Uswe 17 - Fanawbuid tagsibaliwas Fakayabian

Sik wabilug Manase at Kasugfunanan at Talun

¹ Ay nafon yangay ngay talun sas Manase at kasugfunanan, Use at baguama taguna. Talun Gilyad ay Basan nafon sas Makir at kalongan aroro kanya sik maseganama fag tagfawayan. (Makir, Manase at baguama taguna.)

² Talun tagsis Urdan at fakayabian baliwa nafon sa sik wabilug Manase at kasugfunanan: Abyeser, Kelek, Asriel, Sekem, Kefer, ay Semida at ngay kalongan. Ay nafud sat galay kalongan.

³ E sik taw at ngayan Selufead. Kanya Kefer at baguama ay Gilyad at fufu. Ay Gilyad, Makir at baguama, ay Makir, Manase at baguama. Selufead we baguama, sik ngay baguina way. At ngay baguina Makla, Nua, Ugla, Milka ay Tirsa.

⁴ Kanya fagayu nalao sas Elyasar fun tagfon fanggalangun, ay sas Uswe, Nun at baguama, ay sa sangay tagfangguna, ay nalong te, “Yawi nasugu sas Muisis te, gfon yangay emi talun kata em ngay kalongan fag ngay mangama.” Nu katanya, Uswe nafon sa kafag ngay baguina sik talun kata Yawi at suguan.

⁵ Katanya Manase at kasugfunanan nu gagbilug safuluk afud talun. Dewa katanya, wa nagbilug Gilyad ay Basan tagsis Urdan at fakamenitan baliwa,

⁶ aroro nafon yangay at afud sat ngay kalongan fag ngay mangena. Gilyad fag talun anfon sa sik gaban Manase at kasugfunanan at sawad.

⁷ Manase at kasugfunanan at fatuan talun siginans Aser sitsigons Mikmetat, sas Sekem at fakamenitan baliwa. Sanya ginan, sas fasiunan fag alvngvdan baliwa gtaglayun sa sangay taw tagbanwan munakbang sis bulbug Tapuak.

⁸ (Ngay talun tagligung Tapuak, Manase at kasugfunanan at fagagbilugun, dewa katanya, Tapuak, sis Manase ay Efraim at wabilug, kanya Efraim at fagagbilugun.)

⁹ Gtaglayun sas fasiunan fag alvngvdan sas Kana fag liskung. Ngay furuan ayu daul Efraim at fagagbilugun, masuglat sa sangay taw Manase at ngay furuan ayu daul. Ay Manase at kasugfunanan at fatuan talun gtaglayun sas fawalan fag alvngvdan liskung sitsigons Dagat Mediteranyu.

¹⁰ Ay talun tagsis fasiunan fag alvngvdan liskung, Efraim at kasugfunanan at fagagbilugun, ay talun sis wala fag alvngvdan liskung, Manase at kasugfunanan at fagagbilugun. Manase at kasugfunanan at fagagbilugun at fatuan sis fakayabian, Dagat Mediteranyu. Ay tagbanwan sis fawalan fag alvngvdan, Manase ay Aser at kasugfunanan, ay tagsis fakamenitan, Isakar at kasugfunanan.

¹¹ Tuy Isakar ay Aser at kasugfunanan at nafon fag ngay furuan ayu daul sas Manase at kasugfunanan: Bet-San, Ibleam, Dur, Endur, Taanak, Megidu, ay at ngay furuan ayu sirut sit ligung.

¹² Dewa katanya, Manase at kasugfunanan wa nagbilug ngay furuan daul aroro wa mafaiyan ngay taw Kanaan tagbanwan sanya.

¹³ Ay ngay taw Israel nu nkaksvn wan, nafagsuguan ngay taw Kanaan, dewa katanya, wa naiyan kanya fagayu.

¹⁴ Use at kasugfunanan nalong sas Uswe te, “Wain emi em talun fag sik afudun way? Ngayu ami aroro Yawi nafamanyun emi.”

¹⁵ Uswe nabalus te, “Nu anud ngayu am, ay nu dyay kasakan sa ayu tagsis Efraim at fagagbilugun fag ngay buksul, loi sa sangay taw Peres ay taw Refa at fagagbilugun fag ngay araw. Gamasi laman ay fagagbilugun.”

¹⁶ Use at ngay kasugfunanan nalong te, “Talun ke ngay buksul alay yay laman sa emi. Ay wami mababo ngay taw Kanaan sisad datag aroro kanya fagayu e ngay faguyudan at mawatan sanbung. Katanya yangay ngay taw Kanaan tagsis Bet-San ay sa sangay furuan ayu sirut sat ligung ay sas datag Esreel.”

¹⁷ Uswe gbalus te, “Aroro ngayu am ay mabalyanan, ay talun ban bundi sik afud,

¹⁸ anggan tua ban tagaarawun fag ngay buksul. Nanggamas ban am ngay araw, aroro am ban tagagbilug fagayu. Matuyan wan mafaiyan am ngay taw Kanaan dewa kanya fagayu mabalyanan ay dewa anke faguyudan at mawatan sanbung.”