Markus 11 - Fanawbuid tagsibaliwas Fakayabian

Isus Nasakbo sas Erusalem Kata sik Fun

¹ Isus ay at ngay ufud nu munakbang wan sis furuan Erusalem, andasug sas Betfage ay Betanya fag duak furuan sis day Buksul Ulibu. Ay Isus nasugu duak tagadal te,

² “Loi wan sat fadogan fag furuan, ay nu ndasug am sanya, lumag ro am sik riangan asnu masiukan. Kafag riangan ya batang e gsakay. Luasi ay tabani stae.

³ Ay nu e nainto way ayu te, ‘Wain ay fagluasun kafag riangan asnu?’ balusi te, ‘Tam Fun kaylat ay arodi ro gfafoli yay stae.’ ”

⁴ Ay kanya fag dua nalo wan ay nalag sik riangan asnu masiukan si sik sakbawan bale sis day dalan. Ay gina gluas,

⁵ sik ngay taw at malindug sanya ginto te, “Wain ay fagluasun kafag asnu?”

⁶ Ay duama nafoyung Isus at longan aro taw, ay at malindug wa gsalag ya.

⁷ Arodi kafag duama nataban kafag riangan sas Isus ay nasagmak at ngay lanbung sas tungud guyuy riangan ay Isus nasakay sanya.

⁸ Ay ngayuk taw nasagmak yangay at ngay lanbung sa sangaba dalan, ay tiba nasagmak ngay falungfung, at nabul siginans gamasun.

⁹ Ay ngay taw tagsit fagunan ay tagsit faguyanan guro te, “Fadi fadi, segi takadasug sas Dius at fagmabalyananun!

¹⁰ Segi anya, aroro tam mangaguyang Dabid at fagfunanan gdog yay ankaksvn. Fadi fadi, segi Tiba Tungud fag Dius!”

¹¹ Ay Isus andasug sas Erusalem ay nasakbo sas Dius at bale. Ay nu nalingaman wan kamayewa tagsanya, kanya nalo wan sas furuan Betanya, gasfuan at tagadal fag labi dua, aroro anyabi wan.

Isus Nafayango sik Kayu

¹² Ay balabag di, Isus ay at ngay tagadal nalo siginans furuan Betanya, ay Isus kalunus.

¹³ Ay Isus nabanawan sik kayu igus marabung, ay nanangakbang laman nanlag te, o e rawvg, ay manlag di we rawvg, at ngay don way lang, aroro bunya fanrawvgan.

¹⁴ Ay Isus nalong sanya fag kayu te, “Wa ban e kon ya am rawvg kabavn.” Ay at ngay tagadal nadungug Isus at nalong takatanya.

Isus Naiyan Tagfaebayad siginan Dius at Bale

¹⁵ Ay Isus anggan at ngay tagadal andasug sas Erusalem. Ay Isus nasakbo sas Dius at bale ay naiyan tagfaebayad ay fagayu at namayad sanya. Ay kanya nafalub ngay tagfabadbangsian salapi at fagfolian, ay anggan ngay faglunggungan laman sa sangay tagfaebayad labikung.

¹⁶ Ay Isus nasalag ke ngay famaloun nu gdalan sas Dius at bale.

¹⁷ Ay Isus nalong te, “E rirukan wa te, ‘Ku bale sik bale daranginan, laman fagayu talun at ngay taw gdarangin sanya,’ ay dewa katanya, nawat wayam ‘ngay tagfangkamul at fagmafulan.’ ”

¹⁸ Ay ngay fun tagfon fanggalangun ay ngay tagfoyung Muisis at Faugali nu nadungug Isus at longan, grvbvy balyawvtan te, tain ban nu namabul anya. Ay kanya fagayu kalimu Isus, aroro ngay taw andulo nu nadungug Isus at foyungan.

¹⁹ Ay nu nyabi wan, Isus ay at ngay tagadal nalo wan siginans Erusalem.

Foyungan sabaliwa at Kinyango fag Fun Kayu Igus

²⁰ Balabag di, Isus ay at ngay tagadal gina glao si sangaba dalan, manlag di at nalag egmenit fag kayu igus anyango wan, anggan at lalid.

²¹ Ay Pedru namatang ay nalong sas Isus te, “Takamoyung, damai egmenit am nafaurianan fag kayu nyango wan.”

²² Ay Isus nalong sat ngay tagadal te, “Afanudi sas Dius.

²³ Matuyan nu glong au ayu te, nusnga sinu nu nalong ste fag buksul te, ‘Alini, ay tosi sasad dagat,’ kafag taw nu ddi gaduanun, ay nu gafanud tua te, umfasludan, anud umkatanya wa fia.

²⁴ Nu katanya, glong au ayu te, nusnge wain ay fagetun gina am gdarangin, afanudi te, umfasludan fia, ay sumawa fia ayu.

²⁵ Ay gina am malindug gdarangin, falyami ay iba nusnge wain at mauri at fakamulun sa ayu, laman ay Mama sas banwa gfalyam yangay ay ngay asalanan.”

²⁶

Sinu at Nasugu Isus

²⁷ Ay Isus ay at ngay tagadal gdog yay andasug sas Erusalem. Ay Isus gina glo sis Dius at basad bale, ngay fun tagfon fanggalangun ay ngay tagfoyung Muisis at Faugali ay anggan ngay fagtainan nanangakbang sa anya.

²⁸ Ay kanya fagayu nainto sas Isus te, “Daginan am fagmabalyananun am fagmafafakamulunun katanya, ay sinu at nasugu emu te, namakamulun o katanya?”

²⁹ Ay Isus nabalus te, “Anggan au e fagintoun au sa ayu. Balusi angku ay gfoyung kyangay ro ayu te, daginan ku fagmabalyananun ku fagmafafakamulunun takatanya.

³⁰ Ginto au ayu te, daginan Uan at fagmabalyananun nu gfasurung, o siginans Dius o ay mannga siginans taw? Balusi angku.”

³¹ Ay kanya fag ngay taw Udyu gkamatoan sit dayu te, “Nu nalong ro tam te, ‘Siginans banwa,’ kanya ro gbalus antam te, ‘Wain ay fagyudun gafanud Uan at longan?’

³² Ay nu nalong ro tam te, ‘Siginans taw’? ngay taw ro kauri way antam.” Kanya fagayu kalimu ngay taw aroro kafag ngay taw gafanud te, Uan, Dius fia at taglong at sadi.

³³ Nu katanya, kanya fagayu nabalus Isus te, “Wami saful.” Ay Isus nalong te, “Anggan au, kwa gfoyung ayu te, daginan ku fagmabalyananun ku fagmafafakamulunun takatanya.”