1 ᑲᕒᐃᑎᔭᓇᒃ 14 - Ojibwe Kihcimasina'ikan

Miinawaa eshiaapatahkin ahcaahkowi miinikoowinan

¹ Mii 'iwe saaki'iwewin piminisha'amok. Antawentamok itahsh kaye ahcaahkowi miinikoowinan. Mii 'iwe nawac ishiantawentamok cikanootamawek Kishemanitoo.

² A'awe aaniihsh e'ishikakitotc pepahkaan ayishikiishwewinan, kaawiin mayaa otishikanoonaahsii' ini pemaatisinitc, Kishemanitoon ehta ko. Kaawiin pahkaan awiyan onihsitohtaakohsiin. Eshimiinikotc itahsh ini Kishemanitoon otAhcaahkwan, mii 'iwe eshiwiintank ini kekoonan kaakaacikaatenikin.

³ Awiya tahsh kaakanootamawaatc Kishemanitoon otishikanoonaa' 'i pemaatisinitc cikakwe mashkawiki'aatc. Okakwemiinaa' mashkawentamowin, okakwenana'entami'aa'.

⁴ Awiya kaapahkaanikiishwetc wiin iko ehta mashkawiki'itiso. Awiya tahsh kaakanoocikehtamawaatc Kishemanitoon, kahkina awiya' omashkawiki'aa' otepwehtamoo' kaatashimaawaci'itinitc.

⁵ Nintaaminwentam kahkina awiya pepahkaanikiishwewinan aapacihtooyek. Nawac itahsh nintaaminwentam kanootamawek Kishemanitoo. Nawac aaniihsh kihtakimaa 'awe kaakanootamawaatc Kishemanitoon ahpiihc wiin a'a kaapepahkaanikiishwetc. Mii ehta keshikihtaapatisitc, i'imaa ayaatc awiya keanihkanoohtamaaketc, kahkina 'imaa kaatashimaawaci'itiwaatc otepwehtamook cioncimashkawi'ikowaatc i'iwe ihkitowin.

⁶ Aaniin, niiciotepwehtamook! Ahpii otihsinakook aaniin keinaapatisiyaampaan pahkaani ishikiishwewinan ehta ishikiikitoyaan? Kiishpin ehta ishikanooninakook Kishemanitoo kaaishikihkentamooshiwetc, kaye kihkencikewin miininakook, kaye kekoon Kishemanitoo ishikanootamawak kemaa kaye kekoon kihkino'amawinakook, mii ehta 'imaa keishiminohse'inakook.

⁷ Inashke aaniihsh kitohcikanak ehpimaatisihsikwaa, maakishaa pootaacikan kaye matweyaapiikipicikan – okanihsitaawihtaan ina awiya 'i nikamon noowaahc iko inwewemohcikenaaniwaninik? Kaawiin iitok.

⁸ Ampe kaye e'antamiikaasonaaniwank, a'awe kaanoontaakohtamawaatc shimaakanihsha', kiishpin noowaahc ishinoontaakohtootc i'i pootaacikan, awenenan itahsh kekihkentaminihpan ciwaweniinitc?

⁹ Mii peshikwan kekiinawaa. Kiishpin ishikiishwehsiwek cipakahkihtaakwahk, aanti keoncikihkencikaatekipan i'iwe kaaihkitoyek? Anihshaa kikamihcikakitom.

¹⁰ Paahtiinatinotokenan ishikiishwewinan o'omaa ahkiink. Kaawiin awaac peshik ishikiishwewin anihshaa inwemakahsinoon.

¹¹ Kiishpin itahsh kihkentansiwaan ishikiishwewin, ninkamayakihtawaa 'awe kaaishikiishwetc, shikwa kewiin ninkamayakihtaak.

¹² Kiinawaa tahsh e'aahko antawentamek ahcaahkowi miinikoowinan, miiwanini maawac kakwenakacihtook ini miinikoowisiwinan awahshime keonciminohse'ikowaatc kahkina otepwehtamook i'imaa kaamaawacianami'aawaatc.

¹³ Miitahsh i'i awenen nehtaa aapacihtootc pahkaan ishikiishwewin okakakwecimaan Kishemanitoon cimiinikotc ciaanihkanoohtamaasotc.

¹⁴ Kiishpin aaniihsh ishianami'aayaan pahkaan ishikiishwewinink, nintahcaahkonk iinsan nintoncianami'aa. Kaawiin i'imaa kaashinaakatawentamaan ishiwiici'iwemakahsinoon.

¹⁵ O'o tahsh ihshihsek, aaniin keishihcikeyaan? Nintahcaahkonk ninkaoncianami'aa, kaye hsa ko kaashinaakatawentamaan ninkaoncianami'aa. Nintahcaahkonk ninkaoncinikam, 'imaahsh kaye kaashinaakatawentamaan ninkaoncinikam.

¹⁶ Kiishpin itahsh kitahcaahkonk ehta oncinanaahkomatc a'a Kishemanitoo, piintiketc itahsh awiya kaawiici inentaakosiimihsinowek, aaniin keshinahkotank “emen” ci‑ihkitotc? Kaawiin aaniihsh okihkentansiin i'i kaaihkitowintc.

¹⁷ Aanawiin ehteonishihshink kinanaahkomiwewin, kaawiin kanake ominose'ikohsiin a'awe kaakihkentansik.

¹⁸ Niin iko ninanaahkomaa Kishemanitoo, awenen iko kaatahshiyek pepahkaani ishikiishwewinan eshiaapacihtootc, nawac niin niipiwa' nintishikiishwe.

¹⁹ Ahpiihsh e'maawaci'itinaaniwank, nawac nintaainentam naanan ciaapacihtooyaan ihkitowinan keishinihsitohtaakwahkin, pahkaan awiya cikihkino'amawakwaa, ahpiihc wiin mitaahcink mitaahswaahk tahsinkin nintihkitowinan e'mayakikiishweyaan.

²⁰ Niiciotepwehtamook, keko 'iwe apinoonciiwi inentamowin ishiaapacihtoohkek. Mii 'owe tahsh ehta cikakweishiayaayek oshkapinoonciishink, cimanaakihkentamek kaamaashinaakwahkin. Kinaakatawencikaniwaank itahsh taapishkoo kaakiishaapewitc ishiayaayohk.

²¹ Kehtekihcioshipii'ikewinink ishipii'ikaate o'owe: “KaaTipenciketc ihkito: ‘Kaamayakikiishwewaatc ninka‑anoonaak cikanoonaawaatc nimpimaatisiima'. Mihsawaa piiwitek otooniwaank ninkaishikanoonaak oko nimpimaatisiimak, keyaapi tahsh kaawiin ninkapisintaakohsiik,’ ihkito.”

²² Miitahsh o'owe ishimiinikoowisiwin pepahkaanikiishwewinan e'aapatahkin e'noontaakwahkin, taoncikihkenintisowak iki kaaotepwehtamowinihsikwaa ehtinowiwaatc. Kaawiin wiin inaapatahsinoon otepwehtamook cikihkenintisowaatc. I'iwe tahsh ishimiinikoowisiwin Kishemanitoo ehkanootamawaatc awiya, mii 'imaa taoncikihkenintisowak otepwehtamook, ishikanoonintwaa. Kaawiin wiin i'imaa kaaotepwehtamowinihsikwaa taoncikihkenintisohsiiwak.

²³ Miitahsh kiishpin kahkina e'maawantoopiintikewaatc otepwehtamook, kahkina tahsh tashipepahkaanikiishwewaatc, kiishpin itahsh oncipiintikewaatc aaninta ikiweniwak ekaa mahshi e'wiici inentaakosiimihsinowekwaa kemaa kaye kaaotepwehtamowinihsikwaa, kaawiin ina kiiwashkweyaatisiwak kitaaikosiiwaak?

²⁴ Kiishpin itahsh kahkina oncikanootamawaawaatc Kishemanitoon otihkitowininiink, miihsh ahpii ehpiintiketc awiya ekaa mahshi kaawiici inentaakosiimiwehsik kemaa kaye kaaotepwehtamowinihsik, okamamiihkwa'okon i'iwe kaanoontank, i'iweni tahsh kahkina kaaihkitonitc kwayahk okawaapanta'ikon aaniin kaainaatisitc.

²⁵ I'iweni kaakiihkaatoohpan otinentamowin mohsheaya'ii taishihsicikaateni. Ta‑animihkohtaa, okakihci‑inenimaan itahsh Kishemanitoon, kaye kikainaacimikowaa tepwe e'wiiciiwinek Kishemanitoo.

Kwayahk ci‑ishinaakwahk kipiintikewiniwaa

²⁶ Aaniin itahsh, niiciotepwehtamook? Ahpii waa'maawaci'itiyek peshik otayaan nikamowin, shikwa peshik otayaan kihkino'amaakewin, shikwa kaye peshik okihkentamo'ikoon Kishemanitoon ciwiintamaaketc. Shikwa peshik pahkaan ishikiishwewin ishimiinaa, miinawaahsh a'a peshik otaanihkanoohtamawaan ini pahkaan kaaishikiishwenitc. Mii ko 'i kahkina tatoocikaatewan cimaamawi mashkawiki'itiyek.

²⁷ Kiishpin awiyak wiipahkaanikiishwewaatc, maakishaa niishin maakishaa kaye nihsin ehta takakitowak, kaawiin awahshime. Pahkaan itahsh iko awiya oka‑aanihkanoohtaan 'iwe kaaihkitowintc.

²⁸ Ayaahsik itahsh awiya keaanihkanoohtank, maano tamihcinamatapi 'awe pahkaanikiishwewin kaa‑ayaatc. Wiinehta takanoonitiso kaye Kishemanitoon okakanoonaan.

²⁹ Ikiweniwak itahsh kaanihtaa kanootamawaawaatc Kishemanitoon taniishiwak kemaa tanihsiwak kekakitowaatc. Kotak itahsh awiyak okakakwesihtaanaawaa.

³⁰ Awiya tahsh iko e'mekwe⁠namatapitc, kiishpin oncikihkentamo'ikotc Kishemanitoon kekoon ciwiintamaaketc, niikaan a'a kaakakitotc takipihcikakito.

³¹ Kahkina pehpeshik kaatahshiyek kikapakitinamaakoom cikanootamawek Kishemanitoo, miitahsh 'iwe kahkina awiya ci‑ishikihkino'amaakoowisitc kaye kahkina cioncimashkawentamowaatc.

³² Awiya tahsh ishimiinikoowisitc cikanoocikehtamawaatc Kishemanitoon, okakashkihtoon citipentank i'i otishimiinikoowisiwin kwayahk ci inaapacihtootc.

³³ Inashke kaawiin 'iwe nihshiwanaatahkamikisiwin otooshihtoohsiin Kishemanitoo, i'iwe hsa cisakahkamikisink. Miinawaa tahsh 'owe eshihcikewaatc Kishemanitoo opimaatisiima' aanti piko kaaishimaawaci'itinitc, peshikwan kekiinawaa ci‑ishihcikeyek:

³⁴ Taka takoskwaawaatapiwak iki ihkwewak. Kaawiin tapakitinamawaahsiiwak cikakitowaatc. Inaawak hsa otaanaank ci‑inentaakosi'itisowaatc. Mii 'iwe eshihsink Kishemanitoo otInaahkonikewin.

³⁵ Kiishpin itahsh kekoon wii'antakihkentamowaatc ekiihtenihsitohtansikwaa, okatashikakwecimaawaan onaapemiwaan paanimaa kiikiiwewaatc owaahkaa'ikaniwaank. Akaciwentaakwan ihsa 'awe ihkwe ehkakitotc 'imaa entashimaawaci'itink.

³⁶ Komaa kiinawaa ehta kii'onciimakanotok i'i Kishemanitoo otihkitowin? Kiinehtawaa na kikiihpiotihsikom?

³⁷ Kiishpin awiya niin kaakanootamawak Kishemanitoo e'inentank, komaa niin nintahcaahkowaatis inentank, otaanihsitaawinaanan ini niin weshipii'amawinakook kaaTipenciketc otinaahkonikewin e'aawaninikin.

³⁸ Kiishpin itahsh awiya wii'noontansik ono ihkitowinan, kaawiin kewiin tapisintawaakaniwihsii.

³⁹ Kiinawaa tahsh niiciotepwehtamook, maawac mihsawentamohk cikanootamawek Kishemanitoo. Kaawiin kaye kikaonci'aahsiwaawaak awiyak cipepahkaanikiishwehsikwaa.

⁴⁰ Maano hsa kahkina kekoon kwayahk ciminonaakwahk, ahpane hsa ko ciminotoocikaatek kahkina kekoon.