Markus 7 - Fanawbuid tagsibaliwas Fakayabian

Taw Udyu at Fagfaningun at Faugali

¹ Ngay taw Fariseu ay tibak tagfoyung Muisis at Faugali siginans Erusalem anful sas Isus.

² Ay kanya fagayu nalag Isus at ngay tagadal tiba nu gfangon wa nafaning at faugali sabaliwa nu gfegus at ngay daluap.

³ Taw Fariseu ay fagayu taw Udyu ya kon yakmay nafegus at daluap, kata at ngay mangaguyang at faugali.

⁴ Ay nusnge wain at nabul fag fakonun, ya kon yakmay nafegus at daluap. Ay ngayu yay at faugali, kata nu gfegus taya ay bisu.

⁵ Ay ngay taw Fariseu ay ngay tagfoyung Muisis at Faugali nainto sas Isus te, “Wain am ngay tagadal at fagyudun gfaning tam mangaguyang at faugali? Aroro kanya fagayu nu nanfangon wa gfegus at daluap.”

⁶ Ay Isus glong te, “Matuyan Isayas at foyungan ebi sabaliwa ayu fag ngay takamaningan. Katatuy at marirukan sis Dius at Longan, ‘Tuy fag ngay taw, nu gseg angku si way lang at aringang, dewa katanya at amatanganan ngayayu way siginan angku.

⁷ Nu katanya way we tungkul, dewa gseg angku, Aroro at foyungan, taw way at longan.’

⁸ Nafayudun am Dius at ngay suguan ay ay nafaning, taw way at longan.”

⁹ Isus glong yangay te, “Maksvn nu gafayudun am Dius at suguan laman gfaning am taw at faugali.

¹⁰ Ay ebi Muisis nalong te, ‘Suyui tua am mama ay am mina,’ ay ‘Fabuli wan nusnga sinu fag taw nu glong way at mauri sat mama ay sat mina.’

¹¹ Ay dewa Dius nasugu katanya, gfoyung am te, masine way sik taw nu glong sat mama ay sat mina te, ‘Nafon kwa sas Dius ku fanggubukun ma sa ayu,’

¹² ay gsalag am kafag taw laman wa ggubuk at mama ay at mina.

¹³ Ay nu katanya, gfae yud wam e tungkul Dius at Longan siginan nu gfaning am ay mangaguyang at faugali. Ay e tiba yay takatanya ay fakamulun.”

Nataw Tagfasuya Taw

¹⁴ Ay Isus nadog yay nafaful sa anya ngay taw ay nalong te, “Fagayu am dungugani ay asafuli ku longan.

¹⁵ Bunwa sik taw at naon tagfasuya anya, nu bunway tagduksun siginan anya tagfasuya anya.

¹⁶ Am at nadungug, amatangani.”

¹⁷ Ay Isus nu naubun ngay taw ay nu nasakbo sas bale, at ngay tagadal nainto kanya fag faydayuanan at masuad.

¹⁸ Ay Isus glong sat ngay tagadal te, “O nunda yam e fagsafulun? O yam saful te, nusnge wain sik taw at naon wa gfasuya anya?

¹⁹ Aroro fakonun kadasug sas ungdan ay gtaglayun sas alangan, ay wa kadasug sat amatanganan.” Isus at fagnalongun katanya nafoyung te, fagayu fakonun masine wan.

²⁰ Ay Isus glong yangay te, “Tagduksun siginan sik taw tagfasuya anya.

²¹ Aroro tagsiginan sik taw at amatanganan kasure at mauri fag ngay algan, kata nu gfanugtug sat yud e indugan, ay nu gfangkamul, ay nu gfabul,

²² ay nu gfanugtug sat ke indugan, ay nu gfangalabian tiba at ramraman, ay nu gfakamulun at mauri, ay nu gfandaya, ay at fagyudun e apla, ay nu galabian, ay nu kamuagan gfatuyan sabaliwa at iba, ay nu kamatungudun, ay anggan nu yud e amatanganan.

²³ Takatanya fag ngay mauri siginan sad basad taw, ay kanya tagfasuya sik taw.”

Sik Mangena at Baguina e Mauri fag Falad

²⁴ Ay Isus namalindug ay nalo wan sa sik talun munakbang sis furuan Tiru. Ay Isus nasakbo sa sik bale, ay wa kaylat ngay taw nu nasaful te, sanya wan. Ay dewa katanya, wa masuksuan.

²⁵ Ay sik mangena e munina ke mauri fag falad, ay kafag mangena nadungug te, sanya wan Isus. Ay arodi vtv kanya ndasug ay namalub sas Isus at daga salubangan.

²⁶ Kafag mangena, sik taw Gresya tagsiginans talun Sirya sis Fenisya. Kanya get sas Isus te, “Aiyani at mauri fag falad siginan ku munina.”

²⁷ Ay Isus glong sa kafag mangena te, “At masine, taguna gfayafun kyay ste fag ngay sisian. Wa masine gbul ngay sisian at fakonun ay gukas sa sangay idu.”

²⁸ Ay kafag mangena gbalus te, “Sabv ngaro, ku Fun. Dewa katanya, ngay idu kon ngay sisian at nagfatongan siginan at fagfangonan.”

²⁹ Ay Isus glong sa kafag mangena te, “Aroro katanya am famalus, ulii wan, mauri fag falad naubun wan am munina.”

³⁰ Ay kafag mangena guli wan ay manlag di at munina sisad igyan, ay we mauri fag falad ya.

Isus Nafafia Sik Taw Yud Gdungug ay Yud Maringang

³¹ Ay arodi Isus nalo wan siginans furuan Tiru fag talun, ay nataglayun sas furuan Sidun ay sas Safuluk Furuan Daul fag talun, ay andasug sas Lino Galilea.

³² Ay tibak taw nataban sas Isus sik taw yud gdungug ay yud maringang. Ay maksvn nu get sas Isus te, “Fatayuki am daluap sa anya.”

³³ Ay Isus nataban kafag taw siginans fagngayuan, ay nafatayuk at sumyu sa kafag taw at talinga, ay natufe ay nafatayuk sanya fag taw at leplep.

³⁴ Ay Isus natangda sas banwa ay naengasan ngabasad ay glong anya te, “Efata,” at masuad te, “Aluangi.”

³⁵ Ay at talinga nluang ay at leplep anfia. Ay masnug wan nu garingang.

³⁶ Ay Isus maksvn nu glong sanya fag ngay taw laman wa kamarita sas nusnga sinu. Ay dewa Isus kaksvn nya nu glong, kaksvn way baliwa kafag ngay taw nu gfoyung.

³⁷ Ay kafag ngay taw andulo maksvn ay glong te, “Madulo tua at ngay nafakamulun, aroro ngay taw at yud gdungug, gdungug wan, ay at yud maringang, maringang wan.”