Mạk 3 - Ooḅi Adōm Aghuḍum

Oōy olo ạvo bho naamugh

¹ Keḍio ạJizos amula ạghi totu ịtughumiom obho. Tesuo kir ōoy olo ạvo bho naamugh.

² Kir ẹde arōoy ilo idi ạni ilo nẹva mạar olo obhin ọgbaam ọbhamam ạJizos, peedi ịke mogon eru kạar olo odi taakō ni mōoy obho mi taḍuma obhooghia bho.

³ PạJizos ạkpete kua ạnogho mōoy obho ạvo bho naamugh obho, “Tele maru eebha taghisigh ogbo arōoy obho.”

⁴ Keḍio ạJizos apuruan kua rōoy obho, “Iḍighen mibha iizuan moḍighi tẹzo araalōgh obhꞌezira mi taḍuma obhooghia bho? Ọlogh ạvo ọnogho ōoy nꞌoḍighi odi mịkarabh? Ọbhel aghuḍum ōoy nꞌobhiẹmi aghuḍum obhꞌodi?” Oomꞌeedi iḅa ni be ịrol bịrim.

⁵ Ẹzo bho ạJizos naanon eedi obho ariḍien obhꞌodi neeghiraan. Tonyiin odi amen opopo pạghusan eedi isibh odi mebum ọḅaar ẹmu obhꞌeedi nꞌobho eedi neekōrōnuan obho. Keḍio odi ạkpete kua ạnogho mōoy obho, “Sele mạvo onuma.” Odi asele pạvo bhꞌodi aru ạneghe.

⁶ Parōoy aFarisi obho ịḍua totu ịtughumiom obho iikōbhōghian tonyiin esi nꞌarōoy iḅōrō tạHerod, eedi iḍikuan ruzue mẹzo oghigh odi ạJizos.

Eghu arōoy ilo ịrol tobꞌegha bho

⁷ Tipa bho pạJizos nꞌobo bho nẹtuonom odi obho ịḍua ịghi tobꞌegha bhꞌaGalili. Tesuo pobꞌọlogh arōoy iru todi. Eedi ịḍua taGalili nꞌaJudia,

⁸ nꞌaJerusạlẹm, nꞌebhugh obhꞌIdumia, nꞌebhugh obho odi tẹḅeenyom ọbhiiny obhꞌạJodan, nꞌạraama ebhugh aTaya nꞌaSaidon ibha ituan obho keru. Eedi obꞌọlogh arōoy obho iru tạJizos tebum obho eedi nẹemoghon mọkpo bho ạJizos naḍighi obho.

⁹ Arōoy obho ịbugh ni epu molo ạJizos ạkpete ạnogho mobo bho nẹtuonom odi obho mọva oghuugh oseerian odi, molo arōoy obho ịizeghi odi.

¹⁰ Odi naakō mobꞌọlogh arōoy molo oomo obo bho nẹnweey obho nenyuughian moḍigh ọghi okulaan odi.

¹¹ Kamen kamen olo obo bho ịkarabh ạruumugh nẹeḅaghami obho ịmiin odi peedi ogbuluman omulughu oghōl ekua, “Ạna Ọony obho tẸnaan.”

¹² PạJizos ạbhooruom magey mịkarabh ạruumugh obho mọḅele ọgba odi omutiom.

ẠJizos ạson maḍiōbh nꞌịzal iteledōm obho

¹³ Ipa iru itẹn, pạJizos ạsiin tạnyu eegum abheleghi marōoy obho iḍigh tologhi odi obho iru todi. Eedi iru todi,

¹⁴ podi ạson maḍiōbh nꞌịzal ibha odi aghōl ḍien aghōl iteledōm obho. Keḍio odi ạkpete kua ạnogho eedi, “Ạami nạason enyina mọrolan ạmi. Ạami tatōm ni enyina amutiom mọghi ọgba adōm obho,

¹⁵ obhin nạ ịnyaam obhirighanogh ịkarabh ạruumugh.”

¹⁶ Iibha eedi aḍiōbh nꞌịzal obho odi ạson ạseghe bho: ạSaimon (obho ạJizos ạnogho mọnon aḍien aghōl aPita bho);

¹⁷ aJems nꞌạJon umōr odi, (eedi ạnwuny taZebidi, ibha ạJizos aghōl ḍien eedi aghōl araBoanaag, ẹmu obho “arōoy aḍio olo nagumughu”);

¹⁸ nꞌẠndru, nꞌaFilip, nꞌaBatolomiu, nꞌaMatiu, nꞌạTomos, nꞌaJems ọony tẠlifios, nꞌạTadios, nꞌạSaimon ẹku arōoy ibha ughōl bọ aZelot obho,

¹⁹ nꞌaJudas Ịskariot obho aḅool mạJizos obho.

ẠJizos nꞌaBielzebul

²⁰ Ipa iru itẹn pạJizos atẹn aghẹel. Onyiin ẹzo bho nạ obꞌọlogh arōoy iru iikōbhōghian molo ạJizos nꞌiteledōm odi ịteeny io nọteeny men ole eḍian.

²¹ Amen aburumōr odi ịmoghon mipa bho peedi ịghi mobhin odi, ebum obho arōoy nẹkpete ekōl kua, “Odi nạtaal.”

²² Ẹde arōoy obo ịtughumiom araalōgh obho, ilo ịḍua taJerusạlẹm iru ịrol ịkpete kua, “ABielzebul ọkarabh ẹmugh obho odi todi.” Ịnon ịkpete kua, “Uvẹmụ aruru obho ạnogho odi mịnyaam obhirighanogh eedi.”

²³ PạJizos abheleghi rōoy obho iru todi keḍio odi adōgh mẹde asidōgh bhibha ạnogho eedi aghōl kua, “Imute ẹko molo aSetan tapirighan maSetan?

²⁴ Eru kạar olo onyiin ebhugh ịḍianogh rụuku onyiin naḅe monyiin, ebhugh opopo orue ḍio ạmara, tameel ni.

²⁵ Eru kạar olo onyiin eghun otu ịḍianogh rụuku onyiin naḅe monyiin, eghun otu opopo orue ḍio ạmara, tameel ni.

²⁶ Tebum iibha bẹleni, eru kạar olo ade-ọolema taSetan nẹeḍianogh rụuku, odi ọrolom mu mẹtolom obho, ikunughi odi naatuan.

²⁷ “Oōy olo tatue aḅom aḍigh totu ōoy olo ạghua magey aminyogh mọkpo odi ạḍuonom olo, tughuneen molo odi abhira abhum mọoghuanaan ōoy obho ạbhaḍi ḍio, keḍio odi tagbi mookōbhōghi ọkpo ōoy obho ọḍuonom.

²⁸ “Ịitua miibha bho. Totue ni ọḅelemaan kịkarabh kịkarabh ilo arōoy iḍighi nꞌoomo ịkarabh ọnuekpete ilo eedi ịkpeteey.

²⁹ Keḍio kōoy kōoy olo ạkpete mịkarabh aḍighanaan mẸmugh Iigbia bho ọḅelemaan olo, ebum obho odi naaḍighi mịkarabh olo ikunughi olo bho.”

³⁰ (ẠJizos ạkpete miibha bho tebum obho ẹde arōoy ịkpete ighōl kua, “Ọkarabh ẹmugh odi todi.”)

Oniin nꞌaburumōr tạJizos

³¹ Eedi idi suo, poniin nꞌaburumōr tạJizos iru. Eedi ịmara tetẹrẹ erōm dōm ịghi nepuruan ghạ zodi.

³² Obꞌọlogh arōoy ịrologhu delede ekō mạJizos ẹlogh togbo. Eedi pobo ịgba ịnogho mạJizos ighōl kua, “Nonon ni, oniin onuma nꞌaburumōr onuma idi tetẹrẹ nepuruan ạna.”

³³ PạJizos ạbhagharana kua, “Okōr ōoy oniin ạmi? Ikōr arōoy aburumōr ạmi?”

³⁴ Podi akiton aanon mobo bho ịrol delede ikō zodi ikiton obho aghōl kua, “Iinon, iibha poniin nꞌaburumōr ạmi.

³⁵ Kōoy kōoy olo aḍighi mibha Ẹnaan nạva molo odi kaḍighi obho, odi pumōr nꞌụmarani nꞌoniin ạmi.”