Izikịẹl 1 - Kịrịkẹnị Baịbụl

Izikịẹl Ḅe Tamụnọ Amanyana Emine Ọrị Mẹ ( 1.1—7.27 ) Tamụnọ Amanyanaḅọ Emine

¹ Sọnọ karama ene mị ḅie inein-a akalụ mị ḅie ḅụ kụra soi karama kụra mị ḅie, Ị̀rị̀, Agbamịẹ Izikịẹl, Buzaị yaḅe, ini desin ḅaraḅụ se so Babilọn mun Juapụma ḅie à simemẹ Kẹba Tọrụ mị aka ḅụ. So mị finjimẹ, se tẹmẹ ḅụ Tamụnọ Ḅe yese ị̀ ḍiemẹ.

² (Anị ini kụrọ ḅaraḅụ amanyanaḅọ Jẹhoịakin ḅe desin sọnọ karama kụra mị ḅie.)

³ Anịanga ḅụ Babilọn mị ḅie Kẹba Tọrụ mị aka sịkịḅụ, Nyanaḅọ Ḅe ọkwẹịn ị̀ pịrịye à nwọ naamẹ, se àrị oria kụrọ nwọ ọrịmẹ.

⁴ À tọrụdekichịẹma se kụrọ irisi fọrụ nwọ ọrịmẹ ọgọnọ ọrụ ḅụ ḅoaḅẹ. So alagba wakam ma ḅịa-aḅẹ kpiti soḅuno mị ḅie, anịsịkị anị kelema so mị ḅịaḅẹ. So alagba mị wakam ma ḅịa àrị nyọ ḅụ, alapẹlẹka ọkụ simeye ḅịaḅẹ.

⁵ Irisi mị ogboku ḅụ ḍumo nyana aye sime ọkụ sime inein aye, tomoniḅọ kịkẹaye à nwọ ọrịmẹ.

⁶ Ọkụma arịa ḅụ gbọrịye inein-a tọrụ na inein-a pamba, gbọrịye inein-a tọrụ na inein-a pamba, nwọ nyanamẹ.

⁷ Arịa ḅụọma gbụsụnụmẹ, nambulo akpaka ọkụ simeaye arịa ḅụọ chuku ma ḅụ omi-ẹ. Ini iḅiọkụma guro tẹlịmasa alapẹlẹka ikulele ḅịaọkụ àrị nwọ iḅimẹ.

⁸ Àrị nyana inein-a tọrụ ma na inein-a pamba ma na sikima ọkụma, àrị pịkị gbọrịye inein-a tomoni ḅara inein-a tomoni ḅara nwọ nyanamẹ, gbọrị ḅara gbọrị pamba chuku ḅie gbọrị ḅara gbọrị pamba chuku ḅie omi-ẹ.

⁹ Mà namama arịa mama pamba, mama pamba ma àrị nwọ finjima so ọkụma àrị ḅo gbasịa kelekele inein-a ịkọlị nwọ mịẹmẹ, arịa pamba ma ḅịpị okolo ma jịnye jịnye la waraḅẹ. Àrị nwẹngị ọkụma gbọrị ḅụ mị àrị nwẹngịarịye-ẹ, arịa ojuma pịkịka ḅaraḅụ.

¹⁰ Mà namama kịrịkịrị inein-a tọrụkuḅu àrị nwọ nyanamẹ: tọrọkọ ḅụ tomoniḅọ tọrụkuḅu, amaḅaranga ḅụ chịrịḅa nama tọrụkuḅu, ereḅaranga ḅụ owoi nambulo tọrụkuḅu, anịsịkị ọḅụju mị igo tọrụkuḅu.

¹¹ Arịa ḅụ gbọrịye gbọrịye mama pamba ma dekichịẹma ọkụma arịa ḅịpị okolo ma jịnye jịnye ḅịpị okolo nwọ lamẹ, anịsịkị ísí-a mama pamba ma àrị nwọ iko se arịa ḅụ ḅie chumẹ.

¹² Mà namama gbọrịye gbọrịye arịa tọrụ ma se inein-a ịkọlị mamgba damẹ, mị gose arịmgba ineda kpo ḅụ munḅịa anga goyegoye nwọ munḅịa, oju pịkịka ḅaraḅụ.

¹³ Mà namama ogboku ḅụ kọrị se ḅịapakarị pọnjị tọnjie ọkụ simeye sịkịmamgba nwẹngịma ḅọrọaḅẹ. Fịnị mị anị kọrịpakaḅo fịnịḅẹlẹ nwọ tẹịntẹịn pakụmamẹ.

¹⁴ Nama ma àrị mangị ọḅụ na kuḅu na da àrị ḅara mị, anị so mị pịkị sarasarama wakam, wakam ma ḅịarị ọkụ-ẹ.

¹⁵ À ma inein-a namama ḍikiarịogbo à ḅo inein-a kporokporo nwọ ọrịmẹ, àrị kiri ọgọnọ ḅụ gbọrịye gbọrịye angasịkị, gbọrịye gbọrịye angasịkị ḅụ omi-ẹ.

¹⁶ Inein-a kporokporo mamgba kịkịna kịkịnamẹ, arịaḅụ gbọrịye gbọrịye yela ḍụparị ḅịa ọkụ ḅịamẹ, àrị pịkị jịn-a kporokporo nyanamẹ, gbọrịye gbọrị kporokporo, gbọrịye gbọrị kporokporo amaḅaranga ḅụ àrị na sụkama sụkama simemẹ,

¹⁷ anịẹrẹchị kporokporoma àrị ineda inein-a ịkọlị ma ḅụ àrị mun ḅi anga goyegoye nwọ munḅịa.

¹⁸ Kporokporo mamgba kelema koro tọrụmgbọlụ arịaḅụ ḅeinmẹ.

¹⁹ Nama ma nwẹngị sịkị goyegoye, kporokporoma àrị na nwẹngịmẹ, mà namama nemikase kiri ọgọnọ ḅụ iwomẹ ḅẹḅẹ, kporokporoma sọ pịkị ọkọ mịẹmẹ.

²⁰ Nama ma àrị mun ḅịanga goyegoye àrị nwọ mun mẹ, kporokporoma sọ namama mịẹọkụ nwọ mịẹmẹ, anịatịḅị namama àrị datekerema aḅẹ.

²¹ Anịgose namama ḅọrọ nwẹngịmẹ anịkanịka dachịẹmẹ anịkanịka kiri ọgọnọ ḅụ iwo so damẹ ḅẹḅẹ kporokporoma sọ anị gbọrị ḅara mị mịẹmẹ.

²² Nama ma tịḅị ọgọnọ ini yela ḍụparị se tẹmẹ sotọrụ elekima nwananị nwananị ma ḅịaḅẹ.

²³ Anị sotọrụ elekima nwananị nwananị ma ḅịarị ye mị chuku ḅie namama chịẹse arịa mama pamba ma finji jịnye jịnye da se ísí mama pamba ma se arịa oju gbẹịnmẹ.

²⁴ Arịa pamba ma nyọfiema ọkụ à nwọ naamẹ àrị fin àrị sịkịḅụ; àrị opu tọrụḅie ambura fieọkụ fiemẹ, ḅaka owuni nyọ fiema ọkụ simemẹ, Kụrọmamgba Nyana Tamụnọ Ḅe pụkọ kịkẹmẹ. Àrị fin mị ḅụ dachịẹ sịkị, àrị arịa pamba ma ikomẹ.

²⁵ Anị-ẹ nwọḅẹ sọnị anị sotọrụ elekima nwananị nwananị ma ḅịarị ye mị ọgọnọju ḅụ nyọ pa fieaḅẹ.

²⁶ Anị sotọrụ elekima mị ọgọnọ ḅụ iḅiọkụma ye la ḍụparị ini nwọse mịẹ emine simemẹ, anịsịkị emine mị ọgọnọ tomoniḅọ ọkụ simeḅọ anịa ọgọnọ sime waraḅẹ.

²⁷ Ye mị alapẹlẹka ikulele fịnị ḅie sime se ḅịa ọkụ ḅịamẹ. Anịa ḅịa mị nyọ mamgba kelemamẹ.

²⁸ Anịa ḅieḅụ so elekima mị nyana kịrịkịrị-a tọrụ mamgba karamẹ. Mịn kụrọma ḅịa tọrụda tọnjie mị ḍiepakụmamẹ na Nyanaḅọ Ḅe ori omi-ẹ. À mịnaye ma ọrị sịkị, à sokoro ị̀ tọrụ se kiri iḅomẹ, anị à ḅo gbọrị pụkọ nwọ naaye-ẹ.