Uswe 16 - Fanawbuid tagsibaliwas Fakayabian

Ngay Talun at Nafon sas Efraim ay Manase at ngay Kasugfunanan

¹ At nafon sas Use at kasugfunanan laman at talun, siginans Liskung Urdan munakbang sis Eriku, sas Eriku at fakamenitan baliwa fag ngay bulbug, gtaglayun sas talun yud e taw sitsigon sangay buksul tagsis ligung furuan Betel.

² Siginans Betel (Betel at ngayan yangay te, Lus), gtaglayun sas Atarut ay si sangay taw Ark at fagbanwanan

³ ay gtagbung sas fakayabian baliwa, ay gtaglayun sa sangay taw Aflet at fagbanwanan, anggan sas fatuan Bet-Kurun. Ay gtaglayun sas Geser sitsigons Dagat Mediteranyu.

⁴ Kafag ngay afud daga Manase ay Efraim at kasugfunanan Use at ngay baguama, at nagbilug fag talun.

⁵ Tuy Efraim at kasugfunanan at fagagbilugun at nafud sat ngay kalongan: at fatuan sas fakamenitan baliwa gfasigad siginans Atarut-Adar gtaglayun sas Bet-Kurun

⁶ sitsigons Dagat Mediteranyu. Ay at fatuan sabaliwas fawalan fag alvngvdan siginans Mikmetat, ay kabaraud sas fakamenitan baliwas Taanat-Silu, ay gdalan sas Anuak sas fakamenitan baliwa.

⁷ Ay siginans Anuak gtagbung sas Atarut ay Naara, gdalan sas Eriku ay gtaglayun sas Liskung Urdan.

⁸ Siginans Tapuak, at fatuan gtaglayun sas fakayabian baliwa ay gdalan sas Kana fag liskung, sitsigons Dagat Mediteranyu. Kayunya Efraim at kasugfunanan at nabul fag talun at nafud sat ngay kalongan.

⁹ At fagagbilugun yangay ngay furuan ayu daul ay furuan ayu sirut tagsis Manase at fagagbilugun.

¹⁰ Kanya fagayu wa naiyan ngay taw Kanaan tagbanwan sis Geser; nu katanya dasug katsi, e ngay taw Kanaan yay tagbanwan magamut ngay taw Efraim, ay kanya fagayu ansik ngay fagsuguan.