Uswe 5 - Fanawbuid tagsibaliwas Fakayabian

Nu Gfae Fakatoglagan

¹ Ngay taw Amur at ngay fun tagbanwan sis Urdan sfakayabian baliwa, ay ngay taw Kanaan at ngay fun sis tigyangan Dagat Mediteranyu nadungug te, Yawi nafatat Liskung Urdan gina ngay taw Israel gdife. Kanya fagayu kalimu ay wa makatu namawayan ngay taw Israel.

² Ginanya, Yawi nalong sas Uswe te, “Awati sik ngay fiso matares siginans gang, ay fae fakatoglagani ngay taw Israel.” (Kanya at fadua ginan nu gfae fakatoglagan ngay taw Israel yud yay nafae fakatoglagan.)

³ Nu katanya, Uswe nawat ngay fiso matares, ay nafae fakatoglagan ngay mangama si sik buksul at nafangayan te, Buksul Fagfae Fakatoglagan.

^4-6 Katatuy Uswe at fagnafae fakatoglaganun ngay mangama: gina ngay taw Israel galin siginans talun Igiptu, fagayu mangama nafae fakatoglagan wan. Dewa katanya, at kinsalug kaduge ufatk safuluk banwa gina kanya fagayu glao sis talun yud e taw ye fakatoglagan. Ginanya, ngay mangama nu nsak wan at banwa laman namawayan anbul way aroro wa gfaning Yawi. Kanya fag ngay taw Yawi at fagfararangan te, “Wa ban am lumag at masine ay at maramraman fag talun ku nafatuyanan sa ay ngay mangaguyang.”

⁷ Uswe at nafae fakatoglagan fag ngay munama, kanya wan Yawi at fantubus at ngay mama aroro kanya fag ngay munama ya nke fakatoglagan kaduge glao siginans talun Igiptu.

⁸ Gina kanya fag ngay munama anke fakatoglagan, gbanwan yay sit ngay bale yakmay anfia.

⁹ Ay Yawi nalong sas Uswe te, “Katsi fag menit, gfalyam au ay fakaplaun siginan nu gafagsuguanan am talun Igiptu.” Ay dasug katsi, kafag talun at ngayan, Gilgal.

¹⁰ Ginanya fag yabi sis falabi ufatk menit gina taguna fag magdanun, kaduge ngay taw Israel gbanwan sis Gilgal sis datag Eriku, kanya fagayu gfalganan sik fagmafulun sabaliwa Tagbarita nu Gfalangfe.

¹¹ Balabag di, kanya fagayu kon at gutluan sanya ginan fag talun: at nasanglay fag trigu ay tinapay at yud e famabia.

¹² Ay sanya ginan fag menit, taw Israel nu kon kanya fag fakonun, wa batang ya kae mana, ay wa batang ya kon takatanya fag fakonun. Ginanya fag banwa, kafag ngay taw at fakonun at gutluan wan sis talun Kanaan.

¹³ Uswe nu munakbang wan sis Eriku, nalag wa vtv sik mangama malindug sit daga salubangan e buba sik fiso tagsumbalian at uyup. Uswe nainto anya te, “O em tagfawayan o, ay mannga em fawayan?”

¹⁴ Kafag mangama gbalus te, “Duan. Andasug au laman tagfangguna Yawi at ngay tagfawayan.” Ay Uswe namalub sas daga laman kamababaun sa anya ay nainto te, “Ku Fun, nataw am longan sa angku, am fagsuguan?”

¹⁵ Ay kanya nabalus te, “Lafusi yap am lapak siginan am darafa, aroro malindug o sit yud e malong fag buknga.” Ay Uswe nafaning at suguan.