Mathayo 14 - IBUKU RĨRĨA ITHERU RĨA NGAI

¹ O hĩndĩ ĩo-rĩ, Herode ũrĩa mũthamaki nĩaaiguire ngumo ya Jesu,

² agĩkĩĩra ndungata ciake atĩrĩ, Ũcio nĩwe Johana Mũbatithania; nĩariũkĩte akoima kũrĩ arĩa akuũ, nĩkĩo mahinya macio marutaga wĩra thĩinĩ wake.

³ Tondũ Herode nĩaanyitĩte Johana, akamuoha, akamũikia korokoro-inĩ, nĩ ũndũ wa Herodia, nĩwe mũtumia wa Filipu, mũrũ wa ithe.

⁴ Tondũ Johana nĩerĩte Herode atĩrĩ, Ndũrĩ na rũtha kũmũtwara.

⁵ Nake rĩrĩa endaga kũmũũraga, agĩĩtigĩra andũ, nĩ ũndũ nĩmoigaga atĩ nĩ mũnabii.

⁶ Na mũthenya wa gũciarũo kwa Herode wakinya, mũirĩtu wa Herodia akĩina rũĩmbo e gatagatĩ-inĩ kao, agĩkenia Herode.

⁷ Nĩ ũndũ ũcio Herode akĩĩhĩta, akiuga atĩ nĩekũmũhe o kĩrĩa angĩmũhoya.

⁸ Nake mũirĩtu ũcio, aataarũo nĩ nyina, akĩmwĩra atĩrĩ, He mũtwe wa Johana Mũbatithania o haha, wĩ kiuga-inĩ.

⁹ Nake mũthamaki akĩigua ũũru; no nĩ ũndũ wa mĩĩhĩtwa yake, na nĩ ũndũ wa acio maaikarĩte nake makĩrĩa, akiuga aheo;

¹⁰ akĩrekania, agĩtinithia Johana mũtwe kũu korokoro-inĩ.

¹¹ Naguo mũtwe wake ũkĩrehwo na kiuga, ũkĩneo mũirĩtu ũcio: nake akĩũtwara kwĩ nyina.

¹² Na arutwo ake magĩthiĩ, makĩoya kĩimba magĩgĩthika; na magĩthiĩ makĩĩra Jesu.

¹³ Nake Jesu rĩrĩa aaiguire ũguo, akiuma kũu ahaicĩte marikabu, agĩthiĩ handũ werũ-inĩ hataarĩ andũ angĩ. Nakĩo kĩrĩndĩ kĩaigua ũguo, gĩkiuma matũũra-inĩ gĩkĩmũkinyĩra na magũrũ.

¹⁴ Nake akiuma marikabu-inĩ, akĩona kĩrĩndĩ kĩingĩ, agĩkĩiguĩra tha, akĩhonia arũaru ao.

¹⁵ Na gwatua gũtuka, arutwo ake magĩũka kũrĩ we makĩmwĩra atĩrĩ, Gũkũ nĩ werũ-inĩ, na gũkirie gũtuka; ĩra kĩrĩndĩ; gĩthiĩ, gĩkinye mĩciĩ-inĩ, gĩkegũrĩre irio.

¹⁶ Nowe Jesu akĩmera, Hatirĩ gĩtũmi gĩa gũtũma mathiĩ; mahei irio arĩ inyuĩ.

¹⁷ Nao makĩmwĩra, Haha tũrĩ na mĩgate o ĩtano, na ciũngũyũ igĩrĩ.

¹⁸ Nake akĩmera atĩrĩ, Ndeherei haha.

¹⁹ Akĩĩra kĩrĩndĩ gĩikare thĩ nyeki-inĩ; nake akĩoya mĩgate ĩo ĩtano, o na ciũngũyũ icio igĩrĩ, akĩrora Igũrũ, akĩrathima, akĩenyũranga mĩgate, akĩmĩnengera arutwo ake, nao arutwo makĩmĩnengera kĩrĩndĩ.

²⁰ Nao andũ acio othe makĩrĩa, makĩhũna: makĩoya cienyũ iria ciatigarire ciondo ikũmi na igĩrĩ ciiyũire.

²¹ Na arĩa maarĩire maarĩ arũme ta ngiri ithano, hatatarĩtwo andũ-a-nja na ciana.

²² Na hĩndĩ o ĩo akĩhatĩrĩria arutwo ake mahaice marikabu, mathiage mũrĩmo mbere yake, mũira wa oigĩre kĩrĩndĩ ũhoro.

²³ Na aarĩkia kuugĩra kĩrĩndĩ ũhoro, akĩambata kĩrĩma-inĩ, agĩthiĩ handũ, e wiki, akahoe; na gũgĩtuka-rĩ, aarĩ ho e wiki.

²⁴ Nayo marikabu hĩndĩ ĩo yarĩ gatagatĩ ka iria, ĩkĩnyarirĩka nĩ makũmbĩ ma maĩ; tondũ rũhuho nĩrũagiragia gũthiĩke.

²⁵ Na ta thaa kenda cia ũtukũ agĩthiĩ kũrĩ o, agĩkinyaga maĩ igũrũ.

²⁶ Nao arutwo ake maamuona agĩthiĩ agĩkinyaga maĩ igũrũ, makĩmaka, makiuga atĩrĩ, Nĩ ngoma; magĩkaya nĩ ũndũ wa guoya.

²⁷ Nake Jesu hĩndĩ o ĩo akĩmaarĩria, akĩmera atĩrĩ, Ũmĩrĩriai; nĩ niĩ tigai gwĩtigĩra.

²⁸ Nake Petero akĩmũcokeria akĩmwĩra, Mwathani, ongorũo nĩwe, njĩra njũke harĩ wee ngĩkinyaga maĩ igũrũ.

²⁹ Nake akĩmwĩra, Ũka. Na Petero akiuma marikabu, agĩikũrũka iria-inĩ, agĩthiĩ agĩkinyaga maĩ igũrũ, akinye harĩ Jesu.

³⁰ Na ona rũhuho, agĩĩtigĩra; na aambĩrĩria kũhorokera maĩ-inĩ, agĩkaya akiuga, Mwathani; honokia.

³¹ Na hĩndĩ o ĩo Jesu agĩtambũrũkia guoko akĩmũgwata, akĩmwĩra, Wee wĩtĩkĩtie o hanini, wathangania nĩkĩ?

³² Nao maahaica marikabu rũhuho rũgĩtuĩka.

³³ Nao arĩa maarĩ marikabu thĩinĩ makĩmũturĩria ndu makiuga, Ti-itherũ, wee nĩwe Mũrũ wa Ngai.

³⁴ Nao maaringa iria, magĩkinya thĩ, o bũrũri wĩtagwo Genesareti.

³⁵ Na rĩrĩa andũ akuo maamũmenyire, makĩrekania ng’ongo ciothe iria ciarĩ gũkuhĩ, makĩmũrehere andũ othe arĩa maarĩ arũaru;

³⁶ nao makĩmũthaitha atĩ metĩkĩrio mahutie o ciohe cia ndigi cia nguo yake; na arĩa othe maacihutirie makĩhona.