Marko 10 - Nyamwezi New Testament 1951

¹ Na wafumaga kwenuko na alifika mwigunguli lya Uyahudi kumwambu na Yordani, na vanhu vingi vivilingaga hangi hawakwe, na hanuma na kitilwe chakwe wavahembekaga hangi.

² Na Vafarisayo vegelaga kumugema na vamuvuzya, Mugosya ali na luhusa kumutavula muke wakwe?

³ Alisi uyu witavukaga na wavawilaga, Mose walagilaki?

⁴ Navo vayombaga, Mose watupaga luhusa kutona cheti cha kumutavula na kumuleka.

⁵ Alisi Yesu wavawilaga, Kunguno ya vulendelezu wa myoyo yinwe wavatonelaga inwe ilagilizyo lyenili.

⁶ Alisi kufuma mbuki ya kutundwa Mulungu wavatunda mugosya na mukima.

⁷ Kunguno yeniyi munhu akumuleka ise na nina na kudimana na

⁸ muke wakwe; syenisyo vakavile hangi vavili sumbwa muvili gumo.

⁹ Haho genaya Mulungu wagadimanaja,

¹⁰ munhu akagalekanye ngʼo. Na mu numba vahemba vamuvuzaja hangi kunguno ya muhayo ugu.

¹¹ Na alivawila, Homwene alimuleka muke wakwe na alimutola ungi, alisihya nawe.

¹² Na ulu mukima alimuleka mugosi wakwe na alitolwa na ungi, nawe alisihya.

¹³ Na vavaletaga vana kuwakwe, kigele avakumye; alisi vahemba vavadakilaga avo vavaletaga.

¹⁴ Alisi aho Yesu wayivonaga, wakilagwa na wavawilaga, Muvaleke vana vize kuwane, na mukavahangilizye ngʼo, kwisi ku va mutindo gwenugu vutemi wa Mulungu vuliho.

¹⁵ Loleyene ndimuwila inwe, homwene akavile kuwanukula vutemi wa Mulungu kitisi mwana, mwenuyo kwingila ngʼo mwenumo na hado ngʼo.

¹⁶ Na wavakumbataga na wavatulilaga makono na wavadosaja.

¹⁷ Na aho wafumaga na wafikaga mu nzila, umo wapelelaga kuwakwe, wamusukambilaga na wamuvuzaja, Muhembeki musoga, niteki kigele nasalike vuzuvuku

¹⁸ wa hanahana? Alisi Yesu wamuwilaga, Kuki ulinitana nene musoga?

¹⁹ Kuduhu musoga sumbwa umo, Mulungu. Mikumo uliyimanicha: ukasihye ngʼo, ukavulage ngʼo, ukive ngʼo, ukasangilwe ngʼo ha vulamba,

²⁰ ukayenge ngʼo, umukuzye nso na noko. Na uyu wamuwilaga, Muhembeki, gose genaya nagalindilaga vukumbu na vuyanda wane.

²¹ Alisi Yesu wamwilolelaga, wamutogagwa na wamuwila, Veve wasigazaja kinhu kimo, uje ukagaguzye gose ago uli nago, na uvape vapina genaya, na ukuvi na nsavo nhanya mwilunde, na haho wize na undonde.

²² Alisi uyu wagayaga na wajaga na misayo, kwisi wavagi na nsavo ningi.

²³ Na Yesu wapilimaja minso wavawila vahemba vakwe, Vutimbu ki venavo vali na nsavo kwingila mu vutemi

²⁴ wa Mulungu! Na vahemba vakumaja kunguno ya mihayo yakwe. Alisi Yesu witavukaga na wavawila, Vana, kili kitimbu ku venavo valiyisanizya nsavo

²⁵ kwingila mu vutemi wa Mulungu! Kili changu muno twangavulende yivite mu linso lya lusindano, kukila musavi ingile mu vutemi wa Mulungu.

²⁶ Alisi vitilulaga munogwene na vayombaga hamohene, Haho nani

²⁷ alikovola kupiziwa? Yesu wavalolaga, wahaya, Ha vanhu kili kigaka, alisi ngʼo hamwa Mulungu, kwisi gose galikovolwa hamwa Mulungu.

²⁸ Petro wavukizaja kumuwila, Lolaga, iswe twagalekile gose na twakulondaga veve.

²⁹ Yesu wayombaga, Loleyene ndimuwila inwe, kuduhu umo homwene wayilekile numba yakwe, ninga vaduguye, ninga valumbuye, ninga nina, ninga ise, ninga vana, ninga migunda kunguno yane na kunguno ya Mhola ya Chelu,

³⁰ sumbwa mwenuyo akupiwa ka igana mu matungo genaya, numba na vaduguye na valumbuye na vanina na vana na migunda, hamohene na kupeziwa, na mwitungo lilakiza vuzuvuku wa hanahana.

³¹ Alisi vingi va mbele vakuvi va numa, navo va numa vakuvi va mbele.

³² Alisi vavagi mu nzila valilina kuja ku Yerusalema, na Yesu wavatongelaga; na vakangagwa, navo vamulondaga na vova. Na wavasolaga hangi va ikumi na vavili hawakwe na wavukizaja kuvawila genaya gadima

³³ kumukwilila, Lolagi, tulilina ku Yerusalema na Mwana wa Munhu akupanwa mu makono ga vahozya vahanya

³⁴ na vamanicha fitabu, na vakumutema kitanga cha lufu, na vakumufumya ku vapagani, navo vakumuyeya, na vakumutugila ku vusyu, na vakumutula milanga na vakumuvulaga, na hanuma na nsiku idatu akuhembuka.

³⁵ Na Yakobo na Yohana, vana vamwa Zebedayo, valimwegela na valimuwila, Muhembeki, tulikova utwitile iswe icho tukukulomba veve.

³⁶ Alisi uyu wavawilaga,

³⁷ Mulikova namwitile inwe ki? Navo vamuwilaga, Uzumye, iswe twikale umo ha mulila gwako na ungi ha lumoso lwako mu lukumo lwako.

³⁸ Alisi Yesu wavawilaga, Inwe mukamanikizye cheniki mulilomba. Mulikovola kunwela kineneko cheniki nene ndinwela, ninga kogiwa na vogiwa uvo ndogiwa navo? Navo vamuwilaga,

³⁹ Tulikovola. Alisi Yesu wavawilaga, Kineneko icho ndinwela nene, inwe vene mukunwela, na vogiwa

⁴⁰ uvo ndogiwa navo inwe vene mukogiwa, alisi kwikala ha mulila gwane ninga ha lumoso lwane yikavile kuwane kumupa, sumbwa avo duhu vatulililwe.

⁴¹ Na aho avo ikumi vayigagwa vavukizaja kuvakilwa Yakobo na Yohana.

⁴² Na Yesu wavitanaga hawakwe na alivawila, Mulimanicha ati avo vapivilwe isima kuvi vatemi kwigulya na va machalo valivatema na nguzu, na vahanya vavo valivafinehezya.

⁴³ Alisi yikave ngʼo sisyo mugati ninwe, sumbwa homwene alikova kuvi

⁴⁴ muhanya mugati ninwe ave mukumba winwe; na homwene alikova kuvi wa mbele mugati ninwe ave

⁴⁵ mukumba wa vose; kwisi ninga Mwana wa Munhu akizile kutumamilwa, sumbwa kuvatumamila na kwipana mwenekili kuvi vukomolwa wa vingi. Na vafikaga mu Yeriko.

⁴⁶ Na aho wafumaga ku Yeriko na vahemba vakwe na mbuto nhanya, Bartimeho, mwana Timeho, muhofu, wavagi alikala ha nzila alilomba fipanwa.

⁴⁷ Na aho wigagwa ati ali Yesu wa Nazareti, wavukizaja kulila na wayombaga, Yesu

⁴⁸ mwana wamwa Davidi, umbonele kisa! Na vingi vamudakilaga, ahulike sele, alisi walilaga munogwene,

⁴⁹ Mwana wamwa Davidi, umbonele kisa! Na Yesu wimaga na wayombaga, Mumwitane! Na vamwitanaga muhofu na vamuwilaga, Idibage moyo, uvuke alikwitana.

⁵⁰ Na uyu wavutagaga vugolole wakwe, wadumukaga na wizaga kumwa Yesu.

⁵¹ Na Yesu wamwitavukaga na wayomba. Veve ulikova nakwitileki? Alisi muhofu wamuwilaga, Muhembeki, ndikova.

⁵² navone hangi! Na Yesu wamuwilaga, Jaga, luhigi lwako lwakupizizye veve. Na itungo lili wavonaga hangi na wamulondaga mu nzila.