Markus 15 - Fanawbuid tagsibaliwas Fakayabian

Isus sis Pilatu at Daga Salubangan

¹ Balabag di, ngay fun tagfon fanggalangun ay sik ngay fagtainan ay ngay tagfoyung Muisis at Faugali ay anggan taw Udyu at ngay tagfangguna fagayu maful laman gkamatoan. Ay nasiuk Isus ay nataban sas Pilatu.

² Ay Pilatu nainto sas Isus te, “O o wan taw Udyu at Fun?” Ay Isus gbalus anya te, “O wan at nalong takatanya.”

³ Ay kafag ngay fun tagfon fanggalangun ngayu at nafoyung Isus at asalanan.

⁴ Ay Pilatu ginto sas Isus te, “Nataw am famalus sa anya fagayu? Dungugani, ngayu at nafoyung am asalanan.”

⁵ Isus wa gbalus, ay Pilatu maksvn nu kadulo.

Pilatu Nafalfas Barabas

⁶ Galay fagmafulun sabaliwas Tagbarita nu Glangfe, Pilatu gfalfas sik maubungan, nusnga sinu ngay taw at fagetun.

⁷ Ginanya, sik taw at ngayan Barabas maubungan sanya gasfuan tibak taw at nafamabul gina gfawayan ngay tagfangguna.

⁸ Ay ngayuk taw andasug sas Pilatu ay get te, “Faningi ebi ataw am ugali.”

⁹ Ay Pilatu ginto te, “O kaylat am nu gfalfas au taw Udyu at fun?”

¹⁰ Pilatu nasaful te, kafag ngay tagfon fanggalangun at fagnatabanun Isus sa anya aroro galabian.

¹¹ Ay kafag ngay fun tagfon fanggalangun nafalu longan sa sangay taw laman Pilatu namalfas Barabas abat ngate Isus.

¹² Ay Pilatu ginto sa sangay taw te, “Nataw ro ku fakamulun sanya fag taw, ay nafangayan te, taw Udyu at Fun?”

¹³ Ay kafag ngay taw maksvn nu guro te, “Tuktuki anya sas fasulungan kayu.”

¹⁴ Ay Pilatu ginto sa anya fagayu te, “Ay wain? Nataw nunda at asalanan?” Ay kafag ngay taw kaugat way nu guro te, “Tuktuki anya sas fasulungan kayu.”

¹⁵ Ay Pilatu nafalfas Barabas aroro kaylat gfaning ngay taw at fakaylatun. Ay Pilatu nu nafafalangan wan Isus, kanya nafatigwanan wan sa sangay tagfawayan, laman nantuktuk sas fasulungan kayu.

Ngay Tagfawayan Gfalingun Isus

¹⁶ Ay kanya fag ngay tagfawayan nataban Isus sas Pilatu at bale, ay nafaful yangay sanya fagayu tagfawayan.

¹⁷ Ay kafag ngay tagfawayan nafaelanbung Isus sik umut masialungan ay nawat sik sangbo at madugi, ay nafasas Isus at alfuyu.

¹⁸ Ay kafag ngay tagfawayan kamuagan gseg te, “Tubus, taw Udyu at Fun!”

¹⁹ Ay kanya fagayu nafalang sik anyamu sas Isus at alfuyu ay natufe anya ay natudan kata nu gseg anya.

²⁰ Ay nu ntabu wan nu gfalingun Isus, kafag ngay tagfawayan nabul at umut masialungan ay nafasulun aro taw at lanbung ay nafaduksun anya laman nantuktuk sas fasulungan kayu.

Nu Gtuktuk Isus sas Fasulungan Kayu

²¹ Ay gina kanya fagayu glao, nafablang Simun siginans gamasun, ay kanya fag ngay tagfawayan nafabuba sa anya Isus at fasulungan kayu. Simun sik taw siginans furuan Sirene ay kanya Aleandru ay Rufus at mama.

²² Kafag ngay tagfawayan nataban Isus sas buksul Gulguta, at masuad te, Talun Butul Alfuyu.

²³ Ay kanya fagayu nafon sas Isus sik fanlangu mafasuglatan sik lune anangi laman gfalay nu ganini, ay Isus wa kaylat ginum.

²⁴ Ay nu natuktuk wan Isus sas fasulungan kayu, kanya fagayu gukas gang laman ginsaful te, sinu ro at nangagbilug Isus at ngay lanbung.

²⁵ Sis fasiam fag buknga sbalabag nu gtuktuk Isus sas fasulungan kayu.

²⁶ Ay nariruk sis fungfung fasulungan kayu at fantabugan te: Ngay Taw Udyu at Fun.

²⁷ Ay natuktuk yangay duak tagfangkamul sas duak fasulungan kayu gsumbalian Isus.

²⁸ [Siginan at kinfasludan takatanya, anfasludan at marirukan sis Dius at Longan te, Natap anya kata sik tagasalanan.]

²⁹ Ay kayu at nadalan sanya gfainsingian at alfuyu ay gfalingun Isus te, “E, o wan at nalong te, ‘Nanrasras kban Dius at bale ay mafatabu kway nu ntabu tuluk menit.’

³⁰ Falangfei am sadili ay alfasi siginans fasulungan kayu.”

³¹ Ay anggan ngay fun tagfon fanggalangun, ay ngay tagfoyung Muisis at Faugali glodlongan gfalingun Isus te, “Kanya dewa mafalangfe tibak taw, wa mafalangfe at sadili.

³² Kanya Dius at nafili fag Fun, taw Israel at Fun. Nu nafalfas di ro at sadili siginans fasulungan kayu, kin, gafanud wa ro tam.” Anggan at kintuktuk tagsumbalian Isus fagdua at sadi gfalingun yangay anya.

Isus nu Kabul

³³ Nu swabilug menit wan, andulum way lang fagdaul sanya fag talun. Ay nu madulum, sitsigon sfatulu sas fafun baliwa.

³⁴ Ay gina sfafun sfatulu, Isus nauro daul te, “Elui, Elui, lama sabaktani.” At masuad te, “Ku Dius, ku Dius, wain am fagnafabayanun angku.”

³⁵ Tiba at malindug sanya nu nadungug, nalong te, “Dungugani, kanya guro Elyas.”

³⁶ Ay sik taw natarung laman namul sik fanrarus ay nafabasa sat mayat fag sanggvtan, ay natvgdan sa sik anyamu ay nafasupsup sas Isus. Kafag taw nalong te, “Toyap, gfanya yap tam o Elyas ro kadasug laman namul anya.”

³⁷ Ay Isus nauro maksvn, ay kanya wan taguyan at engasan.

³⁸ Ay fantaba fag ramit sad basad Dius at bale an-girat siginan at tungud sitsigon tdaga, ay ankafud dua.

³⁹ Sik fun tagfawayan malindug sis salubangan fasulungan kayu, ay manlag di Isus nu naengasan taguyan, kanya nalong te, “Anud, kanya fag taw, Dius at Baguama.”

⁴⁰ Ay ngayuk mangena tagdama sit dayu vtv. Sanya yangay Maria Magdalena, ay Maria, Santiagu ay Use at mina (kanya fag Santiagu ya kafagtainan at sadi fag Santiagu), ay sanya yangay Salume.

⁴¹ Kanya fag ngay mangena tagalo ay nagubuk Isus gina sis talun Galilea. Ay sanya yangay ngayuk mangena at nanangalo Isus sas Erusalem.

Nu Namoli Isus at Bilug

⁴² Ay ginanya fag menit nu gakayabiun wan, Famalganan ngay fakonun. Balabag di, Famiangalay wa fag Menit.

⁴³ Use tagsiginans Arimatea, nafaksvn at amatanganan laman nanget sas Pilatu Isus at bilug. Ngay taw gsuyu tua anya, ay kanya sik tagfangguna yangay sa sangay taw Udyu. Kanya gfanya Dius nu gfagtainan.

⁴⁴ Ay Pilatu andulo maksvn nu nadungug te, Isus anbul wan. Ay kanya nauro at sadi fag fun tagfawayan, ay nainto anya te, o Isus anbul wan?

⁴⁵ Pilatu nu nasaful te, Isus anbul wan, kanya naylat Use nu namul Isus at bilug.

⁴⁶ Ay Use nabayad sik bagu fag ramit ay nasifig Isus at bilug, ay kanya nanamoli sa sik fagfolian at magaruyan si sik gang, ay nafadagingan sik gang sas sakbawan fagfolian laman at fanuklub.

⁴⁷ Ay Maria Magdalena, ay Use at mina fag Maria, nalag te, sanya nu gfoli Isus.