2 Maũndũ ma Matukũ ma Tene 11 - IBUKU RĨRĨA ITHERU RĨA NGAI

¹ Na rĩrĩ, hĩndĩ ĩrĩa Rehoboamu aakinyire Jerusalemu, akĩũnganithia arũme othe a nyũmba ya Juda na ya Benjamini arĩa athure maathiaga ita, andũ ngiri igana rĩmwe rĩa mĩrongo ĩnana, nĩguo makahũrane na Isiraeli macokithie ũthamaki harĩ Rehoboamu.

² No rĩrĩ, ndũmĩrĩri ya Jehova ĩgĩkinyĩra Shemaia, mũndũ wa Ngai, akĩĩrũo atĩrĩ,

³ Aria na Rehoboamu, mũrũ wa Suleimani, mũthamaki wa Juda, o na Aisiraeli othe kũu Juda na Benjamini, ũmere atĩrĩ,

⁴ Jehova oigĩte ũũ: Mũtikwambata, o na kana mũkahũrane na ariũ a ithe wanyu; cokai o mũndũ kwao mũciĩ, nĩ gũkorũo ũndũ ũcio nĩ niĩ ndũmĩte woneke. Nao magĩkĩigua ũnoro ũcio wa Jehova, makĩhũndũka, magĩtiga gũthiĩ kũhũrana na Jeroboamu.

⁵ Nake Rehoboamu agĩtũũra Jerusalemu, na agĩaka matũũra kũu Juda ma gũkũgitĩra.

⁶ Namo matũũra marĩa aakire nĩ Bethi-lehemu, na Etamu, na Tekoa,

⁷ na Bethi-zuri, na Soko, na Adulamu,

⁸ na Gathu, na Maresha, na Zifu,

⁹ na Adoraimu, na Lakishi, na Azeka,

¹⁰ na Zora, na Aijaloni, na Hebironi, matũũra maairigĩtwo ma kũu Juda na Benjamini.

¹¹ Nacio ihingo iria cia hinya agĩkĩrĩrĩria gũciĩkĩra hinya, na agĩkĩiga anene a ita kuo, o na mũthithũ wa irio, o na maguta, na ndibei.

¹² Namo matũũra macio akĩmaiga ngo na matimũ o itũũra, o na akĩmekĩra hinya mũno. Nakuo Juda na Benjamini kwarĩ gwake.

¹³ Nao athĩnjĩri-Ngai o na Alawii arĩa maarĩ kũu Isiraeli guothe magĩĩtwara harĩ we moimĩte ng’ongo ciao ciothe.

¹⁴ Nĩ gũkorũo Alawii nĩmaatigire ithaka ciao cia ũrĩithio, o na kũndũ kũrĩa megwatĩire gũgatuĩka kwao, magĩgĩthiĩ kũu Juda na Jerusalemu; nĩ ũndũ Jeroboamu na ariũ ake nĩmaamaingataga nĩguo matikarutagĩre Jehova wĩra wa ũthĩnjĩri-Ngai;

¹⁵ nake Jeroboamu agĩtua andũ o ro ũguo matuĩke athĩnjĩri-Ngai a matĩri-inĩ, o na a kũhakaga marimũ marĩa mahaana thenge cia njamba, o na mĩhianano ya njaũ ĩrĩa aathondekete.

¹⁶ Na rĩrĩ, thutha wa athĩnjĩri-Ngai acio-rĩ, andũ othe arĩa maarĩ na ngoro ciendaga gũthingata Jehova, Ngai wa Isiraeli, moimĩte mĩhĩrĩga-inĩ yothe ya Isiraeli, o nao magĩgĩthiĩ Jerusalemu nĩ getha makarutagĩre Jehova, Ngai wa maithe mao, magongona.

¹⁷ Acio nĩo mekĩrire ũthamaki wa Juda hinya, o nake Rehoboamu, mũrũ wa Suleimani, makĩmwĩkĩra hinya mĩaka ĩtatũ; nĩ gũkorũo nĩmaarũmĩrĩire mĩthiĩre ya Daudi, o na Suleimani, mĩaka ĩtatũ.

¹⁸ Nake Rehoboamu akĩhikia Mahalathu, mwarĩ wa Jerimothu wa Daudi, na wa Abihaili mwarĩ wa Eliabu wa Jesii;

¹⁹ nake akĩmũciarĩra ihĩĩ ici, Jeushu, na Shemaria, na Zahamu.

²⁰ Na thutha wa ũcio akĩhikia Maaka, mwarĩ wa Abisalomu; nake akĩmũciarĩra Abija, na Atai, na Ziza, na Shelomithu.

²¹ Nake Rehoboamu nĩendaga Maaka, mwarĩ wa Abisalomu, gũkĩra aka arĩa angĩ ake othe, o na gũkĩra thuriya ciake ciothe; (nĩ ũndũ aahikĩtie aka ikũmi na anana, na akagĩa na thuriya mĩrongo ĩtandatũ; nake agĩgĩciara ihĩĩ mĩrongo ĩĩrĩ na inyanya, o na airĩtu mĩrongo ĩtandatũ.)

²² Nake Rehoboamu agĩgĩtua Abija wa Maaka mũnene, anenehere ariũ a ithe; nĩ gũkorũo nĩaacirĩire gũkanamũtua mũthamaki.

²³ Ningĩ tondũ aarĩ mũũgĩ, akihurunjĩra ariũ ake othe bũrũri wa Juda na Benjamini, akĩmaiga matũũra-inĩ mothe marĩa maairigĩtwo nake akamaheaga irio nyingĩ cia kũrĩa, o na akĩmacarĩria aka aingĩ.