Matiu 26 - Ooḅi Adōm Aghuḍum

Uḍikuan ruzue oḅia moghigh ạJizos

¹ Amen ạJizos ạtughumiom moomo iibha ạḅele, podi ạkpete kua ạnogho mobo bho nẹtuonom odi obho,

² “Enyina neelōghōm, ịzal aḍuma isughō pole ẹzaal Opẹl-Otẹn obho. Taḍuma popo pokuugh Ọony Oōy obho ọkan toorẹeny ẹmigheri.”

³ Ipa iru itẹn paruvẹmụ arōoy iḅo miiḅua bho nꞌarukenya arōoy aJu obho iikōbhōghian totu tạKayafas uvẹmụ ōoy iiḅua bho.

⁴ Eedi iḍigh mezue eḅia mọghi oḅol ạJizos tẹḅokia oghigh odi,

⁵ keḍio eedi ịkpete kua, “Ezira uḍighi ḍio miibha mi tẹzaal obho; ibha ezira uḍighi, parōoy obho orubhe ẹgham.”

Uzuom elo ạmunu mạJizos kọolema mi tạBetani

⁶ Tamen olo ạJizos odi totu tạSaimon obho ạnwe mẹzegh ịpueghi riiḅi obho mi tạBetani,

⁷ ponyiin ạni aru todi. Odi ạbham mobꞌokōtō elo olo nạkunu magey, ạla nạ mikpoki magey. Podi aḅuton melo bho azuom tẹmu tạJizos tamen olo odi nale meḍian.

⁸ Obo bho nẹtuonom odi obho ịmiin mipa bho pologhi eedi ạrol aḅẹebh keḍio ịkpete kua, “Ebum eeghe ku nopiẹmi melo bhobho?

⁹ Elo bhobho ạla kua bho, ịkpe molo koḅool, kọseghe mikpoki obho kọnogho maruvekulom obho.”

¹⁰ ẠJizos naalōghōm mibha eedi nẹkpete bho podi ạkpete kua ạnogho eedi, “Eeghe kenyina nẹeḅaghami mạni obho? Ịneghe magey mibha odi aḍighi ạnogho ạami obho.

¹¹ Aruvekulom obho idi nꞌenyina moomo amen, keḍio ạami ụtolan io enyina moomo amen.

¹² Ibha odi naaḍighi obho, odi asighom melo bhobho lōor ạmi mi tiikōbhōghia amaḍi ạmi.

¹³ Esiibha, ịitua ghạ miibha bho. Kesi kesi olo ụgba mọnuekpete ooḅi adōm obhobho mi toomo ẹmar-arōoy obho, ibha odi aḍighi obho tọgba ghạ ni mọotua ghạ odi.”

AJudas amōruan moḅool ạJizos

¹⁴ Tesuo ponyiin taḍiōbh nꞌịzal iteledōm obho, obho ughōl bọ Judas Ịskariot obho, amute ạghi taruvẹmụ arōoy iḅo miiḅua bho

¹⁵ ạkpete kua, “Ạami abhin mạJizos aruom enyina kenyina tẹnogho ạami meeghe?” Peedi iru ịḅal maḍisibh ḍiōbh asilva ịnogho odi.

¹⁶ Ạseghe tamen opopo ạghi taghisigh paJudas ạrol ạva ghạ meepōogh moḅool ạJizos.

ẠJizos atul nꞌiteledōm odi ale mẹzaal Opẹl-Otẹn obho

¹⁷ Tọḅel aḍuma ẹzaal obho noliom ghạ mạbred obho ụlogh ghạ ḍio mạar obho ughōl bọ ayist obho, piteledōm obho iru tạJizos ipuruan kua zodi, “Ezōor ọghi teḍighen ookōbhōghia oseerian ạna mole ẹzaal Opẹl-Otẹn obho?”

¹⁸ ẠJizos ạkpete kua ạnogho eedi, “Ịki mẹmiinan monyiin ōoy mi tẹma bho mẹkpete kua mẹnogho odi, mōoy obo ịtughumiom obho ạkpete kua, mamen odi nạateeny, iteledōm odi nꞌodi tele mẹzaal Opẹl-Otẹn totu onuma.”

¹⁹ Piteledōm obho ịghi ịtuugh iḍighi mẹzo bho ạJizos ạto ạnogho eedi obho, iikōbhōghia meḍian ẹzaal Opẹl-Otẹn obho.

²⁰ Ạteeny mudule pạJizos nꞌaḍiōbh nꞌịzal iteledōm obho ịghi ịrologhu delede mole eḍian ẹzaal obho.

²¹ Eedi nele meḍian obho pạJizos ạkpete kua, “Ạami nạgba magey ạnogho enyina, onyiin enyina taḅool ni ạami.”

²² Pasilōor iteledōm obho ịkpoghogho, ōoy amen amen ạke mopuruan odi kua, “Ạami bẹle, Obumọogh?”

²³ PạJizos ạbhagharana kua, “Odi obo bho natiom mạbred mi tonyiin esi obho ạami natiom obho taḅool ạami.

²⁴ Ẹzo bho nọoge tẹegia bho mobho Ọony Oōy obho tạpo bho pẹzo tẹtuugh nạ emutenaan odi, keḍio itōnyōgh tẹtol ni ẹnogho zodi obo bho taḅool bọ mỌony Oōy obho. Kịneghe ni epu ẹnogho zodi eru kạar olo ụmar io nꞌọmar zodi.”

²⁵ PaJudas, obo bho aḅool odi obho ạkpete kua amutiom apuruan odi, “Obo ịtughumiom, ạami ḍio mobo bho ạna nakōl obho, iben gạ?” PạJizos ạbhagharana kua, “Ạna nạkpete kua, ạami ḍio.”

Eḍian ạruumugh tObạmọogh obho

²⁶ Eedi nele meḍian obho, pạJizos ạseghe mạbred aakpulughu ạnogho lịsebh, aḅigi ạnogho miteledōm obhꞌodi, ạkpete kua, “Ịdo, ile, oobho piikpōogh obhꞌạmi.”

²⁷ Keḍio odi ạseghe mạḅugha amiim obho, aakpulughu ạnogho lịsebh mẸnaan, ạnogho eedi, ạkpete kua, “Ịdo, oomo enyina ịpoghol,

²⁸ iibha ịḅaal ạmi ibha Ẹnaan abhin aghirom ịzo bho, ibha uzu ụnogho mọlogh mọḅelemaan ịkarabh obho.

²⁹ Ạami nạgba magey ạnogho enyina, ạami ụpoghol mụ miim bhibha ninii ạteeny ḍuma bho ạami tatul nꞌenyina ạpoghol mi tAde-Ọolema tỌde ạmi obho.”

³⁰ Eedi ịmoor sọor ịḅele peedi imute ịghi tobꞌeegum obhꞌỌlivs.

ẠJizos ạgba mibha aPita tạparanaan odi

³¹ Tebōom obho pạJizos ạkpete kua ạnogho eedi, “Ạkar uḍugul aadon poomo enyina oghiil ọḍua ọḅele ạmi, ebum obho ụkpete kua tẹegia bho, ‘Ẹnaan takigh mookō rạana bho keḍio ạraana bho tẹezaranu.’

³² Oomo ipa ẹkona, amen nooḅẹtōn ạami tọbho bho pạami ọghi ghạ taGalili oḅōrō enyina.”

³³ PaPita ạkpete kua amutiom ạnogho mạJizos, “Ạami ụḅele ḍio ạna bọbon amen ạḍua. Oomo ipedi obho ịḍuaghu nạ ni ẹkona ạami ụḍua ḍio.”

³⁴ PạJizos ạkpete kua ạnogho maPita, “Tụtua miibha bho ạami nạkpete ạnogho ạna bho. Keḍio ạkenegh tạlaal muḍugul aadon ạna nạabharanaan ạami ịraar amen.”

³⁵ PaPita ạbhagharana kua, “Ughōl nạ nokigh ạami ẹkona ạami ụparanaan io ạna.” Poomo iteledōm obho ịkpete nạ monyiin ẹzo bho.

ẠJizos aakpulughu mỌde bho

³⁶ Ipa iru itẹn pạJizos abhin miteledōm obhꞌodi nꞌodi ịghi tesi olo ughōl Getsemani, keḍio ạkpete kua ạnogho eedi, “Ịtologhu suo delede meḅōrō ạami, ạami ụki epa uukpulughu.”

³⁷ Podi ạbhamam nꞌaPita nꞌịzal ạnwuny obho taZebidi. Ịitu nꞌịiḅaghami neelegheri esōorōm odi,

³⁸ keḍio odi ạkpete kua ạnogho eedi, “Ịitu obhꞌekpom ạmi neepu molo idi kolo netu moḅiiḍi ạmi oghigh. Ịtol suo megon eḅōrō ạami.”

³⁹ Odi arele ạghi taghisigh mịbam, pagbuluman azumeni ghisigh odi tade bho, aakpulughu aghōl kua, “Ạda, eru kạar olo iḍigh tologhi onuma putughuneen mọmiinom obhobho mi tạmi. Oomo ipa ẹkona, ịtol io tibha ịto ạmi, ẹrol ni tịto onuma.”

⁴⁰ Odi aakpulughu kua ạḅele, podi amula ạghi tịraar iteledōm obho, eedi nekoḍiiy, podi ạkpete kua ạnogho maPita, “Eeghe aḍighi kịraar enyina irue ḍio mogon oḅōrō ạmi bọbon onyiin ạwa?

⁴¹ Igon ghạ be meekpulughu molo enyina imeel eḍigh tọdegh oonon. Idi tologhi ẹmugh obho keḍio iikpōogh obho irue ḍio, idugh ni epu.”

⁴² Podi amina amula mogbẹbhiōm ịzal amen ạghi aakpulughu aghōl kua, “Ạda, eru kạar olo tughuneen molo ạami ụmiinom mọmiinom obhobho nolo itue ḍio ẹneghe, pẹrol ni tibha ịto bhꞌonuma.”

⁴³ Odi amina amula ạghi iteledōm obho, nekoḍiiy ni, irue nạ ḍio norue momina ọkparion ariḍien obhꞌeedi.

⁴⁴ PạJizos amina ạḅele eedi ạḍua, ạghi aakpulughu mogbẹbhiōm ịraar amen, ạkpete nạ monyiin odi ọnuekpete bho.

⁴⁵ Odi aakpulughu ạḅele, podi amula ạghi titeledōm obho ạkpete kua, “Enyina idi nini nekoḍi epooghia? Iinon, amen obho nạateeny mobho tokuugh mỌony Oōy obho ọlogh tạravo iḍighi mịkarabh arōoy.

⁴⁶ Iḅerenu, ọghi! Iinon, oobho odi ōoy obho, obo naḅool ạami obho.”

Uḅol mạJizos

⁴⁷ ẠJizos odi nini ạḍeghe men aJudas, onyiin taḍiōbh nꞌịzal obo bho nẹtuonom odi obho aru, odi nꞌobꞌọlogh arōoy ilo iroḍi mibꞌạsumugem ẹgham nꞌarugule. Aruvẹmụ arōoy iiḅua bho nꞌarukenya arōoy aJu obho irōm eedi.

⁴⁸ Odi obo bho aḅool odi obho, nạakpete ạnogho mobꞌọlogh arōoy obho, ạnogho eedi melẹgh, akōl kua, “Oōy olo ạami uḅolom podi ōoy obho, iḅol odi.”

⁴⁹ Amen aJudas aru asi podi akẹm ạghi tạJizos ạkpete kua, “Obo ịtughumiom, ekima ẹrol ẹnogho ạna!” Keḍio aru aḅolom odi.

⁵⁰ Keḍio ạJizos ạbhagharana kua zodi, “Ọbulol, kẹm aḍighi mibha ạna natu moḍighi obho.” Peedi arōoy obho iru iḅol odi, ịmaar ikinighi.

⁵¹ Ponyiin obo bho idi nꞌạJizos obho ạnyagh mobꞌạmugem odi amutiom aben asōbh maḅeri ẹbana uvẹmụ ōoy oḅo iiḅua bho.

⁵² PạJizos ạkpete kua ạnogho odi, “Kpọlori mobꞌạmugem onuma mamulumi maseeri, ebum obho oomo obo bho neḅiom obꞌạmugem obho tẹpo ḍuugh obꞌạmugem obho.

⁵³ Ạna olōghōm io gạ mobho, ạami aghōl mobheleghi Ọde ạmi karu kạlogh mạva kạnogho ạami, tonyiin odi amen opopo odi tatōm ni maḍiōbh nꞌịzal ọlogh itelema iḅe-rạagham moru?

⁵⁴ Iibha bho keru emute kua, toḍighi ẹko koḍighi opulughiom tibha ọnuekpete ẹegia bho, mẹetuugh imute?”

⁵⁵ Keḍio odi ạJizos aghiraan ạkpete kua ạnogho mobꞌọlogh arōoy obho, “Enyina ịbhamagh mibꞌạsumugem ẹgham nꞌarugule eru moḅol ạmi kilo enyina iru moḅol ọḅa. Oomo aḍuma mobho ạami ụrol ghạ delede ụtughumiom mi totu iikpulughu obho, keḍio enyina iḅol io ạami.

⁵⁶ Keḍio oomo iibha bho ịtuugh ni nemute moḍighi obhulughiom tibha arizil obho ịge tẹegia bho.” Tiibha bho poomo iteledōm obho ịḅele odi ighilighu ịḍua.

Ụmarami mạJizos taghisigh arōoy isōbh rạakpe bho

⁵⁷ Obo bho iḅol bọ mạJizos obho ibhin odi ẹghi totu tạKayafas, uvẹmụ oḅo miiḅua bho. Arōoy obo ịtughumiom araalōgh obho nꞌarukenya bho neekōbhōghian todi otu obho.

⁵⁸ APita nạatuonom odi tegbeeny aḍigh ạni togigo otu osōbh ạraakpe uvẹmụ oḅo miiḅua bho. Odi aḍigh togigo bho, ạghi atul nꞌarōoy iḅōrō bho ạrol delede, mọmiin oomo ibha temute bho.

⁵⁹ Aruvẹmụ arōoy iiḅua bho nꞌoomo isōbh rạakpe bho ịva bọbon iben oḅologhiom ạJizos molo koghigh odi,

⁶⁰ keḍio bọbon ạar olo eedi ịteeny olo, toomo ibha ọlogh arōoy iru ịgba miben ịḅam tẹmu odi obho ẹkona. Ikunughi obho pịzal arōoy imute iru

⁶¹ ịkpete kua, “Odi ōoy obhobho ạkpete kua, ‘Ạami tatue ni ạakpo motu iikpulughu obho tẸnaan amina aḅōgh ạmarami teesoḍia ịraar aḍuma.’ ”

⁶² Puvẹmụ oḅo miiḅua bho aḅetunu ạkpete kua ạnogho mạJizos, “Ọbhagharana olo ạna ụteeny mọbhagharana toomo ibha nọgba ọḅam tẹmu onuma bho olo?”

⁶³ Keḍio odi ạJizos ẹkona ọkpete nạ ḍio mạar. Puvẹmụ oḅo miiḅua bho amina ạkpete kua ạnogho odi, “Taḍien tẸnaan obho aḍum ni ạrol kamen kamen obho, mobho ạami ubhin nakirom mịzo bho, gbạ mạnogho ezōor eru kạar olo ạna uru maKraist Ọony obho tẸnaan obho.”

⁶⁴ PạJizos ạbhagharana zodi aghōl kua, “Ạna ku nạkpete mipa bho, keḍio ạami nạgba kua ạnogho moomo enyina, ạseghe siibha ạghi taghisigh enyina tẹmiin ni mỌony Oōy obho mobho odi delede mi toḍiom ạvo obo bho ạmoogh moomo ẹmiriikpo bho, amina nạ ạḍua teḅōghōghaan ạnyu obho natu.”

⁶⁵ Tiibha bho puvẹmụ oḅo miiḅua bho aruura mạsuoma odi ạkpete kua, “Odi nạakpete mịkarabh aḍighanaan mẸnaan. Ezira ụva mu mịnon ịigbaay. Esiibha ezira nọomiin mọnuekpete ịkarabh obhꞌodi.

⁶⁶ Enyina nẹetua ẹko?” Peedi ịbhagharana kua, “Neebhum odi, odi tạpo ni.”

⁶⁷ Peedi ịsiroghom odi mịghor taghisigh odi, iḅōrōgh nạ zodi, keḍio eedi obo bho iḅōrōgh odi obho

⁶⁸ ịkpete kua, “Ạna aKraist obho, gbạ mạnogho ezōor mobo bho iḅōrōgh ạna bho.”

APita ạbharanaan mạJizos

⁶⁹ APita ạrol delede tetẹrẹ mi togigo bho, ponyiin ẹbana ọnyani uvẹmụ oḅo miiḅua bho aru todi ạkpete kua, “Ạna ụrolan ạni ghạ mạJizos obhꞌaGalili obho.”

⁷⁰ PaPita ạbharanaan taghisigh oomo eedi ạbhagharana kua, “Ạami ulōghōm io mibha ạna nạkpete bho.”

⁷¹ Odi ạbhagharana ạḅele pạḍua ạghi ạrol tọnu-otu ogigo bho. Pọnon ẹbana ọnyani ạmiin odi ạkpete ạnogho mobo bho idi todi esi obho aghōl kua, “Odi ạrolan ạni ghạ nꞌạJizos obhꞌạNazaret obho.”

⁷² PaPita amina ạbharanaan ạbhagharana kua, “Ịzo ẹko ạami takir ni, ạami ulōghōm io mōoy opopo.”

⁷³ Ịbam amen itẹn parōoy obho ịmaraay todi esi obho iru taPita ịkpete kua, “Agey, ọnuekpete onuma iizuan io.”

⁷⁴ PaPita aghir mịzo aghōl kua, “Ẹnaan ạrabh ạami eru kạar olo ạami nạgba miben. Ạami ulōghōm io mōoy opopo.” Ibia ḍio pạkenegh ạlaal,

⁷⁵ keḍio aPita ạatua mibha ạJizos ạkpete ạnogho odi obho, “Keḍio ạkenegh tạlaal, ạna nạabharanaan ạami ịraar amen.” Podi amute ạḍua ạghi aleghe magey.