2 Maũndũ ma Matukũ ma Tene 3 - IBUKU RĨRĨA ITHERU RĨA NGAI

¹ Na rĩrĩ, hĩndĩ ĩo Suleimani agĩkĩambĩrĩria gwaka nyũmba ya Jehova o kũu Jerusalemu, kĩrĩma-inĩ kĩa Moria, kũrĩa Jehova oimĩrĩire ithe, Daudi, kĩhuhĩro-inĩ kĩa ngano kĩa Orinani, Mũjebusi, o handũ harĩa Daudi aatuire atĩ nĩho ĩgaakwo.

² Nake aambĩrĩirie kũmĩaka mũthenya wa ĩĩrĩ wa mweri wa kerĩ, mwaka wa ĩna ĩrĩa aakorirũo athamakĩte.

³ Na rĩrĩ, gĩtina kĩrĩa Suleimani aathimithirie nĩ ũndũ wa mwakĩre wa nyũmba ĩo ya Ngai gĩatariĩ ũũ: ũraihu wakĩo warĩ mĩkono mĩrongo ĩtandatũ, o ta ũrĩa mũthimĩre wa tene watariĩ; naguo wariĩ wayo warĩ mĩkono mĩrongo ĩĩrĩ.

⁴ Nakĩo gĩthaku kĩrĩa kĩarĩ mbere ya nyũmba ĩo-rĩ, ũraihu wakĩo waiganaine na wariĩ wayo, naguo warĩ wa mĩkono mĩrongo ĩĩrĩ, o naguo ũraihu wa na igũrũ warĩ wa mĩkono igana rĩa mĩrongo ĩĩrĩ; nake Suleimani agĩkĩhumbithia na thĩinĩ guothe na thahabu ĩrĩa therie mũno.

⁵ Nake akĩarithia mbaũ cia mĩthengera kũndũ guothe igũrũ rĩa nyũmba ĩrĩa nene; agĩcoka agĩcihumbithia na thahabu ĩrĩa therie mũno, na igũrũ rĩacio agĩcikururithia mĩhianano ya mĩkĩndũ, o na ya irengeri.

⁶ Agĩkĩgemithia nyũmba ĩo na mahiga ma goro nĩguo ĩthakare; nayo thahabu ĩo yarĩ thahabu ya Paravaimu.

⁷ Nayo nyũmba ĩo akĩmĩhumbithia igũrũ guothe na thahabu, naguo ũguo nĩ ta kuuga mĩratho yayo, na hingĩro cia mĩromo yayo, na thingo ciayo, na mĩrango yayo; nakuo thingo-inĩ agĩgũkururithia mĩhianano ya makerubi.

⁸ Agĩcoka agĩthondekithia kanyũmba karĩa gatheru mũno; naguo ũraihu wako ũkĩiganana na wariĩ wako, naguo warĩ wa mĩkono mĩrongo ĩĩrĩ, o naguo wariĩ wayo ũgĩtuĩka mĩkono mĩrongo ĩĩrĩ; nako kanyũmba kau agĩkahumbithia igũrũ guothe na thahabu ĩrĩa therie mũno, nayo ĩgĩgĩkinyia taranda magana matandatũ ĩgĩthimwo.

⁹ Naguo ũritũ wa mĩcumarĩ warĩ cekeri mĩrongo ĩtano cia thahabu. Natuo tũnyũmba twa igũrũ agĩtũhumbithia kũndũ guothe na thahabu.

¹⁰ Nakuo kũu kanyũmba kau gatheru mũno thĩinĩ, agĩgũicũhithĩria mĩhianano ĩĩrĩ ya makerubi, nayo ĩkĩhumbwo igũrũ guothe na thahabu.

¹¹ Namo mathagu ma makerubi macio maarĩ mĩkono mĩrongo ĩĩrĩ magĩthimwo kũraiha makigiĩ; narĩo ithagu rĩa ikerubi rĩmwe rĩarĩ mĩkono ĩtano, narĩo rĩakinyĩte o rũthingo-inĩ rũa nyũmba ĩo, o narĩo ithagu rĩrĩa rĩngĩ rĩarĩ mĩkono ĩtano, na rĩkahutania na ithagu rĩa ikerubi rĩu rĩngĩ.

¹² O narĩo ithagu rĩa ikerubi rĩu rĩngĩ rĩarĩ mĩkono ĩtano, narĩo rĩakinyĩte rũthingo-inĩ rũa nyũmba; o narĩo ithagu rĩrĩa rĩngĩ rĩarĩ mĩkono ĩtano o ro ũguo, na nĩ kũhutania rĩahutanĩtie na ithagu rĩa ikerubi rĩrĩa rĩngĩ.

¹³ Nakuo gũtambũrũka kwa mathagu ma makerubi macio kwarĩ mĩkono mĩrongo ĩĩrĩ namo merũgamĩtie na magũrũ mamo; namo mothiũ mamo maarorete kũu nyũmba thĩinĩ.

¹⁴ Ningĩ agĩgĩthondekithia gĩtama gĩa kũhakania na ndigi cia rangi wa bururu, na wa zambarau, na wa gakarakũ, o na gatani ĩrĩa njega, agĩcoka agĩgĩtumĩrĩrithia mĩhianano ya makerubi.

¹⁵ Ningĩ mwena wa na mbere wa nyũmba ĩo agĩthondekithĩria itugĩ igĩrĩ cia mĩkono mĩrongo ĩtatũ na ĩtano kũraiha na igũrũ; nacio ciongo iria irĩ mũnduru cia itugĩ-inĩ icio igũrũ, o kĩmwe kĩmwe, ciarĩ cia mĩkono ĩtano.

¹⁶ Ningĩ agĩthondekithĩria irengeri handũ harĩa hatheru mũno, agĩciĩkĩrithia igũrũ rĩa itugĩ icio; agĩcoka agĩthondekithia mĩhianano ya makomamanga igana, akĩmĩĩkĩrithia irengeri-inĩ icio.

¹⁷ Nacio itugĩ icio agĩcihanda hau mbere ya hekarũ, kĩmwe mwena wa ũrĩo, na kĩrĩa kĩngĩ mwena wa ũmotho nakĩo kĩa mwena wa ũrĩo, agĩgĩĩta Jakini, o nakĩo kĩa mwena wa ũmotho agĩgĩĩta Boazu.