Uswe 3 - Fanawbuid tagsibaliwas Fakayabian

Ngay Taw Israel Nandife Urdan

¹ Uswe ay anggan fagayu taw Israel masurip nu kafulo. Kanya fagayu nalao siginans Sitim ay andasug sas Liskung Urdan, ay gina ganandifeun, natungkud yay sis tigyangan liskung.

² Nu nlangfe tuluk menit, at ngay tagfangguna nalao sa sangay bale

³ ay nalong sa sangay taw te, “Nu nalag am ngay taw Lebi nu gbuba Fagsuadan Nasadian sa ay Dius Yawi, aloi,

⁴ laman ro sumaful am te, dada ro ay dalan, aroro yam batang glao sanya. Dewa katanya, lag am kakbang sas Fagsuadan Nasadian; fasik kilumetrui ay kayayuan.”

⁵ Sanya ginan, Uswe nalong sa sangay taw te, “Fasik matuyani ay ngay sadili aroro balabag ban Yawi namasure sa ayu at ngay madulo.”

⁶ Uswe nalong yangay sa sangay tagfon fanggalangun te, “Bubai Fagsuadan Nasadian ay gunai ngay taw.” Ay kanya fagayu nafaning Uswe at longan.

⁷ Ay Yawi nalong sas Uswe te, “Katsi fag menit, gfauseganan au emu si sangay taw Israel at daga salubangan laman sumaful am te, gufud au emu kata nu gufud au Muisis.

⁸ Longi sa sangay tagfon fanggalangun tagbuba Fagsuadan Nasadian te, nu ndasug sas Liskung Urdan, tungkudi yap.”

⁹ Ay Uswe nalong sa sangay taw Israel te, “Gewan ay dungugani nu nataw ay Dius Yawi at fagyalongun.

¹⁰ Katsi, sumaful am te, si wa ayu tagleleg fag Dius, aroro kaduge am gfawayan ay ngay fawayan, tam Dius gfayayu siginan ayu ngay taw Kanaan, taw Ket, taw Kib, taw Peres, taw Girgas, taw Amur ay ngay taw Ebus.

¹¹ Tuyani fia te, Fagsuadan Nasadian sas fagdaul daga at Fun, gguna tua gugat ayu kaduge am gdife Liskung Urdan.

¹² Nu katanya, katsi, filii labi duak taw, sadik taw siginan sik gaban taw Israel.

¹³ Ay ngay tagfon fanggalangun tagbuba Fagsuadan Nasadian sas Yawi, fagdaul daga at Fun, nu siwa sad Liskung Urdan, mamam umragang nu gfamilugan, ay umful sa sik afud liskung.”

^14-15 Ginanya fanggutluan, ay liskung glugwak. Ngay taw nalao siginan at fagmafulan ay nadife liskung. Ngay tagfon fanggalangun tagbuba Fagsuadan Nasadian gguna anya fagayu. Gina ngay tagfon fanggalangun at ngay darafa nasiad liskung,

¹⁶ mamam anragang wa vtv nu gfamilugan ay anful sa sik fungsu sis Adam fag furuan munakbang sis furuan Saretan. We gfamilugan ya tagsas Dagat at Mabulan, nu katanya, ngay taw nadife munakbang sis furuan Eriku.

¹⁷ Ngay tagfon fanggalangun tagbuba Fagsuadan Nasadian malindug sit kinlanggang fag liskung kaduge ngay taw Israel gdife. Kanya fagayu wa glelegan yakmay fagayu taw andife.