'wiitoohkaakoyaan.

¹¹ Mii hsa tahsh o'owe, awenen iko wencinoontamowek minwaacimowin, kemaa niin aawiyaan, kemaa wiinawaa pahkaan ishinisha'waakanak, miiwan ini peshikwan eshikakiihkwenotamaank. Mii 'iwe mayaa kaatepwehtamek.

Kiinawint kaye kikakiiwepimaatisimin

¹² Miitahsh i'i nintinaacimowininaan eshihsink, Christ ekiihkiiwepimaatisi'intc onci nipowinink. Aaniihshwiin aaninta kiinawaa wenci ihkitoyek e'ayaamakahsinok cikiiwepimaatisink onci nipowinink, aasha ohsha ekiihkashkihtootc Christ?

¹³ Kiishpin ayaamakahsinokipan cikiiwepimaatisink onci nipowinink, mii 'i kewiin Christ cikiihkiiwepimaatisihsikipan.

¹⁴ Kiishpin itahsh Christ kiihkiiwepimaatisihsikipan, kaawiin kekoon taakii'inaapatahsinoon ninkakiihkwewininaan, kitepwehtamowiniwaa kaye.

¹⁵ Kaye hsa tahsh, okakiinawishkaacimook nintaaishinaakosimin, aaniihsh ninkii'inaanaan Kishemanitoo ekiihkiiwepimaatisi'aatc Christan. Kiishpin itahsh tepwewiniwankipan ekaa awiya cikiiwepimaatisihsik, kaawiin iinsan kewiin Kishemanitoo okiihkiiwepimaatisi'aahsiin ini Christan.

¹⁶ Inashke hsa kiishpin kiiwepimaatisi'aahsiwintwaa iki kaaishkwaapimaatisiwaatc, kaawiin iinsan kaye wiin Christ taakiihkiiwepimaatisi'aahsii.

¹⁷ Kiishpin itahsh Christ kaahkiiwepimaatisi'aahsiwintipanen, kaawiin awaac kekoon inaapatahsinoon kitepwehtamowiniwaa. Keyaapi iinsan 'imaa kitayaam kimaci‑ishiwepisiwiniwaank.

¹⁸ Mii hsa 'iwe kaye keishinaakwahkipan, iki kaakii'ahpinipowaatc Christan aanakiihtepwehtawaawaatc, aasha ekii'nihshiwanaatisiwaatc.

¹⁹ Kiishpin 'omaa pimaatisiwinink ehta ishiwiici'ikowankwen e'ahpenimonotawank Christ, mii 'i kiinawint awahshime ci‑ishikoohpaatentaakosiyankipan ahpiihc wiin kahkina awiya.

²⁰ Tepwe tahsh kii'oncikiiwepimaatisi'aa nipowinink a'a Christ! Miitahsh i'imaa cionciaayiici⁠kihkentaakwahk miinawaa cikiiwepimaatisiwaatc kaakii'ishkwaapimaatisiwaatc.

²¹ Inashke aaniihsh i'imaa kaa'ayishihcikekopanen a'a peshik inini, amii 'imaa kaa'onciimakaninik i'i nipowin, a'a tahsh wiin kotak inini kaakii'ishihciketc, mii 'imaa wenciimakahk cioncikiiwepimaatisi'ikooyank nipowinink.

²² I'imaa hsa Aatamink (Adam) e'ontahkaanesiwaatc, mii 'imaa wencinipowaatc kahkina awiyak. Mii peshikwan e'wiiciiwikowaatc Christan, mii 'imaa kahkina keoncimiinintwaa pimaatisiwin.

²³ Kwayahk itahsh iko ta anikiiwepimaatisiwak: a'awe Christ maawac nihtam kiihkiiwepimaatisi. Paanimaahsh miinawaa takwihshink, miiwa' i'iweniwa' kenikiiwepimaatisinitc Christ kaatipenimaatc.

²⁴ Miitahsh i'i ahpii ta‑aniwehkwaashkaamakan kahkina kekoon. Ahkawe kahkina Christ okashaakooci'aa' iniweniwa' kaaokimaawentaakosinitc kaye kaakashki'ewisinitc kaye kaamashkawentaakosinitc. Mii ahpii otipencikewin cimiinaatc ini Kishemanitoon Weyoohsimimintc.

²⁵ Wiin ihsa Christ antawentaakosi ciokimaawitc piinihsh iko kahkina Kishemanitoon kaacaakishaakoocihtamaakotc i'i kaamiikaanikotc.

²⁶ I'iwe tahsh ishkwaac misiwe keshaakooci'aakaniwitc kaamiikaasotc, mii hsa 'awe nipowin.

²⁷ Aaniihsh Kihcimasina'ikan ishipii'ikaate a'a Christ ehtashimintc: Kahkina kekoon ciahpisitepitc citipentank ekii'ishihtamaakotc Kishemanitoon. I'iwe tahsh kaaihkitoomakahk: “Kahkina kekoon citipentank ekii'ishihtamaakotc,” mii 'imaa eshikihkentaakwahk Kishemanitoo ehtakwakincikaasohsik citipenimikohpan Christan. Wiin aaniihsh kahkina otahtamawaan ini Christan.

²⁸ Paanimaa tahsh kahkina kekoon ekii'ahtamawintc Christ citipentank, mii ahpii a'awe oKosihsimaa keinahsitisotc Kishemanitoon citipenimikotc, miiwan iniweniwan kaakii'ahtamaakotc kahkina kekoon citipentank. Miitahsh i'i ahpii misiwe kemaaciitipentaminitc kahkina kekoon Kishemanitoon.

²⁹ Kiishpin itahsh o'owe eshihsekwen, aaniin keinintwaa oko kaaishihcikewaatc kaaoncisiika'antaatiwaatc i'i kaakii'niponitc ehkakwewiici'aawaatc? Aaniin itahsh inaa enwaatamowaatc? O'o tahsh ishihsekipan iki kaakii'nipowaatc miinawaa cipimaatisihsikwaapan, aaniin enentamowaatc kaaoncisiika'antaatiwaatc i'i neponitc?

³⁰ Kaye niinawint, aaniihsh wencitootamaank entahsotipa'ikan e'naniisaani'itisoyaank nihshiwanaatisiwinink?

³¹ Niiciotepwehtamook, entahsokiishik nimpehshwaapantaan i'i nipowin. Inashke hsa wiinke kikihci‑inenimininim i'imaa e'onciimakahk e'wiiciiwinank a'a Christ Ciisahs kaaTipeniminank, mii 'iwe enamanci'oshkaakoyaan ciwiintamawinakook.

³² I'iwe hsa ko ekiihpi⁠miikaanakwaa pikwaciaya'aawihshak kaainentaakosiwaatc o'omaa Ehpihsahsink (Ephesus), kiishpin ininiinaank ehta ontinamaan nintinamanci'owin ishipimaatisiyaan, kaawiin awaac kekoon nintaainaapacihtoohsiin. Kiishpin kiiwepimaatisi'aahsiwintwaa kaakii'ishkwaapimaatisiwaatc, mii hsa intawaa ishihciketaa e'nekaami‑ihkitonk: “Haw wiihsinitaa, minihkwetaa, mihsawaa ohsha kikanipomin!”

³³ Keko wayeshintisohkek. Aana minoishiwepisiyan, maci‑ishiwepisiwaatc itahsh kaawiitoohkawatwaa, kikanihshiwanaaci'ikon.

³⁴ Kwayahk iko moohkentamok, poonihtook kimaci‑ishiwepisiwiniwaan. Inashke ciakaciwentamek o'o kaawiintamawinakook: aaninta kaawiin kikihkenimaahsiwaawaa Kishemanitoo.

Aaniin keishinaakosiwaatc kiikiiwepimaatisiwaatc

³⁵ Awiya tahsh taihkito: “Aaniin itahsh kekii'ishi kiiwepimaatisi'intwaapan ikiweniwak nepowaatc? Aaniin itahsh keshiwiiyawewaatc ahpii kiishpin tepwe kiiwepimaatisiwaatc?”

³⁶ Kiin kekiipaatisiyan, nintaainaa. I'i hsa wiin kehtikaataman, kaawiin tapimaatisiihkantehsinoon, paanimaa ehta kiininkwa'ikaatek e'nipoomakahk e'ishinaakwahk.

³⁷ I'iwe hsa kaakihtikaataman kaawiin i'iwe ehkiishikik kaaishinaakwahk kitaa ninkwaawanka'ansiin, kihtikaanenhs ohsha ehta kipakitinaan, maakishaa pahkweshikan ehkihtikaanenhsiwitc, maakishaa kaye pahkaan kaatinowank.

³⁸ Kishemanitoo otinahtoon i'i kihtikaanenhs keshiwiiyawiimakahk aaniin iko kaainentank. Entahsink hsa ko kihtikaanenhs ishiwiiyawiwan mayaa ehtinowank.

³⁹ Shikwa kaye kaawiiyaahsiwiwaatc, kaawiin peshikwan kahkina ishiwiiyaahsiwihsiiwak. A'awe hsa ko inini wiin ehtinowitc ishiwiiyaahsiwi. Ikihsh kaye aya'aawihshak pahkaan ishiwiiyaahsiwiwak. Kaye pinehshiinshak pahkaan kewiinawaa ishiwiiyaahsiwiwak. Iki tahsh kaye kinooshek pahkaan kewiinawaa tinowiwak e'oskawiwiwaatc.

⁴⁰ Ayaamakanoon tahsh kaye kiishikonk kaatinowankin wiiyawiwan kaatashipimaatisiwaatc kaye ahkiink kaatinowankin kaashiayaawaatc. Shikwa pahkaan ishionishihshininiwan kiishikonk kaatashiowiiyawiwaatc, kaye 'omaa ahkiink kaatashiowiiyawiwaatc eshionishihshininikin.

⁴¹ A'awe tahsh kaye kiisihs wiin iko tipinawe inaahsike. A'awehsh kaye tipihkikiisihs kaye wiin pahkaanatinini otinaahsikewin. Ampooshke kaye wanankohshak pepahkaan iko kewiinawaa ishiayinaahsikewak.

⁴² Mii 'owe keishinaakwahk kekiiwepimaatisi'intwaa kaa'ishkwaapimaatisiwaatc. Ahpii e'na'inikaatek i'i wiiyawimaa, tinowan ahkawe cinihshiwanaatahk. Paanimaahsh kiiwepimaatisinaaniwank mii 'iwe keishiayaakin wiiyawimaan wiihkaa cinihshiwanaatahsinokin.

⁴³ Koohpaatentaakwan i'i e'na'ihcikaatek, miinawaa tahsh pimaacihcikaatek wiinke taonishihshin. Wahkewan i'i kaana'ihcikaatek, pimaacihcikaatek itahsh tasoonkentaakwan.

⁴⁴ I'i wiiyaw kaana'inikaatek mii 'iwe kaa‑ayaamakahk o'o noonkom pimaatisiwinink. Ahpiihsh i'iwe kiiwepimaacihcikaatek mii 'iwe tino wiiyaw keshiminwaapatahk ahcaahkomaank. Ayaa i'iwe wiiyaw kaa‑ayaamakahk o'o onci noonkom pimaatisiwinink, kaye 'iwe tino ayaamakan wiiyaw keshiminwaapatahk ahcaahkonk onci.

⁴⁵ O'owe aaniihsh ihkitoomakan Kehtemasina'ikan: “A'awe maawac niikaan kaa'oshi'intc inini Aatam (Adam), kii'ishi'aa pemaatisitc ehkikahcaahkwetc,” ishipii'ikaate. A'awe tahsh wiin ishkwaac kaa aawitc Aatam, mii 'awe ahcaahk kaapimaatisiishkaaketc.

⁴⁶ Kaawiin weti nihtam onciimakahsinoon i'i kaa‑ahcaahkwentaakwahk, kaawiiyaahsiwank hsa wiin nihtam kii'ayaamakan, miitahsh i'i kii'aniayaa naake kaa‑ahcaahkwentaakwahk.

⁴⁷ 'Awe nihtam inini Aatam kaakii'ishiayaatc, mihtahkamikonk kii'oncioshihcikaaso o'omaa ekii'onciitc ahkiink. A'awe tahsh kotak inini kaakii'ishiayaatc kiihpioncii kihcikiishikonk.

⁴⁸ Iki 'omaa ahkiink kaaoncitipentaakosiwaatc, mii'i enaatisiwaatc a'awe mihtahkamikonk kaakii'onci oshihcikaasotc. Ikiweniwak itahsh kihcikiishikonk kaaoncitipentaakosiwaatc, mii'i enentaakosiwaatc enaatisitc a'a kihcikiishikonk kaakiihpionciitc.

⁴⁹ Shikwa peshikwan iko ehpikikishkamowaatc otishinaakosiwin a'a nihtam mihtahkamikonk kaakii'oncioshi'intc, kaye kikanaapi⁠ kikishkamowaamin otishinaakosiwin a'awe inini kihcikiishikonk kaapionciitc.

⁵⁰ Niiciotepwehtamook, mii 'owe ehkitoyaan: a'awe kaa ayaatc wiiyaahs, miskwiini tahsh kaye ehta, kaawiin otaaishikashkihtoohsiin cimiinintc ci ishiwiitoohkaasotc i'imaa Kishemanitoo otipencikewinink. I'i tahsh kaye kenipoomakahk kaawiin wiihkaa tamiinaakaniwansinoon i'i pishihshik cipimaatahk.

⁵¹ Aaniihsh, kiwiintamawininim i'i mahshi kaakiihpayahte kihkencikaatehsinok: kaawiin kahkina kikaishkwaapimaatisihsiimin. Kahkina tahsh kika‑aanci'ikoomin.

⁵² Kesihkaa, peshiko pahsankaapink taishikitaahtapihse, ani‑ishkwaahsek kahkina kekoon kenoontaakwaninik Kishemanitoo okihcipootaacikan. Aaniihsh tamatweinwemakan, miihsh i'i ahpii kekiiwepimaatisiwaatc iki nepowaatc ekaa miinawaa cinipohsikwaa. Miitahsh mincikahkina maamaw kika‑aanci'ikoomin.

⁵³ 'Owe aaniihsh kaawahkenihshiwanaatahk nantawentaakwan ciaancihcikaatek wiihkaa cinihshiwanaatahsinok, i'ihsh kaye kaawahkenipoomakahk taishiaancihcikaate wiihkaa cinipoomakahsinok.

⁵⁴ Ahpii tahsh kii'ishihsek kaawahkenihshiwanaatahk kaye kaaninipoomakahk ekii'aancihcikaatekin cinihshiwanaatahsinok kaye cinipoomakahsinok, mii ahpii tatipihse o'owe ihkitowin kaakii'ishipii'ikaatek: “Nipowin nihshiwanaacihcikaate, Kishemanitoo oshaakoocihtwaawin aasha kiihkiishihcikaate.”

⁵⁵ “Kiin nipowin, aanti tahsh keoncishaakoocihtwaayampan? Kiin nipowin, aanti keonciwiihsakiciihsoweyampan?”

⁵⁶ I'imaa maci‑ishiwepisiwinink oncikashkihtoomakan i'i nipowin ciwiihsaka'owemakahk, i'iwehsh kaye maci‑ishiwepisiwin oncimashkawisiimakan i'imaa Onahshowewinink.

⁵⁷ Miikwehc itahsh tainaa Kishemanitoo kaashimiininank kiinawint cishaakoocihtwaayank onci 'awe kaaTipeniminank Ciisahs Christ.

⁵⁸ Haw ihsa niiciotepwehtamook kaasaaki'inakook! Soonkikaapawik, keko kekoon kikawahkawii'ikohsiim, mooshak hsa ciwenoocianohkiihtawek a'a kaaTipenciketc. Kikihkentaanaawaa ohsha ekaa anihshaa e'anohkiihtawaahsiwek kaaTipenciketc.