Markus 12 - Fanawbuid tagsibaliwas Fakayabian

Isus at Faydayuanan sabaliwa at Mauri fag ngay Tagalaga Tanuman

¹ Isus gfasigad gfoyung sa sangay taw sik faydayuanan te, “Sik taw natanum ubas sit daga ay naalad at tanuman ay nawat sik fagturisan ubas at rawvg, ay nawat yangay sik bale ngabat laman fagulitan at tanuman. Ay kanya nafaalaga at tanuman sa sik ngay tagalaga, ay nalo sa tangayayu fag talun.

² Ay abandi, at tanuman at rawvg nu nlesan wan, kanya nasugu at fagsuguan at sadi sa sangay tagalaga at tanuman laman namul at afud.

³ “Ay kafag ngay tagalaga nagamat kanya fag fagsuguan ay nafalang ay naiyan we buba.

⁴ Ay tagagbilug gdog yay nasugu sik fagsuguan. Ay at ngay tagalaga nafefakarukan anya sit alfuyu ay nafalingun.

⁵ Ay tagagbilug nasugu sadi yak fagsuguan, ay ngay tagalaga nafabul anya. Ay nasugu yangay tibak fagsuguan, ay katanya yangay at nafakamulun sa anya fagayu, tiba nafalangan ay tiba nafabul wan.

⁶ Ay sa taguyan oma, e sawad yay sadi at fagnansuguun ro, kanya at fakesugun at baguama. Ay nasugu anya sat ngay tagalaga aroro gamatangan te, ‘Kanya ro fag ngay tagalaga gsuyu tua ku baguama.’

⁷ “Ay kanya fag ngay tagalaga gkamatoan te, ‘Kadasug wan at nangagbilug ban at mama at daga. Bastam, namabul watam anya, ay itam waban tagagbilug at daga.’

⁸ Ay at ngay tagalaga nagamat kafag baguama ay nafabul ay naukas sas day tanuman.

⁹ “Tain ban tagagbilug kafag tanuman at fakamulun? Kanya ban kadasug ay namabul kafag ngay tagalaga ay namalaga at tanuman sa tibak tagalaga.

¹⁰ O yam natap Dius at Longan te, ‘Ngay takawat bale at naukas fag gang, katsi famaogat at bale.

¹¹ Tam Fun at nafakamulun takatanya, ay maksvn nu madulo.’ ”

¹² Ngay fun tagfon fanggalangun ay ngay tagfoyung Muisis at Faugali ay anggan ngay fagtainan kaylat nanggamat Isus, aroro nasaful te, Isus at faydayuanan at fagfatungulan sa anya fagayu. Ay kanya fagayu kalimu ngay taw, nu katanya, nalao wan ay naubun Isus.

O Masine Gfon Famayad sas Talun Ruma at Fun

¹³ Sanya ginan, ngay fun tagfon fanggalangun nasugu tibak taw Fariseu ay Erudes at fagsuguan tiba laman namae asalanan Isus sit longan.

¹⁴ Ay kanya fagayu andasug sas Isus ay nalong te, “Takamoyung, saful ami te, matuyan tuo, ay di o gamatangan nusnga setaw taw at longan, ay di o e fagfili taw, ay matuyan nu gfoyung o Dius at fakaylatun. O gfaning manga tam tam faugali nu gfon tam famayad sas talun Ruma at fun, o mannga duan?

¹⁵ O gfon tam o mannga deyud?” Ay Isus nasaful te, kanya fagayu kamaningan way, ay nabalus anya fagayu te, “Wain ay fagfaskudun angku? Fastei sik salapi, gdama au.”

¹⁶ Ay kanya fagayu nafon sik salapi. Ay Isus nainto te, “Sinu at ke aninu ay at ke ngayan at marirukan ste fag salapi?” Ay kafag ngay taw nabalus te, “Talun Ruma at fun.”

¹⁷ Isus nalong anya te, “Nu katanya, foni sas talun Ruma at fun, anya mandi at afud. Ay foni sas Dius, Dius mandi at afud.” Ay fagayu taw andulo Isus at famalus.

O at Kinbul Gdog yay ban Gleleg

¹⁸ Ay sik ngay taw Saduseu andasug sas Isus. Ngay taw Saduseu gfoyung te, ngay taw ban at kinbul wa gdog ya gleleg. Ay kanya nainto sas Isus te,

¹⁹ “Takamoyung, Muisis nariruk sa antam te, sik mangama nu nbul wan ay at bubay wa nke sisian, masine kafag mangama at faduksay nu nantiug kafag mangena, laman namae sisian yay, tuga ban at faduksay at sisian.

²⁰ Ebi e fituk duksayan mangama. At kaka daul nafamubay ay anbul ay wa nke sisian.

²¹ Ay at fadua nabubay sanya fag mangena ay anbul yud e sisian. Ay katanya yangay at fatuluk faduksay.

²² Ay fagfitu nabubay anya ay wa nke sisian. Ay abandi, kafag mangena anbul yangay.

²³ Gina ban fagayu taw nadog naleleg, sinu ban at ke bubay fia kafag mangena, aroro fagfitu nabubay anya?”

²⁴ Isus glong te, “Gsalan am, aroro wam anyamag Dius at Longan ay at fagmabalyananun.

²⁵ Aroro gina ban fagayu taw nadog naleleg, wa ban e gdaddadwaan ya. Ginanya ban fagayu taw kata Dius at ngay tagbarita sis banwa.

²⁶ Ay nu saman baliwa at kinbul nu gdog gleleg, o nunda yam natap Muisis at Rirukan, Dius nu garingang siginan kafag tagigang fag fun kayu? Dius nalong sa anya te, ‘Au wan Abrayam, Isak ay Akub at Dius.’

²⁷ Dius bunwa at mabulan fag ngay taw at Dius, nu bunway tagleleg tua fag ngay taw at Dius. Nu katanya, maksvn nu gsalan am.”

Tiba Tungud fag Suguan sis Muisis at Faugali

²⁸ Sik tagfoyung Muisis at Faugali andasug ay nadungug kanya fag ngay taw nu gbadbaboan. Kafag tagfoyung Muisis at Faugali nu nasaful te, matuyan tua Isus at famalus, ginto Isus te, “Inday fag suguan tiba tungud at mafanud sis Muisis at Faugali?”

²⁹ Isus gbalus te, “At tiba tungud fag suguan te, ‘Taw Israel, dungugani. Tam Fun, tam Dius sadi way.

³⁰ Esugi am Fun, am Dius, sas fagdaul am amatanganan, ay sas fagdaul am fakaylatun ay sas fagdaul am fagsafulun ay sas fagdaul am fagmabitsugun.’

³¹ Ay at fadogan fag suguan, ‘Esugi am iba kaksvn nu kesug o emu.’ We tibak suguan tagtungud yay tuy.”

³² Ay kafag tagfoyung Muisis at Faugali glong sas Isus te, “Anud ngaro, Takamoyung, matuyan am longan te, ‘Sadi way tam Dius ay we tiba, kanya way lang.’

³³ Nu kesug tuo tam Dius sas fagdaul am amatanganan, ay sas fagdaul am fagsafulun, ay sas fagdaul am fagmabitsugun, ay nu kesug o am iba kaksvn nu kesug o emu, kanya tua tagtungud fagayu fagirugun fag fanggalangun ay kamayewa fag fanggalangun.”

³⁴ Ay Isus nu nasaful te, mamatanganan tua kafag taw at longan, glong sa anya te, “Munakbang wan Dius nu gfagtainan emu.” Ay abandi we taw ya namaskud nanginto sas Isus.

Sinu ke Kasugfunanan Dius at Nafili fag Fun

³⁵ Isus gina gfoyung sis Dius at bale, glong te, “Wain ngay tagfoyung Muisis at Faugali at fagfoyungun te, ‘Dius at nafili fag Fun, fun Dabid at kasugfunanan.’

³⁶ Dabid yangay at nalong gina at Masine fag Falad nafamatanganan anya te, ‘Tam Fun nalong sa ku Fun te, Malunggungi sa ku siun baliwa, ay namababo au emu sa am ngay fawayan.’

³⁷ Fun Dabid nafangayan anya te, ‘Ku Fun.’ Nu katanya, tain ro kafag Fun nu siginans fun Dabid at kasugfunanan?” Ay ngayu takaylat gdungugan Isus.

Isus Nafararang sabaliwa Tagfoyung Muisis at Faugali

³⁸ Ay Isus nafoyung te, “Dirii tua ay lag gfaning ngay tagfoyung Muisis at Faugali. Kanya fagayu e lanbung at mafilian nusnga nday nu glao, ay gina sis wabilug furuan, kaylat ngay taw nu gseg anya.

³⁹ Ay galay nasas bale fakafulan ay e ngay fagmafulun, kanya fagayu at fakaylatun sa tua at masine fag ngay faglunggungan,

⁴⁰ ay gfamin ngay fagbubayun at ramraman, ay dewa ngaduge nu gdarangin, gfalagan way lang. Kanya ban fagayu mul at maksvn fag faurianan.”

Sik Fagbubayun Nafon at Fanggalangun

⁴¹ Ay Isus malunggung sis day fagsuadan fanggalangun, ay gdama ngay taw nu gfon salapi. Ngayuk taw maramraman nafon ngayuk salapi.

⁴² Ay sik yud e kwa fag fagbubayun andasug ay nafon duak salapi, ay at nafon bunya sik singku.

⁴³ Ay Isus nafaful at ngay tagadal ay nalong te, “Matuyan nu glong au ayu te, kanya fag fagbubayun at nafon natungud yay sat ngay iba.

⁴⁴ Aroro kanya fag ngay maramraman at fon at nagsawean way, ay kafag fagbubayun dewa yud e kwa, at nafon fagayu tua at salapi, anggan at nafalganan famul ma at fakonun.”