2 Maũndũ ma Matukũ ma Tene 2 - IBUKU RĨRĨA ITHERU RĨA NGAI

¹ Na rĩrĩ, Suleimani agĩgĩcirĩra gwaka nyũmba ĩĩtanĩtio na rĩĩtwa rĩa Jehova, o na kwĩakĩra we mwene nyũmba ya ũthamaki.

² Tondũ ũcio Suleimani agĩgĩthura andũ ngiri mĩrongo mũgwanja a gũkuuaga mĩrigo, o na andũ ngiri mĩrongo ĩnana aicũhia mahiga irĩma-inĩ, o na andũ angĩ ngiri ithatũ na magana matandatũ anyabara a kũmaroraga.

³ Ningĩ Suleimani akĩrekia andũ kwĩ Huramu, mũthamaki wa Turo, akiuga atĩrĩ, O ta ũrĩa wekaga baba, Daudi, ũkĩmũrehithĩrie mĩtarakwa eakĩre nyũmba ya gũtũũra-rĩ, niĩ o na niĩ njĩka o taguo.

⁴ Atĩrĩrĩ, nĩ Jehova Ngai wakwa ngwakĩra nyũmba ĩĩtanĩtio na rĩĩtwa rĩake, njoke ndĩmĩamũre ĩtuĩke yake, nĩguo mbere yake hacinagĩrũo ũbumba wa mahuti marĩa manungaga wega, o na haigagwo mĩgate ĩrĩa ĩigagwo mbere yake, o na harutagĩrũo mahaki ma njino ma rũcinĩ na hwaĩ-inĩ, o na ma mĩthenya ya thabatũ, na ma karũgamo-inĩ ka mĩeri, o na ma hĩndĩ ya ciathĩ iria ciathanĩtwo ikoniĩ Jehova Ngai witũ. Ũcio nĩguo mũtugo ũrĩa ũtuĩtwo ũrũmagĩrĩrũo nĩ Isiraeli tene na tene.

⁵ Nayo nyũmba ĩrĩa ngwaka nĩ nene mũno; nĩ gũkorũo Ngai witũ nĩ mũnene gũkĩra ngai ciothe.

⁶ No rĩrĩ, nũ ũngĩkĩhota kũmwakĩra nyũmba, kuona atĩ matu-inĩ, o matu-inĩ marĩa ma igũrũ mũno, ndangĩiganĩra kuo? Kuona nĩ ũguo-rĩ, kaĩ niĩ ndĩkĩrĩ ũ wa kũhota kũmwakĩra nyũmba, tiga o handũ ha gũcinagĩra ũbumba mbere yake?

⁷ Tondũ ũcio ndehithĩrie mũndũ mũũhĩgĩrĩru ũruti wa wĩra na thahabu, na betha, o na gĩcango, na kĩgera, na rangi wa zambarau, na rangi wa gakarakũ, o na rangi wa bururu, o na mũũhĩgĩrĩru ũkururi mĩkururo ya mĩthemba yothe, nĩ getha aikaranie na andũ arĩa ogĩ ndĩ nao gũkũ Juda o na Jerusalemu, o arĩa maahaarĩirio nĩ baba Daudi.

⁸ O na ningĩ-rĩ, ndehithĩrie mĩtarakwa, na mĩthengera, o na mĩthandari, yumĩte kũu Lebanoni; nĩ ũndũ nĩnjũĩ atĩ ndungata ciaku nĩciũhĩgĩrĩire watũri wa mĩtĩ kũu Lebanoni; na atĩrĩrĩ, ndungata ciakwa ĩgeturanĩra na ndungata ciaku,

⁹ nĩguo injigithĩrie mĩtĩ mĩingĩ; tondũ nyũmba ĩrĩa njitĩkĩte gwaka nĩĩgatuĩka ya kũgegania nĩ ũndũ wa kũneneha.

¹⁰ Na atĩrĩrĩ, ndungata ciaku iria njatũri cia mĩtĩ, o icio imĩatũraga-rĩ, nĩngacihe kori ngiri mĩrongo ĩĩrĩ cia ngano ngonyore, o na kori ngiri mĩrongo ĩĩrĩ cia cairi o na mbathi ngiri mĩrongo ĩĩrĩ cia maguta.

¹¹ Hĩndĩ ĩo Huramu, mũthamaki wa Turo, agĩcokia ũhoro ũcio awandĩkĩte marũa-inĩ akĩũtwarithĩria Suleimani, akiuga atĩrĩ, Tondũ wa ũrĩa Jehova endete andũ ake-rĩ, nĩkĩo aagũtuire mũthamaki, ũmathamakagĩre.

¹² Ningĩ Huramu agĩkĩrĩrĩria kuuga atĩrĩ, Jehova Ngai wa Isiraeli arogoocwo, o we ũrĩa wombire igũrũ na thĩ, o ũcio waheire Daudi ũrĩa mũthamaki mũriũ mũũgĩ, ũheetwo ũhoti wa kũbarĩrĩra o na kũmenya wega maũndũ, nĩ getha agaakĩra Jehova nyũmba, o na aake nyũmba ya gũtũũrũo nĩ mũthamaki.

¹³ Na rĩu nĩndakũrehithĩrie mũndũ mũũgĩ, mũmenyi maũndũ, nake nĩ Huramu, mũndũ warĩ wa baba;

¹⁴ na nĩ mũrũ wa mũndũ-wa-nja wa airĩtu a Dani, nake ithe aarĩ mũndũ wa Turo, na nĩ mũũhĩgĩrĩru mũno ũruti wĩra wa thahabu, na wa betha, o na wa gĩcango, na wa kĩgera, na wa mahiga, na wa mĩtĩ, na wa rangi wa zambarau, na wa rangi wa bururu, o na wa ũkururi mĩkururo ya mĩthemba yothe, o na wa gũthugunda ũndũ o wothe ũrĩa ũngĩthugundĩka. Mũndũ ũcio ndamũrehithie kũrĩ wee nĩ getha aheo handũ aikare hamwe na andũ aku arĩa ogĩ, o na andũ arĩa ogĩ a mwathi wakwa, Daudi, thoguo.

¹⁵ Tondũ ũcio rĩu gĩtũrehithĩrie ithuĩ ndungata ciaku ngano, na cairi, na maguta, o na ndibei, iria wee mwathi wakwa waaririe ũhoro wacio;

¹⁶ na ithuĩ nĩtũgũtema mĩtĩ mĩingĩ o ta ĩrĩa ũkabatario nĩyo, yumĩte Lebanoni, na tũcoke tũmĩohanie ĩgerio iria-inĩ ĩkinyio Jopa, nawe ũmĩoere kũu ũmĩambatie ũmĩkinyie Jerusalemu.

¹⁷ Nake Suleimani agĩtara andũ a ndũrĩrĩ ingĩ arĩa maarĩ kũu bũrũri wa Isiraeli, o ta ũrĩa ithe, Daudi, aamatarire; nao makĩonwo marĩ ngiri igana rĩa mĩrongo ĩtano na ithatũ na magana matandatũ.

¹⁸ Nao andũ ngiri mĩrongo mũgwanja thĩinĩ wao-rĩ, akĩmatua a gũkuuaga mĩrigo; nao andũ ngiri mĩrongo ĩnana magĩtuĩka aicũhia a mahiga irĩma-inĩ; nao andũ ngiri ithatũ na magana matandatũ magĩtuwo anyabara a kũheaga andũ acio mawĩra mao.