Markus 4 - Fanawbuid tagsibaliwas Fakayabian

Isus at Faydayuanan sabaliwa sik Tagtanum

¹ Isus gdog yay gfoyung sis tigyangan lino. Ay aroro ngayuk taw tagligung anya, Isus nasakay sa sik sakayan lino ay malunggung sanya. Ay kafag ngay taw si way stigyangan lino.

² Ay ngayu at foyungan faydayuanan sanya fag ngay taw. Glong te,

³ “Sik tagtanum nakoko laman nananum at ngay bvtang.

⁴ Ay gina gtanum, tiba at bvtang antong sasad dalan. Ay sik ngay manuk tungud andasug sanya ay nasinduk wan.

⁵ Ay tiba at bvtang antong sa tagagangun ay tagsanya fag daga mayangfis way. Ay kafag bvtang masakit nu gtugbung, aroro kafag daga wa ngabasad.

⁶ Ay menit nu masugba wan, at bagu gtugbung fag bvtang kalangke wan, aroro at lalid wa kaabasad, ay kayango wan.

⁷ Ay tibak bvtang antong sas wa makmak madugi, ay kafag makmak anbia ay nafaut at tanuman, ay at tanum wa narawvg.

⁸ Ay tibak bvtang antong sat masine fag daga, ay natugbung ay anbia ay narawvg tua. Sik raug at bilug, tuluk safulu, ay tiba unumk safulu ay tiba sik sandan.”

⁹ Ay Isus nalong te, “Fagayu am tagdungugan, amatangani tua fia.”

Isus at Algan at Fagfaydayuananun

¹⁰ Tangayu noli wan. Gina Isus ansadili, at ngay ufud, anggan at labi dua, nainto sabaliwa at faydayuanan.

¹¹ Ay Isus nalong te, “Dius nafayamag sa ayu at ngay masuksuk sabaliwa at fagfagtainanan. Ay sa tibak taw nu gfoyung, faydayuanan way.

¹² Laman kanya fag ngay taw, ‘dewa gdama, wa glag, aroro nu natogdungug di, kanya ban fag ngay taw umfoli sa angku, ay namalyam au at ngay asalanan.’ ”

Isus at Faydayuanan sabaliwas Tagtanum at Masuad

¹³ Isus glong yangay te, “O natogdungug am aro fag faydayuanan? Nu dyayam natogdungug, tain ban nu saful am tibak faydayuanan?

¹⁴ Tagtanum, at natanum, Dius at Longan.

¹⁵ Kafag bvtang at kintong sa sangaba dalan kata ngay taw at nadungug Dius at Longan. Arodi vtv Satanas andasug ay nabul kafag longan, aro at kintanum sit ngay amatanganan.

¹⁶ Ay at kintong fag ngay bvtang sa tagagangun, kata ngay taw at nadungug Dius at Longan ay masakit nu gafanud ay guseganan.

¹⁷ Ay kanya fag ngay taw nu gafanud wa glugo, kata kafag bvtang nu yud nalalid. Fagidapun ay famaskud nu ndasug aroro siginan at nadungugan Dius at Longan, kanya fagayu gfangafoliun way.

¹⁸ Ay at kintong fag ngay bvtang sas wa makmak madugi, kata ngay taw at nadungug Dius at Longan,

¹⁹ ay dewa katanya, kanya fagayu gafanawa at leleg ste swa daga, ay kesug at fagmaramramanun, ay anggan galabian ramraman, ay kanya nafaut at nadungug fag longan, ay wa narawvg.

²⁰ Ngay taw at nadungug ay at natogdungug Dius at Longan, kata ngay bvtang at kintong sit masine fag daga. Kafag ngay taw at fakamulun masine tua, kata yangay kafag tanum nu narawvg. Sik raug at bilug, tuluk safulu, ay tiba unumk safulu ay tiba sik sandan.”

Sik Salung at Masukluban si sik Alungkung

²¹ Isus nainto sa anya fagayu te, “O sik taw nu nafasalung sik salung, nanuklub sik alungkung ay mannga namasas daga fagtiugan? Abat ngate, namasa tua fia sik fagfatungkudan.

²² Aroro fagayu at yud kalag umsure ban, ay fagayu at masuksukan umsaful ban.

²³ Am at nadungug, amatangani.”

²⁴ Isus glong yangay te, “Amatangani tua ay nadungug. Ay nusnga se aksvn nu gfaurianan am ay iba, katanya yangay nu gafaurianan am, ay e famamut yay.

²⁵ Aroro sik taw at ke kwa, e gfamut yay ban. Ay sik taw nu alay way tagsi anya, e namul yay ban siginan anya.”

Isus at Faydayuanan sabaliwa sik Bvtang nu Natugbung

²⁶ Isus glong yangay te, “Dius nu gfagtainan kata sik taw nu natanum at bvtang sit gamasun.

²⁷ Kafag taw gtiug sad yabi ay gfanlo swa menit, ay kadugenya kafag bvtang gtugbung ay kabia, dewa katanya, kafag taw wa saful nu setain nu kabia.

²⁸ Daga gfatugbung. Taguna gbilugan, ay at fadogan gfangkura ay grawvg, ay at fadogan karaska wan.

²⁹ Ay nu nraska wan, kafag taw ggutlu wan aroro fanggutluan wan.”

Isus at Faydayuanan sabaliwa sik Rigrig Burarad

³⁰ Isus glong yangay te, “Tain ro nu gfafaskudanan au Dius at fagfagtainanan, ay tain nu gfafaydayuanan?

³¹ Kanya kata sik rigrig burarad. Kanya wan tiba alay fag bvtang sas fagdaul daga.

³² Ay nu natanum wan, gtugbung ay nu nbia, abat yap tibak makmak. Ay gbia at sanga, ay ngay manuk tungud gfugad tua sanya.”

³³ Ngayu takatanya fag faydayuanan Isus nu gfoyung Dius at Longan sat ngay fadgaloan, kaksvn at fagmakatuun gtogdungug.

³⁴ Isus wa gfoyung nu dway gfaydayuanan. Ay at ufud nu at ngay tagadal tua lang, Isus gfayamag at ngay faydayuanan at masuad.

Isus Nafasiwang sik Fulug

³⁵ Menit nu nfalyu wan, Isus glong sat ngay tagadal te, “Bastam, nandife watam lino.”

³⁶ At ngay tagadal naubun ngay taw ay nasakay sas Isus at fagsakayan fag sakayan lino. Anggan tibak sakayan gfadgaloan yangay anya fagayu.

³⁷ Ay gina sis wabilug lino, sik maksvn fag tagmara andasug, ay maksvn nu glugwak sak gasuklubun at sakayan, ay mamam arvs gakapnun sit sakayan.

³⁸ Ay Isus gtangilan gtiug sis sakayan at faguyanan baliwa fag fungfung. Ay at ngay tagadal gfulo anya te, “Takamoyung, o wo gafanawa te, gakalubgubun watam?”

³⁹ Isus anfulo ay nasalag tagmara, ay glong sas lugwak te, “Aragangi wan!” Ay anragang wan ay anke fagmanabayanun wan.

⁴⁰ Ay Isus nalong sat ngay tagadal te, “Wain ay fakalimuun? O yam e fagafanudun?”

⁴¹ Ay at ngay tagadal kalimu ay gidgintoan te, “Sinu tuy fag taw? Newa dewa tagmara ay lino gfaning tua anya.”