Uswe 21 - Fanawbuid tagsibaliwas Fakayabian

Lebi at ngay Kasugfunanan at ngay Furuan

¹ Sanya ginan, Lebi at ngay kasugfunanan nalao sas Elyasar fag tagfon fanggalangun, ay sas Uswe, Nun at baguama, ay sa sangay tagfangguna Israel at ngay kasugfunanan,

² sas Silu sis talun Kanaan. Kanya fagayu nalong te, “Yawi nasugu sat fagsuguan Muisis laman namon emi ngay furuan ayu daul em fagbanwanan ay em fagnamafangonan em ngay fagbaugun.”

³ Nu katanya, kata Yawi at suguan, ngay taw Israel nafagbilug sik afud at talun sas Lebi at kasugfunanan ngay furuan ayu daul ay anggan tagsanya fag ngay fagnamafangonan.

⁴ Kuat at ngay kasugfunanan at nagbilug taguna fag ngay furuan ayu daul. Ay Arun at kasugfunanan fag ngay taw Lebi nagbilug labi tuluk furuan daul. Kafag ngay furuan, Uda, Simyun ay Benamin at ngay kasugfunanan at ngay talun.

⁵ Ay Kuat at kasugfunanan tiba nagbilug yangay safuluk furuan daul siginan Efraim ay Dan at kasugfunanan ay sik wabilug Manase at kasugfunanan at ngay talun.

⁶ Gersun at kasugfunanan nagbilug labi tuluk furuan daul siginan Isakar, Aser ay Naftali at kasugfunanan at ngay talun, ay Manase fag wabilug kasugfunanan tagsis Basan fag talun.

⁷ Merari at ngay kasugfunanan nagbilug labi duak furuan daul siginans Rubin, Gad ay Sebulun at kasugfunanan at ngay talun.

⁸ Nu katanya, kata Yawi at suguan sas Muisis ay siginan nu gfafidfilian, ngay taw Israel nafagbilug ngay furuan sas Lebi at ngay kasugfunanan, ay tagsanya fag ngay fagnamafangonan.

^9-10 Kayu tuy ngay furuan siginans Simyun ay Uda at fagagbilugun fag talun at nafagbilug sas Arun at ngay kasugfunanan. Kanya fagayu Kuat at kasugfunanan, ay Kuat, Lebi at baguama. Ay kanya ban fagayu at nangagbilug kafag ngay furuan.

¹¹ Ay nafagbilug wan sa anya: Kiryat-Arba (at ngayan yangay te, Kebrun), tagsis Uda fag ngay buksul, anggan tagsanya fag ngay fagnamafangonan ngay fagbaugun. (Arba, Anak at mama.)

¹² Dewa katanya, kafag furuan at ngay gamasun ay tagsit ligung fag ngay furuan ayu sirut nafagbilug wan sas Kaleb, Efune at baguama.

¹³ Ay nafagbilug yangay sas Arun at kasugfunanan, Kebrun (sik furuan fagnanuksuanan sik taw nu nafamabul way yud at algan), ay Libna,

¹⁴ Atir, Estemua,

¹⁵ Kulun, Debir,

¹⁶ Ayin, Uta ay Bet-Semes, ay anggan tagsanya fag ngay fagnamafangonan fagbaugun. Nu fagayu wan, siamk furuan daul siginan Simyun ay Uda at kasugfunanan at talun.

^17-18 Nafagbilug yangay sa anya fagayu ufatk furuan daul tagsis Benamin at kasugfunanan at talun: Gibyun, Geba, Anatut, ay Almun, ay anggan tagsanya fag ngay fagnamafangonan fagbaugun.

¹⁹ Arun at kasugfunanan fag ngay tagfon fanggalangun nagbilug labi tuluk furuan ay anggan tagsanya fag ngay fagnamafangonan fagbaugun.

^20-22 Kuat at kalongan tiba siginans Lebi fag kasugfunanan nagbilug ufatk furuan daul siginan Efraim at ngay kasugfunanan at talun: Sekem sis Efraim at fagagbilugun fag ngay buksul (sik furuan fagnanuksuanan sik taw nu nafamabul way yud at algan), ay Geser, Kibsaim, ay Bet-Kurun anggan tagsanya fag ngay fagnamafangonan fagbaugun.

^23-24 Nafagbilug yangay sa anya fagayu ufatk furuan daul siginan Dan at kasugfunanan at talun: Elteke, Gibetun, Ayalun ay Gat-Rimun anggan tagsanya fag ngay fagnamafangonan fagbaugun.

^25-26 Ay siginan yangay sik wabilug Manase at kasugfunanan at talun sas fakayabian baliwa, nagbilug duak furuan daul Taanak ay Gat-Rimun anggan tagsanya fag ngay fagnamafangonan fagbaugun. Kuat at kasugfunanan tiba at nagbilug safuluk furuan daul anggan tagsanya fag ngay fagnamafangonan fagbaugun.

²⁷ Gersun at ngay kalongan, Lebi at kasugfunanan, nagbilug duak furuan daul siginans Manase fag wabilug kasugfunanan at talun: Gulan tagsis Basan, (sik furuan fagnanuksuanan sik taw nu nafamabul way yud at algan), ay Be-Estara, anggan tagsanya fag ngay fagnamafangonan fagbaugun.

^28-29 Nafon yangay sa anya fagayu ufatk furuan daul siginan Isakar at kasugfunanan at talun: Kisyun, Daberat, Armut, En-Ganim, anggan tagsanya fag ngay fagnamafangonan fagbaugun.

^30-31 Siginan Aser at kasugfunanan at talun, nagbilug ufatk furuan daul: Misal, Abdun, Kelkat, ay Rekub, anggan tagsanya fag ngay fagnamafangonan fagbaugun.

^32-33 Nafon yay fia tulu yak furuan daul siginan Naftali at kasugfunanan at talun: Kedes tagsis Galilea, (sik furuan fagnanuksuanan sik taw nu nafamabul way yud at algan), ay Kamut-Dur ay Kartan anggan tagsanya fag ngay fagnamafangonan fagbaugun. Gersun at kasugfunanan at nagbilug labi tuluk furuan daul, anggan tagsanya fag ngay fagnamafangonan fagbaugun.

^34-35 Lebi at kasugfunanan at sawad, Merari at kalongan, nagbilug ufatk furuan daul siginan Sebulun at kasugfunanan at talun: Ukneam, Karta, Dimna ay Naalal anggan tagsanya fag ngay fagnamafangonan fagbaugun.

^36-37 Nafon yangay ufatk furuan daul siginan Rubin at kasugfunanan at talun: Beser, Yaas, Kedemut, ay Mefaat, anggan tagsanya fag ngay fagnamafangonan fagbaugun.

^38-39 Nafon yangay ufatk furuan daul siginans Gad at kasugfunanan at talun: Ramut sis talun Gilyad, (sik furuan fagnanuksuanan sik taw nu nafamabul way yud at algan), Makanaim, Kesbun ay Aser anggan tagsanya fag ngay fagnamafangonan fagbaugun.

⁴⁰ Merari at kalongan siginans Lebi at kasugfunanan nagbilug labi duak furuan daul.

^41-42 Lebi at kasugfunanan nagbilug siginan ngay taw Israel at fagagbilugun fag talun ufatk safulu e waluk furuan daul, anggan tagsanya fag ngay fagnamafangonan fagbaugun.

⁴³ Nu katanya, Yawi nafagbilug sas Israel fagayu talun kata at nafatuyanan sat ngay mangaguyang. Kanya fagayu nagbilug kafag talun ay nabanwan sanya.

⁴⁴ Yawi nafae fagmanabayanun sanya fag ngay taw kata at fatuyanan sat ngay mangaguyang. Kanya fagayu wa gababawan at ngay fawayan aroro Yawi gfababo tua.

⁴⁵ Yawi nafafasludan fagayu at fatuyanan sa sangay taw Israel.