2 Maũndũ ma Matukũ ma Tene 14 - IBUKU RĨRĨA ITHERU RĨA NGAI

¹ Nake Abija agĩgĩkoma hamwe na maithe, nao andũ makĩmũthika itũũra rĩa Daudi, nake Asa, mũrũwe, agĩthamaka ithenya rĩake; namo matukũ-inĩ make bũrũri ũgĩikara ũtarĩ mbaara mĩaka ikũmi.

² Nake Asa agĩĩka maũndũ marĩa monagwo nĩ Jehova Ngai wake marĩ mega na merekereire;

³ nĩ ũndũ nĩeheririe igongona cia mũthemba wa kũngĩ, o na matĩri ma kũndũ gũtũũgĩru, o nacio itugĩ cia kũhoyũo agĩciunanga, namo Maashera akĩmatemenga;

⁴ nake agĩgĩatha Ajuda akĩmera marongorie Jehova, Ngai wa maithe mao, na mekage maũndũ merekanĩrĩire na watho wake o na maathani make.

⁵ Ningĩ akĩeheria matĩri ma kũndũ gũtũũgĩru matũũra-inĩ mothe ma Juda, o na mĩhianano ya kũhoya riũa; naguo bũrũri ũcio aathaga ũgĩikara ũhoreire.

⁶ Ningĩ agĩaka matũũra mairigĩtwo kũu Juda; nĩ gũkorũo bũrũri nĩwahoreire ũkĩaga mbaara mĩaka ĩo; nĩ ũndũ Jehova nĩaamũheete ũhurũko.

⁷ Ningĩ nĩerire Ajuda atĩrĩ, Rekei twake matũũra maya, tũmarigicĩrie thingo, o na mĩthiringo ya nyũmba ndaya na igũrũ, o na ihingo irĩ na igera. Bũrũri ũgũtũũra ũrĩ o witũ, nĩ ũndũ wa ũrĩa tũrongoretie Jehova, Ngai witũ; nĩtũmũrongoretie, na nĩatũheete ũhurũko na mĩena yothe. Ũguo nĩguo maagĩakire matũũra macio, na magĩtũũra magaacĩire.

⁸ Nake Asa aarĩ na mbũtũ cia ita, andũ marutĩtwo Juda ngiri magana matatũ arĩa mathukagia ngo na matimũ; o na andũ ngiri magana merĩ ma mĩrongo ĩnana, arĩa mathukagia ngo na makarathana na mĩguĩ, marutĩtwo mũhĩrĩga-inĩ wa Benjamini. Nao acio othe maarĩ njamba irĩ hinya.

⁹ Na gũgĩkinya atĩrĩ, atĩ Zera, Mũkushi, agĩgĩũka ahũrane nao, arĩ na mbũtũ ya ita ya andũ ngiri ngiri, na ngari cia ita magana matatũ; nake agĩthiĩ agĩkinya Maresha.

¹⁰ Nake Asa agĩkiumagara nĩguo akamũtũnge, nao makĩarania ita yao gĩtuamba gĩa Zefatha, o kũu Maresha.

¹¹ Hĩndĩ ĩo Asa agĩgĩkaĩra Jehova, Ngai wake, akiuga ũũ: Atĩrĩrĩ, Jehova, gũtirĩ ũngĩ tawe wa gũteithania, ũteithie ũrĩa wĩ na hinya mũno, o na kana ũrĩa ũtarĩ na hinya; Jehova, Ngai witũ, tũteithie nĩ ũndũ wee nĩwe twĩgiritanĩtie nawe, na tũũkĩte kũhũrana na kĩrĩndĩ gĩkĩ twĩhokete rĩĩtwa rĩaku. Atĩrĩrĩ, Jehova, wee nĩwe Ngai witũ; twagũthaitha ndũkareke ciana cia Adamu ikũhoote.

¹² Hĩndĩ ĩo Jehova agĩkihũrĩra Akushi mbere ya Asa, o na mbere ya Ajuda; nao Akushi makĩũra.

¹³ Nake Asa, o na andũ arĩa maarĩ hamwe nake, makĩmateng’eria makĩmakinyia Gerari; naho hakĩgũa Akushi aingĩ moragĩtwo o nginya hakĩaga gũtigwo o na ũmwe muoyo; nĩ gũkorũo nĩmaaninĩirũo mbere ya Jehova, o na mbere ya mbũtũ ciake; nao Ajuda magĩtaha indo nyingĩ mũno.

¹⁴ Ningĩ makĩhũra matũũra mothe marĩa maarĩ ndere-inĩ cia Gerari, nĩ ũndũ Jehova nĩaatũmire andũ amo magwatwo nĩ guoya mũnene mũno; nao Ajuda magĩtaha indo cia matũũra macio mothe; nĩ gũkorũo maarĩ na indo nyingĩ cia gũtahwo.

¹⁵ O namo mahema ma ũhiũ makĩmahũranga, magĩgĩtaha mbũri nyingĩ mũno, na ngamĩra; nao magĩcoka Jerusalemu.