Uswe 6 - Fanawbuid tagsibaliwas Fakayabian

Eriku nu Karasras

¹ Ay ginanya, ngay taw tagbanwan sis Eriku nadingding maksvn sakbawan furuan aroro kalimu ngay taw Israel. Nusnga sinu fag taw we masakbo, ay wa yangay e maduksun siginans furuan.

² Yawi nalong sas Uswe te, “Gfagbilug au sa ayu furuan Eriku ay anggan yangay at fun ay at ngay tagfawayan.

³ O ay am ngay tagfawayan ligungani furuan sayginan galay sik menit, kaduge unumk menit.

⁴ Ay fagunai fituk tagfon fanggalangun sis day Fagsuadan Nasadian ay galay at sadi e buba budyung. Ay sis fafituk menit, fafitu ginani nu gligungan am furuan, gadgaloan ngay tagfon fanggalangun gfawang at budyung.

⁵ Ay nu nadungug am at marure fag awang budyung, asfuani uroi daul. Sanya ginan, umrasras wan furuan at alad ay we gsalag nu gsakbo am.”

⁶ Nu katanya, Uswe nafauro ngay tagfon fanggalangun ay nalong te, “Bubai Fagsuadan Nasadian. Am at fitu gunai ay bubai ay mesa budyung.”

⁷ Ay nalong yangay sa sangay taw te, “Loi wan! Nanligungan am furuan. Ay tibak tagfawayan gguna ngay tagbuba Fagsuadan Nasadian.”

⁸ Kata Uswe at longan, kafag ngay tagfawayan naguna ngay tagbuba Fagsuadan Nasadian ay nauyup at ngay budyung.

⁹ Ay tibak ngay tagfawayan gguna ngay tagfon fanggalangun, ay e tibak tagfawayan galo ngay tagbuba Fagsuadan Nasadian. Ay wa karagang budyung nu gawang.

¹⁰ Dewa katanya, Uswe nalong te, “Lag yap guro ay lag yap garingang kyakmay e suguan.”

¹¹ Kata Uswe at suguan, ngay tagbuba Fagsuadan Nasadian sayginan kaligung furuan. Sanya ginan, kanya fagayu anfoli sat fagmafulan, ay natungkud sanya sik yabi.

¹² Balabag di, Uswe masurip nu kafulo. Ngay tagfon fanggalangun gdog gbuba Fagsuadan Nasadian,

¹³ ay at fitu sis Fagsuadan Nasadian at fagunan ay gfawang ngay budyung. Ay katanya yangay ngay tagfawayan at fakamulun, ay at tiba sis fagunan Fagsuadan Nasadian ay at tiba sis faguyanan, ay e gfawang yangay at ngay budyung.

¹⁴ Sis faduak menit, gdog yay gligung furuan, ay sanya ginan gdog yay anfoli sat fagmafulan fag ngay bale. Ay kanya fagayu nafakamulun takatanya kaduge unumk menit.

¹⁵ Ay sfafituk menit, kanya fagayu masurip nu kafulo ay nananligung kafag furuan, kata at nafakamulun. Ay ginanya fag menit fitu ginan nu nanligung.

¹⁶ Ay sfafitu ginan, ngay tagfon fanggalangun gfawang at ngay budyung ay Uswe nasugu at ngay taw laman guro te, “Yawi nafagbilug sa antam tuy fag furuan!

¹⁷ Rasrasi wan tuy fag furuan ay fagayu tagsanya laman sik fanggalangun sas Yawi. Ay falangfei Rakab fag takamatugtug ay anggan at kalongan, aroro kanya nafasuksuan tua at nananginsaful fag dua.

¹⁸ Ay lag gbul nusnge wain at nafon laman sik fanggalangun sas Yawi. Aroro nu e nabul wayam nusnge wain, kamin ban am, ay am ban at ke malong sat kindasug fag faurianan sas Israel.

¹⁹ Ay fasamani laman sas Yawi ngay salapi, ay gintu, tansu, ay sanbung, ay suadi sas fagfungsuan ramraman laman sas Yawi.”

²⁰ Ngay tagfon fanggalangun nafawang at ngay budyung ay ngay taw Israel guro kaduge budyung gawang. Ay furuan at ngay alad anrasras ay kanya fagayu nanamawayan. Ay we gsalag nu gsakbo sanya fag furuan ay kanya fagayu nagbilug.

²¹ Ay kanya fagayu nafon sas Yawi furuan laman sik fanggalangun siginan nu gfabul ngay mangama ay mangena, at mafagtainan ay sisian, ay anggan yangay ngay baka, tupa ay asnu.

²² Uswe nasugu sat nananginsaful fag dua te, “Loi sas Rakab at bale, ay faduksuni anya ay anggan at ngay kalongan kata ay fatuyanan sa anya.”

²³ Nu katanya, duama nalo wan ay nafaduksun Rakab gadgaloan at ngay fagtainan, ay anggan at ngay faduksay, ay fagayu at ngay kalongan. Nataban anya fagayu ay nafabanwan si sangay taw Israel at day fagmafulan.

²⁴ Ay ngay taw Israel nairug wan furuan ay fagayu nusnge wain sas day fagagbilugun at mawatan siginans salapi, gintu, tansu, ay sanbung. Kanya fagayu nabul takatanya fagayu ay nasuad sas fagfungsuan ramraman laman sas Yawi at bale.

²⁵ Ay Uswe nafalangfe tua Rakab ay anggan at ngay kalongan aroro kanya nafasuksuan at nananginsaful fag dua sas furuan Eriku. Dasug katsi, Rakab at kasugfunanan gbanwan yay gugat sis Israel.

²⁶ Ginanya, Uswe nafararang sa sangay taw Israel te, “Yawi ban gfaurianan nusnga sinu at nadog nafalindug furuan Eriku. Nusnga sinu at nanangawat fagtungkudan turuk ay sakbawan Yawi gfabul wan kafag taw at sisian taguna.”

²⁷ Yawi gufud Uswe, ay nafasik takadungug sas fagdaul talun.