Esra 10 - Fanawbuid tagsibaliwas Fakayabian

Ngay Taw Israel nu Gfoyung at ngay Asalanan

¹ Kaduge Esra gtudan gdarangin sis salubangan Dius at bale, kanya gwayway ay gfoyung taw Israel at ngay asalanan. Ay ngayuk taw Israel, mangama, mangena ay sisian tagligung anya, gwayway yangay maksvn.

² Sanya ginan, Sekanyas, Ekyel at baguama, ay Elam at kasugfunanan nalong anya te, “Wami nafakamulun at matuyan sa tam Dius, aroro nafamubay ami sa tibak talun at taw. Dewa katanya, ngay taw Israel e fagsegun yay.

³ Nu katanya, katsi, gfatuyanan ami te, gfaning tua ban ami am ngay foyungan sa emi, ay gfaning yangay ban mi ngay tagfaning tam Dius at ngay suguan. Nangawat ami sik nasadian sa tam Dius te, gaiyan wami em ngay mangena tagsiginan tibak gaban taw anggan at ngay sisian. Ay namaning ban mi tam Dius at Faugali.

⁴ Malindugi wan, aroro o wan at ke fakamulun takatanya. Faksvni am amatanganan ay fakamuluni at matuyan. Ay ggubuk ban mi emu.”

⁵ Nu katanya, Esra anlindug wan ay nalong sa sangay tagfangguna, ngay tagfon fanggalangun, ay sa sangay taw Lebi, ay sas fagayu taw Israel te, “Fatuyanani te, gfakamulun ban am Sekanyas at ngay nalong.” Ay kanya fagayu nafatuyanan.

⁶ Ay sanya ginan, Esra nalao sis salubangan Dius at bale ay nasas Eukanan, Elyasib at baguama, at suluk, ay kanya nu ndasug sanya, wa nafangon ay wa nainum aroro kabalu sabaliwa ngay taw Israel at kinfoli siginan at fagatabananan, at fagyudun matuyan.

^7-8 Ngay taw Israel at ngay tagfangguna ay at ngay fagtainan sas fagdaul talun Uda ay sas Erusalem, nalong sas fagayu at kinfoli siginan at fagatabananan te, afuli sas Erusalem. Ay nu sinu ban at yud andasug sis fatuluk menit, gbul wan siginan anya at ngay fagagbilugun ay wa ban katap ya te, sik ngay taw at kinfoli siginan at fagatabananan.

⁹ Nu katanya, sis fatuluk menit fagayu taw tagbanwan sis Uda ay sis Benamin anful, ay namalunggung sis Dius at bale at fagaweanan tagsis Erusalem. Anfasludan takatanya gina sis faduak safuluk menit sis fasiamk magdanun. Ay kanya fagayu gtadtaruyan aroro sat kafanudan at kamatoanan ay at kaksvnan nu karak.

¹⁰ Sanya ginan, Esra fag tagfon fanggalangun anlindug ay nalong te, “Anke asalanan am aroro nafamubay am sa tibak gaban taw. Siginan takatanya ay nafakamulun, nafamut am ngay taw Israel at ngay asalanan.

¹¹ Katsi, foyungi ay ngay asalanan sas Yawi, ay mangaguyang at Dius, ay fakamuluni at fakaylatun. Ay asamani wan siginan ay ligung fag ngay taw, ay saruayani wan siginan ay ngay mesa bubay tagsiginan tibak talun.”

¹² Ay fagayu tagbanwan nauro te, “Anud, matuyan! Gfakamulun ban mi kata am suguan.

¹³ Dewa katanya, yaban mi nafafasludan takatanya nu sadi way ay mannga duak menit, aroro ngayu tua si emi at ke asalanan takatanya. Katsi karak yay ay wami magwanta nu maduksunan way mi.

¹⁴ Tam ngay tagfangguna yakman lang takafamato ste, ay tagfakamulun laman sa sangay taw. Fastaei fagayu at nafamubay siginan tibak talun, gadgaloan at ngay fagtainan ay at ngay tagfawabilugan sit mesa furuan. Gfakamulun tam takatatuy laman umkalyam wan Dius nu kauri antam aroro sa tam asalanan.”

¹⁵ Ay at kinfamato Yunatan, Asael at baguama, ay Aseya, Tikba at baguama. Ay at nagubuk anya fagayu Mesulam ay Sabetay fag taw Lebi.

^16-17 Ay fagayu kinfoli siginan at fagatabananan nafafasludan takatanya fag algan. Nu katanya, Esra fag tagfon fanggalangun nafili ngay mangama tagfangguna sa sangay talanan, ay nariruk kanya fagayu at ngay ngayan. Ay taguna fag menit sis fasafuluk magdanun, kanya fagayu namalunggung laman gfasigad nu ginsaful sabaliwa ngay taw Israel at nafanmangena sa tibak gaban taw. Ay gina taguna fag menit sis fasafuluk magdanun, at fadogan fag banwa antabu wan nu ginsaful fagayu at ke ngay mamalong.

Ngay Mangama at Nafamubay siginan Tibak Talun

^18-19 Kayu tuy at nafamubay sa tibak gaban taw, ay nafatuyanan te, gfasaruayan wan at ngay bubay: (Kanya fagayu nafon ngay tama tupa laman at fanggalangun famalyam at ngay asalanan.) Siginan ngay tagfon fanggalangun: Tagsiginan Eswa, Usadak at baguama at talananan, ay at ngay faduksay: Maaseya, Elyeser, Arib ay Gedalya.

²⁰ Tagsiginan Imer at talananan: Kanani ay Sebadya.

²¹ Tagsiginan Karim at talananan: Maaseya, Elyas, Semaya, Ekyel ay Usya.

²² Tagsiginan Pasur at talananan: Elyuenay, Maaseya, Ismael, Netanel, Usabad ay Elyasa.

²³ Ay siginan ngay taw Lebi: Usabad, Simei, Kelaya (at ngayan yangay te, Kelita), Petakya, Uda ay Elyeser.

²⁴ Ay siginan ngay tagfawang: Elyasib. Ay siginan tagulit Yawi at bale at sakbawan: Salum, Telem ay Uri.

²⁵ Ay siginan ngay taw Israel: Tagsiginan Parus at talananan: Ramya, Isya, Malkya, Miamin, Elyasar, Malkya ay Benaya.

²⁶ Tagsiginan Elam at talananan: Matanya, Sakaryas, Ekyel, Abdi, Eremut ay Elyas.

²⁷ Tagsiginan Satu at talananan: Elyuenay, Elyasib, Matanya, Eremut, Sabad ay Asisa.

²⁸ Tagsiginan Bebay at talananan: Eukanan, Kananya, Sabay, ay Atlay.

²⁹ Tagsiginan Bani at talananan: Mesulam, Maluk, Adaya, Asub, Seal ay Eremut.

³⁰ Tagsiginan Pakat-Muab at talananan; Adna, Kelal, Benaya, Maaseya, Matanya, Besalel, Binwi ay Manase.

^31-32 Tagsiginan Karim at talananan: Elyeser, Isya, Malkya, Semaya, Simyun, Benamin, Maluk ay Semarya.

³³ Ay tagsiginan Kasum at talananan: Matenay, Matata, Sabad, Elifelet, Eremay, Manase ay Simei.

^34-37 Tagsiginan Bani at talananan: Maaday, Amram, Uel, Benaya, Bedya, Kelui, Banya, Meremut, Elyasib, Matanya, Matenay ay Aasu.

^38-42 Tagsiginan Binwi at talananan: Simei, Selemya, Natan, Adaya, Maknadebay, Sasay, Saray, Asarel, Selemya, Semarya, Salum, Amarya ay Use.

⁴³ Tagsiginan Nebu at talananan: Eyel, Matitya, Sabad, Sebina, Aday, Uel ay Benaya.

⁴⁴ Kanya fagayu at nafamubay siginan tibak gaban taw at mangena, ay tiba kanya fag ngay mangena e ngay sisian wan.