Milimo 7 - Nyamwezi New Testament 1951

¹ Haho muhozya muhanya wamuwilaga, Kinahe, yili syenisyo? Nawe wayombaga,

² Inwe vagosya vadugu na vavava, mudegeleke. Mulungu wa lukumo wigelaga kumwa nsiswe Abrahamu, aho wikalaga mu Mesopotamia, na wavagi atali

³ kusamila mu Harani, na wamuwilaga, Ufume ku nsi yinwe na ku vaduguyo na uje ku nsi yeniyo, hoyene nkukulagila.

⁴ Haho wafumaga ku nsi ya Vakaldayo, na wikalaga mu Harani; na hanuma na kugulala kwamwa ise Mulungu wamusamaja kufuma kwenuko kwiza mugati na nsi yeniyi, homwenumu mulikalamo lelo.

⁵ Alisi akamupile ifungu lya nsi, ninga ngʼo lugemo lwa lupambala lumo, sumbwa wamulaganaja kuyipana kuwakwe kuvi nsavo yakwe na ku vuvyalwa wakwe hanuma nawe, nulu wavagi akavile na mwana.

⁶ Mulungu wayombaga giki, Vavyalwa vakwe vakuvi valovezi mu nsi ngeni, na vakuvatula mu vusese, na vakuvaducha sivi myaka magana anne.

⁷ Na va chalo chenicho, hovene vakuvatumila mu vusese, nkuvayangula, wayombaga Mulungu; haho vakufuma, na vakunitumamila henaha.

⁸ Na wamupaga vuswanya wa vutahiriwa. Na haho wamuvyalaga Isaka, na wamutahiri lusiku lwa mnane, na Isaka wamuvyalaga Yakobo, na Yakobo wavavyalaga vahenga viswe avo ikumi na vavili.

⁹ Vahenga viswe vamwivuvilaga Yosefu, na vamuguzaja ku Misri, na Mulungu wavagi hamohene nawe, na wamupizaja ku mamikosi gakwe gose,

¹⁰ na wamupaga kisa na ngelo hambele na Farao, Mutemi wa Misri, homwene wamutulaga kuvi muhanya higulya na Misri na numba yakwe yose.

¹¹ Lelo yizaga nzala higulya na Misri yose na Kanaani na mukosi muhanya, na vahenga vakawine chakulya.

¹² Alisi aho Yakobo wigagwa ati chakulya chavagimo mu Misri, wavatumizaja vahenga viswe lugendo lwa mbele.

¹³ Lugendo lwa vuvili Yosefu wifumbulaga ku vaduguye, na igongo lyamwa Yosefu lyamanikivagwa na Farao.

¹⁴ Na Yosefu watumizaja, na wamwitanaga ise Yakobo na mugana gwakwe gose, vanhu makumi mpungati na vatano.

¹⁵ Haho Yakobo wikaga ku Misri, na wagulalaga mwenekili na vahenga

¹⁶ viswe na vafilagwa ku Sikemu, na vazikagwa mu kivimbi, hochene Abrahamu wagulaga na mapesa ku vana vamwa Hamori mu Sikemu.

¹⁷ Aho itungo lʼilagano lyegelaga, holyene Mulungu wamulaganaja Abrahamu, vanhu vakwilaga, na vingihaga mu Misri,

¹⁸ kusika wavukaga Mutemi ungi, homwene wavagi akamumanikizye Yosefu.

¹⁹ Mwenuyu wavapinehezaja na vuyengani vʼigongo liswe, na wavadukaja vahenga, wavakungilizaja kuvataga velele vavo, ngena vazuvuke.

²⁰ Mwitungo lyenilo Mose wavyalagwa, na wavagi musoga muno, walelagwa myezi idatu mu numba yamwa ise.

²¹ Aho watagilagwa, mwana mukima wamwa Farao wamusolaga, na wamutovelaga kitisi mwana wakwe.

²² Na Mose wahembekagwa mu ngelo zyose zya Vamisri, na wavagi wa nguzu mu mihayo na milimo yakwe.

²³ Aho wakulaga myaka makumi anne, walomaga ndaka kuja kukavalola vaduguye,

²⁴ vana vʼIsraeli. Na aho wavonaga umo wadukivilwe cha gele, wamugwasaja, na wamwiholelaga uyu wadukivilwe, na wamuvulagaga Mumisri.

²⁵ Kwisi wiganikaga vaduguye vamanikaja, ati Mulungu alivapa vukomolwa na kukono kwakwe; alisi vavagi vakamanikizye.

²⁶ Hawangaluke wigelaga hangi mugati navo aho vikenaja, na wakovaga kuvaswanya, wahayaga, Inwe vagosya, muli vadugu, kuki muliwihologanya?

²⁷ Alisi homwene wamulevaga mwiye, wamusindikaga, uhaya, Nani wakutulaga veve kuvi muhanya na muyanguzi wiswe?

²⁸ Kinahe, ulikova kumbulaga nane, kitisi wamuvulagaga Mumisri igolo?

²⁹ Kunguno ya muhayo gwenugu Mose wapelaga, na wikalaga kitisi mulovezi mu nsi ya Midiani, na kwenuko wavyalaga vana vavili.

³⁰ Aho myaka makumi anne yavitile, malaika wigelaga kuwakwe mwibalangu ha lugulu lwa Sinai mugati

³¹ nʼisaka lilivaka moto. Na aho Mose walivonaga wakumaja kunguno ya wigele wenuvu; na aho wegelaga

³² kwilolela, muzwi gwa Guku gwahamukaga, Nene ndi Mulungu wa vahenga vako, Mulungu wamwa Abrahamu na Isaka na Yakobo. Haho Mose wadetemaga, na akagimile kwilolela.

³³ Na Guku wamuwilaga, Uzule filatu ku magulu gako; kwisi henaha uliwimaho yili nsi nsondo.

³⁴ Loleyene, nagawine mamikosi ga vanhu vane mu Misri, na nakwigilwe kusamba kwavo, kunguno yeniyi nikaga navakomole. Lelo nzugu, nkukutumizya ku Misri.

³⁵ Mwenuyo Mose, homwene vamwikanaga aho vayombaga, Nani wakutulaga kuvi muhanya na muyanguzi? mwenuyo Mulungu wamutumizizye ave muhanya na mukomozi mu kukono kwa malaika, homwene wigelaga kuwakwe mwisaka.

³⁶ Mwenuyo wavafumaja na wavezaja migaka na malumeho mu nsi ya Misri, na mu nyanza ya Sham, na mwibalangu myaka makumi anne.

³⁷ Mose mwenuyo wavawilaga vana vʼIsraeli, Mulungu akumukindikila inwe mufumbuzi kufuma mu vadugu vinwe kitisi nene.

³⁸ Ali mwenuyo, homwene mwivilingano mwibalangu wavagi hamohene na malaika, homwene wayombaga nawe ku lugulu lwa Sinai, na hamohene na vahenga; uyo homwene wanukulaga mihayo ya vuzuvuku, kigele atupe

³⁹ iswe, uyo homwene vahenga valemaga kumudonhoka, sumbwa vamutenkaga, na mu myoyo yavo vikevelaga

⁴⁰ ku Misri, navo vamuwilaga Aroni, Utuvezezye milungu, hoyene yikututongela; kwisi tukamanikizye genayo gamukwililaga mwenuyo Mose homwene watufumaja ku nsi ya Misri.

⁴¹ Navo vavezaja ndama mu nsiku zyenizyo, na kimbulimbuli vakiletelaga kitambo, na vadehaga kunguno ya milimo ya makono gavo.

⁴² Alisi Mulungu wavafutatilaga, na wavalekaga vazitumamile mbuto zʼilunde, kitisi yitonilwe mu kitabu cha vafumbuzi, Kinahe, mwandetelaga ngʼombe ninga fitambo fingi mugati na myaka makumi anne mwibalangu inwe va numba yʼIsraeli?

⁴³ Na mwasombaga ihema lyamwa Moloko, Nʼisonda lyamwa Mulungu Romfa; Fimbulimbuli fyenifyo hofyene mwavezaja, kigele mufikuvile. Kunguno yeniyi nkumusamya inwe kuja kule kuvita Babeli.

⁴⁴ Vahenga vavagi nalyo ihema lya vusangilwa mwibalangu, kitisi mwenuyo, homwene wayombaga na Mose, walagilile alivezye kitisi mukolani ugo hogwene waguwine.

⁴⁵ Nalyo vahenga valyanukulaga, na valingizaja mu kutongwa na Yoswa mu nsi ya vapagani, hovene Mulungu wavapezaja hambele na vahenga, na

⁴⁶ lyadilagaho kusika nsiku zyamwa Davidi, homwene wavonaga kisa hambele na Mulungu, nawe walombaga amukovele Mulungu wamwa Yakobo wikalo.

⁴⁷ Alisi Salomo wamuzengelaga numba.

⁴⁸ Alisi Mwenuyo ali higulya akikalaga mu numba zizengilwe na makono, kitisi mufumbuzi aliyomba,

⁴⁹ Ilunde lili isumbi lyane lya kitemi, Na nsi hakutulila magulu gane. Numba ya mutindo ki mukunzengela? Guku alihaya; Ninga vusuhilo wane vuli kuhe?

⁵⁰ Kukono kwane kukavezizye gose genaya?

⁵¹ Inwe va nhani muno, mukatahirivilwe myoyo ninga matwi; nsiku zyose mulimulasa Roho Nsondo, kitisi

⁵² vahenga, syenisyo ninwe vene. Nani mugati na vafumbuzi vahenga vakamupezizye? Navo vavavulagaga, hovene vafumbulaga kwiza kwa Mugololoku, homwene inwe lelo mwamugambaga, na mwamuvulagaga, inwe

⁵³ mwapivilwe ngʼhama, kitisi zyalagililwe na vamalaika; alisi mukazilindilile.

⁵⁴ Aho vagigagwa genaya, valasilwe mu myoyo yavo, na vamusyelaga mino.

⁵⁵ Alisi uyu okalile Roho Nsondo walangamilaga minso gakwe kwilunde, wavonaga lukumo lwamwa Mulungu, na Yesu imile ha mulila gwa Mulungu.

⁵⁶ Nawe wahaya, Lolagi, ndilivona ilunde lilugukile, na Mwana wa Munhu imile ha mulila gwa Mulungu.

⁵⁷ Alisi vahamukaga na kilaka, na vakivaga

⁵⁸ matwi gavo, na vose vamudumukilaga hamohene; na vamusindikaga hanze na kaya, na vamutulagulaga mawe; na vasangilwa vatulaga myenda yavo ha magulu ga musumba,

⁵⁹ lina lyakwe Saulo. Haho vamutulagulaga Stefano mawe, nawe walombaga, uhaya, Guku

⁶⁰ Yesu, uyanukule roho yane. Na wasukambaga magulu, na wahamukaga na muzwi muhanya, Guku, uleke kuvasolozezya vukenaguzi wenuvu. Na aho wayombaga genaya wagulalaga.