Luk 23 - Ooḅi Adōm Aghuḍum

Eedi ịmarami mạJizos taghisigh taPailet

¹ Poomo eedi iḅerenu ibhin mạJizos ịghiom maPailet.

² Taghisigh taPailet peedi ịke mọgbaaghiom odi miben, ighōl kua, “Ezōor nọomiin mibha ōoy obhobho naabiōghōm rōoy, nạkpete ạnogho zeedi meedi isōgh io mosōgh ẹnogho mọola bho aRom, keḍio nakōl nạ modi aKraist ọola bho.”

³ Keḍio aPailet apuruan odi kua, “Ạna ọola arōoy aJu obho?” PạJizos ạbhagharana zodi kua, “Ạna ku nakōl kua.”

⁴ Keḍio aPailet ạkpete ạnogho marōoy iiḅua bho nꞌọlogh-ọlogh arōoy obho, aghōl kua, “Apum olo ạami ụva ụmiin mi tōoy obhobho molo oghigh odi olo.”

⁵ Peedi ịbhooru imulughu modi naabhin mịtughumiom odi naḅia moomo arōoy aJudia morubhe ẹgham. Odi ạke taGalili, keḍio esiibha odi naarōol asiom suo.

Eedi ịmarami mạJizos taghisigh tạHerod

⁶ Amen aPailet ạmoghon mẹzo bho, podi apuruan kua, “Oōy obhobho olꞌaGalili?”

⁷ Amen odi aru ạmoghon mobho ạJizos aru molo ebhugh tạHerod, podi ạnogho zodi marōoy iḅōrō bho mọghiom ạHerod. Odi odi nạ taJerusạlẹm men opopo.

⁸ Ologhi tạHerod ạḅaal magey mọmiin ạJizos. Kọkanya amen mobho odi nạamoghon mọdu tạJizos, keḍio odi nạva ghạ mọmiin odi. Odi nạva molo ạJizos kaḍighi mọkpo ibꞌaruugu odi kạmiin.

⁹ Podi ạHerod apuruan mạJizos mọlogh iipuruan, keḍio ạJizos ọsir io bọbon ọghor.

¹⁰ Keḍio arōoy iiḅua bho nꞌarōoy obo ịtughumiom iilōgh obho imute iru nemulughuom ẹgbaaghiom odi miben.

¹¹ Keḍio ạHerod nꞌarōoy ẹgham odi ịiḅaghami zodi, ịloki nạ zodi rẹgheer. Keḍio eedi ịseghe mobꞌạdoni ạruula ịḅologhi zodi, ibhin zodi imulumi ịghiom aPailet.

¹² Todi ạkar aḍuma popo, pạHerod nꞌaPailet iru bụrubulol. Tamen iibha bho demute ḍio bho, eedi obo ọlokian ariḍien.

Usōbh mọkpe bho obhumeni mạJizos moghigh odi

¹³ PaPailet amina abheleghi marōoy iiḅua bho, nꞌạruula bho, nꞌarōoy obho aakōbhōghi monyiin esi,

¹⁴ ạkpete kua ạnogho zeedi, “Enyina ibhin mōoy obhobho eruom ạami eghōl modi nateliom rōoy mi tịkarabh araabōom. Ạami, mi toomo ịigbaay enyina, ụmiin io mapum obho enyina nẹpamam odi obho.

¹⁵ Ẹzo bho ạHerod amulumi zodi aru tạmi obho, podi ẹkona ọmiin io mapum odi nạ. Bọbon ạar olo ōoy obhobho naaḍighi molo ịgbaan lo odi kạbho olo.

¹⁶ Tebum iibha bẹleni, ạami tạgurogh odi, ạḅelemaan.”

¹⁷ [Toomo aḍuma ẹzaal Opẹl-Otẹn obho, aPailet namutiom ghạ monyiin ōoy ikoli ạnogho zeedi.]

¹⁸ Oomo arōoy obho imulughu imutiom, “Kigh zodi mamutiom mạBarabas mạnogho ezōor.”

¹⁹ (ẠBarabas odi mikoli, tebum obho odi aghigh mōoy, tamen olo uḅeey ralebhir tẹma bho.)

²⁰ APailet nạva mẹzo olo omutiom ạJizos, podi amina amula aru tarōoy obho ạkpete modeenyemi iloghi eedi.

²¹ Parōoy obho imulughu imulumian odi, “Toorẹeny ẹmigheri obho, kạn zodi toorẹeny ẹmigheri obho!”

²² Keḍio aPailet amina ạkpete mogbẹbhiōm ịraar amen ạnogho zeedi, “Okōr oḍigh ịkarabh mibha odi aḍighi? Ạami ụmiin io mapum olo ịgbaan molo odi kạbho. Ạami tạgurogh odi amutiom.”

²³ Peedi imulughu tạruumu eedi ighōl mụkan mạJizos mi toorẹeny ẹmigheri obho. Imulughu obhꞌeedi neepu molo eedi ipuom aPailet.

²⁴ PaPailet asōbh mọkpe bho abhumeni mạJizos kẹzo bho eedi negbẹel obho.

²⁵ Keḍio odi amutiom mōoy obho eedi negbẹel obho, odi obo bho aḍigh mikoli tebum obho odi aghigh mōoy tamen olo uḅeey ralebhir obho, keḍio odi ạseghe mạJizos ạnogho zeedi moḍighi kẹzo kẹzo olo iḍigh tologhi eedi.

Eedi ịkan mạJizos toorẹeny ẹmigheri

²⁶ Keḍio eedi ịseghe mạJizos ịḍuonom. Ẹzo bho eedi nẹki obho, peedi ịmiinan mōoy olo ughōl ạSaimon, olꞌaSairini, ạḍua nạki tẹma bho. Peedi ịbham zodi, ịnogho moorẹeny ẹmigheri obho morōol ạtuonuman ạJizos.

²⁷ Obꞌọlogh arōoy ẹtuonuman zodi. Ẹtede eedi pạraani olo neleghe nepumughu mebum odi.

²⁸ Keḍio ạJizos aghiraan teedi ạkpete kua, “Enyina ạraani aJerusạlẹm, íleghe ghạ mebum ạmi, ileghian lōor enyina nꞌebum ạnwuny enyina.

²⁹ Aḍuma natu molo arōoy tẹkpete kua, ‘Ạlisebh ilꞌạraani obho ạnwuny ilo bho, obo bho dẹmaraghi ghạ ḍio rụnwuny obho, obo bho ọony dọmaam ghạ ḍio rạamaam eedi obho.’

³⁰ Opo pamen obho arōoy tẹkpete kua ẹnogho mibꞌaruugum ạrubharakpar obho, ‘Imeleghuom ezōor,’ keḍio tẹkpete ẹnogho mịbam obho, ‘Ikpereghiom zezōor!’

³¹ Erumolo ọkpo olo idi kua nemute siibha imoom iirẹeny obho, tẹtol ẹko tamen olo iirẹeny obho neemughughu?”

³² Keḍio eedi ịseghe mịnon ịzal arōoy ịkanam nꞌạJizos, ạruukoma zeedi arōoy obho.

³³ Amen eedi isi teegum obho ạgbaanan bọ kịikpo ẹmu ōoy obho, peedi ịkan zodi toorẹeny ẹmigheri obho, nꞌịzal ạruukoma bho, mi tekẹeny nꞌoḍiom tạJizos.

³⁴ Keḍio ạJizos ạkpete kua, “Ọde, ḅẹlemaan zeedi! Eedi ilōghōm io mạar olo eedi neḍighi.” Keḍio eedi ịsa mẹlel ịḍian marukpe bhꞌodi.

³⁵ Arōoy obho nẹemaraay nepōgha; tẹzo bho, paruvẹmụ arōoy aJu obho nẹeḅaghami ghạ zodi, “Hụu! Odi nạpel ghạ mịnon, odi ạbhela lōor odi, erumolo odi aru maKraist obho tẸnaan, ạkar obho odi nạason ạseghe bho!”

³⁶ Arōoy ẹgham obho ẹkona ịmologh nạ zodi, keḍio eedi iru ịnogho zodi mạkata,

³⁷ keḍio ighōl kua, “Pẹla lōor onuma, erumolo ạna uru mọolema aJu obho!”

³⁸ Keḍio nọoge nạ kua mi tạnyu oorẹeny ẹmigheri obho: “Oobho ọolema arōoy aJu obho.”

³⁹ Onyiin ọokoma bho mi tẹeghelaan obho ạkpaton nạ mọnu ạkpete zodi mịkarabh, “Ạna aKraist obho ḍio? Pẹla lōor onuma maru mạbhel ạni ezōor!”

⁴⁰ Keḍio ōoy opedi obho asi zodi, “Ạna oghiil io mẸnaan? Odi nꞌezira idi tonyiin ọmiinom obho.

⁴¹ Ibha tezira ịkar ni ẹgbaan, ezira nọsughō ḍien, keḍio odi bọbon ịkarabh olo odi aḍighi olo.”

⁴² Keḍio odi ạkpete kua ạnogho mạJizos, “Obumọogh tụtua zạmi mamen ạna tatu mọda ẹmar-arōoy obho!”

⁴³ PạJizos ạkpete kua ạnogho zodi, “Ạami nạgba kua ạnogho ạna: aadon ạna tạtolan ạami tesi obhooghia obho!”

Ọbho tạJizos

⁴⁴ Tamen olo aḍio natu mọḍian ịzal abin, paghōzōgh obho aḅil, keḍio obꞌọkinim akpe moomo ẹma bho ninii kogbo ọsilaan.

⁴⁵ Keḍio obꞌukpe bho ụkpo bọ totu iikpulughu obho ạbaan ạḍian ịzal abin.

⁴⁶ Tigbōgh imulughu nꞌobꞌoghōrōkō, pạJizos aleghe kua “Ọde, ạami ụseghe mẹmugh obhꞌạmi ạlogh tạravo bhꞌonuma.” Odi ạkpete kua ạḅele, podi ạbho.

⁴⁷ Uvẹmụ arōoy ẹgham obho ạmiin moomo ibha imute bho, podi abuom Ẹnaan aghōl kua, “Tagey obho, ōoy obhobho ooḅi ōoy!”

⁴⁸ Oomo obo bho ịmara nepōgha bho, amen eedi ịmiin moomo ọkpo bho imute bho, peedi ịḅamaghi rạvo tạruumu eedi keḍio igheleghu.

⁴⁹ Oomo obo bho nẹemar ilōghōm mạJizos obho, nꞌạraani obho ịtuonuman zodi ki taGalili obho, ịmaraay tegbeeny ẹrol ẹmiin mibha nemute bho.

Amaḍi tạJizos

^50-51 Kir ōoy olo ughōl aJosef olo Arimatia, onyiin ẹma arōoy aJu obho. Odi ooḅi ōoy, ogbōgh ōoy nạ, olo naḅōrō mAde-Ọolema bho tẸnaan moru. Odi odi ạni tạruula ibha nẹto mịto bho, keḍio odi omōruōm ạni ḍio mịto bho eedi ịto bọ moghigh ạJizos obho.

⁵² Odi ạghi taPailet agbẹel moḍim obho tạJizos.

⁵³ Keḍio odi asōorẹ zodi, ạseghe mạbalala abhurughiom zodi, keḍio ạseghe zodi ạlogh toogu olo odi agbo mi tạrubhurukpar, olo doḍi ghạ ḍio mōoy.

⁵⁴ Iibha bho imute mudule aḍuma iikōbhōghia obho tạḅaal paḍuma obhooghia arōoy aJu obho.

⁵⁵ Ạraani obho ịtuonuman mạJizos ki taGalili obho ịghi ạni, ịrol ạni ịmiin moogu obho aJosef aḍi mạJizos obho, nꞌẹzo bho odi aḍi obho.

⁵⁶ Keḍio eedi imula ighẹel iikōbhōghia maralo nꞌạrumunu milo ooduom toḍim obho tạJizos. Tebum iilōgh obho, peedi ibhooghia mi taḍuma oobhooghia arōoy aJu obho.