Ub 23 - Fanawbuid tagsibaliwas Fakayabian

Ub Naringang

¹ Ay Ub nalong te,

² “Dasug katsi maksvn yay gugat nu gfayud au Dius. Dius gfaidapan yay gugat angku dewa maksvn wan nu gfandeng au.

³ Nu saful kdi te, sanya Dius, katsi lumao au laman nangadasug sa anya,

⁴ ay namoyung au sa anya ku mamalong, ay nanlong au ku fanlonganan.

⁵ Kaylat au gyasafulun at fagyalongun sa angku, ay kaylat au gyadungugun at famalus.

⁶ O kanya ro manga namabadbaboan way angku siginan at fagmabalyananun? Duan, kanya ro wa namakamulun, nu bunway gdungugan tua ro angku.

⁷ Sik taw at matuyan kata angku masine way glong at malong sas Dius ku tagwabilug at daga salubangan, ay kanya namalfas wa fia angku.

^8-9 Dewa au narvbvy Dius nusnga nday, dewa sas fakamenitan, sas fakayabian, ay sas alvngvdan fagdua, kwa nalag anya.

¹⁰ Aroro kanya saful way ku fakamulun, kanya nu ntabu nu gfaskud angku, nu glag angku masine ktua, kata sik gintu at masine fia.

¹¹ Gfaning ktua gugat at ngay balyawvtan ay kwa kamabo anya.

¹² Gfaning au at ngay suguan ay gdiri au fia at ngay longan si ku amatanganan. Ay gfamafanud au at ngay longan gtungud tua ku ngay fakonun kayu menit.

¹³ Ay Dius di ginbalian kabavn, ay nusnga sinu we masalag anya, ay kanya mafafakamulun tua nusnga setaw at fakaylatun.

¹⁴ Ay kanya gfafasludan sa angku nusnge wain at algan, ay ngayu tua at algan sa angku.

¹⁵ Nu katanya, kalimu ktua anya, ay nu gamatangan kway takata tuy kaugat yay nu kalimu au anya.

¹⁶ At Mabalyanan fag Dius gfamomuy ay gfalimu angku.

¹⁷ Dewa katanya, kwa karagang nu gfandeng au, dewa kata nu masifigan au fagmadulumun.”