Uswe 2 - Fanawbuid tagsibaliwas Fakayabian

Uswe Nasugu at Nanginsaful Furuan Eriku

¹ Sanya ginan, Uswe gfalganan sik masuksukan fag balyawvtan. Kanya nasugu duak taw siginans furuan Sitim laman nanginsaful talun Kanaan, kaugat wan furuan Eriku. Ay kanya fag dua gina andasug sas furuan Eriku, nabanwan sas Rakab, sik takamatugtug fag mangena, at bale.

² Ay e nalong sas furuan Eriku at fun te, “Katsi fag yabi e ndasug stie sik ngay taw Israel laman nanginsaful tam talun.”

³ Nu katanya, furuan Eriku at fun nasugu sik ngay taw laman nanlong sas Rakab te, “Faduksuni siginan am bale kafag duak taw, aroro kanya nastie laman nanginsaful tam talun.”

^4-6 Rakab nabalus te, “Matuyan duak taw andasug sa ku bale, dewa katanya, kwa saful te, daginan. Kanya fag dua nalo wan gina gakayabiun ay gina gadingdingun furuan at sakbawan. Kwa nasaful nu dada ro nu glao, dewa katanya, tibaginan ro nasud yayam nu nanangguyan am anya fag dua.” (At mafanud, Rakab nafasuksuan way kafag duak taw sat tungud bale ay natabun at ngay natimrang fag nagfagudan fangawat ramit fag tanum.) Ay kanya fag ngay fagsuguan nalo wan laman namafalo duama.

⁷ Ay kanya fagayu gina naduksun, nadingding wa vtv at sakbawan furuan, ay nanamafalo sitsigons fagdifean Liskung Urdan.

⁸ Ay kanya fag duak taw gina nantiug, Rakab nalao sas tungud bale sa kafag dua at fagtiugan,

⁹ ay nalong te, “Nasaful au te, Yawi gfon wan sa ayu tuy fag talun. Fagayu taw tagbanwan ste maksvn nu kalimu ayu.

¹⁰ Nadungug ami nu setain Yawi nu gfaragang Dagat Maraska laman ay dalan, ginam glao siginans talun Igiptu, ay nu setain nu gfabul Sikun ay Ug, ngay taw Amur at fun fagdua, sis dife Liskung Urdan.

¹¹ Nu nadungug ami takatanya, anlimu ami maksvn, ay galay at sadi anmomuy, aroro ay Dius Yawi, banwa tua ay daga at Dius.

¹² Nu katanya, katsi fatuyanani sas Yawi at ngayan te, ggubuk ban am ku ngay kalongan kata nu ggubuk au ayu. Foni angku sik famatuyan te,

¹³ wa ban am gfabul ku ngay fagtainan ay ku ngay faduksay ay fagayu ku kalongan.”

¹⁴ Duama nalong sas Rakab te, “Gfon ami em leleg laman sa emu! Nu ddi ban o nalong em tungulan, malukme ban mi sa emu gina ban Yawi gfon emi tuy fag talun.”

¹⁵ Rakab at bale sisad basad furuan daul at alad, nu katanya, kanya nafatustus duama sas fagbanawanan sat nafabaringbing fag lubid.

¹⁶ Rakab nalong sas duama te, “Nu glo am, sa yakman sa sangay buksul laman ro at namafalo ayu wa glag ayu. Suksuani sanya tuluk menit yakmay kanya fag ngay taw anfoli stae. Sanya ginan, masine wam guli.”

¹⁷ Ay duama nalong sas Rakab te, “Gfafasludan ban mi em fatuyanan sa emu,

¹⁸ dewa katanya, fakamuluni kata tam nasadian: gina ban mi gfawayan ste fag talun, siuki tuy fag lubid maraska sam fagbanawanan si em fagtustusan. Fasakboi sam bale am fagtainan, am ngay faduksay ay fagayu am kalongan.

¹⁹ Dewa katanya, at sadi am kalongan nu naduksun way, ay anbul, bunwa em kurang ya. Ay nu e nbul way sim basad bale, em kurang wan.

²⁰ Dewa katanya, nu nalong way o em tungulan, wa ban mi gfafasludan em nasadian sa emu.”

²¹ Rakab gbalus te, “Kin, kaylat au.” Sanya ginan, Rakab nafalao wa vtv duama ay nafabaringbing sik lubid maraska sat fagbanawanan.

²² Ay duama nalo wan, ay nasa sangay buksul, ay nasuksuan yay sanya tuluk menit, kaduge at namafalo anya fag ngay taw sa yay sangaba dalan. Kanya fagayu wa nalag duama ay noli wan.

²³ Ay duama nalao siginans buksul ay nadife liskung ay anfoli sas Uswe. Kanya fag dua nafoyung sas Uswe fagayu at kinfasludan.

²⁴ Nalong te, “Anud, Yawi nafon wan sa antam fagdaul kafag talun. Ay fagayu taw sanya maksvn nu kalimu antam.”